Food security, ligtas at komportableng buhay para sa lahat

ni Bong Go @Bisyo Magserbisyo | July 15, 2023

Sa mga nakalipas na taon, nasaksihan natin ang mabigat na epekto na dulot ng pandemyang COVID-19 sa ating bansa -- sa ekonomiya, sa kalusugan at sa pang-araw-araw na pamumuhay ng bawat Pilipino.

Sa harap ng mga hamong ito, ating inaasahan na pagtutuunan ng pamahalaan ang isang inclusive recovery na may puso at malasakit para sa lahat, lalo na para sa mga mahihirap at sa mga higit na nangangailangan ng kalinga mula sa gobyerno.

Bilang kinatawan n'yo sa Senado, tayo po ay may malalim na pag-asa at optimismo na magpapatuloy ang administrasyon ni Pangulong Bongbong Marcos Jr. sa paglulunsad at pagpapatupad ng mga pro-poor initiative. Sana rin ay maipagpatuloy ang mga magagandang nagawa ng nakaraang administrasyon ni dating Pangulong Rodrigo Duterte tungo sa mas ligtas at komportableng buhay para sa lahat.

Sa mga unang taon ng kanyang pamumuno, ating nasaksihan ang malasakit ni Pangulong Marcos at ng kanyang administrasyon sa ating mga kababayang mahihirap. Sa patuloy na pagsulong ng ating ekonomiya, sana ay siguruhin talaga na walang Pilipino ang maiiwan.

Sa nalalapit niyang ikalawang State of the Nation Address (SONA), naniniwala tayo na mahalaga ang usaping food security. Kailangang ituring natin ito bilang isang prayoridad palagi para maiwasan na may magutom na pamilyang Pilipino.

Isa rin sa ating inaasahan sa paparating na SONA ay ang patuloy na implementasyon ng Philippine Development Plan ng administrasyon, na may eight-point agenda na naglalayong makamit natin ang food security, mapabuti ang pamamahala ng ating supply chain, mabawasan ang gastusin natin sa energy at mapanatili ang ating energy security, at mabawasan ang economic vulnerabilities sa bansa na idinulot ng pandemya o iba pang krisis.

Inaasahan ko rin ang patuloy na prayoridad ng gobyerno sa mga isyung pangkalusugan, pagpapalakas sa ating social protection, pagtataguyod ng imprastruktura, at paghihikayat ng entrepreneurship sa bansa.

Bilang Chair ng Senate Committee on Health, makaaasa kayo sa aking patuloy na pagsusulong sa layunin nating pangkalusugan. Isa na rito ang ating naipasa na Regional Specialty Centers Act na ating ini-sponsor at isa sa mga may-akda sa Senado, at ngayon ay naghihintay na lamang ng pirma ng Pangulo upang maisabatas.

Isa po itong paraan para mailapit natin ang mga serbisyo medikal sa ating mga kababayan na mahihirap lalo na sa malalayong lugar. Halimbawa, sa ngayon, ‘yung may sakit sa puso, kailangan pa nilang magpaopera sa Metro Manila sa Philippine Heart Center. Kapag mayroon na tayong Regional Specialty Centers, magkakaroon na ng specialized medical services sa mga regional hospitals sa iba’t ibang parte ng bansa para naman hindi na nila kailangang bumiyahe pa at gumastos ang mga pasyente papuntang Maynila.

Samantala, bilang bisyo ko ang magserbisyo, patuloy ako at ang aking opisina sa pagbisita sa ating mga kababayan upang mamahagi ng tulong sa abot ng aming makakaya.

Noong July 14, nagtungo tayo sa Rizal Park sa Davao City para magbigay ng dagdag na tulong sa 1,272 mga biktima rin ng sunog noon mula sa iba’t ibang barangay. Personal nating sinaksihan ang ipinamahaging emergency housing assistance ng National Housing Authority sa mga benepisyaryo, sa pakikipagtulungan kasama ang tanggapan nina Davao City Mayor Sebastian “Baste” Duterte at NHA Regional Manager ng Davao Region na si Engr. Clemente Dayot.

