Gawing mas maginhawa ang pagkuha ng serbisyo sa gobyerno

ni Bong Go @Bisyo Magserbisyo | September 27, 2023

Naging mabunga ang ating pagsisimula ng linggong ito dahil noong Lunes, September 25, ay ilang mga panukalang batas ang naaprubahan na sa ikatlo at huling pagbasa sa Senado.

Pasado na rin ang mga ito sa Kongreso at magkakaroon na lang ng bicameral committee meeting bago isumite kay Pangulong Ferdinand Bongbong Marcos Jr. Kapag naging ganap na batas, napakalaki ng maitutulong ng mga panukalang ito sa buhay ng ating mga kababayan.

Co-author at co-sponsor tayo sa tatlong panukalang ito, na masusing tinalakay at pinagdebatihan namin ng mga kapwa ko mambabatas hanggang makapasa na nga sa huling pagbasa.

Una sa mga panukalang ito ang Senate Bill No. 1846, o ang Internet Transactions Act. Layunin nito na maprotektahan ang mga mamimili at mga negosyante sa kanilang online transactions nang hindi nakokompromiso ang kanilang privacy at seguridad. Napapanahon ang pagsasabatas nito dahil sa tumataas na bilang ng mga mamimili na gumagamit ng e-commerce upang mapabilis at mapadali ang pagbili ng kanilang mga pangangailangan.

Noon ko pa sinasabi na dapat maprotektahan natin ang ating maliliit na negosyo at online sellers na ang gusto lamang ay maghanapbuhay para sa kanilang mga pamilya, lalung-lalo na ngayong panahong ito. Sa kabilang banda, dapat din namang mapangalagaan ang ating mga online consumers. Kailangang matiyak ang kalidad ng mga produktong kanilang binili at mapangalagaan sila laban sa mga scam.

Masaya ko ring ibinabalita na pasado na sa Senado ang panukalang magpapalawak sa sakop ng Centenarian Act.

Sa ilalim nito, kapag naging ganap na batas, ang isang senior citizen na aabot sa edad na 80 ay tatanggap ng cash gift na P10,000 at P20,000 naman pagsapit sa edad na 90.

Bukod naman sa P100,000 na matatanggap ng sasapit sa edad na 100, pagkakalooban din siya ng liham ng pagbati mula sa Pangulo ng Pilipinas.

Nasa kultura na nating mga Pilipino na alagaan ang ating mga nakakatanda. Dapat natin silang suportahan at bigyan ng pagkilala. Habang kaya pang pakinabangan at ma-enjoy ng senior citizen ang cash gift, ibigay na natin sa kanila. Maganda rin na may inaasahan ang ating mga senior citizens pagtuntong nila ng 80, 90 at 100 years old. Anuman ang halaga, maaari itong magsilbing inspirasyon sa kanila para mas maging positibo ang kanilang pananaw at mag-improve ang kanilang katayuan.

Suportado ko ang anumang hakbang na magpapabuti lalo sa kalusugan at kapakanan ng ating mga senior citizens. Kilalanin natin sila dahil malaking sakripisyo ang ginawa nila noon upang maitaguyod ang kanilang mga pamilya na siyang pundasyon ng ating lipunan. Suklian natin sila ng pagmamahal at pag-aaruga sa kanilang pagtanda. Bilang isa sa mga vulnerable groups, kailangan ng mga matatanda natin ang tulong at suporta ng pamahalaan. Kaya itong cash gift ay sigurado akong malaking tulong sa kanila kung maging ganap na batas.

Malaki naman ang aking pasasalamat sa aking mga kapwa mambabatas na nagbigay din ng kanilang buong suporta para sa pagpasa ng Senate Bill No. 2001, o ang New Philippine Passport Act.

Kung magiging batas ito, higit na magiging madali at mapapabilis para sa mga Pilipino ang pagpoproseso ng kanilang passport, at mas mapapalakas ang seguridad at integridad nito. Sa patuloy na pag-unlad ng teknolohiya, nararapat lang na maging mas akma, abot-kaya at mas ligtas ang pagkakaroon ng Philippine passport. Ang karapatan sa paglalakbay ay isa sa mga ginagarantiyahan ng ating Saligang Batas.

