Karapatan ng manggagawa, ipaglaban!

ni Bong Go @Bisyo Magserbisyo | May 3, 2023

Noong Lunes, Mayo 1, ay Araw ng Paggawa. Bilang miyembro ng Senate Committee on Labor, kinikilala natin ang mahalagang papel ng mga manggagawang Pilipino sa pagsulong at pag-unlad ng ating bansa. Napakalaki ng kontribusyon ng ating mga manggagawa sa muling pagbangon ng ating ekonomiya mula sa pandemya, lalo na ang mga ordinaryong manggagawang Pilipino na araw-araw ay nakikipagsapalaran para lang may maipakain sa kanilang pamilya. Sila palagi ang dapat nating unahin at ipaglaban.

Sa Senado ay isinusulong natin ang mga panukalang-batas para patuloy na maprotektahan ang mga karapatan at kapakanan ng mga manggagawang Pilipino. Isa rito ang Senate Bill No. (SBN) 1705 na naglalayon na dagdagan ang service incentive leave ng mga manggagawa sa pribadong sektor. Nar’yan din ang SBN 1707 na naglalayon na magkaroon ng competitive remuneration and compensation packages ang ating mga social workers. Noong isang taon naman ay isinumite natin ang SBN 1183, o ang panukalang “Media and Entertainment Workers’ Welfare Act”, para mas mapalawak ang proteksyon, seguridad at insentibo para sa mga kaibigan nating media workers sa pamamagitan ng karagdagang health insurance package, overtime and night differential pay, at iba pang mga benepisyo. Isinumite rin natin ang SBN 420, na naglalayon na mabigyan ng temporary employment ang eligible members ng low-income rural households na kayang mag-perform ng unskilled physical labor. At para mas maprotektahan ang mga delivery service riders, nar’yan ang SBN 1184; at ang SBN 1191 para naman sa mga marinong Pilipino. Kung maisabatas ang mga ito, hangarin nating mas maproteksyunan pa ang mga manggagawang Pilipino.

Noong kasagsagan ng pandemya, matagumpay nating naimungkahi ang pagbibigay ng Small Business Wage Subsidy na nagkaloob ng tulong pinansyal sa mga eligible workers ng mga MSMEs na naapektuhan ang hanapbuhay nang ipatupad ang enhanced community quarantine. Ngunit kahit sa panahong bumabangon na sana tayo sa pandemya, huwag natin itigil ang suportang maaaring maibigay ng gobyerno sa kanila upang makabangon at maiahon sa kahirapan.

Bilang inyong manggagawa naman sa pamahalaan, patuloy tayo sa paglalapit ng mga serbisyo ng gobyerno sa ating mga kababayan sa buong Pilipinas. Kahapon ay sinaksihan natin ang ceremonial ribbon cutting at blessing ng bagong municipal and legislative building sa Buruanga, Aklan. Napondohan ang proyekto sa pamamagitan ng ating suporta bilang Vice Chair ng Senate Committee on Finance. Sinaksihan din natin ang pagbubukas ng 7th Panagat Festival. Nagbigay tayo ng mensahe sa pagdiriwang na nagtatampok sa iba’t ibang aktibidad sa pangingisda ng mga Buruanganons. Personal din nating pinangunahan ang pamamahagi ng tulong para sa 1,000 mahihirap na residente sa lugar.

Kasabay naman ng pagdiriwang ng Labor Day ay dumalo tayo sa pagbubukas ng Calacatchara Festival 2023 bilang bahagi ng pagdiriwang ng ika-188 Araw ng Calaca sa Batangas. Personal din nating pinangunahan ang pamamahagi ng ayuda para sa 1,000 mahihirap na residente ng Calaca City. Dumiretso naman tayo sa bayan ng Taal para mag-inspeksyon sa kanilang integrated rural health unit. Bahagi ito ng ating layunin bilang Chair ng Senate Committee on Health na mas mapalakas pa ang ating healthcare system. Personal din nating pinangunahan ang pamamahagi ng tulong sa 1,000 mahihirap na Taaleños.

Bilang isang adopted son ng Taal at ng buong Calabarzon, at bilang kapwa Batangueño kung saan nanggaling ang pamilya ng aking ina na mga Tesoro, nagpapasalamat ako sa oportunidad na makapagserbisyo sa lalawigan.

