Super Health Centers, isang malaking hakbang para mapangalagaan ang kalusugan ng bawat Pilipino

ni Bong Go @Bisyo Magserbisyo | September 6, 2023

Madalas nating marinig ang kasabihang health is wealth. Totoo ito. Kapag malusog at malakas ang isang tao, at walang dinaramdam sa katawan, daig niya ang isang may pera nga pero nakahiga na lang sa kwarto at walang ibang magawa dahil sa sakit. Isa ang kasabihang ito sa ating gabay bilang Chair ng Senate Committee on Health para patuloy na proteksyunan ang buhay at kalusugan ng mga Pilipino.

Isa sa mga inisyatibang isinulong natin ang pagpapatayo ng Super Health Center sa iba’t ibang komunidad sa ating bansa para mas mailapit sa ating mga kababayan, lalung-lalo na ang mga mahihirap, hopeless, helpless at walang ibang malalapitan maliban sa pamahalaan, ang pangunahing serbisyong medikal.

Itatayo sa mga estratihikong lokasyon na tutukuyin ng Department of Health, nakadisenyo ang Super Health Center sa pagbibigay ng primary care, konsultasyon, at early detection ng mga sakit lalo na sa malalayong komunidad. Sa pamamagitan ng Super Health Center, mababawasan din ang mga pasyente sa malalaking ospital.

Ang Super Health Center ay isang medium type version ng polyclinic, at improved version ng rural health unit. Ang mga serbisyong hatid nito ay database management, out-patient, birthing, isolation, diagnostic (laboratory: X-Ray, ultrasound), pharmacy, at ambulatory surgical unit. Ang iba pang kayang ipagkaloob nito ay eye, ear, nose, and throat (EENT) service; oncology centers; physical therapy at rehabilitation center; at telemedicine kung saan maaaring magpakonsulta ang pasyente sa pamamagitan ng telepono. Magagamit din ito bilang satellite vaccination sites kapag may pabakuna ang DOH.

Nakapaglaan ang Kongreso ng budget para sa pagpapatayo ng 307 Super Health Centers sa year 2022, at may napondohang 322 naman ngayong taon—at patuloy nating sisikapin at ipaglalaban na madagdagan pa ito para mas maraming matulungang Pilipino.

Sa katunayan, nagkaroon na ng groundbreaking para sa itatayong Super Health Center sa Nabas, Aklan noong September 1. Ang okasyon ay sinaksihan din nina Congressman Ted "Nonong" Haresco, Vice Mayor James Solanoy, at Councilor Leovilyn dela Torre.

Bukod dito, magkakaroon din ng Super Health Center ang iba pang lugar sa Aklan gaya ng Tangalan, Kalibo, Ibajay, Balete, Batan, Malay, New Washington, at Numancia.

Nagkaroon din ng groundbreaking ng Super Health Center sa Hilongos, Leyte noong araw na iyon na dinaluhan nina Leyte 5th District Representative Carl Cari, Mayor Manuel Villahermosa at iba pang opisyal. Kasabay nito ay nagkaroon ng inagurasyon ng Super Health Center sa Dinalupihan, Bataan na dinaluhan mismo ni Congresswoman Gila Garcia, Governor Jose Enrique “Joet” Garcia III, Mayor Tong Santos, at Vice Mayor Fer Manalili.

Noong August 31 naman ay nagkaroon din ng inagurasyon ang Super Health Center sa Calatagan, Batangas kasama sina Mayor Peter Palacio, Vice Mayor Rogelio Zarraga at iba pang mga konsehal. Nagkaroon naman ng groundbreaking ceremony para sa itinatayong Super Health Center sa Lian, Batangas na pinamunuan nina Vice Governor Mark Leviste, Mayor Joseph Peji at Vice Mayor Ronin Leviste noong araw na iyon.

Ang pagpapatayo ng Super Health Centers ay isang mahalagang hakbang tungo sa pagpapabuti ng kalusugan ng ating mga kababayan sa mga kanayunan. Ito ay nagpapakita ng dedikasyon ng ating pamahalaan na dalhin ang serbisyong pangkalusugan nang mas malapit sa ating mga komunidad. Layunin natin na tiyakin na hindi na nila kailangang maglakbay nang malayo para lang makakuha ng mga pangunahing serbisyong pangkalusugan.