Isa rin ito sa mga prayoridad na panukalang batas ni Pangulong Ferdinand Marcos, Jr., na ating sinuportahan, kung saan ang mga senior citizens at migrant workers ay maaaring mag-renew ng kanilang passports nang online at hindi na kailangan pang pisikal na magpunta sa opisina ng Department of Foreign Affairs.

Aatasan din ang DFA na magtayo ng online application portal at ng Electronic One-Stop Shop na maaaring ma-access sa official website ng ahensya. Ang mga kababayan natin na walang passport ay maaaring mag-apply para sa emergency passports, na valid sa loob ng isang taon.

Maaari rin silang mag-request ng emergency travel document certificate kung nawala ang passport bago umuwi sa Pilipinas kapag naisabatas ito.

Ang mga senior citizens at PWDs ay bibigyan din ng 20 percent discount sa kanilang passport application fees. Magkakaroon din ng special lane para sa senior citizens, PWDs, mga buntis at overseas Filipino workers (OFWs) kapag ito ay naging ganap na batas na.

Samantala, bukod sa ating trabaho sa Senado ay patuloy tayo sa paglalapit ng serbisyo sa iba’t ibang sektor ng ating lipunan. Kahapon, September 26, masaya kong ibinabalita na nagkaroon na ng groundbreaking ang itatayong Super Health Center sa Talakag at Kalilangan sa probinsya ng Bukidnon.

Naging guest of honor and speaker naman tayo noong September 24 sa ikaapat na anibersaryo at 5th Induction Ceremony ng Lions International District 301-A4 na ginanap sa Maynila. Sa aking mensahe na dinaluhan ng mga officials, members, district governors at past district governors, nagpasalamat tayo sa malaking tulong na ibinigay ng kanilang komunidad sa administrasyon ni dating pangulong Rodrigo Duterte, at sa malaking ambag ng organisasyon sa pamamagitan ng pagbibigay ng tulong at suporta sa mga kababayan nating lubos na nangangailangan.

Dumalo rin tayo sa 48th Firstfruits and Thanksgiving Anniversary ng Metropolitan Bible Baptist Ekklesia (MBBE) sa Sta. Ana, Manila sa imbitasyon ni Manila 6th District Representative Bienvenido "Benny" Abante Jr. Inilahad natin doon ang ating paniniwala na ang serbisyo sa tao ay serbisyo rin sa Diyos.

Naghatid naman ang aking tanggapan ng tulong sa 653 biktima ng sunog sa Bongao, Tawi-Tawi; at 22 pamilyang nasunugan din sa Brgy. Calingatngan, Borongan City, Eastern Samar.

Napagkalooban din ng kabuuang 500 food packs ang mga naging biktima ng bagyong Egay sa bayan ng Barlig, Mountain Province.

Nagbigay rin tayo ng dagdag suporta sa mga nawalan ng trabaho, kabilang na ang 457 residente ng Alangalang, Leyte na benepisyaryo rin ng programa ng DOLE.

Sa kabila ng ating mga naisasakatuparan bilang inyong kinatawan sa Senado, at Senator Kuya Bong Go na nagmamalasakit at nagseserbisyo sa bawat Pilipino, asahan ninyo po na patuloy akong magseserbisyo sa abot ng aking makakaya at uunahin ko ang kapakanan ng ating mga kababayan na higit na nangangailangan, ang mga hopeless, helpless at walang malalapitan maliban sa pamahalaan. Patuloy rin akong susuporta sa mga programa ng ating gobyerno para sa ikabubuti at ikagagaan ng buhay ng bawat sektor ng ating lipunan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Kalusugan at buhay ng mahihirap, unahin

ni Bong Go @Bisyo Magserbisyo | September 23, 2023

Noong September 20, nagkaroon ng pagdinig sa Senado ukol sa budget ng Department of Social Welfare and Development para sa susunod na taon.

Sa naturang hearing, inihayag ko ang aking suporta sa budget ng ahensya, ngunit pinaalalahanan ko rin ito tungkol sa mga responsibilidad nito na dapat isakatuparan.

Simple lang naman ang ating layunin, dapat na unahin ang mga mahihirap. Bilang chair ng Senate Committee on Health, naniniwala ako na ang kalusugan at buhay ng bawat Pilipino ay mahalaga.

Katumbas nito ay isang malusog at mahabang buhay sa bawat mamamayan. Lagi nating tandaan na ang katumbas ng kalusugan ay buhay ng bawat Pilipino.