Noong Abril 30 ay nasa Bago City at La Carlota City, Negros Occidental naman tayo para mamahagi ng tulong sa tig-1,000 mahihirap na pamilya sa dalawang siyudad. Sinaksihan din natin ang groundbreaking ng itatayong Super Health Center sa Bgy. Atipuluan sa Bago City bilang bahagi ng ating layunin na matiyak na makararating sa mga residente ang serbisyong medikal ng gobyerno. Nakisaya rin tayo sa 41st Pasasalamat Festival ng La Carlota City kung saan tampok ang float parade at street dance competition patungong public plaza. Sinamahan tayo ni Vice Governor Jeffrey Ferrer at mga lokal na opisyal doon.

Samantala, noong Abril 29 ay ginanap ang FIBA Basketball World Cup 2023 Draw sa Araneta Coliseum. Bilang Chair ng Senate Committee on Sports, buo ang ating suporta sa ating Gilas Pilipinas team sa kanilang paglahok sa laro sa darating na Agosto. Ang ating bansa ay isa sa mga host countries para sa FIBA Basketball World Cup 2023.

Matagumpay nating naipaglaban sa Senado ang karagdagang pondo ng Philippine Sports Commission, na ang bahagi ay magagamit para sa pagho-host ng naturang paligsahan.

Nagpapasalamat naman tayo sa “Gawad Agila Awards” na ipinagkaloob sa atin ng The Fraternal Order of Eagles, Philippine Eagles Okada Elite Eagles Club sa Okada Hotel, Parañaque City noong April 29. Sa aking mga kuya at ate sa Philippine Eagles, salamat.

With or without this award or recognition, ipagpatuloy natin ang pagseserbisyo at pagtulong sa kapwa sa abot ng ating makakaya.

Nakarating naman ang aking relief team sa mga komunidad na nahaharap sa iba’t ibang krisis. Napagaan natin ang dalahin at nakapaglagay ng ngiti sa mga labi ng 100 mahihirap na residente ng Loreto at 100 din sa Veruela, mga bayan sa Agusan del Sur.

Hindi rin natin kinaligtaan ang 300 pa sa Baler, Casiguran and Maria Aurora sa lalawigan ng Aurora.

Naniniwala ako na kapag maganda ang ating hangarin sa ating kapwa sa paghahatid ng serbisyo, tulong at malasakit, hinding-hindi tayo pababayaan ng ating Panginoon.

Minsan lang tayong dadaan sa mundong ito. Kung anong kabutihan o tulong na puwede nating gawin sa ating kapwa ay gawin na natin ngayon dahil hindi na tayo babalik sa mundong ito. Patuloy akong magseserbisyo sa inyong lahat dahil ako ay naniniwala na ang serbisyo sa tao ay serbisyo rin sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Malasakit at Super Health Centers para sa patuloy na pangangalaga sa kalusugan ng mga Pinoy

ni Bong Go @Bisyo Magserbisyo | April 29, 2023

Mabigat at mahirap ang ating naging laban nang pumutok ang pandemya tatlong taon na ang nakalilipas dahil sa bagong sakit na hindi natin inaasahang mararanasan natin sa ating buong buhay. Buong giting na nakipaglaban at nagsakripisyo ang ating mga health workers para mailigtas ang buhay ng ating mga kababayan. Nalampasan natin ang napakabigat na pagsubok sa pamamagitan ng pagtutulungan at pagbabayanihan, at ngayon ay unti-unti nang nakababangon ang ating ekonomiya.

Pero ang hamon na dala ng COVID-19 ay hindi pa rin tuluyang nawawala. Palagi pa ring nar’yan ang banta ng virus. Kaya naman bilang inyong Chair ng Senate Committee on Health, muli akong umaapela, lalo na sa mga kuwalipikadong hindi pa bakunado at wala pang boosters na samantalahin niyo ang pagkakataon at huwag nang magpatumpik-tumpik, lalo pa at bukas ngayon sa general population ang pagbabakuna. Mas protektado ‘pag bakunado.

