Suportahan at ipagmalaki ang mga atletang Pilipinong kalahok sa 32nd SEA Games

ni Bong Go @Bisyo Magserbisyo | May 12, 2023

Bilang suporta sa ating mga atletang Pilipino na sumasabak ngayon sa ginaganap na 32nd Southeast Asian Games, bumiyahe tayo sa Cambodia para saksihan ang kanilang mga laro at makiisa sa ating mga kababayan doon na mag-cheer at pataasin ang kanilang kumpiyansa at morale.

Bilang Chair ng Senate Committee on Sports, napakaimportante para sa akin na ma-evaluate kung anong aspeto pa ng ating sports programs ang higit na dapat tutukan para aktuwal na makita kung paano mas masusuportahan ang ating mga atleta. Kasama rito ang pakikipagpalitan ng best practices sa ibang bansa para masigurong “at par” tayo sa world-class standards.

Maganda ang ipinapakitang performance ng ating mga atleta at umaasa tayong sa pagtatapos ng kompetisyon ay mataas ang ating medal standing. Malaking paghahanda na rin ito at pagsasanay para sa mga darating pang kompetisyon na kanilang lalahukan.

Sa ating parte, inisponsoran at ipinaglaban natin sa Senado ang karagdagang pondo para sa Philippine Sports Commission noong deliberasyon para sa ating 2023 budget, partikular ang para sa grassroots sports development at suporta sa ating mga atletang lalahok sa mga international competitions. Sa katunayan, dapat ay humigit-kumulang sa P200 milyon lang ang budget para sa PSC, pero ipinanukala at isinulong natin na madagdagan ito ng P1 bilyon, kung saan kasama na ang pondo para sa mga lalahok sa SEA Games, Asian Games, at 2024 Paris Olympics.

Makatatanggap din ng suporta ang mga atletang lalahok sa ASEAN Para Games, Asian Indoor Martial Arts Games, World Combat Games, World Beach Games, Asian Beach Games, at World Beach Games. May bahagi ng pondo na inilaan din para sa pagho-host ng Pilipinas ng 2023 FIBA World Cup at iba pang sports programs gaya ng Batang Pinoy, Philippine National Games, at ang grassroots program na nasa ilalim ng Sports Development Council. Naglaan din ng pondo para sa pagpapatayo ng sports facilities sa buong bansa, at para sa mas pinalawak na research and development sa larangan ng sports sciences and sports technology.

Suportado natin lagi ang ating mga atleta. Bukod sa bisyo natin ang magserbisyo, bata pa lang ako ay mahilig na akong maglaro ng basketball at hanggang ngayon ay isa akong sports enthusiast. Naniniwala rin ako na isang paraan ang sports para mailayo ang ating mga kabataan sa ilegal na droga at manatiling malusog ang kanilang pangangatawan at isipan. Ang lagi kong payo sa kanila, get into sports, stay away from drugs.

Bukod naman sa mga atletang sumasabak sa SEA Games, kinikilala rin natin ang tagumpay ng iba pa nating atleta. Noong Mayo 10 ay inisponsoran natin ang Senate Resolution na nagbibigay-pugay sa Filipino boxer na si Marlon Tapales na nagwagi sa kanyang mga laban sa World Boxing Association at International Boxing Federation World Super Bantamweight titles at nakalikha na ng sariling tatak sa larangan ng boxing.

Ang kanyang mga panalo ay naghatid ng tagumpay sa kanyang pamilya, mga kaibigan at sa ating bansa, at magsisilbing inspirasyon sa iba pang kabataang atleta.

Ngayong linggong ito ay patuloy din tayo sa paglalapit at paghahatid ng serbisyo ng pamahalaan sa iba’t ibang panig ng ating bansa. Noong Huwebes, Mayo 11 ay biyaheng Nueva Ecija tayo at nag-inspeksyon sa itinayong Talavera Bridge. Ang proyekto ay napondohan sa ating tulong bilang Vice Chair ng Senate Committee on Finance.

