Pamimigay ng ayuda, mas mapapabilis gamit ang teknolohiya

ni Bong Go @Bisyo Magserbisyo | May 24, 2023

Isa sa mga naging layunin ko nang ako’y maging lingkod bayan ay ang mas ilapit ang mga serbisyo ng pamahalaan sa mga tao. Kaya sa ginanap na pagdinig noong Mayo 22 ng Senate Committee on Science and Technology, bilang isa sa may-akda ng E-Governance Bill, binigyang-diin ko sa aking manipestasyon na ang red tape sa mga ahensya ng pamahalaan ang isa sa laging problema sa loob ng mahabang panahon.

Nauubos ang pera, panahon at lakas ng ating mga kababayan para lang makakuha ng kahit ordinaryong dokumento, permit o magkaroon ng access sa public information. Sa tagal ng proseso, inaabot minsan ng mahigit isang buwan bago pa magkaroon ng resulta.

Para sa akin, ang gobyerno ay dapat na laging handang tumugon sa mga pagbabago ng panahon. Ito ang dahilan kaya isinumite ko ang panukalang E-Governance Act, na una ko nang nai-file noong 18th Congress.

Nagpapasalamat din ako kay Pangulong Ferdinand “Bongbong” Marcos, Jr. na ginawa itong priority measure at nabanggit sa kanyang unang State of the Nation Address.

Kung maipasa at magiging ganap na batas, itatakda nito ang pagtatayo ng pinalawak at magkakaugnay na information and resource-sharing and communications network na sakop ang national and local governments. Magkakaroon din ng internal records management information system, information database at digital portals, at isusulong ang digitization ng paper-based workflows—para bukod sa mas mabilis na nga ay transparent pa ang paghahatid ng serbisyo publiko. May malaking papel dito ang Department of Information and Communications Technology, na tututok dito.

Sa pribadong sektor, nag-adjust na ang mga negosyo gamit ang e-commerce at e-banking platforms para mapabuti ang kanilang mga serbisyo. Ngayon na rin ang tamang panahon na gawing prayoridad ng gobyerno ang digital transformation. Dapat na ang karamihan sa application para sa dokumento na mula sa gobyerno ay pwede nang online.

Sa isang online government portal, dapat ay naroon na ang lahat na kailangan ng ating mga kababayan gaya ng pagkuha ng NBI clearance, birth certificate, business permit, at iba pa. Mas maganda rin kung magiging available ang public directory ng buong gobyerno kasama ang kanilang contact details para mas maging madali sa ating mga kababayan na lapitan ang gobyerno.

Sa ganitong paraan, magiging episyente ang mga serbisyo ng pamahalaan.

Kung matutugunan at maha-harmonize ang impormasyon na mayroon tayo para mabigyan ng mabilis at angkop na serbisyo ang mga tao, maiiwasan na natin ang nangyari noong panahon ng pandemya na natagalan ang pagbibigay ng ayuda dahil sa manu-manong pagproseso ng database mula iba’t ibang ahensya.

Marami tayong natutunan noong pandemya kung paano mag-adapt sa panahon gamit ang teknolohiya na mayroon tayo. Napilitan tayong mag-adjust at gumamit ng iba’t ibang information technology applications para lang makapaghatid ng tulong sa mga tao at matiyak na hindi mahihinto ang serbisyo lalo pa at may mga ipinatutupad na restriksyon noon.

Kaya gamitin natin ang teknolohiya para maisaayos ang serbisyong ibinibigay natin at maihatid kaagad ang tulong lalo na sa mga mahihirap, hopeless, helpless at walang malalapitan maliban sa pamahalaan. Sa ganitong paraan, mas mapapalapit ang gobyerno sa mga tao, bibilis ang paghahatid ng serbisyo at magkakaroon din sila ng daan at paraan para maiparating ang kanilang mga karaingan.