Noong July 13, nasa Davao del Norte tayo kung saan dinaluhan natin ang inauguration ng Sangguniang Panlalawigan Building sa Tagum City sa imbitasyon ng lokal na pamahalaan. Sinilip din natin ang Tagum City Motorpool for Care for School Chairs Program kasama sina Vice Governor Oyo Uy at Mayor Rey Uy.

Sa kaparehas na araw, dumalo rin tayo sa groundbreaking ng Super Health Center ng siyudad na sinundan naman ng pamamahagi natin ng tulong sa 1,500 na mga mahihirap nating kababayan doon kasama ang lokal na pamahalaan.

Noong July 12, tayo ay nasa Cebu para daluhan ang groundbreaking ng Super Health Center sa Carcar City at mamahagi ng tulong sa 2,000 na indigents sa lugar kasama sina Governor Gwendolyn Garcia, Congresswoman Rhea Gullas, Mayor Mario Patricio Barcenas at Vice Mayor Efren Quijano. Ininspeksyon din natin ang Carcar City New Public Market na napondohan ang pagsasaayos sa ating pamamagitan.

Sinundan ito ng ating monitoring visit sa Malasakit Center sa Cebu Provincial Hospital kung saan namigay tayo ng tulong sa 170 pasyente at 243 frontliners. May hiwalay na tulong ang DSWD sa mga kwalipikadong pasyente. Namahagi rin tayo ng tulong sa 2,000 na mahihirap na residente sa Naga City sa tulong ng opisina ni Mayor Valdemar Chiong.

Binisita natin ang seawall project at turn over ng mga sasakyan para sa lungsod na atin ding sinuportahang mapondohan noon.

Pagkatapos ay dinaluhan natin ang Liga ng mga Barangay NCR Regional Summit 2023 na ginanap sa Davao City kung saan binigyang-diin ko ang aking suporta sa kapakanan at karapatan ng ating barangay at Sangguniang Kabataan officials.

Nitong nakaraang linggo, nagkaroon din ng iba’t ibang relief activity ang aking opisina sa buong bansa. Sa Camarines Sur, namahagi tayo ng assistance sa 94 na kababayan natin sa mga conflict-affected at geographically isolated barangays; at 450 na mahihirap naman sa Canaman at Calabanga.

Namahagi rin tayo ng tulong sa 57 na mahihirap na residente sa Muntinlupa City; 57 sa Licab at 237 sa Gapan, Nueva Ecija; 75 na persons with disabilities sa Davao City; 300 na mahihirap sa Pasig City; at 1,000 sa Meycauayan City, Bulacan. May 109 pamilyang biktima ng sunog rin ang naabutan ng tulong sa Brgy. 23-C, Davao City.

Nagpaabot din tayo ng suporta sa groundbreaking ng Super Health Center sa Estancia, Iloilo, at namahagi rin ng tulong ang aking team sa 1,000 na mahihirap doon.

Tandaan natin na sa bawat pagsubok, may kasamang pagkakataon para sa atin na matuto at magpatuloy. Sa nalalapit na SONA ni Pangulong Marcos Jr., aking inaasahan na patuloy na ipapakita ng ating gobyerno ang dedikasyon at malasakit sa sambayanang Pilipino. Sa ating pagtutulungan at pagkakaisa, tiyak na malalampasan natin ang hamong ating kinakaharap at maaabot natin ang isang mas magandang kinabukasan para sa lahat.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

E-Governance Act, para sa mas maayos na serbisyo publiko

ni Bong Go @Bisyo Magserbisyo | July 12, 2023

Hindi na katulad ng dati ang panahon ngayon. Kasabay ng pagsulpot ng mga makabagong teknolohiya, iba’t ibang uri rin ng problema at mga hamon ang ating kinakaharap. Kabilang na rito, ang pagtaas ng bilang ng mga krimeng nagaganap sa cyberspace.

Ayon sa ulat ng Philippine National Police, ang bilang ng mga cybercrime sa Metro Manila sa first half ng 2023 ay tumaas ng 152% kumpara sa parehong panahon noong nakaraang taon.