Isa sa mga responsibilidad ng DSWD, ayon sa Malasakit Centers Act, na tayo ang principal sponsor at may-akda, ang patuloy na suporta sa Malasakit Centers program.

Bilang isa sa mga ahensyang namimigay ng tulong pampagamot sa mga one-stop shop na ito, nararapat lamang na siguruhin ng ahensya na may social worker o personnel ito sa 159 na Malasakit Centers na matatagpuan sa iba’t ibang panig ng ating bansa.

Napakahalaga na ang apat na pangunahing ahensya sa mga Malasakit Centers — kabilang na ang Department of Health, Philippine Charity Sweepstakes Office, PhilHealth, at DSWD — ay maging tapat sa kanilang mandato na magbigay ng karampatang tulong at serbisyong medikal sa ating mga kababayan sa mabilis at maginhawang paraan.

Maliban sa Malasakit Centers, hinimok ko rin ang DSWD na mas lalong paigtingin ang implementasyon ng mga programang nakakatulong sa mahihirap nasaan man sila sa bansa tulad ng Pantawid Pamilyang Pilipino Program, Sustainable Livelihood Program, at Balik Probinsya, Bagong Pag-asa na ating isinulong noon.

Ang mga programang ito ay hindi lamang nagbibigay ng agarang tulong pinansyal sa ating mga kababayan, kundi nagbibigay rin ng pangmatagalang solusyon upang malampasan ang kahirapan.

Kaya’t mahalaga na siguruhing maayos ang implementasyon ng mga ito upang mas maraming Pilipino ang makikinabang.

Isa sa mga pangunahing tungkulin din ng DSWD ay ang pagbibigay ng agarang tulong sa mga nangangailangan. Isa na rito ang kanilang Assistance to Indigents in Crisis Situations program. Kaya’t pinaalalahanan ko ang DSWD na siguruhing hindi made-delay ang ayuda para sa mga benepisyaryong qualified at na-validate na nila mismo na walang ibang matakbuhan kundi ang gobyerno.

Sa pagdinig na iyon, nangako naman si DSWD Secretary Rex Gatchalian na gagawa ito ng paraan para maibigay ang tulong mula sa gobyerno sa mga nararapat na makatanggap nito. Ayon sa datos ng DSWD, and’yan naman ang pondo. Gamitin sana agad para makatulong at huwag na sanang patagalin pa dahil marami ring naghihirap na mga kababayan.

Kaakibat ng pagsuporta sa mga programang makakatulong sa mahihirap, patuloy rin ako at ang aking tanggapan sa aming misyon na mas ilapit ang mga tulong at serbisyo ng gobyerno sa mga komunidad na nangangailangan nito.

Noong September 21, nagtungo tayo sa San Mateo, Rizal para saksihan ang groundbreaking ng isang Super Health Center doon. Kasama natin sa pagtitipon sina Rizal Governor Nina Ricci Ynares, San Mateo Mayor Bartolome “Omie” Rivera, Jr., Vice Mayor Jaime Romel Roxas at iba pang opisyal. Sa ating pakikipagtulungan sa DOH, LGUs at mga kapwa natin mambabatas, magkakaroon ng 307 Super Health Center sa year 2022 at 322 na Super Health Center sa year 2023 sa buong Pilipinas kasama na r’yan itong sa San Mateo.

Nakiisa rin tayo sa 451st Founding Anniversary ng naturang bayan kung saan binigyang-diin natin ang importansya ng pagkakaisa lalo na sa mga panahon ng pagsubok.

Nagpapasalamat naman ako sa local government ng San Mateo dahil sa parangal na iginawad nila sa akin. With or without award ay magseserbisyo ako sa aking mga kapwa Pinoy.

Nagbigay rin tayo ng dagdag suporta sa mga nawalan ng trabaho, kabilang na ang 630 sa Iligan City, Lanao del Norte na benepisyaryo rin ng TUPAD program ng DOLE; at 315 sa Merida, Leyte.

Nagkaloob din tayo ng personal na tulong sa 10 na biktima ng sunog sa Mataas na Kahoy, Batangas; at 30 naman sa Lumban, Laguna. Namahagi tayo ng assistance sa 25 TESDA graduates sa Guagua, Pampanga.