Matapos ito ay dumiretso tayo sa Talavera General Hospital para sa monitoring visit ng Malasakit Center doon para tiyakin na patuloy nitong naseserbisyuhan ang mahihirap na pasyente na walang ibang matatakbuhan maliban sa pamahalaan. Naghatid tayo ng tulong sa 79 pasyente at 406 frontliners, habang may hiwalay na ayuda ang Department of Social Welfare and Development (DSWD) sa mga kuwalipikadong pasyente.

Nag-inspeksyon din tayo sa Llanera Super Health Center, na bukod sa magkakaloob ng kinakailangang serbisyong medikal ay bahagi rin ng ating layunin bilang Chair ng Senate Committee on Health na mas mapalakas pa ang ating healthcare system, lalo na sa malalayong komunidad. Sinaksihan din natin ang inagurasyon ng public wet market sa Llanera na napondohan din ng gobyerno sa tulong natin. Bago natapos ang araw, pinangunahan natin ang pamamahagi ng tulong para sa 1,000 mahihirap na residente ng Llanera.

Bilang adopted son ng Nueva Ecija, masaya ako na nabigyan ng oportunidad na mas makatulong sa mga kapatid nating nangangailangan doon.

Binisita naman natin noong Miyerkules, Mayo 10 ang 672 kababayan nating biktima ng insidente ng sunog sa Pritil Public Market, Tondo, Maynila para maalalayan sila at mapagkalooban ng pangunahing pangangailangan. Napakahirap ng kalagayan ng ilang market at ambulant vendors, na bukod sa natupok ang kanilang mga gamit o tinda sa palengke ay problema rin ang kanilang puwesto. Prayoridad natin ang maagap na pagpapagaan sa pagsubok na kanilang kinakaharap. Nakiusap ako sa mga ahensya ng gobyerno na mabigyan sila ng dagdag na livelihood support para mas makabangon muli.

Hindi rin natin kinaligtaan ang iba pa nating kababayan na nahaharap sa iba’t ibang krisis. Agad tayong umalalay sa mga biktima ng sunog tulad ng 205 residente ng Taytay, Rizal; 58 sa Bgy. 38, Caloocan City; at 12 sa Bgy. Sicsican, Puerto Princesa City, Palawan.

Naayudahan din natin ang 2,199 indigent na mga estudyante sa Gingoog City, Misamis Oriental. Dagdag pa rito, naghatid din ng tulong ang aking opisina sa 233 nating kababayan sa Casiguran, Aurora; 332 sa Minalin, Pampanga; 150 sa Malitbog, Bukidnon; 141 sa General Natividad, Nueva Ecija; 129 sa Hamtic, Antique; 50 sa Naawan, at 50 rin sa Jasaan sa Misamis Oriental; 45 sa Malolos City, at 44 sa Sta. Maria sa Bulacan.

Nagpapasalamat tayo sa mga lokal na opisyal ng mga lugar na nabanggit sa pagsuporta sa ating adhikain na ilapit ang serbisyo ng gobyerno sa mga kababayan nating hopeless, helpless at higit na nangangailangan.

Suportahan at ipanalangin natin ang tagumpay ng ating mga atletang sumasabak sa SEA Games. Ipakita natin sa buong mundo ang husay at galing ng manlalarong Pilipino.

Bukod sa pag-alalay sa mga Pilipinong nais mag-uwi ng karangalan sa bansa, alalayan din natin ang ating mga kababayan dito na nangangailangan ng ating pag-aaruga at pagmamalasakit. Ibigay natin sa kanila ang serbisyong nararapat para makabangon sa hirap, at magkaroon ng mas ligtas at matiwasay na buhay ang lahat.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Proteksyon ng freelance workers, tiyakin

ni Bong Go @Bisyo Magserbisyo | May 10, 2023

Marami sa ating mga kababayan ngayon ang nagtatrabaho bilang freelancer. Gaya ng ibang manggagawang Pilipino, malaki ang kontribusyon ng ating freelance workers sa paglago ng ating ekonomiya. ‘Yun nga lang, madalas nilang maging problema ang kawalan ng proteksyon—at kung minsan ay hindi pa nababayaran ang kanilang naging trabaho.