Kung maisabatas, hangarin natin na ang E-governance ay magiging susi tungo sa mas maayos na pamamahala, at tulay para mailapit sa tao ang gobyerno. Maganda man ang hangarin nito, napakaimportante rin na maipaintindi ito sa mga taong dapat makinabang dito. Naiba na po ang panahon sa ngayon, at marami na pong natututong gumamit, at marami pa rin pong dapat turuan kung paano gumamit. Marami pa sa atin ang nangangapa pa po kung paano gamitin itong digital system sa panahon ngayon.

Huwag nating hayaang maiwan sila sa progresong ating inaasam.

Sa kabila naman ng ating pagiging abala sa Senado, hindi natin kinaliligtaan ang paglapit sa mga komunidad sa iba’t ibang bahagi ng ating bansa at magkaloob ng tulong sa ating mga kababayang nahaharap sa iba’t ibang krisis.

Kahapon, May 23, binisita natin at personal na pinangunahan ang pamamahagi ng ayuda sa 1,000 mahihirap na residente ng Brgy. Maybunga, Pasig City. Nagpadala rin tayo ng mensahe sa ating mga atleta na lalahok sa 12th Asean Para Games.

Bumisita naman tayo sa Gapan City, Nueva Ecija noong May 22 at nag-abot ng tulong sa 1,663 mahihirap na residente at ilang biktima ng sunog mula sa Gapan City, Cabiao at Peñaranda.

Nakarating naman ang aking relief team sa Llanera sa nasabing lalawigan, at pinagaan ang dalahin ng 81 mahihirap na residente; habang 233 naman ang nabigyan ng ayuda sa Maria Aurora sa probinsya ng Aurora.

Napakahalaga ng epektibo at maayos na serbisyo ng gobyerno para sa isang bansa at mga mamamayan nito. Dapat ay napapamahalaang mabuti at nagagamit nang maayos ng gobyerno ang resources nito, at tiyakin na nakararating sa mga tao nang hindi naaantala o nasasayang. Ito po ang isa sa ating mga adhikain na ating ipinaglalaban, dahil para sa akin, hindi dapat pahirapan ang mga Pilipino, at sa halip ay ilapit sa kanila ang serbisyo.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Specialized medical services ng gobyerno, dapat mas ilapit sa mga Pilipino

ni Bong Go @Bisyo Magserbisyo | May 20, 2023

Sa kabila ng patuloy na pagsisikap ng ating pamahalaan na mapaganda ang paghahatid ng serbisyong medikal sa ating mga kababayan, kung ikukumpara sa ating malaking populasyon, nananatiling limitado ang bilang ng mga pasyenteng nakakapagpagamot sa specialty hospitals na karamihan ay nasa Metro Manila, gaya ng Philippine Heart Center, Lung Center of the Philippines, National Kidney and Transplant Institute, at Philippine Children’s Medical Center.

Nagkakaloob ang mga ito ng abot-kayang healthcare at sapat na kagamitan, karanasan, teknolohiya, at expertise. Sila rin ang madalas puntahan ng mga medical practitioner.

Karamihan sa ating mga kababayan na may malubhang sakit mula sa iba’t ibang lugar sa bansa ay gustong magpagamot sa mga specialty hospitals sa Maynila. Pero hindi naman ganu’n kadali ‘yun dahil kailangan pa nilang mamasahe at problema rin kung saan sila tutuloy habang nasa Maynila, kung saan mataas ang presyo ng mga bilihin kumpara sa probinsya. Dagdag-pasanin pa ito para sa kanila. Madalas, ang nauuna pa nilang maging problema ay kung saan kukunin ang panggastos kaya hindi na lang nagpapagamot at namamatay ang iba nang hindi man lang nakapagpatingin sa espesyalista.

Bilang Chair ng Senate Committee on Health at isa sa mga author, inisponsoran ko sa Senado noong Mayo 17, ang Senate Bill No. 2212 na naglalayon na magtatag ng regional specialty centers sa buong bansa. Si Senate President Migz Zubiri naman ang principal author ng panukalang ito.

