P1B alokasyon para sa Cancer Assistance Fund, isulong

ni Bong Go @Bisyo Magserbisyo | September 16, 2023

Marami sa ating mga kababayan ang nakararanas ng sakit na cancer.

Gayunpaman, hindi lamang ito problema sa ating bansa kundi isang pandaigdigang suliranin din. Kaya naman, bilang Chair ng Senate Committee on Health, patuloy kong isinusulong ang pagdagdag sa pondo ng Cancer Assistance Fund sa ilalim ng Department of Health.

Noong nakaraang taon, naglaan ang Mababang Kapulungan ng Kongreso ng P250 milyon na pondo para sa CAF. Pero hindi tayo tumigil doon. Sa Senado, dinagdagan pa natin ito at umabot sa kabuuang halaga na P500 milyon ang pondo nito para sa taong 2023.

Sa kabila nito, naniniwala tayo na hindi pa rin ito sapat. Kaya para sa susunod na taon, isinusulong natin, sa tulong ng ating mga kapwa mambabatas, na madoble ang CAF at maging P1 bilyon na ang pondo. Alam kong kulang na kulang pa rin ito sa rami ng mga nagkakasakit ng cancer. Pero naniniwala ako na isang hakbang ito tungo sa tamang direksyon.

Ang pagdami ng mga kaso ng cancer ay nangangailangan ng mas proactive na response mula sa gobyerno. Ang pagpapalakas ng CAF ay hindi lamang magbibigay-ginhawa sa financial constraints ng mga pasyente, kundi maging sa kanilang mga pamilya. Ito rin ay naaayon sa National Integrated Cancer Control Act na nilagdaan ni dating Pangulong Rodrigo Duterte noong 2019.

Sa ilalim ng NICCA, may access ang mga cancer patients sa tulong pinansiyal para sa kanilang iba’t ibang pangangailangan — mula sa screening tests hanggang sa specialized treatments. Kaya naman, patuloy kong ipinaglalaban ang mas malaking alokasyon ng pondo para sa CAF. Bawat piso na ilalagay natin dito, buhay ang ating nasasagip.

Ngunit, hindi lang ito tungkol sa cancer. Ipinaglalaban ko rin ang pagdagdag sa kabuuan ng ating health budget. Mahalaga ang kalusugan ng bawat Pinoy, lalo na ngayon na marami tayong mga pagsubok na hinaharap. Dapat ay one step ahead tayo at nararapat lamang na may sapat na budget ang gobyerno para maalagaan nito ang kalusugan ng kanyang mga mamamayan. Lagi nating tandaan na ang katumbas ng kalusugan ay buhay ng bawat kababayan!

Maliban sa pagtataguyod ng karapatan ninyo sa Senado, tuluy-tuloy din ako sa pagbaba sa grassroots upang personal na makumusta ang kalagayan ng ating mga kababayan dahil bisyo ko na ang magserbisyo.

Nitong September 14, sumama tayo sa isinagawang salo-salo sa Davao City kasama ang mga opisyal ng Commission on Higher Education, University of the Philippines System, at mga pinuno ng State Universities and Colleges ng bansa para ipagdiwang ang pagkatalaga ng kapwa ko Mindanaoan na si Atty. Angelo Jimenez bilang ika-22 Presidente ng Unibersidad ng Pilipinas.

Kinaumagahan, September 15, dumalo tayo muli sa kanilang pagtitipon sa imbitasyon ni CHED Chair Prospero de Vera. Nanawagan ako ng pagkakaisa at pakikipagtulungan ng mga SUCs kasama na ang UP, CHED at iba pang ahensya ng gobyerno, at mga kapwa ko mambabatas na patuloy nating isulong ang mga inisyatibo para sa kinabukasan ng mga kabataan dahil ang maayos na edukasyon ang tanging puhunan natin sa mundong ito.