Bilang miyembro ng Senate Committee on Labor, napakahalaga para sa akin na mapangalagaan ang mga karapatan ng bawat manggagawang Pilipino. Kaya isinumite natin sa Senado ang Senate Bill No. 2107 o “Freelance Workers Protection Act”.

Kung pumasa at maging ganap na batas, layunin nito na magkaloob ng proteksyon at insentibo sa mga freelance workers, kilalanin ang kanilang mga karapatan, at tiyakin na maayos na nababayaran ang kanilang pagseserbisyo. Bagama’t itinuturing sila na self-employed, kailangang bigyan sila ng karampatang proteksyon tulad din ng ibang manggagawang Pilipino.

Kung maisasabatas, magkakaroon ng legal remedies at proseso upang masigurong mababayaran sila sa kanilang serbisyo. Makakasuhan at mapapatawan naman ng parusa ang mga kukuha ng kanilang serbisyo na hindi magbabayad o hindi tutupad sa kasunduan. Bago rin nila ipagkaloob ang kanilang serbisyo, kailangan munang may written contract sa pagitan nila at ng hiring party.

Noon pa natin ipinaglalaban ang karapatan at kapakanan ng mga manggagawang Pilipino. Ngayong taon ay nag-file rin ako ng panukalang SBN 1705 na naglalayon na madagdagan ang service incentive leave ng mga empleyado sa pribadong sektor; at ang SBN 1707 na naglalayon namang maproteksyunan ang ating mga social workers.

Noong isang taon ay isinumite rin natin ang panukalang SBN 1183 o “Media and Entertainment Workers’ Welfare Act”, para mapalawak ang proteksyon, seguridad at insentibo ng mga manggagawa sa media and entertainment industry sa pamamagitan ng karagdagang health insurance package, overtime and night differential pay, at iba pang mga benepisyo. Para sa proteksyon ng mga delivery service riders ay nag-file ako ng SBN 1184; at SBN 1191 para naman magkaroon ng Magna Carta para sa ating mga seafarers, kung maisabatas.

Naghain din tayo ng panukalang SBN 420, na naglalayon na mabigyan ng temporary employment ang eligible members ng low-income rural households na kayang mag-perform ng unskilled physical labor, kung maisabatas.

Balik-sesyon naman kami sa Senado ngayong linggong ito. Kaya naman noong Mayo 9 ay pinangunahan natin, bilang committee chair, ang public hearing ng Senate Committee on Health and Demography para pag-usapan ang implementasyon ng Republic Act No. 11036 o ang “Philippine Mental Health Act.” Gaya ng iba pang isyung pangkalusugan, napakaimportante ng ating mental health.

Bago magbalik-sesyon sa Senado ay lumahok tayo sa UNTV Cup kung saan nakasama natin sa basketball game sina Majority Floor Leader Senator Joel Villanueva at Senator Sonny Angara noong Mayo 7 sa NOVADECI Convention Center sa Quezon City. Nagwagi ang ating koponan na Senate Sentinels laban sa AFP Cavaliers. Bagama’t busy sa trabaho, lumahok kami sa liga para mai-promote ang sports bilang paraan na mailayo ang ating mga kabataan sa masasamang bisyo. Ang palagi ko ngang pakiusap sa tuwing nakakasalamuha ko ang mga kabataan: get into sports, stay away from drugs.

Noong Mayo 8, nagtungo naman tayo sa Batangas City at nagkaloob ng ayuda sa 1,109 mahihirap na residente. Nagsagawa rin tayo ng inspeksyon sa San Pascual Super Health Center na nagkaroon ng upgrade, at personal na pinangunahan ang pamamahagi ng tulong sa 1,000 mahihirap na persons with disabilities, senior citizens, solo parents at ilang indigent families sa lugar. Bilang adopted son ng Calabarzon region at kapwa Batangueño, sa abot ng aking makakaya ay tutulong ako sa mga nangangailangan, lalo na ang mahihirap at mga may sakit.

