Permanente, ligtas at maayos na evacuation centers para sa mga apektado ng kalamidad at sakuna

ni Bong Go @Bisyo Magserbisyo | June 24, 2023

Hindi nawawala sa akin ang pag-aalala sa kalagayan ng ating mga kababayan na apektado ng pag-aalburoto ng Bulkang Mayon at iba pang kalamidad o sakuna na hinaharap ng ating bansa.

Kaya naman noong June 22 ay binisita ko ang Tabaco City at bayan ng Malilipot sa probinsya ng Albay at personal kong inalam ang kanilang kalagayan. Nakipag-ugnayan tayo sa kanilang mga lokal na opisyal at nakiusap sa kanila na unahin lagi ang kaligtasan ng mga nasasakupan, at siguraduhin na maayos ang kalagayan ng mga evacuees.

Mahirap kumilos kapag wala sa sariling tahanan at may kinakaharap pang kalamidad na hindi alam kung kailan matatapos. Apektado maging ang pinagkukunan ng kabuhayan.

Kaya ipinakiusap ko rin sa mga awtoridad na importante na walang magugutom sa ating mga kababayan habang hindi pa bumabalik sa normal ang sitwasyon.

Napakahirap at kawawa ang kalagayan ng mga kababayang apektado ng mga ganitong sitwasyon.

Kaya isinusulong ko sa Senado ang Senate Bill No. 188. Layunin ng panukalang ito na itatag ang Department of Disaster Resilience na tututok sa pagtugon sa natural disasters. Kung makapasa at tuluyang maisabatas, itutuon ng DDR ang atensyon nito sa tatlong mahahalagang aspeto ng disaster response — ang disaster risk reduction, preparedness and response, at recovery.

Importante na mayroon tayong departamento na nakapokus at may klarong mandato pagdating sa ating disaster resiliency efforts. Sa pamamagitan ng DDR, mas mapapabuti rin natin ang kakayahan at operasyon sa pamamahala at pagresponde sa mga darating na krisis. Hindi puwedeng laging task force lamang dahil temporary lang ito at nawawala ang continuity kapag nagpalit na ng administrasyon. Mahirap din kung mananatiling coordinating council lang ang mamamahala sa ganitong sitwasyon dahil sa kakulangan ng kapangyarihan nito.

Dapat ay departamento sana na may Cabinet-level secretary ang in-charge para may kapangyarihan at kakayahang i-mobilize ang buong gobyerno kapag kinakailangan.

Magkakaroon siya ng personalidad na diretsong isasangguni sa kapwa niya department secretaries ang pangangailangan ng mga taong apektado ng krisis. Dapat may point person talaga na may awtoridad at malinaw na mandato.

At dahil laging problema ng mga apektado ng kalamidad kung saan sila pansamantalang maninirahan, na kadalasan ay sa mga silid-aralan kaya malaking abala sa pag-aaral ng mga estudyante doon, inihain ko rin sa Senado ang SBN 193. Kung makapasa at maging ganap na batas, layunin nito na magtayo ng permanente, ligtas, at maayos na evacuation centers sa bawat munisipalidad, lungsod, at lalawigan sa buong bansa. Kumpleto ito sa mga pangunahing pangangailangan ng mga evacuees gaya ng pagkain at tubig, at mga pasilidad gaya ng maayos na tulugan, lutuan at banyo.

Ilan lamang ito sa mga panukalang batas na aking inihain sa Senado para maging one-step ahead tayo sa mga kalamidad at sakuna na palagiang dumadalaw sa bansa.

Bagaman at hindi natin masasabi kung kailan ito darating, ang mahalaga ay laging handa tayo. Hindi puwedeng madalas na lang tayong nabubulaga dahil ang mga kababayan natin, lalo na ang mga mahihirap, ang mas nahihirapan.

Samantala, sa ating pagbisita sa Albay ay isinabay na rin natin ang paghahatid ng iba pang serbisyo. Sa Tabaco City ay personal nating pinagkalooban ng tulong ang 250 mahihirap na residente, gayundin ang 151 evacuees. Nakatuwang natin sina Governor Grex Lagman, Congressman Edcel Lagman, Mayor Krisel Lagman-Luistro, Vice Mayor Nestor San Pablo, at Sangguniang Panlalawigan Members Victor Ziga Jr., Rey Bragais, Dante Arandia at iba pang opisyal.