Ito rin ang rason kung bakit isinabatas noong panahon ni dating P-Duterte ang Republic Act No. 10931, o ang Universal Access To Quality Tertiary Education Act. Ako rin ay nag co-author at co-sponsor ng panukalang Senate Bill No. 1360 na layuning mas palawakin pa ito lalo.

Pagkatapos ay dumiretso tayo sa Bislig City, Surigao del Sur para makiisa sa 23rd Charter Day celebration ng Bislig. Namahagi rin tayo ng mga grocery packs sa 32 new couples sa ginawang kasalang bayan doon. Dinaluhan din natin ang pagbubukas ng ika-159 na Malasakit Center sa Bislig District Hospital, kung saan namahagi tayo ng personal na tulong para sa mga pasyente at front liners.

Samantala, mula noon hanggang ngayon, patuloy tayong sumusuporta sa mga programang pangkabuhayan lalo na yung mga makakatulong sa mga mahihirap na nahaharap sa krisis. Sa ating pakikipagtulungan, ang Department of Trade and Industry ay nagbibigay ng mga negosyo kits sa mga kuwalipikadong benepisyaryo at tinuturuan sila kung paano palalaguin ang kanilang mga negosyo para mapakinabangan ng pamilya ang kanilang kikitain.

Nagbigay tayo ng karagdagang suporta sa mga benepisyaryo ng programang ito.

Kabilang sa mga natulungan natin ay ang 20 mula sa Dipaculao, Aurora; 57 sa Sanchez Mira at Abulog, Cagayan; 100 na naapektuhan ng lindol sa Montevista at New Bataan, at 50 sa Nabunturan sa Davao de Oro; 196 sa Malalag at Sulop, Davao del Sur; 20 sa Mangatarem, Pangasinan; 21 na biktima ng bagyong Egay sa Pigcawayan, North Cotabato; 132 na shear line victims sa Gingoog City, Misamis Oriental; at 36 na benepisyaryo mula sa Lutayan at Columbio, Sultan Kudarat at General Santos City.

Patuloy din ang aking suporta sa pamimigay ng emergency housing assistance ng National Housing Authority sa mga nasalanta ng sakuna upang makabili sila ng yero, pako at iba pang materyales pampaayos ng bahay. Nagbigay tayo ng karagdagang tulong sa mga benepisyaryo nito, kabilang ang 85 na biktima ng sunog sa Imus City, Cavite, at 65 sa Bacolod City, Negros Occidental.

Nagkaloob din tayo ng tulong sa 75 na TESDA graduates sa Victorias City, Negros Occidental.

Namahagi naman tayo ng dagdag na suporta sa mga manggagawang nawalan ng trabaho na benepisyaryo ng TUPAD program ng Department of Labor and Employment, kabilang ang 413 sa Talibon, Bohol; at 150 sa Plaridel, Bulacan. Nagbigay din tayo ng dagdag na tulong sa 333 na mahihirap na residente sa Paluan, Occidental Mindoro; at 234 sa Antipolo City, Rizal.

Noong September 15, dumalo ang aking opisina sa groundbreaking ng Super Health Centers sa New Washington at Malay sa probinsya ng Aklan.

Ang laban kontra cancer ay laban ng bawat Pinoy. Walang pinipili ang sakit na ito, at maaaring tamaan nito ang sinuman sa atin o ang ating mga mahal sa buhay. Kaya’t napakahalaga na magkaisa tayo sa layunin nating labanan ito.

Kaya’t hinihikayat ko rin ang bawat isa sa inyo na makiisa sa labang ito. Magtulungan tay upang makamit natin ang de-kalidad na serbisyong medikal na ating sandata upang wakasan na ang public health problem na ito.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Mental health ng mga kabataang Pinoy, proteksyunan

ni Bong Go @Bisyo Magserbisyo | September 13, 2023

Bilang Chair of Senate Committee on Health, naniniwala ako na ang kalusugan ay hindi lamang tumutukoy sa physical health ng isang tao, kundi maging sa mental health nito.