Tuluy-tuloy rin ang aking tanggapan sa pag-iikot sa buong Pilipinas para mahatiran ng tulong ang ating mga kababayang nahaharap sa iba’t ibang krisis. Nagsagawa ang ating relief team ng serye ng pamamahagi ng ayuda sa mahihirap na residente ng Agusan del Sur at napagaan natin ang dalahin ng 100 benepisyaryo sa Veruela, 100 sa Sta. Josefa, 40 sa Esperanza, at 40 rin sa San Francisco. Pinasaya rin natin ang 370 benepisyaryo na miyembro ng iba’t ibang sektor sa Bukidnon na nagmula sa mga munisipalidad ng Kibawe, Dangcagan at Cabanglasan. Hindi rin natin kinaligtaang mag-iwan ng ngiti sa mga labi ng mahihirap nating kababayan sa Zambales at naalalayan ang 227 benepisyaryo mula sa Botolan, at 163 pa mula sa Iba. Inayudahan din natin ang 65 pamilyang biktima ng sunog sa Pagadian City, at nagpadala ng grocery packs sa San Juan City Jail.

Sa abot ng aking makakaya, patuloy lang tayong maghahatid ng serbisyo sa ating mga kababayan. Gagawin natin ang lahat ng ating makakaya, kasama ang mga kapwa ko manggagawa sa gobyerno, na makalikha ng pagbabago sa mga komunidad at maiangat ang kalagayan ng bawat Pilipino tungo sa pagkakaroon ng mas ligtas at komportableng buhay.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Ipaglaban ang kung ano ang atin

ni Bong Go @Bisyo Magserbisyo | May 6, 2023

Bahagi ng aking tungkulin—at nating lahat na mga Pilipino—na palaging isulong ang interes ng ating bansa. Kahit maliit na bansa tayo, dapat nating ipaglaban kung ano ang atin.

Bagama’t kilala ang mga Pilipino na masayahin, mapayapa at mapagbigay, kilala rin tayo bilang matatapang at naninindigan para sa tama. Kayat dapat nating ipaglaban at hindi hayaan na may mang-abuso sa ating mga karapatan.

Bilang mambabatas na vice chair ng Senate Committee on National Defense at miyembro ng Senate Committee on Foreign Relations, hangad ko na lahat ng anumang hindi pagkakaintindihan sa West Philippine Sea ay maidadaan sa maayos at diplomatikong usapan. Hinihimok ko ang lahat, pati ang mga bansang itinuturing naman nating mga kaibigan, na panatilihin ang respeto sa isa’t isa at iwasan ang paggamit ng karahasan.

Ayaw natin ng digmaan at doon tayo lagi sa kapayapaan. Kaya marapat lang na ang bawat panig sa usaping ito ay patuloy na magpakita ng seryosong paninindigan na magkaroon ng mapayapang pag-uusap para maresolba ang mga sigalot, at sumunod sa mga pandaigdigang obligasyon at tungkulin bilang mga responsableng miyembro ng international community.

Ang ipinaglalaban natin dito ay ang kapakanan ng mga mamamayang Pilipino—lalo na ang mga mangingisda na ang tanging pinagkukunan ng ikabubuhay ay ang yamang dagat ng West Philippine Sea. Kailangan natin silang maprotektahan at malayang magawa ang kanilang mga aktibidad nang hindi nangangamba para sa kanilang kaligtasan.

Anuman ang pagsubok na ating hinaharap, palagi nating unahin ang kapakanan ng mga Pilipino — lalo na ang mahihirap na walang ibang sinasandalan o matatakbuhan kundi ang gobyerno na dapat magprotekta sa kanila.

Bukod sa pakikipaglaban sa ating soberanya, patuloy din nating bigyang-pansin ang mga nangangailangang komunidad sa loob ng bansa.

Nitong linggo ay muli tayong naging abala sa ating mga gawain sa loob at labas ng Senado.

Dinaluhan natin bilang panauhing pandangal ang opening ceremonies ng 49th Midyear Convention Surgery and Universal Health Care noong May 4 sa SMX Convention Center, SM Lanang Premier, Davao City. Ibinahagi natin na bilang Chair ng Senate Committee on Health and Demography, tungkulin natin at isang pribilehiyo ang magtrabaho para mapaganda ang kalidad at maging abot kamay ng mga Pilipino ang serbisyong pangkalusugan.