Ininspeksyon din natin ang Super Health Center sa lungsod, kung saan nakatayo ito sa loob ng resettlement area ng National Housing Authority sa Bgy. San Vicente. Ang naturang housing project ay sinimulan noong administrasyon ni dating Pangulong Rodrigo Duterte para mabigyan ng pabahay ang mga biktima ng Bagyong Rolly noong 2020. May lawak itong 20 ektarya at nasa 2,361 housing units ang itinayo. Ang mga nakatirang benepisyaryo sa resettlement area ay ilan lang sa makikinabang kapag naging operational na ang Super Health Center.

Pagkatapos, dumiretso din tayo sa bayan ng Malilipot at tinulungan ang 221 evacuees na kasalukuyang nasa Malilipot Central School katuwang sina Mayor Cenon Volante, Bgy. Captain Ignacio Bobis at iba pang opisyal.

Kahapon, June 23, ay dinaluhan natin ang 48th Annual Directorate Meeting and National Convention of the Geodetic Engineers of the Philippines Inc. na ginanap sa SMX Convention, Lanang, Davao City. Noong June 21 ay dumalo tayo sa ginanap na 3rd National Summit of Philippine Society of Medical Laboratory Scientists (PSMLS) Inc. sa Winford Hotel, Sta. Cruz, Manila. Bilang kanilang guest speaker sa parehong pagtitipon, suportado natin ang mga sektor na ito bilang kabalikat ng ating pamahalaan sa pagsulong at pag-unlad ng ating bansa.

Bumiyahe rin tayo sa Bulacan at sinaksihan ang groundbreaking ng San Rafael Super Health Center, at namahagi ng ayuda sa 1,000 mahihirap na residente katuwang si Mayor Cholo Violago at iba pang opisyal noong Hunyo 21.

Hindi naman tumitigil ang aking relief team sa pag-alalay sa ating mga kababayang nahaharap sa iba’t ibang krisis. Maagap na natulungan ang 21 residenteng biktima ng sunog sa Bgy. Cabacungan, La Castellana, Negros Occidental. Napagaan natin ang dalahin ng 1,000 na mahihirap na residente ng Bustos, at 600 pa sa Obando, mga lugar sa Bulacan. Hindi rin kinaligtaan ang 96 sa Bataan. Nakatanggap din ng tulong ang 180 TESDA trainees sa Mandaue City, Cebu na nakakumpleto ng kanilang pagsasanay.

Hindi po ako titigil sa paghahatid ng serbisyo sa ating mga kababayan anuman ang panahon at sitwasyon para matulungan sa abot ng aking makakaya lalo na ang mga mahihirap, hopeless, helpless at walang malalapitan maliban sa pamahalaan.

Pangalagaan natin ang buhay at kalusugan ng bawat Pilipino. Ipagpatuloy natin ang pagtutulungan at bayanihan. At sa panahon ng kalamidad, magmalasakit tayo at mag-abot ng ating makakayanang suporta sa mga apektado.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Para iwas-droga, sports ang kailangan ng mga kabataan

ni Bong Go @Bisyo Magserbisyo | June 21, 2023

Kabilang sa aking mga adbokasiya ang hikayatin ang ating mga kababayan, lalo na ang mga kabataan, na pumasok sa sports. Bata pa lang ako ay isa na akong sports enthusiast, hanggang ngayon ay aktibo pa rin ako sa basketball, at nagkataon ding ipinagkatiwala sa atin ang pagiging Chair ng Senate Committee on Sports. Bukod sa maayos na kalusugan at edukasyon, isang mahalagang aspeto ang sports para mahubog ang isipan at katawan ng ating mga kabataan na siyang pag-asa ng ating bayan.

Isa sa ating inisyatiba at patuloy na pinagsusumikapang mapalaganap ay ang grassroots sports development dahil bilang isang probinsyano, alam kong maraming talento rin ang mula sa iba’t ibang sulok ng bansa. Nais nating mapagkalooban ng pantay na oportunidad ang mga atletang ito, mas mahasa pa ang kanilang galing at maturuan ng tamang disiplina at pagsisikap para magtagumpay.

Kaya naman noong June 17 ay dinaluhan natin ang ginanap na Serbisyong Totoo Sports Clinic sa Matalam, North Cotabato kung saan nagpakita ng kanilang galing ang mga kabataan mula sa 34 na mga barangay. Nabigyan din sila ng pagkakataon na matuto at magsanay sa patnubay ng mahuhusay na coach at mentors. Nagkaloob naman ang aking tanggapan ng dagdag na suporta tulad ng bola para sa basketball at volleyball sa mga lumahok na barangay. Pinayuhan ko ang mga kabataan na ipagpatuloy ang kanilang nasimulan at hikayatin ang iba pa nilang kasama sa komunidad na lumayo sa masasamang bisyo, get into sports and stay away from drugs.