Sa aking sponsorship speech, binigyang-diin ko na kailangang maging mas available ang specialized medical services sa ating mga kababayan na nasa probinsya. Hindi dapat mahirapan ang ating mga kababayan na maka-access sa serbisyo ng gobyerno, lalo na pagdating sa usaping pangkalusugan. Ang gobyerno ang dapat maglapit ng serbisyo sa mga tao. Ito rin ang dahilan kung bakit ko isinulong ang mga Malasakit Centers at patuloy na sinusuportahan ang pagtatayo ng mga Super Health Centers sa iba’t ibang bahagi ng bansa para mailapit natin sa mga tao ang serbisyong pangkalusugan na kailangan nila.

Kaugnay din ito ng naging pahayag ni Pangulong Ferdinand Marcos, Jr. sa kanyang unang State of the Nation Address na malaki ang pakinabang natin sa mga specialty hospitals, kaya hindi lang dapat sa National Capital Region, kundi maging sa ibang parte ng bansa ay kailangang magdagdag ng ganitong uri ng mga pagamutan. Kabilang ito sa legislative agenda na nakapaloob sa Philippine Development Plan 2023 - 2028 na nilagdaan ng Pangulo.

Sang-ayon ako sa sinabi ng Pangulo dahil hindi lang naman sa Metro Manila mayroong may sakit sa puso o baga. Sa pag-iikot ko sa buong bansa, napakaraming lumalapit sa akin, hindi lang para magpagamot, may iba na ang hinihingi ay pamasahe para lang bumiyahe sa Maynila dahil nandito ang mga specialty hospitals na kayang gumamot sa kanila. Para sa mga kababayan nating hindi maabot ang serbisyo ng mga specialty hospitals na nasa Maynila pa, magkakaroon ng specialty centers sa mga existing regional hospitals na malapit sa kanila sa pamamagitan ng panukalang ito.

Sa labas naman ng ating mga gawain sa Senado, patuloy din tayo sa paglalapit ng serbisyo ng gobyerno sa mga komunidad, partikular ang paghahatid ng serbisyong pangkalusugan bilang bahagi ng ating layunin na mas mapalakas ang ating healthcare system at mapangalagaan ang kalusugan ng bawat Pilipino.

Kahapon, Mayo 19, ay nasa Jordan, Guimaras tayo para daluhan ang Manggahan Festival at volleyball tournament sa lugar. Nagsagawa rin tayo ng monitoring visit sa Malasakit Center na nasa Dr. Catalino Gallego Nava Provincial Hospital. Inilunsad ito noong Hulyo 30, 2020, at tulad ng ibang Malasakit Center, tinitiyak natin na naipagpapatuloy nito ang pagtulong sa mga pasyente, lalo na ang mahihirap, hopeless, helpless at walang malalapitan maliban sa pamahalaan. Nag-abot din tayo ng tulong sa mga pasyente at frontliners, habang ang Department of Social Welfare and Development (DSWD) naman ay may hiwalay na tulong para sa mga pasyente.

Sinaksihan din natin ang groundbreaking ng itatayong Super Health Center sa Buenavista, Guimaras. Layunin ng SHC na ilapit ang mga basic medical services ng gobyerno sa tao, lalo na ang mga nakatira sa liblib na lugar.

Habang nasa Guimaras, nag-inspeksyon din tayo sa itinayong seawall, na ating sinuportahang mapondohan noon. Nag-inspeksyon din tayo sa itinayong Buenavista Wharf, na sinaksihan pa natin ang groundbreaking noong November 5, 2018. Naghatid din tayo ng tulong sa 1,500 mahihirap na residente ng Buenavista.

Dumalo naman tayo noong Mayo 18 sa ginanap na Sarakat Festival sa Santa Praxedes, Cagayan.

Sinaksihan din natin ang inagurasyon ng itinayong Santa Praxedes Super Health Center.

Pinangunahan din natin ang pamamahagi ng tulong para sa 1,500 mahihirap na residente sa lugar.