Binanggit din natin ang malaking ambag ng pagpasa ng Universal Health Care Act sa ating healthcare system, bagamaa’t may mga hamon pa ang pagpapatupad nito. Tinukoy din natin ang ating mga naging inisyatiba para masuportahan ang UHC Act gaya ng isinulong nating karagdagang P21 bilyong PhilHealth budget para sa iba’t ibang serbisyong medikal, at ang patuloy na pagtatatag ng Malasakit Centers at Super Health Centers sa buong bansa.

Dinaluhan din natin ang ginanap na Sangguniang Kabataan Provincial Federation of Davao Occidental Congress sa Ritz Hotel, Garden Oases, Davao City. Pinasalamatan natin ang mga kabataan ng Davao Occidental na nagsisikap na mapalakas ang kanilang kakayahang mamuno sa kanilang hanay at mapaganda ang kanilang mga komunidad.

Binanggit ko sa kanila ang importansya ng kooperasyon ng mga kabataan para masolusyunan ang mga suliranin ng ating lipunan para sa mas magandang bukas ng ating bayan, at maging ng mga susunod na henerasyon. Ipinayo natin na maging instrumento sila ng mga kapwa kabataan para mailayo ang mga ito sa ilegal na droga. Payo ko sa kanila, get into sports and stay away from drugs.

Masaya ko ring ibinabalita na nagkaroon na ng groundbreaking ng itatayong Super Health Center sa Tafal Ned, Lake Sebu, South Cotabato.

Muli naman akong bumisita noong Mayo 3 sa aking mga kababayan sa Alitagtag, Batangas. Katuwang si Mayor Edilberto Ponggos, personal tayong nagkaloob ng ayuda para sa 883 mahihirap na residente sa lugar. Matapos ito ay dumiretso tayo sa Cavite City at inalalayan ang 767 residenteng naging biktima ng sunog.

Dinaluhan din natin bilang panauhing tagapagsalita ang ginanap na 2nd National DOH Employees Association Convention sa Manila Hotel. Ang okasyon ay bahagi ng pagdiriwang ng Health Worker’s Day. Pinasalamatan natin ang lahat ng healthcare workers na walang kapaguran at buong-pusong nagtatrabaho sa gitna ng patuloy na pandemyang ito. Tiniyak din natin sa kanila na patuloy tayong magtataguyod ng mga panukala at inisyatiba na magpapabuti sa ating healthcare system, magpapalakas sa ating public health response, at magbibigay ng mas magandang access sa mga serbisyong medikal para sa lahat ng Pilipino.

Hindi rin nating kinaligtaang maghatid ng tulong sa ating mga kababayan sa iba’t ibang lugar sa Pilipinas na nahaharap sa iba’t ibang krisis. Maagap na umalalay ang aking opisina sa mga naging biktima ng magkakahiwalay na insidente ng sunog, gaya ng 163 sa Bgy. Rizal Pala Pala 2 sa Iloilo City; 11 sa Villaba, Leyte; at 39 sa Purok San Vicente, Badiang Sinawilan, Digos City.

Nagsagawa rin tayo ng serye ng pamamahagi ng tulong sa Agusan del Sur partikular ang 250 mahihirap na residente ng San Francisco, 200 sa Bunawan, 100 sa La Paz, 40 sa Talacogon, at 100 pa sa Prosperidad. Tuluy-tuloy din ang pag-ikot ng aking opisina upang mamahagi ng tulong sa 150 residente sa Dingalan, Aurora; at 19 sa Dinalupihan, Bataan.

Mayroon ding 613 TESDA graduates mula sa probinsya ng Cebu ang binigyan natin ng dagdag na tulong.

Nagpapasalamat ako sa pagbibigay ninyo ng pagkakataon sa isang probinsyanong tulad ko na maging tagapaglaban ninyo sa gobyerno. Ibinabalik ko ang tiwalang ipinagkaloob ninyo sa akin sa pamamagitan ng mabilis at walang tigil na serbisyo para sa inyong lahat sa abot ng aking makakaya.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.