Huwag din tayong maging masyadong kampante dahil hanggang ngayon ay may lumalabas pa ring bagong variant ng virus. Sundin pa rin natin ang mga ipinatutupad na health protocols, lalo na ang pagsusuot ng face mask sa mga piling lugar. Maging mapagmalasakit tayo sa ating kapwa, na kung nakararamdam tayo ng sintomas ay agad magpakonsulta at huwag munang makikisalamuha sa ibang tao hangga’t maaari.

Ipagpatuloy natin ang disiplinang ating nakasanayan simula nang lumaganap ang pandemya.

Sa parte ko, mula’t sapul naman ay napakaimportante para sa akin ng kalusugan ng bawat Pilipino.

At dahil nasaksihan ko sa pagputok ng pandemya na kinapos tayo sa mga ospital at pasilidad—na ang ibang pasyenteng nagpapagamot ay nagsisiksikan sa kama, sa mga pasilyo at sa parking area na nilalapatan ng lunas—naging isa sa mga prayoridad ko ang mas mapalakas ang ating healthcare system dahil hindi natin tiyak kung kailan may susulpot muling bagong sakit.

Napakaimportante na maihatid sa bawat sulok ng Pilipinas ang serbisyong medikal na kailangan ng komunidad. Ito ang dahilan kaya nar’yan ang Malasakit Center program para matulungan ang ating mga kababayang walang kakayahang magbayad ng kanilang hospital bills, nang hindi na nila kailangang pumila at magpalipat-lipat sa mga opisina ng pamahalaan dahil nasa iisang bubong na lang ang mga ahensya na may medical assistance programs na makakatulong sa kanila.

Itinataguyod din natin ngayon ang pagpapatayo ng mga Super Health Centers—sa pangunguna ng Department of Health (DOH) at suporta ng mga kapwa ko mambabatas, pati mga lokal na pamahalaan—para hindi na kailangang bumiyahe sa malayo ng mga pasyente. Ilapit natin sa tao ang serbisyong pangkalusugan.

Ang Super Health Centers ay nagkakaloob ng iba’t ibang serbisyong medikal gaya ng database management, out-patient, birthing, isolation, diagnostic (laboratory: X-Ray, ultrasound), pharmacy, at ambulatory surgical unit. Nagkakaloob din ito ng eye, ear, nose, and throat (EENT) service; oncology centers; physical therapy and rehabilitation center; at telemedicine, kung saan puwedeng magpakonsulta ang pasyente sa pamamagitan ng telepono.

Masigasig nating sinusubaybayan ang dalawang programang ito para matiyak na naipagpapatuloy ang pangunahing layunin kung bakit natin ito pinangarap na maisakatuparan. Sa ngayon ay mayroon nang 157 Malasakit Centers sa buong bansa at patuloy na nakapaghahatid ng tulong sa milyun-milyong Pilipino. Marami na ring Super Health Centers ang naitayo at kasalukuyang itinatayo sa buong bansa kung saan 307 ang napondohan sa 2022, at 322 naman ang napondohan ngayong taon.

Samantala, hindi rin tayo tumitigil sa direktang paghahatid ng serbisyo at tulong sa iba’t ibang komunidad sa abot ng ating makakaya.

Bumisita tayo sa Island Garden City of Samal, Davao del Norte kahapon, Abril 28, at nakiisa sa pagdiriwang ng Araw ng Bgy. Tambo. Dumalo rin tayo sa ribbon cutting ceremony para sa itinayong bagong barangay hall, na sinuportahan kong mapondohan bilang Vice Chair ng Senate Committee on Finance. Pinangunahan din natin ang pamamahagi ng ayuda para sa 1,100 mahihirap na residente mula sa tatlong barangay.

Sinaksihan din natin ang turnover ceremony ng bagong farm to market road sa Bgy. Tambo pa rin, at isa rin sa mga proyektong ating natulungan na mapondohan. Nag-inspeksyon din tayo sa road concreting project, na malaki ang maitutulong sa mga residente dahil magkokonekta ito ng dalawang purok doon para mas maging komportable ang kanilang paglalakbay.

Nasa Bohol naman tayo noong Huwebes, Abril 27, at sinaksihan ang groundbreaking ng itatayong Ubay Super Health Center at nag-inspeksyon sa itinatayo nang Talibon Super Health Center.