Hindi natin maaaring palampasin ang ganitong uri ng krimen. Kahit saan man ito mangyari, online man o hindi, kailangang panagutin ang mga taong nasa likod nito.

Kasama sa ating mga hakbangin upang maresolba ang isyu ng cybercrime, ang pagsiguro na ang gobyerno ay makakasabay sa pangangailangan ng panahon ngayon gamit ang teknolohiya. Kaya ko ipinaglalaban ang pagtataguyod ng E-Governance Act.

Kung maipasa, layunin ng panukalang batas na ito na magtatag ng isang integrated at interconnected na information at resource-sharing network na sasaklaw sa national at mga local government units sa bansa. Sa ilalim ng panukalang ito, dapat tayong magkaroon ng internal records management information system, information database, at digital portals para sa mas maayos na paghahatid ng mga serbisyo ng pamahalaan.

Naniniwala akong malaki ang maitutulong ng E-Governance Act hindi lamang sa paglaban sa cybercrime kundi mailapit ang serbisyo publiko sa mga nangangailangan nito. Ang pagkakaroon ng mga digital portal para sa paghahatid ng public services ay magbibigay-daan sa mas mahusay na pagsusuri at pag-monitor ng mga transaksyon upang maproteksyunan ang kapakanan ng ating mga kababayan.

Sa pamamagitan ng institutionalization ng E-governance roadmap, mas mabilis ang pagkuha ng impormasyon at serbisyo mula sa pamahalaan. Sa halip na pumila ng ilang oras, o kaya’y bumiyahe ng malayo, mapapadali na natin ang proseso sa pamamagitan ng isang click lamang.

Kaya natutuwa ako na isa rin ito sa prayoridad ng kasalukuyang administrasyon.

Maliban dito, ang panukalang ito ay nagtataguyod din ng digitalization ng mga paper-based na proseso upang maabot ng gobyerno ang mas mataas na efficiency at transparency sa mga serbisyong pampubliko. Kaya mas lalong mailalapit natin ang mga serbisyo ng gobyerno sa mga Pilipino nasaan man sila sa mundo.

Isa rin ako sa mga co-author at co-sponsor ng Internet Transactions Bill na kung maipasa ay magbibigay ng proteksyon sa mga consumers at sellers na nakikipagtransaksyon sa pamamagitan ng internet.

Sa ilalim ng panukala, magkakaroon ng E-Commerce Bureau na mangangasiwa sa regulasyon ng internet transactions para maiwasan ang anumang uri ng panloloko gamit ang internet.

Aminado tayo na ang digital transformation sa pamahalaan ay isang malaking hakbang, ngunit kinakailangan natin ito. Tulad ng mga pribadong sektor na naka-adapt na sa e-commerce platforms para mapabuti ang kanilang mga serbisyo, dapat ring maka-adapt ang pamahalaan at magkaroon ng kakayahang harapin ang mga hamon ng makabagong panahon.

Samantala, sa kabila ng ating pagtugon sa problema ng makabagong panahon, patuloy rin tayo sa paglilingkod sa ating mga ordinaryong kababayan. Hindi ako titigil sa pagtulong sa abot ng aking makakaya dahil bisyo ko na ang magserbisyo.

Noong July 11, tayo ay nagpunta sa Trece Martires City, Cavite upang mag-abot ng tulong sa 1,330 na mga mahihirap na residente roon. Ang relief effort na ito ay isinagawa sa pakikipagtulungan ng opisina ni Mayor Gemma Lubigan. Bilang adopted son ng CALABARZON region, ang bawat ngiti at pasasalamat na ating natanggap mula sa kanila ay sapat na upang mapawi ang ating pagod.

Noong July 10, nagtungo naman tayo sa Quezon City para mamahagi ng tulong sa 210 na mga biktima ng sunog at 1,000 indigents sa lugar, katuwang ang tanggapan nina Congressman PM Vargas at Councilor Alfred Vargas.