Noong June 16 ay dinaluhan din natin ang ribbon-cutting ng Pentathlon facility na may fencing hall sa Ormoc City. Isang proyekto ito na ating sinuportahan bilang Vice Chair ng Senate Committee on Finance at katuwang sina Congressman Richard Gomez at Mayor Lucy Torres-Gomez.

Malaking tulong ito para mapalakas ang grassroots sports development sa lugar at mai-promote ang iba pang larangan ng palakasan na maaaring mapaghusayan ng mga kabataan.

Ang pagpapalawak sa grassroots sports development ang isa sa mga dahilan kaya patuloy kong isinusulong ang Senate Bill No. 423, o ang panukalang Philippine National Games Act. Kung papasa at magiging ganap na batas, layunin nito na magkaroon ng platform para sa mga atleta sa buong Pilipinas, lalo na ang mga kabataan sa mga kanayunan, na makalahok sa mga pambansang kumpetisyon. Layunin din nito na mabigyan ng pagkakataon ang mga may potensyal na madiskubre at makalahok sa international sporting competitions.

Naging author at co-sponsor din tayo ng panukala na naging Republic Act No. 11470 na nagtatag sa National Academy of Sports (NAS) noong 2020. Ang NAS ay isang government-run educational institution na ang Main Campus ay nasa New Clark City, Capas, Tarlac. Nagkakaloob ito ng de-kalidad na secondary education na may special curriculum sa sports para sa mga kabataang Pilipino na gustong mas mapagbuti pa ang kanilang talento habang ipinagpapatuloy ang kanilang pag-aaral. Sa ganitong paraan, walang makokompromiso: puwedeng mag-training habang nakakapag-aral.

Sa pagpapatuloy naman ng ating paghahatid ng iba’t ibang serbisyo sa buong Pilipinas, kahapon, June 20, ay nasa Laguna tayo para saksihan ang ceremonial ribbon cutting ng Nagcarlan Public Market, isa sa mga proyektong natulungan nating maipatayo noon.

Kasama sina Gov. Ramil Hernandez, Vice Gov. Karen Agapay, Cong. Amben Amante, Cong. Ruth Hernandez, Mayor Elmor Vita, Vice Mayor Rexon Arevalo, Coun. Rey Commendador at iba pang lokal na opisyal, pinangunahan din natin ang pagkakaloob ng tulong sa 1,500 mahihirap na residente.

Dumiretso rin tayo sa Sta. Rosa City at nag-inspeksyon sa inilulunsad na Super Health Center doon, at matapos ay personal na nagkaloob ng tulong sa 1,500 mahihirap na residente sa pakikipagtulungan ng lokal na pamahalaan sa pamumuno ni Mayor Arlene Arcillas at iba pang lokal na opisyal.

Nasa Tarlac City naman tayo noong Lunes at inalalayan ang 1,000 na PWDs, market vendors at ilang indigents mula sa probinsya ng Tarlac sa pamumuno ni Gov. Susan Yap at Cong. Christian Yap. Sinaksihan din natin ang groundbreaking ng itatayong Concepcion Super Health Center kasama si Kabayan Partylist Rep. Ron Salo at Mayor Noel Villanueva. Nagbigay rin tayo ng tulong sa 977 residente na kinabibilangan ng mga biktima ng bagyo at ilang mga estudyante. Patuloy ang pagbibigay ng tulong ng aking tanggapan sa mga lugar na ito sa probinsya ng Tarlac.

Bukod naman sa ating pagdalo sa sports clinic sa Matalam, North Cotabato noong June 17, namigay rin tayo ng tulong sa 1,318 benepisyaryo mula sa iba’t ibang sektor sa naturang probinsya kasama si Gov. Lala Taliño-Mendoza, Matalam Mayor Oscar Valdevieso, Vice Mayor Ralph Ryan Rafael at iba pang opisyal. Dinaluhan din natin ang selebrasyon ng 54th Araw ng Alamada sa pamumuno nina Mayor Jesus Sacdalan at Cong. Joel Sacdalan. Kasama rin namin doon sina Senator Francis Tolentino, Vice Gov. Efren Piñol at iba pang opisyal. Nagkaloob din tayo ng tulong sa 840 na magsasaka at sa 1,500 mahihirap na residente ng Alamada.

Nakarating din ang aking opisina sa iba’t ibang komunidad para alalayan ang mga nahaharap sa iba’t ibang krisis. Maagap tayong nag-abot ng tulong sa mga naging biktima ng sunog gaya ng 167 sa Awang, Datu Odin Sinsuat, Maguindano del Norte; at 32 pa sa Mother Bagua, Cotabato City.