Kapag may isyu sa mental wellness ng isang bata, apektado rin ang bawat bahagi ng kanyang buhay – gaya ng kanyang academic performance, at pakikitungo sa pamilya at sa mga kaibigan.

Nitong Martes, September 12, inaprubahan na sa Senado ang Senate Bill No. 2200, o ang Basic Education Mental Health and Well-Being Promotion Act, na layuning itaguyod ang mental health ng mga kabataang Pilipino sa pamamagitan ng pagtatalaga ng Department of Education ng mental health specialists at associates sa ating mga paaralan.

Bilang co-author at co-sponsor ng panukala, buong puso kong pinasasalamatan ang principal author at sponsor nito na si Senator Sherwin Gatchalian sa kanyang pag-prioritize rito. Ang kanyang dedikasyon sa kapakanan ng ating kabataan ay kahanga-hanga, at ang kanyang pamumuno sa pagtaguyod ng inisyatibang ito ay ating sinasaluduhan.

Ang pagpasa ng panukalang ito ay isang malaking hakbang patungo sa pagkilala at pagtugon sa pangangailangan ng mental health sa ating mga kababayan. Ito ay hindi lamang isang tagumpay para sa Senado o para sa mga may-akda ng batas, kundi isang tagumpay para sa bawat Pilipino na nangangailangan ng suporta at pang-unawa pagdating sa kanilang mental well-being.

Tungkulin nating lahat, bilang mga mamamayan at lingkod-bayan na tugunan ang isyu ng mental health. Nararapat lamang na magtaguyod tayo ng ganitong mga inisyatibo upang masiguro ang kaligtasan ng ating mga kabataan lalo na sa harap ng mga pagsubok na nagdudulot ng depresyon at iba pang karamdaman sa pag-iisip na dapat seryosohin at tugunan. Hindi biro ang ganitong mga karamdaman at bilang mga magulang at nakakatanda ay gabayan natin sila tungo sa mas matiwasay na kinabukasan.

Naniniwala rin ako na ang panukalang ito ay makakatulong sa pagtanggal ng stigma sa usaping mental health. Nagpapahayag ito na okay lang na pag-usapan ang naturang paksa at humingi ng tulong sa propesyunal kung kakailanganin.

Sa katunayan, mayroon din akong nai-file na Senate Bill No. 1786 na layunin namang magmandato ng pagkakaroon ng mental health offices sa ating mga public higher educational institutions sa bansa. Kung maipasa rin ito, naniniwala ako na malaki ang kanyang magiging papel sa pagtataguyod sa mental well-being ng ating mga kabataan.

Bukod sa trabaho bilang mambabatas, patuloy din tayo at ang aking opisina sa paglilibot sa bansa upang mamahagi ng tulong sa ating mga kababayan at makisalamuha na rin sa kanila upang personal na tugunan ang kanilang mga pangangailangan.

Noong September 12, dumalo ako sa turnover ceremony ng motorcycle units para sa Motorcycle Riding Academy ng Metropolitan Manila Development Authority (MMDA) kung saan kinomendahan ko ang layunin ng naturang institusyon na mag-promote ng responsible driving sa mga Pilipino. Pagkatapos ay sinilip natin ang state-of-the-art na Communication and Command Center ng MMDA na ating pinondohan noon upang mas maisaayos ang pagtugon sa kalamidad, traffic management at public safety sa buong NCR. Nakasalamuha ko rin ang mga mayors ng Metro Manila sa aking pagbisita roon.

Dahil bisyo ko na ang magserbisyo, tuluy-tuloy din ang aking opisina sa paghahatid ng serbisyo sa ating mga kababayan na apektado ng iba’t ibang krisis. Noong September 9, personal akong naghatid ng tulong sa 250 na fire victims sa Barangay Culiat, Quezon City, sa pakikipagtulungan ng opisina ni Congresswoman Marivic Co-Pilar.