Bahagi rin ito ng ating laging panawagan at adhikain na hikayatin ang pamahalaan na dapat tayong mag-invest sa ating healthcare system ngayon. Dapat maging one step ahead para hindi na tayo muling mabulaga sakaling may sumulpot na namang bagong sakit dahil hindi natin alam kung ang COVID-19 na ang huling pandemya na darating sa ating buhay. Kaya naman nakakabahala ang panukalang bawasan ng P10 bilyon ang budget ng DOH sa 2024. Sisikapin ko na ipaglabang madagdagan ang budget sa health.

Dapat unahin natin ang kalusugan ng bawat Pilipino dahil ang kalusugan ay katumbas ng buhay ng bawat Pilipino.

Bukod naman sa serbisyong pangkalusugan, hindi natin kinakaligtaan ang patuloy na pagtulong sa ating mga kababayang nangangailangan sa abot ng ating makakaya at kapasidad.

Kahapon, September 5, guest speaker tayo sa 50th commencement exercises ng Cavite State University-CCAT Rosario Campus at nagbigay tayo ng inspirasyon sa 680 graduates. Nagkaloob din tayo ng munting regalo sa mga nagtapos nang may karangalan.

Maagap namang inalalayan ng aking tanggapan ang 352 mahihirap na bumabangon pa mula sa nakaraang sunog sa Valenzuela City. Nakatanggap ang mga benepisyaryo ng tulong sa ilalim ng Emergency Housing Assistance Program (EHAP) ng National Housing Authority, bukod sa tulong mula sa aking opisina.

Ang programang EHAP ay nasimulan noong panahon pa ni dating pangulong Rodrigo Duterte. Isa ako sa nagsulong nito noon. Ngayon, ito ay ating patuloy na sinusuportahan para may maibili ng housing materials tulad ng pako at yero ang mga nasunugan.

Nitong nakaraang araw din ay nabigyan natin ng personal na tulong ang 71 residente ng Parañaque City na nasunugan.

Naghatid din tayo ng ayuda para sa 44 mahihirap na residente ng Makati City; at 44 sa Pasay City.

Bukod sa ating ibinigay ay nakatanggap din sila ng tulong mula sa DOLE sa ilalim ng Tulong Panghanapbuhay sa Ating Disadvantaged/Displaced Workers (TUPAD) program ng ahensya.

Naalalayan din natin ang 21 micro entrepreneurs sa Ma-ayon, Capiz, sa pamamagitan ng DTI-Pangkabuhayan sa Pagbangon at Ginhawa (PPG) Program, na ating isinulong noong administrasyon ni dating pangulong Duterte at patuloy na sinusuportahan ngayon para maipagpatuloy ang pagtulong sa ating maliliit na negosyante na naapektuhan ng sakuna at krisis.

Sa programang PPG, tuturuan ang mga benepisyaryo na magnegosyo at bibigyan ng puhunan para palaguin ito. Masarap sa pakiramdam kapag pinaghirapan at pinagpawisan mo ang iyong negosyo at napalago mo ito. Ang maayos na kabuhayan ang isa sa mga magiging susi sa pagginhawa ng pamumuhay ng iyong pamilya.

Lagi nating tandaan na isang beses lang tayo dadaan sa mundong ito. Kung anong kabutihan o tulong na puwede nating gawin sa ating kapwa tao, gawin na natin ngayon dahil hindi na tayo babalik sa mundong ito. Kung ang kalusugan ay kayamanan, ang pagkakaloob naman ng serbisyo sa kapwa ang nakapagbibigay ng tunay na kaligayahan.

Patuloy akong magseserbisyo sa kapwa ko Pilipino sa abot ng aking makakaya dahil naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Mabuting kalusugan, tiyak ang dekalidad na pamumuhay

ni Bong Go @Bisyo Magserbisyo | September 2, 2023

Ang estado ng kalusugan ng mga mamamayan sa isang bansa ay isang batayan din ng kalagayan ng kalidad ng buhay. Kaya para sa akin, bilang Chair ng Senate Committee on Health at Vice Chair ng Finance Committee, dapat maglaan ang pamahalaan ng sapat na pondo sa mga programang pangkalusugan na pinamumunuan ng Department of Health.

Kailangang matiyak na maging ang pinakamahihirap nating kababayan, mga hopeless, helpless at walang malalapitan maliban sa pamahalaan ay may access sa dekalidad na serbisyong pangkalusugan. Kaya nababahala ako sa panukala na bawasan ng P10 bilyon ang budget ng DOH sa 2024 lalo pa at bumabangon pa lang tayo mula sa pandemya at mas kailangan natin na palakasin pa ang ating healthcare system upang maging mas handa sa anumang krisis na maaaring dumating.