Nagpapasalamat naman tayo kay Mayor Esterlina Aguinaldo at sa buong bayan ng Santa Praxedes na sa pamamagitan ng isang resolusyon na ipinasa noong Mayo 8, 2023, kinilala tayo bilang adopted son ng bayan nila dahil sa ating patuloy na serbisyo mula noon hanggang ngayon.

Isang malaking karangalan na ituring na isang anak ng Santa Praxedes.

Pumunta rin tayo sa Lal-Lo, Cagayan sa araw na ‘yun at sinaksihan natin ang groundbreaking ng itatayong Lal-lo Super Health Center. Nagkaloob din tayo ng ayuda sa 1,500 mahihirap na residente sa lugar.

Hindi rin tumitigil ang aking relief team sa pag-alalay sa ating mga kababayan sa buong Pilipinas na nahaharap sa iba’t ibang krisis. Maagap nating natulungan ang anim na residenteng nasunugan sa Angeles City, Pampanga. Tumulong din tayo sa isinagawang medical and dental mission sa Belison, Antique para sa 255 benepisyaryo. Pinagaan din natin ang dalahin ng mahihirap na residente mula sa iba’t ibang sektor gaya ng 1,735 sa Lagonglong, 50 sa Libertad, 50 sa Salay sa Misamis Oriental; 770 sa Datu Saudi Ampatuan, Maguindanao del Sur; 419 sa Laurel, Batangas; at 153 sa Carmen, Las Nieves, Butuan City, at Nasipit sa Agusan del Norte.

Bilang lingkod-bayan, huwag kayong magpasalamat sa amin dahil ginagampanan lang namin ang aming tungkulin. Ibinabalik ko lang ang tiwalang ipinagkaloob ninyo sa akin sa pamamagitan ng mabilis, maayos, maaasahan at madaling malalapitan na serbisyong may pagmamalasakit sa inyong pangangailangan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Suporta sa panukalang dagdag na sahod para sa mga manggagawa

ni Bong Go @Bisyo Magserbisyo | May 17, 2023

Bilang miyembro ng Senate Committee on Labor, suportado ko ang inisyatiba ng Senado na magkaroon ng across-the-board increase ang daily wages ng mga manggagawa sa buong bansa. Isinumite ni Senate President Juan Miguel Zubiri ang Senate Bill No. 2002, o ang Across-the-Board Wage Increase Act of 2023 at isa ako sa mga co-author nito. Kung maisasabatas, target nito na taasan ang arawang suweldo ng lahat ng nasa pribadong sektor ng P150.

Habang bumabangon ang ating ekonomiya mula sa pandemya at iba pang krisis, sikapin nating hindi maiwan ang mga kababayan nating mahirap. Hindi lamang ang mga negosyante ang dapat na magbenepisyo sa pagganda ng ating ekonomiya kundi maging ang ating pinakaordinaryong manggagawang Pilipino, lalo na ang daily wage earners.

Iparamdam natin sa kanila ang mas komportableng buhay at bigyan natin sila ng pag-asang makaahon mula sa kahirapan.

Noong Mayo 11, iniulat ng Philippine Statistics Authority na ang ating Gross Domestic Product ay lumago nang 6.4% sa unang quarter ng 2023. Ito ang pinakamabilis na paglago sa Southeast Asia. Gayunman, binigyang-diin ng International Monetary Fund na ang paglago ng ating ekonomiya ay dapat na manatili sa 6% ngayong taon, lalo pa’t nananatiling mataas ang inflation rate.

Ibig sabihin, nag-expand ang ating ekonomiya, pero mataas pa rin ang presyo ng mga bilihin. Dahil dito, dapat nating tutukan ang mga pinakamahihirap na manggagawa at daily wage earners na nahihirapan nang mag-budget na halos isang kahig, isang tuka na lang dahil sa pang-araw-araw na gastos.

Bagama’t kailangang balansehin ng gobyerno ang interes ng mga employers at mga manggagawa, nais kong ipaalala na ang mga kumpanya at negosyo ay nagbabayad ngayon ng mas mababang buwis dahil sa Republic Act No. 11534 o Corporate Recovery and Tax Incentives for Enterprises Act (CREATE) na inaprubahan noon ni dating Pangulong Rodrigo Duterte.