Nabigyan rin namin ng dagdag na tulong pangkabuhayan ang ilang mga naging biktima ng krisis katuwang ang Department of Trade and Industry. Kasama rito ang mga tinamaan ng Bagyong Paeng noon sa probinsya ng Antique, partikular ang 59 benepisyaryo mula sa Patnongon, 20 sa Sibalom, 13 sa Bugasong, 12 sa Hamtic at dalawa sa Belison. Kaparehas na suporta rin ang natanggap ng 84 benepisyaryo sa Bataan; 20 na residente sa Dipaculao, Aurora; 32 sa Sanchez Mira, Cagayan; at 100 na MSMEs at mga biktima ng lindol naman sa Montevista at New Bataan, sa Davao de Oro.

Sa programang pangkabuhayan na ating isinulong noon at patuloy na sinusuportahan ngayon, binibigyan ng DTI ng negosyo kits ang mga kuwalipikadong benepisyaryo at ginagabayan sila paano palaguin ito. Ang palaging bilin ko sa mga benepisyaryo, masarap sa pakiramdam kapag napalago nila ang negosyo na kanilang pinaghirapan at naiuwi nila sa kanilang mga pamilya ang kanilang kita.

Sa ating pakikipagtulungan, nabigyan rin ng dagdag na suporta mula sa aming tanggapan at ayuda mula sa National Housing Authority na pambili ng mga yero, pako at iba pang materyales pampaayos ng bahay ang iba pang mga naging biktima ng sakuna noon. Kasama rito ang 22 na residente ng Antipolo City na apektado ng landslide at 85 na nasunugan noon sa Imus City, Cavite.

Samantala, sa ating adhikaing suportahan ang mga kabataan, nagbigay rin tayo ng dagdag na tulong sa 689 elementary at high school students sa Puerto Princesa City, Palawan, at sa 100 na nagtapos ng TESDA courses sa Danao City, Cebu.

Bukod pa rito, nag-abot rin tayo ng dagdag na suporta sa mga displaced workers na naging benepisyaryo ng TUPAD program ng DOLE, kabilang na ang 382 na manggagawa sa Iloilo City at 413 sa Talibon, Bohol.

Samantala, noong September 10 ay natapos na ang 2023 FIBA World Cup sa SM Mall of Asia Arena sa Pasay City kung saan nakuha ng Germany ang gold medal, Serbia ang silver medal, at Canada naman ang nakapag-uwi ng bronze. Pinupuri ko ang lahat ng naging parte ng matagumpay na pagdaraos ng napakalaking sport event na ito sa ating bansa, kasama na ang ating co-hosts na Japan at Indonesia.

Pinupuri ko rin ang ating national team, ang Gilas Pilipinas, sa kanilang pag-secure ng puwesto sa Olympic Qualifying Tournaments. Ang kanilang ipinakitang katatagan ay tunay na kahanga-hanga, kaya naman bilang Chair ng Senate Committee on Sports, buo ang aking suporta sa kanilang mga susunod na laban, kabilang na ang Asian Games at iba pang international tournaments.

Ipagpatuloy natin ang ating pakikiisa sa mga adhikaing layuning maiangat ang kalagayan ng ating bansa. Proteksyunan natin ang kalusugan ng ating mga kababayan at bigyan natin ang lahat ng oportunidad na maging produktibong miyembro ng ating lipunan.

Bilang inyong lingcod-bayan, patuloy akong tutulong sa abot ng aking makakaya sa mga mahihirap upang mailapit sa tao ang serbisyong kailangan nila mula sa gobyerno.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

BFP modernization at Malasakit Center, para sa proteksyon ng mga Pinoy

ni Bong Go @Bisyo Magserbisyo | September 9, 2023

Noong bagung-bagong upo pa lang ako sa Senado noong 2019, sa aking unang buwan ng panunungkulan ay isinumite ko ang isa sa aking mga prayoridad na panukalang batas, ang Senate Bill No. 204.