Nagulat tayo nang dumating ang COVID-19 sa ating buhay. Nakita natin ang kakulangan ng ating sistemang pangkalusugan. Gayunpaman, naging oportunidad din ito para masilayan natin ang mga dapat mas pagtuunan ng pansin upang maging mas handa tayo. At dahil dito, sabi ko nga, ‘the more we should invest sa ating healthcare system.’

Noong isang taon ay ipinaglaban natin na madagdagan ang budget ng DOH, na mula sa P296 bilyon ay naging P316 bilyon ang kanilang 2023 budget. Noong 2019 naman bago dumating ang pandemya ay muntik ding binawasan ang budget para sa Research Institute for Tropical Medicine. Hindi po tayo pumayag. In fact, dinagdagan pa natin sila noong budget deliberations.

Tama nga ang kutob ko, sino ba ang mag-aakala na ang RITM ang magiging isa sa pinakaimportanteng opisina sa panahon ng pandemya? Ang RITM din ang may kakayahan na mag-test ng iba pang nakahahawang sakit bukod sa COVID-19.

Isinulong din natin ang paglalaan ng karagdagdang budget para sa Cancer Assistance Fund. Ang Cancer Assistance Fund ay wala noon sa proposed budget ng 2023. Maganda na napondohan ito ng Lower House, at dinadagdagan pa namin sa Senado. Para naman sa susunod na taon, isusulong ko na madoble ito dahil alam naman natin na ang hirap magkasakit ng cancer, magastos, at talagang pilay ang pamilya lalo na ang mahihirap.

Bukod pa sa pagdadagdag ng budget pangkalusugan, hindi rin tayo titigil sa ating hangarin na ilapit ang serbisyo medikal ng gobyerno sa mga nangangailangan nito saan man sila naroroon sa bansa at anuman ang kanilang estado sa buhay.

Una na rito ang patuloy na operasyon ng Malasakit Centers na ating isinulong at naisabatas noon bilang principal sponsor at pangunahing may-akda. Sa kasalukuyan ay mayroon ng 158 Malasakit Centers, at mahigit pitong milyong Pilipino na ang natulungan nito ayon sa datos ng DOH.

Pangalawa ay ang pagkakaroon ng Regional Specialty Centers sa mga regional hospitals ng DOH na atin ding isinulong na maisabatas kamakailan lamang bilang principal sponsor at isa sa mga may akda nito. Ang Regional Specialty Centers Act ay multi-year plan para ilapit ang specialized medical services sa ating mga kababayan. Halimbawa, ang may sakit sa puso, hindi na kailangang sa Maynila pa magpaopera dahil doon na siya pupunta sa DOH regional hospital na malapit sa kanilang lugar.

Pangatlo naman ay ang pagpapatayo ng Super Health Centers sa iba’t ibang sulok ng bansa na ating sinikap na mapondohan. Ang Super Health Center naman ay medium type version ng polyclinic, at improved version ng rural health unit. Sa SHC ay mapagkakalooban ang pasyente ng primary care, konsultasyon at early detection ng kanyang sakit. May 307 na napondohan noong 2022 at 322 naman ngayong taon.

Itinatayo ito sa mga strategic areas na natukoy ng DOH.

Masaya kong ibinabalita na kahapon, September 1, ay nagkaroon na ng groundbreaking ng itatayong Super Health Center sa Hilongos, Leyte; at sa Nabas, Aklan. Dinaluhan din ng aking opisina ang inauguration and blessing ng Super Health Center sa Dinalupihan, Bataan.

Nitong August 31, nagkaroon na rin ng groundbreaking para sa itatayong Super Health Center sa Lian, Batangas habang nagkaroon din ng blessing and turnover ng Super Health Center sa Calatagan, Batangas na aking unang binisita noong November 2022.

Bukod pa sa ating mga adhikaing pangkalusugan, hindi tayo tumitigil sa ating mga gawain sa labas ng Senado lalo na ang paglalapit ng serbisyo at paghahatid ng tulong sa mga nangangailangan.

Guest speaker tayo sa ginanap na 23rd National Midyear Convention of the Philippine Academy of Family Physicians noong August 31 sa SMX Convention Center Lanang, Davao City.

Pinasalamatan natin ang mga family physicians sa kanilang naging sakripisyo noong pandemya at hanggang ngayon para mapangalagaan ang kalusugan ng mga Pilipino.

Patuloy din ang ating suporta sa bawat laro ng Gilas Pilipinas sa 2023 FIBA World Cup, bilang tayo ang chair ng Senate Committee on Sports.