Sa parte ko, lagi nating ipinaglalaban ang kapakanan ng mga manggagawang Pilipino para mapangalagaan ang kanilang mga karapatan at magkaroon ng mas magagandang benepisyo. Isinumite rin natin sa Senado ang panukalang SBN 2107, o ang Freelance Workers Protection Act na naglalayon na mabigyan ng proteksyon at insentibo ang mga freelance workers, kilalanin ang kanilang mga karapatan at matiyak na protektado sila at nababayaran nang tama para sa kanilang mga serbisyo.

Isinumite rin natin ang panukalang SBN 1705 na naglalayon na madagdagan ang service incentive leave ng mga empleyado sa pribadong sektor; at ang SBN 1707 na naglalayon naman na maproteksyunan ang ating mga social workers.

Dagdag pa rito, ang ating iniakdang panukala na SBN 1183, o ang Media and Entertainment Workers’ Welfare Bill para mapalawak ang proteksyon, seguridad at insentibo ng mga manggagawa sa media and entertainment industry sa pamamagitan ng karagdagang health insurance package, overtime and night differential pay, at iba pang mga benepisyo kung maisabatas.

Para sa proteksyon ng delivery service riders, nag-file rin ako ng SBN 1184 at SBN 1191 para naman magkaroon ng magna carta para sa ating mga seafarers, kung maisabatas.

Inihain din natin ang SBN 420, na naglalayon na mabigyan ng temporary employment ang eligible members ng low-income rural households na kayang mag-perform ng unskilled physical labor, kung maisabatas.

Tuluy-tuloy naman ang aking tanggapan sa paglilibot sa buong Pilipinas para maalalayan ang ating mga kababayan na nahaharap sa iba’t ibang krisis o sakuna.

Maagap tayong sumaklolo sa mga naging biktima ng magkakahiwalay na sunog tulad ng 20 residente ng Bgy. Pusok at isa pa sa Bgy. Mactan sa Lapu-Lapu City, Cebu. Nagkaloob din tayo ng tulong sa 1,912 residente ng Datu Saudi Ampatuan, Maguindanao del Sur na apektado ng armed conflict sa kanilang lugar. Naabutan din ng tulong at napagaan ang dalahin ng mahihirap na residente tulad ng 1,050 sa District 1 and 2 sa siyudad ng Manila; 666 sa Limay, Bataan; 150 sa Bgy. Escopa, Project 4, Quezon City; 366 sa Kalawit, Zamboanga del Norte; at 108 pa sa Malolos City, Bulacan.

Samantala, sa pagtatapos ng 32nd Southeast Asian Games, bilang Chair ng Senate Committee on Sports, lubos ang ating paghanga at pasasalamat sa ating mga atletang buong giting na lumahok sa iba’t ibang kompetisyon. Gaya ng pagkapanalo ng Gilas Pilipinas na nakasungkit ng gintong medalya sa men’s basketball finals nitong Martes, Mayo 16. Talagang masarap sa pakiramdam na nakabawi tayo sa Indonesia, nakabawi pa tayo sa Cambodia.

Kaya naman nakaka-proud bilang Pilipino ang mga tagumpay na nakamit ng Gilas at ng iba pang Pilipinong atleta na sumabak sa SEA Games. Maipagmamalaki natin ang kanilang naging dedikasyon, disiplina at angking talento para maipakita sa buong mundo ang kanilang husay at ang pusong Pilipino na lumalaban hanggang dulo. Ang kanilang panalo ay panalo rin ng ating bansa at ng bawat Pilipino.

Ipagpatuloy lang natin ang ating pagmamalasakit sa kapwa upang makapagbigay ng tulong sa mga nangangailangan. Bigyan natin sila ng bagong pag-asa na sama-sama tayong makakaahon mula sa anumang suliranin bilang isang nagkakaisang sambayanan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.