Samantala, sa loob ng mga nakaraang araw, namahagi rin tayo ng tulong sa mga kababayan natin sa iba’t ibang parte ng bansa, gaya ng mga 550 pamilyang apektado ng pag-aalburoto ng Bulkang Mayon sa Sto. Domingo, Albay, at mga mahihirap nating kababayan na may hinaharap na iba’t ibang krisis at sakuna, tulad ng 750 sa Tangalan, Aklan; 100 sa Balayan, Batangas at 55 pamilyang apektado ng sunog sa Quezon City.

Mananatili tayong matatag, nagkakaisa, at nagtutulungan. Unahin natin ang kapakanan ng mga mahihirap at magmalasakit tayo para matugunan ang kanilang mga pangangailangan. Sama-sama nating harapin ang mga hamon ng makabagong panahon tungo sa isang mas ligtas at progresibong Pilipinas.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Kapag matatag ang agrikultura, walang magugutom

ni Bong Go @Bisyo Magserbisyo | July 8, 2023

Suportado natin ang direktiba ni Pangulong Ferdinand “Bongbong” Marcos, Jr. sa National Bureau of Investigation na magsagawa ng malalimang imbestigasyon sa diumano’y kartel sa sibuyas at pag-iimbak ng iba pang produktong agrikultural, at pagmamanipula sa presyo ng mga mapagsamantala.

Bilang isang mambabatas, napakahalaga para sa akin na mapangalagaan ang interes ng ating mga lokal na magsasaka at mga mamimili, lalo na ang mga mahihirap nating kababayan dahil bawat piso sa kanila ay mahalaga.

Kailangang mawakasan na ang ganitong pagmamanipula ng kartel na nagreresulta sa sobrang pagtaas ng presyo ng sibuyas at bumubutas sa bulsa ng ating mga kababayan.

Dapat na mapanagot ang mga responsable rito.

Ang sektor ng agrikultura ang isa sa pinaka-backbone ng ating ekonomiya.

Napakahalaga ng papel ng ating mga magsasaka para matiyak ang seguridad sa pagkain ng buong bansa. Ngayong may banta pa ng tagtuyot dahil sa El Niño phenomenon, lalong mahaharap sa mabigat na pagsubok ang ating mga magsasaka. Dapat magtulungan ang gobyerno at ang iba pang ahensya para maging mas matatag ang ating sektor ng agrikultura, at mabawasan ang epekto ng mga kalamidad sa ating mga magsasaka at mga komunidad na ang pangunahing pinagkakakitaan ay pagsasaka.

Sa parte ko bilang senador, patuloy akong susuporta sa mga programa ng gobyerno na layuning palakasin ang sektor ng agrikultura dahil napakahalaga ng mga magsasaka sa ating pangkalahatang pagsulong at pag-unlad. Magtulungan tayo at sikaping walang magutom dahil napakaimportante sa pag-unlad na may laman ang tiyan ng bawat Pilipino.

Kung kaya ikinagagalak ko ang pagpirma ni Pangulong Bongbong Marcos, Jr. kahapon, July 7, ng Republic Act 11953 o ang New Agrarian Emancipation Act. Layunin nito na hindi na magbayad ang mga Agrarian Reform Beneficiaries ng P58 bilyong halaga ng kanilang pagkakautang sa ilalim ng Comprehensive Agrarian Reform Program ng gobyerno, at maging ang ibang pagkakautang mula sa iba pang agrarian reform programs. Naging co-author at co-sponsor tayo ng Senate Bill No. 1850 ng nasabing batas.

Bahagi pa rin ng ating pagsuporta sa mga magsasaka, kahapon, July 7, ay nagpadala tayo ng mensahe sa ginanap na pamamahagi ng Certificate of Land Ownership Award sa mga Agrarian Reform Beneficiaries sa Davao Region at nagkaloob sa mga ito ng kaunting tulong, kasabay ng ceremonial signing ng New Agrarian Emancipation Act. Masaya tayo na pag-aari na nila ngayon ang kanilang lupang sinasaka.