Layunin nito na palakasin ang Bureau of Fire Protection. Nakapasa ito at naging ganap na batas, ang Republic Act No. 11589, o ang Bureau of Fire Protection Modernization Act, matapos lagdaan ni dating pangulong Rodrigo Duterte noong September 10, 2021.

Tayo ang principal author at co-sponsor ng naturang batas, na ngayon ay dalawang taon nang nagkakabisa. Importante na mabigyan ng suporta ang modernization ng ating BFP dahil napakahalaga ng tungkulin na ginagampanan nila upang makapagligtas ng buhay.

Pagkatapos ng ating panunumpa sa COMELEC bilang bagong halal na senador noong 2019, personal akong dumiretso sa mga pamilyang nasunugan sa Caloocan City. Halos linggu-linggo akong bumababa sa mga nasusunugan. Nakikita ko kasi ang hirap ng ating mga kababayang apektado ng sunog. Kahit isang bahay lang ang masunog, damay po pati ang mga kapitbahay.

Maraming pamilya ang apektado. Kaya dapat lang na palakasin ang kapasidad ng BFP sa pagresponde sa sunog.

Hindi lamang ang pagbili ng mga bagong fire trucks at equipment ang makatutulong sa paglaban sa mga sunog. Mahalaga rin dito ang fire safety education at information campaign para maturuan ang ating mga kababayan kung paano maiiwasan ang mga ganitong insidente.

Para rin ito sa ating mga bumbero upang mapangalagaan ang kanilang kaligtasan.

Nagpapasalamat tayo sa kanilang sakripisyo dahil kahit hindi sunog, kasama sila sa mga unang sumusuong sa panganib at rumeresponde tuwing may sakuna at kalamidad anumang oras.

Higit sa lahat, sa BFP modernization ay mas mapoprotektahan ang buhay at ari-arian ng ating mga kababayan. Ang gamit na nasunog ay maaaring palitan, ang nawalang pera ay maaaring kitain pa, pero ang buhay ng tao ay hindi na. A lost life is a lost forever. Kaya ang pinakaimportante pa ring proteksyon laban sa sunog ay ang todong pag-iingat laban sa mga posibleng pagmulan nito.

Isa sa mga prayoridad na tulungan ng aking tanggapan ang mga kababayan nating nasusunugan dahil napakahirap ng kanilang kalagayan — na natupok na nga ang kabuhayan ay wala pang mapagkukunan agad ng panggastos para sa araw-araw na pangangailangan.

Bukod sa suportang ating ipinagkakaloob, naaalalayan din sila ng Malasakit Center kung kailangan nila ng tulong medikal. Ang Malasakit Centers Act ay isa sa ating mga inisyatiba bilang Chair ng Senate Committee on Health para mailapit sa ating mga kababayan, lalo na sa mga mahihirap, ang serbisyo ng pamahalaan. Tayo ang principal author at sponsor ng Republic Act No. 11463 na nag-institutionalize sa ating sinimulang Malasakit Centers program. Sa datos ng DOH ay mayroon na ngayong 158 operational Malasakit Centers, at mahigit pitong milyong pasyente na ang natulungan.

Nagsisilbing one-stop shop na ang Malasakit Center kung saan nasa iisang bubong na ang mga kinatawan ng Department of Social Welfare and Development, Department of Health, Philippine Health Insurance Corporation, at Philippine Charity Sweepstakes Office na mayroong sari-sariling medical assistance programs. Mayroon nang takbuhan ang mga tao at hindi na magpalipat-lipat ang pasyente sa pag-a-avail ng tulong sa mga naturang ahensya. Kapag pinagsama-sama ang mga medical assistance na ito, layunin ng Malasakit Center na mapababa sa pinakamababa ang hospital bill ng pasyente.