Bumisita rin tayo sa Don Emilio Del Valle Memorial Hospital at inispeksyon ang operasyon ng Malasakit Center doon. May dala-dala rin tayong tulong para sa 362 na pasyente at 543 hospital frontliners. May hiwalay na ayuda rin ang Department of Social Welfare and Development (DSWD) sa mga pasyente at 72 na kuwalipikadong hospital personnel. Pinangunahan din natin ang pamamahagi ng tulong para sa 1,000 mahihirap na residente ng Ubay; at 1,000 rin sa Talibon.

Nakarating naman ang aking relief team sa iba’t ibang lugar para alalayan ang mga naging biktima ng sunog gaya ng 309 sa Bgy. Pinagbuhatan, Pasig City; 23 sa Puerto Princesa City; 23 sa Atimonan, Quezon; anim sa Iligan City, at tig-isa sa Moncada, Tarlac at Mabalacat, Pampanga.

Hindi rin natin kinalimutang pagaanin ang dalahin ng 500 mahihirap na residente sa Gitagum, Misamis Oriental; 437 sa Victoria, Tarlac; 500 sa Batangas City at 707 sa Malvar, Batangas; 320 sa Malolos City, Bulacan; at 186 sa Santo Tomas, Pampanga.

Patuloy kong ginagampanan ang aking tungkulin sa Senado at kasabay nito ay direktang nakapaghahatid ng serbisyo sa ating mga kababayan. Kung mahalaga ang aking trabaho bilang mambabatas, naniniwala ako na importante rin ang aking tungkulin na magbigay ng konkretong tulong sa mga nangangailangan nito.

Bilang inyong lingkod-bayan, nanaisin kong makasalamuha ang mga kapwa ko Pilipino para makatulong sa abot ng aking makakaya, makapaglunsad ng mga proyektong makakapagpaunlad ng kanilang komunidad, marinig ang kanilang hinaing, masolusyunan ang mga problema, at makapag-iwan ng ngiti sa oras ng kanilang pagdadalamhati.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

‘Go For Gold!’ — Hangad natin ang tagumpay ng mga atletang Pilipino sa 2023 SEA Games

ni Bong Go @Bisyo Magserbisyo | April 26, 2023

Muling sasabak ang ating mga atletang Pilipino sa gaganaping 32nd Southeast Asian Games sa Cambodia sa Mayo 5 hanggang 17, 2023. Noong Lunes, Abril 24, dinaluhan natin ang kanilang send-off ceremony sa Philippine International Convention Center sa Pasay City.

Bilang Chair ng Senate Committee on Sports, palagi tayong nandito para suportahan ang ating mga atleta. Isa rin akong sports enthusiast, at noon pa man ay talagang mahilig na ako sa sports. Isa rin itong paraan para mahikayat ang ating mga kabataan, to get into sports and stay away from drugs. Isa ito sa pamamaraan para mailayo ang ating mga kabataan sa ilegal na droga at manatili silang malusog ang isipan at katawan.

Kaya sa ating kapasidad, nag-sponsor tayo sa Senado at ipinaglaban sa 2023 national budget deliberation na magkaroon ng dagdag na pondo ang Philippine Sports Commission, lalo na ang para sa grassroots sports development, at upang masuportahan ang ating mga atletang lalahok sa international competitions.

Mula noon hanggang ngayon, full support tayo sa ating mga atleta, hindi lang sa SEA Games kundi maging sa Asian Games at Olympics. Sa katunayan, sa budget deliberation ay humigit-kumulang sa P200 million ang inilalaan sana para sa PSC. Tayo ang nag-defend at nag-suggest ng dagdag sa pondo nila na P1 billion para sa kapakanan ng ating mga atleta.

Makakatanggap din ng suporta ang mga atletang Pilipino na lalahok sa ASEAN Para Games, Asian Indoor Martial Arts Games, World Combat Games, World Beach Games, at Asian Beach Games.

Inilaan din ang bahagi ng pondo para sa pagho-host ng ating bansa ng FIBA World Cup ngayong taon, at sa iba pang sports programs gaya ng Batang Pinoy, Philippine National Games, at ng grassroots program sa ilalim ng Sports Development Council. May nakalaan din para sa pagpapatayo ng sports infrastructure sa iba’t ibang bahagi ng ating bansa, at para sa advanced research and development sa larangan ng sports sciences and sports technology.