Tuluy-tuloy naman ang aking tanggapan sa pag-alalay sa ating mga kababayang nahaharap sa iba’t ibang krisis. Naayudahan ang 650 residente ng Bgy. Napnapan, Pantukan, Davao de Oro na naging biktima ng pagbaha.

May mga nakatanggap ng tulong sa ilalim ng DTI Pangkabuhayan sa Pagbangon at Ginhawa (DTI-PPG) na isang programang ating isinulong noong panahon ni dating pangulong Rodrigo Duterte at ipinagpapatuloy na suportahan ang implementasyon ngayon. Kasama rito ang 15 benepisyaryo sa Lemery, Iloilo; 43 sa Roxas City, Capiz; at 40 pa sa Libacao, Aklan. Bukod sa pangkabuhayan, nagbigay rin ako ng personal na tulong at suporta sa kanila.

Katuwang naman ang TESDA, naalalayan natin ang 25 benepisyaryo sa Bgy. Pulanglupa, Trento, Agusan del Sur.

Bukod naman sa Emergency Housing Assistance Program mula National Housing Authority ay nagbigay tayo ng dagdag na tulong sa 16 residente ng Caloocan City. Ang programang EHAP na ating isinulong noon at patuloy na sinusuportahan ngayon ay nagbibigay ng tulong para pambili ng yero, pako at iba pang materyales na pampaayos ng bahay ng mga biktima ng krisis.

Namahagi rin tayo ng dagdag na tulong sa mga naging benepisyaryo ng Tulong Panghanapbuhay sa Ating Disadvantaged/Displaced Workers (TUPAD) ng DOLE tulad ng 269 na mahihirap sa Baliwag, at 150 sa Bustos, mga lugar sa Bulacan.

Ako ay naniniwala na ang serbisyo sa tao ay serbisyo sa Diyos. Kaya bilang lingkod bayan, tutulong ako sa abot ng aking makakaya at sisikapin kong mas ilapit pa ang serbisyo ng gobyerno sa mga taong nangangailangan nito -- lalo na ang mga mahihirap at biktima ng krisis.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Regional specialty centers, para sa mas mahusay na paghahatid ng serbisyong medikal

ni Bong Go @Bisyo Magserbisyo | August 30, 2023

Napakasarap sa pakiramdam kapag ang isang bagay na ating pinaghihirapan para maialay sa ating mga Kababayan ay nagkakaroon ng katuparan sa pamamagitan ng ating pakikipagtulungan kasama ang mga kapwa natin lingkod-bayan.

Kaya naman masayang-masaya tayo na ganap nang naging batas noong August 24, 2023 ang Republic Act No. 11959 o ang Regional Specialty Centers Act na tayo ang principal sponsor at isa sa mga may-akda sa Senado. Nakakuha ito ng 24-0 na boto sa Senado dahil sa pagsang-ayon ng aking mga kasamahan na makakabuti ito para sa lahat at makakatulong sa mahihirap, nasaan man sila sa ating bansa at anuman ang katayuan nila sa buhay. Ito ay simbolo ng ating pagkakaisa para sa kapakanan ng bawat Pinoy.

Ang Regional Specialty Centers Act ay isa sa mga prayoridad na batas ng kasalukuyang administrasyon at bahagi ng una at ikalawang State of the Nation Address ni Pangulong Ferdinand Marcos, Jr. Isinulong po natin ito bilang tayo ang Chair ng Senate Committee on Health, at bahagi ng ating adhikain na mapangalagaan ang kalusugan ng bawat Pilipino, lalung-lalo na ang mga mahihirap, hopeless, helpless at walang malalapitan maliban sa gobyerno.

Layunin ng bagong batas na ito na mailapit ang specialized medical care sa ating mga kababayan lalo na sa malalayong komunidad sa pamamagitan ng pagtatayo ng specialty centers sa mga regional hospitals ng Department of Health. Dahil dito, ang ating mga kababayan na may malalang karamdaman ay hindi na kailangan pang pumunta sa Maynila para magpagamot sa mga specialty hospitals tulad ng Philippine Heart Center o Lung Center dahil magkakaroon na ng ganyang specialty center sa regional hospitals na malapit sa kanila.

Kapag naitayo na ang mga Regional Specialty Centers sa mga existing hospitals sa iba’t ibang rehiyon, ang mga pasyente na nangangailangan ng special medical care -- lalo na ang mga nasa probinsya -- ay hindi na kinakailangan pang bumiyahe at gumastos pa para lang magpagamot sa mga specialty hospitals sa Maynila. Ang gobyerno na ang mismong maglalapit ng serbisyo medikal sa mga tao.