Tumulong din tayo sa 500 benepisyaryo mula sa Plaridel, Bulacan; at 100 pa sa Cuyapo, Nueva Ecija. Nabigyan din natin ng tulong ang 180 TESDA trainees na nagsipagtapos sa Mandaue City, Cebu.

Bukod sa pagtulong sa mga nangangailangan, mahalagang mahubog din ang isipan at katawan ng ating mga kabataan bilang mga pag-asa ng ating bayan. Napakaimportante na magabayan sila sa pamamagitan ng tamang edukasyon at pagsasanay sa sports dahil hindi lang natin sila nailalayo sa kaway ng droga at kriminalidad kundi lumilikha rin tayo ng magandang kinabukasan para sa kanila anuman ang larangan na kanilang papasukin balang araw.

Palakasin natin ang ating grassroots programs at ilapit natin sa tao ang serbisyong kailangan nila mula sa edukasyon, pangkalusugan, at pati na rin sa sports. Handa po akong tumulong sa abot ng aking makakaya, lalung-lalo na po sa mga mahihirap nating kababayan at dapat ilapit natin ang serbisyo ng gobyerno sa kanila.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Mga rebelde, samantalahin ang programa ng gobyerno para sa maayos na pamumuhay

ni Bong Go @Bisyo Magserbisyo | June 17, 2023

Sa mga nakalipas na dekada ay naging mailap ang pangmatagalang kapayapaan sa ilang lugar sa ating bansa, lalo na ‘yung mga malalayo at mahirap maabot ng mga serbisyo mula sa gobyerno.

Natatandaan ko, mayor pa lang si Tatay Digong ng Davao City ay nagpupunta na kami sa mga kampo ng rebelde para iligtas ang mga sundalo at pulis na nabihag. Ako mismo ang iniiwan niya doon kung sobra sa isa ang ililigtas namin dahil hindi na kasya sa maliit naming sinasakyan.

Kung tutuusin, parang ako na ‘yung bihag-kapalit sa sitwasyon na iyon.

Nang maging pangulo na siya, pinirmahan niya ang Executive Order No. 70 noong 2018 na nagtatag sa National Task Force to End Local Communist Armed Conflict (NTF-ELCAC).

Ito ay may layuning maging mas holistic at whole-of-government ang approach sa pagsugpo sa insurgency.

Ibig sabihin, sa halip na gamitan ng puwersa ng pamahalaan ang mga rebelde, tinukoy ang lahat ng ugat ng insurgency at nilapatan ng solusyon gaya ng kahirapan, kawalan ng hanapbuhay, kakulangan sa edukasyon at hindi accessible na mga serbisyo ng gobyerno.

Sa pamamagitan ng NTF-ELCAC, maraming kapwa natin Pilipino na nagrebelde noon ang nagbalik-loob sa pamahalaan at nabigyan ng pagkakataon na muling maging produktibong bahagi ng ating lipunan at nakapiling muli ang kanilang pamilya.

Sinuportahan natin ito dahil importante sa akin ang kapayapaan lalo na sa Mindanao.

Wala na dapat na patayan dahil sino ba naman ang may gustong magpatayan? Masakit makitang kapwa Pilipino ay nagpapatayan laban sa kapwa Pilipino dahil lang sa pagkakaiba sa mga ideolohiya.

Kaya mahalaga na mas mapalawak pa ang mga programa para sa mga nagbabalik-loob at mapagkalooban sila ng patuloy na pagkukunan ng ikabubuhay para huwag na silang humawak muli ng armas laban sa kapwa nila Pilipino.

Kaugnay nito, bilang vice chair ng Senate Committees on National Defense at ng Public Order, noong June 13 ay dinaluhan natin ang unang anibersaryo ng pagiging insurgency-free ng Davao del Norte na ginanap sa Tagum City. Kasama natin dito ang mga lokal na opisyal gaya ni Governor Edwin Jubahib, ilang mga pulis, militar at iba pang uniformed personnel, gayundin ang mga residente para ipagdiwang ang tagumpay ng kapayapaan, pagkakaisa at pag-unlad laban sa karahasan at pagkakawatak-watak.

Naroroon din ang mga dating rebeldeng nagbalik-loob, at ang mga batang IPs na nailigtas sa kaguluhan. Binigyang-diin ko rin sa kanila na hindi na dapat dumanak pa ng dugo sa pagitan ng mga Pilipino. Nananawagan din ako sa mga nasa kabundukan pa na bumaba na sila at samantalahin ang mga programang iniaalok ng pamahalaan.

Ako mismo ay tutulong din sa kanila sa aking sariling kakayahan at kapasidad para makamit na natin ang kaayusan.