Kamakailan ay naghatid ng tulong ang aking tanggapan sa mga residenteng nasunugan o naharap sa iba’t ibang krisis sa Arkong Bato, Valenzuela City. Ilan sa kanila ang nagpasalamat sa tulong na ipinagkaloob ng Malasakit Center.

Isa rito si Manilyn Sarmiento na nasunugan habang siya ay nagbubuntis. Dahil sa Malasakit Center, natulungan siya sa bayarin sa ospital. Nasunugan din si PJ Opana Oral at nakatanggap ng tulong mula sa ating tanggapan. Ang Malasakit Center din ang sumagot sa kanyang pagpapagamot matapos siyang tamaan ng tetanus. Aniya, malaking bagay sa mga tulad niya ang Malasakit Center. Isang senior citizen naman si Erlinda Baby Natividad Morelos na nasunugan din. Lagi siyang inaalalayan ng ating tanggapan dahil malapit sa ating puso ang mga nakatatanda.

Ang mga nasunugan sa Valenzuela City ay nakatanggap din ng hiwalay na tulong mula sa National Housing Authority dahil may programa silang ating isinulong noon at ipinagpapatuloy ngayon upang mabigyan ng pambili ng yero, pako at iba pang materyales na pampaayos ng bahay ang mga biktima ng sakuna. Lahat ng posibleng paraan para maihatid natin ang serbisyo at matulungan ang ating mga kababayan ay atin pong pinagsisikapan na maisulong at maipatupad. Samantala, nabigyan rin ng housing assistance ng NHA na atin ding sinuportahan ang 22 residente ng Antipolo City na naapektuhan ng landslide.

Bukod dito, tuluy-tuloy ang ating paghahatid ng serbisyo sa ating mga kababayan sa lahat ng sulok ng ating bansa na apektado ng iba’t ibang krisis. Masaya kong ibinabalita na kahapon, September 8 ay nagkaroon ng inagurasyon para sa itinayong Tubigon Dialysis Center sa Bohol sa pamumuno ni Mayor William Jao.

Nakatanggap din ng dagdag na suporta mula sa atin ang mga benepisyaryo ng livelihood program ng Department of Trade and Industry na ating isinulong noon at patuloy na sinusuportahan ngayon upang mabigyan ng puhunan ang mga kuwalipikadong benepisyaryo na naapektuhan ng krisis at maturuan kung paano palaguin ang kanilang negosyo. Kasama rito ang 59 benepisyaryo mula sa Patnongon, 20 sa Sibalom, 13 sa Bugasong, 12 sa Hamtic at dalawa sa Belison, lahat sa Antique. Katulad na suporta rin ang natanggap ng 84 benepisyaryo sa Abucay, Balanga, Bagac, Dinalupihan, Hermosa, Limay, Mariveles, Morong, Orani, Orion, Pilar at Samal sa probinsya ng Bataan, at ng 26 sa Bongabon, Nueva Ecija.

Nagkaloob din tayo ng ayuda sa 689 elementary and high school students sa Puerto Princesa City, Palawan katuwang ang tanggapan ni Councilor Elgin Damasco, gayundin sa 100 TESDA graduates sa Danao City, Cebu. Bukod sa ating ibinigay na tulong, naging benepisyaryo ng programang TUPAD ng DOLE ang 382 residente na nawalan ng trabaho sa Iloilo City.

Ang mga kuwento ng pagbangon at pag-asa ng ating mga kababayan ang nagbibigay inspirasyon sa akin para patuloy na maglingkod nang buong puso sa abot ng aking makakaya. Masaya ako na ang ating mga isinusulong na programa at nalilikhang mga batas ay nakapagpapagaan at nakakatulong na masolusyunan ang kanilang mga problema. Hindi po tayo titigil sa ating ginagawa, at sa pagtupad sa tungkuling ibinigay at ipinagkatiwala ninyo sa akin.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.