Tulad ni Pangulong Ferdinand “Bongbong” Marcos Jr., ang naging mensahe natin sa ating mga atletang lalahok sa SEA Games ay ‘Go, go, go for the gold.’ Sana ay mag-champion tayo at ibalik natin ang pagiging number one natin sa rehiyon sa larangan ng palakasan. Ipinaalala ko rin sa kanila na pinakaimportante ang lumaban nang buong puso dahil kilala ang mga Pilipino na may puso at lalaban talaga.

Samantala, kahapon ay nasa Antique tayo at sinaksihan natin ang groundbreaking ng itatayong Sibalom Super Health Center sa lugar. Bahagi ito ng ating layunin na mahatiran ng mga serbisyong medikal ang malalayong komunidad, at mas mapalakas pa ang ating healthcare system. Personal din nating pinangunahan ang pamamahagi ng ayuda sa 1,000 mahihirap na residente at walong pamilyang nasunugan sa Sibalom.

Nagkaroon din ng medical and dental mission para masuri naman ang kalusugan ng 300 benepisyaryo.

Sinaksihan din natin ang groundbreaking ng itatayong San Jose de Buenavista Super Health Center, at pagkaraan ay pinangunahan ang pamamahagi ng ayuda sa 1,000 senior citizens at PWDs doon. Nagsagawa rin tayo ng monitoring visit sa Malasakit Center sa Angel Salazar Memorial General Hospital para matiyak na patuloy itong nakapagseserbisyo sa mga benepisyaryo. May ibinigay tayong tulong sa 232 pasyente at 935 frontliners. May hiwalay ding tulong ang Department of Social Welfare and Development (DSWD) sa mga pasyente, security guards at utility workers. Samantala, pinangunahan ng ating tanggapan ang pagkakaloob ng tulong sa 1,000 mahihirap sa San Remigio at nakiisa sa selebrasyon nila ng Hambaru Festival.

Masaya naman akong ibalita na nagkaroon na ng groundbreaking para sa itatayong Super Health Center sa President Roxas, North Cotabato. Nag-turnover ceremony na rin ng bagong tayong public market sa Poblacion Salug sa Zamboanga del Norte, na ating tinulungang mapondohan.

Kasama si dating Pangulong Rodrigo Duterte, dinaluhan namin kahapon ang birthday dinner ni Pastor Apollo Quiboloy sa KJC Compound, Davao City.

Noong Lunes naman, nasa Pangasinan tayo para tulungan ang 1,000 market vendors at mga pasyenteng may chronic illnesses ng San Carlos. Pagkatapos ay dumiretso tayo sa Gen. Mamerto Natividad, Nueva Ecija at tinulungan ang 1,000 mahihirap na Novo Ecijanos. Bilang adopted son ng lalawigan ng Pangasinan at Nueva Ecija, ipinarating ko na laging bukas ang aking tanggapan para suportahan ang mga pangangailangan ng ating mga kababayan doon sa abot ng aking makakaya.

Naghatid din ang aking tanggapan ng tulong sa 1,512 rebeldeng nagbalik-loob sa ating lipunan. Kasalukuyan silang kinukupkop ng ating pamahalaan sa kampo ng 14th Infantry Battalion ng Philippine Army sa Mahaplag, Leyte.

Naalalayan din ang mga biktima ng magkakahiwalay na sunog gaya ng 30 residente sa Bgy. Mother Bagua, Cotabato City; 27 sa Bgy. Matina Aplaya, Punta Dumalag, Davao City; 16 sa Bgy. Calumpang, General Santos City; 12 sa Malapatan, Sarangani; pito sa San Jose, Nueva Ecija, at dalawa pa sa Bgy. Tacunan, Davao City. Hindi rin natin kinalimutan na masuportahan ang 33 mahihirap na residente ng Paombong, Bulacan.

Bilang inyong Senador Kuya Bong Go at Chair ng Senate Committee on Health, tandaan natin na health is wealth, at mas mabuti na ang nag-iingat kaysa magkasakit. Hinihiling ko rin sa inyo na sa pagsabak ng ating mga atleta sa SEA Games, ipanalangin natin ang kanilang kaligtasan, tagumpay at maiuwi sana nila sa ating bansa ang kampeonato.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.