Samantala, ngayong birthday week ko ay ginunita ko ang araw na iyon na walang selebrasyon tulad ng dating Pangulong Duterte sa mga kaarawan niya. Sa halip ay nagpasalamat ako sa Panginoon sa ibinigay Niyang buhay at nagpatuloy lang ako sa paglilingkod lalo na sa ating mga kababayang mahihirap.

Kahapon, June 16, ay nasa Leyte tayo matapos maimbitahan ni Mayor Boying Cari sa 16th Charter Day Celebration ng Baybay City. Matapos ang okasyon ay dumiretso tayo sa Immaculate Conception Hospital at nagsagawa ng monitoring visit sa Malasakit Center doon.

Namahagi rin tayo ng tulong sa mga pasyente at frontliners, habang may hiwalay ding tulong para sa mga pasyente mula sa DSWD. Nag-inspeksyon din tayo sa Baybay Super Health Center, na malapit nang matapos ang konstruksyon. Sinilip din natin ang Baybay City Boardwalk, isa sa mga proyekto sa lungsod na napondohan sa ating pamamagitan.

Idineklara rin tayo bilang adopted son ng Leyte — isang malaking karangalan para sa akin at labis tayong nagpapasalamat sa lokal na pamahalaan sa pangunguna ni Governor Icot Petilla, Vice Gov. Sandy Javier, BM Carlo Loreto, at iba pang mga opisyal.

Bumisita rin tayo sa Ormoc City at naghatid ng tulong kasama si Mayor Lucy Torres-Gomez at Congressman Richard Gomez sa 1,000 mahihirap na residente na kinabibilangan ng solo parents at vendors; at 65 pa na mga naging biktima ng sunog.

Binisita rin natin ang Malasakit Center na nasa Ormoc District Hospital kung saan namahagi tayo ng tulong para sa mga pasyente at frontliners. May hiwalay ding tulong ang DSWD para sa mga qualified patients.

Nag-inspeksyon din tayo sa ilan pang proyektong napondohan sa ating pamamagitan, tulad ng fencing hall na binuksan ng araw na 'yun at ang mga itinatayong skate and BMX park. Malaking tulong ito para mapalakas ang grassroots sports development at mailayo ang mga kabataan sa masasamang bisyo. Sabi ko nga, ‘get into sports, stay away from drugs’.

Masaya ko ring ibinabalita na kasabay ng mga aktibidad na ito ang groundbreaking ng itatayong Super Health Center sa Tiguma, Pagadian City.

Noong June 15, bilang handog ko sa kapwa sa aking kaarawan, bumisita ako sa Quezon City para ilunsad ang mga proyektong napondohan sa ating pamamagitan at makatulong sa mga residente. Kasama si Councilor Mikey Belmonte, dinaluhan natin ang inagurasyon ng Multi-Purpose Building sa Bgy. Commonwealth at kasunod sa Bgy. Payatas. Pinangunahan din natin ang pagkakaloob ng ayuda sa 1,000 mahihirap na residente ng lungsod, kasama rin si Mayor Joy Belmonte.

Matapos nito, tumawid tayo patungong Marikina City at namahagi ng tulong sa 1,500 mahihirap na residente ng lungsod, 750 benepisyaryo mula sa San Mateo at 750 pa mula sa Montalban. Nagpapasalamat ako sa mga lokal na opisyal na sina Cong. Maan Teodoro at Mayor Marcy Teodoro ng Marikina City, Mayor General Ronnie Evangelista ng Montalban, at Mayor Bartolome “Omie” Rivera, Jr. ng San Mateo sa pakikipagtuwang sa aking tanggapan upang makatulong sa kanilang mga nasasakupan.

Nag-ikot din sa iba’t ibang bahagi ng ating bansa ang aking opisina para tulungan ang iba pa nating mga kababayan. Naalalayan ang 990 mahihirap na residente ng Tagudin, Ilocos Sur; 550 sa Sto. Domingo, Albay; 350 sa Iligan City; 150 sa Damulog, Bukidnon; 136 sa Samal, 82 sa Limay at 33 sa Balanga na mga lugar sa Bataan; at 100 pa sa Tubod, Lanao del Norte. Mayroon ding dalawang pamilyang nasunugan sa Carcar City, Cebu na ating tinulungan.

Nagpapasalamat ako sa Diyos sa panibagong taon sa aking buhay upang maipagpatuloy ang aking tungkulin na magseserbisyo sa mga Pilipino at unahin ang mga mahihirap. Hindi ko sasayangin ang oportunidad na ito para makapaglingkod sa abot ng aking makakaya.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.