Inihain natin ang Senate Bill No. 2118 na naglalayon na mabigyan ng mas magandang insurance coverage at mga serbisyo ang ating mga magsasaka para matulungan silang mapagaan ang epekto ng mga kalamidad sa kanilang hanay. Isa tayo sa may-akda ng Republic Act No. 11901 na nagpalawak sa agriculture, fisheries, and rural development financing system. Sinuportahan din natin ang pagsasaayos ng irigasyon sa mga taniman at ang pagpapalawak ng National Rice Program. Sinuportahan natin ang plano na ang mga nakatiwangwang na lupa na pag-aari ng pamahalaan na hindi naman ginagamit ay gawing taniman para mapakinabangan ng ating mga magsasaka at mas mapalakas ang produksyon ng pagkain sa ating bansa.

Samantala, bisyo ko ang magserbisyo kaya naman patuloy ang aming tanggapan sa pagkakaloob ng tulong sa mga kababayan nating nahaharap sa iba’t ibang krisis. Noong July 7 ay maagap nating dinamayan ang mga naging biktima ng magkakahiwalay na insidente ng sunog gaya ng 81 residente ng Bgy. Alang-Alang at 44 pa sa Bgy. Jagobiao, Mandaue City, Cebu katuwang si Congresswoman Emarie “Lolypop” Ouano-Dizon.

Namahagi tayo ng tulong sa 828 estudyante ng Cainta at 868 estudyante sa Binangonan, Rizal katuwang si Governor Nina Ynares. Napagaan natin ang dalahin ng 200 mahihirap na residente ng Project 4, Bgy. Marilag, Quezon City katuwang si Councilor Anton Reyes, gayundin ang 120 benepisyaryo sa Pili, Camarines Sur katuwang sina Board Members Vanessa Senar at John Apollo Manaog. Nagkaloob din tayo ng tulong sa 197 miyembro ng iba’t ibang sektor sa Alamada, North Cotabato at 70 sa Bgy. Tibungco, Davao City na biktima ng pagbaha.

Nakarating ang aking relief team sa Antipolo City noong July 6 at katuwang pa rin si Gov. Ynares ay naalalayan ang 1,700 estudyante. Sa Bani, Pangasinan ay 350 benepisyaryo ang ating napagaan ang dalahin katuwang si Vice Mayor Gwen Yamamoto. Mayroong 49 residente na napasaya sa Plaridel, Bulacan katuwang si Mayor Jocell Vistan. Nabiyayaan din ang 160 mahihirap na residente sa Nabua, Camarines Sur.

Nag-ikot din ang aking team noong June 5, katuwang si Mayor Dennis Glean at mga konsehal ay naalalayan ang 500 mahihirap na residente ng Gen. Emilio Aguinaldo, Cavite. Napasaya rin ang 266 benepisyaryo sa mga bayan ng General Mamerto Natividad, Laur at Bongabon, at sa Cabanatuan City, Nueva Ecija katuwang si Governor Aurelio Umali.

Sa San Fernando, Pampanga, katuwang sina Mayor Vilma Caluag at Councilor Ato Agustin ay napagaan ang dalahin ng 196 na residente. Hindi rin kinaligtaan ang 100 benepisyaryo sa Bgy. 107, Zone 9, District 1, Manila City kasama si Punong Barangay Dominador Caccam. Naayudahan din ang 180 mahihirap na residente ng Libmanan, Camarines Sur; at ang 100 solo parents sa Bgy. Mintal, Davao City.

Bawat sentimo ay mahalaga sa bawat Pilipino lalo na sa panahon ngayon. Patuloy kong ipaglalaban ang karapatan ng bawat Pilipinong nagpapakahirap magbanat ng buto at magpatulo ng pawis sa buong maghapon para lang may maiuwi at matiyak na may mailalaman sa tiyan ng kanilang pamilya.

Poprotektahan ko rin ang karapatan ng bawat mamimili, at dapat na ang perang kanilang pinaghirapan ay maibili nila ng produktong may tamang presyo at hindi minanipula ng mga mapagsamantala.

Gaya ng madalas kong sabihin, ang importante ay napapangalagaan ang kalusugan ng ating mga kababayan, at wala dapat magutom na Pilipino.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.