Sa pagpapatupad ng bagong batas, ang DOH ay makikipag-ugnayan sa National Specialty Centers para matiyak na ang specialty centers sa DOH hospitals sa buong bansa ay may mga dalubhasang personnel na may sapat na pagsasanay, bukod pa ang equipment na kakailanganin. Kung ano ang serbisyong kayang ibigay ng specialty centers sa Metro Manila, ganoon din sana ang serbisyong kayang ihatid ng regional specialty centers na itatayo.

Gaya ng madalas kong sabihin, walang Pilipino ang dapat mapag-iwanan pagdating sa kalusugan. Ang Regional Specialty Centers Act ay isang malaking hakbang patungo sa mas abot-kamay na serbisyong pangkalusugan para sa bawat Pilipino, nasaan man sila sa bansa.

Tumutugma rin ito sa ating layunin na magkaroon ng universal access sa serbisyong pangkalusugan. Kaakibat nito ang nauna nating isinulong na Malasakit Centers Act na tayo ang naging principal author at sponsor sa Senado, gayundin ang pagtatayo ng Super Health Centers sa buong bansa na nakapokus sa primary care, konsultasyon, at maagang pagkatuklas sa mga sakit ng mga residente.

Sa datos ng DOH, mahigit pitong milyong benepisyaryo na ang natulungan ng Malasakit Center program -- at patuloy pa itong nadaragdagan araw-araw. Nasa 307 SHCs naman ang napondohan noong 2022, at target nating makapagpatayo rin ng 322 ngayong taon.

Sa pagpasa ng Universal Health Care Law noong 2019 noong administrasyon ni dating pangulong Rodrigo Duterte at ang implementasyon kamakailan ng Konsulta benefit package ng PhilHealth, panibagong karagdagan ang Regional Specialty Centers Act sa mga repormang ating isinasagawa para mapalakas ang ating healthcare system. Sa pamamagitan ng Regional Specialty Centers Act, tinatanggal natin ang mga hadlang sa kalusugan at dinadala ang serbisyong medikal nang mas malapit sa ating mga kababayan.

At dahil bisyo ko ang magserbisyo, patuloy ang ating ginagawang pag-alalay sa ating mga kababayang nahaharap sa iba’t ibang krisis.

Noong Lunes, August 28, nakiisa tayo sa sambayanang Pilipino sa pagdiriwang ng Araw ng mga Bayani. Personal din nating pinangunahan ang pamamahagi ng tulong sa 1,000 estudyante sa Parañaque City kasama si Congressman Gus Tambunting. Pinaalalahanan natin ang mga kabataan na puwedeng maging hero rin po sila in their own ways. Malaki po ang kanilang maiaambag sa ating bansa kung pahalagahan nila ang kanilang edukasyon bilang tanging puhunan natin sa mundong ito. Sila po ang kinabukasan ng ating bayan!

Naglibot at nag-abot din ng tulong ang aking opisina sa iba’t ibang komunidad tulad ng 606 na mahihirap na residente ng Dauis, Bohol; 530 sa Buenavista, Guimaras; 142 na magsasaka at mangingisda sa Alegria, Cebu; 38 sa Science City of Muñoz, Nueva Ecija; at 33 pa sa Mabalacat, Pampanga.

Nitong August 27, Linggo, ay personal din nating dinaluhan ang selebrasyon ng 50th Anniversary ng Pentecostal Missionary Church of Christ (4th Watch) sa New Clark City Athletics Stadium sa Capas, Tarlac. Dumalo rin ang mga kapwa ko mambabatas na sina Senator Robin Padilla at Senator Raffy Tulfo sa pagtitipon. Nagpasalamat ako sa pagkilala nila sa ating pagseserbisyo sa pamamagitan ng Apostle Arsenio Ferriol Award of Excellence for Public Service and Governance na kanilang ibinahagi sa akin. May pagkilala man o wala, patuloy akong magseserbisyo sa aking kapwa dahil naniniwala ako na ang serbisyo sa tao ay serbisyo sa Diyos.

Kung may mga napagtagumpayan man tayo, hindi tayo dapat huminto sa pagtatrabaho para makapaghatid ng kaginhawahan sa buhay ng bawat Pilipino.

Patuloy nating isusulong ang mga panukala at programa na makakatulong sa mahihirap para masolusyunan ang mga hamon na dumarating sa ating bansa. Hindi ako pulitikong mangangako, sa halip ay gagawin ko po ang aking makakaya upang masuklian ang tiwalang ibinigay ninyo sa akin na pagserbisyuhan kayong lahat.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.