Samantala, 102 na nasunugan sa mga barangay ng Inayawan, Kasambagan, at Dujo Fatima sa Cebu City ang nakatanggap ng tulong mula sa NHA, na ating isinulong noon at ipinagpapatuloy ngayon upang mabigyan ng pambili ng yero, pako at iba pang materyales na pampaayos ng bahay ang mga biktima ng sakuna. Bukod sa ayuda mula sa NHA, may personal na tulong din akong ipinamahagi sa kanila.

Nagpadala rin tayo ng ating mensahe sa 50th anniversary ng Tawi-Tawi noong September 22. Noong September 21, dumalo ang aking opisina sa ceremonial turnover ng Super Health Center sa Barangay Sangali, Zamboanga City.

Ang bawat programa, bawat pondo, at bawat hakbang na ating ginagawa ay para sa kapakanan ng bawat kababayan. Magtulungan tayo upang marating ang ating iisang hangarin na walang Pilipino na magugutom o maiiwan sa ating pagbangon sa anumang krisis na ating kinakaharap.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

3 sangkap sa paglaban sa ilegal na droga

ni Bong Go @Bisyo Magserbisyo | September 20, 2023

Ang problema natin sa ilegal na droga ay isang salot na patuloy na nagpapahirap sa ating lipunan. May responsibilidad tayong lahat na gawin ang ating makakaya para iligtas ang bawat pamilyang winawasak nito, bawat adik na tinatanggalan nito ng magandang kinabukasan, at bawat komunidad na nilulunod nito sa hirap.

Isinusulong ko ang tatlong estratehiya na kailangan nating pagtuunan ng pansin sa paglaban sa ilegal na droga. Nar’yan ang law enforcement, rehabilitation, at prevention.

Una sa lahat, suportado ko ang anumang hakbang ni Pangulong Bongbong Marcos sa laban na ito. Sa panahon ni dating Pangulong Rodrigo Duterte, malawakan niyang inaksyunan ang problema sa droga. Ngayon naman ay may sarili ring estratehiya ang kasalukuyang administrasyon na nagbibigay importansya sa rehabilitasyon. Ang mahalaga ay hindi tayo tumitigil sa paglaban sa salot na ito. Kasi alam natin na, kapag bumalik ang droga, babalik din ang korupsyon at kriminalidad sa bansa. Delikado tayo d’yan.

Buo ang suporta ng pamahalaan sa law enforcers in line of duty, hindi lang dapat sila magaling kundi tapat din sa kanilang tungkulin. Kaya naman hinihikayat ko ang mga nasa hanay ng Philippine National Police, Philippine Drug Enforcement Agency, at National Bureau of Investigation na paigtingin pa lalo ang kampanya nila laban sa ilegal na droga. Kaugnay nito, mayroon akong isinusulong na Senate Bill No. 422, na naglalayong magbigay ng libreng legal assistance sa mga uniformed personnel, kung sakali mang maakusahan sila ng mali o hindi patas habang ginagampanan ang kanilang tungkulin.

Ang layunin nito ay hindi lamang para protektahan ang law enforcers, kundi para rin tiyakin na ang bawat aksyon na kanilang ginagawa ay naaayon sa batas at may sapat na legal protection.

Pangalawa, sa aspeto ng rehabilitation, karamihan sa mga gumagamit ng droga ay biktima lamang din. Dapat ay bigyan natin sila ng pagkakataon na magbagumbuhay.

Kaya mayroon din akong panukalang batas, ang SB No. 428, na naglalayong magtatag ng Drug Rehabilitation and Treatment Centers sa bawat probinsya sa buong bansa.

Kasama na rin dito ang SB No. 2115, na naglalayong magbigay ng technical-vocational education at livelihood program para sa mga na-rehabilitate na drug dependents kung maisabatas.

Pangatlo, sa prevention, lalo na sa mga kabataan, ineengganyo natin sila na pumasok sa mga produktibong gawain, katulad ng sports, para maging disiplinado at responsable kaysa malulong sa masasamang bisyo. Turuan natin sila na huwag maligaw ng landas.

Ika nga, get into sports, stay away from drugs! And of course, to keep them healthy and fit, importante rin po sa akin bilang chair ng Senate Committee on Sports at Health, dapat magkarugtong ang dalawang ito.

Dahil para sa akin kapag fit and healthy ka katumbas nito ay isang malusog at mahabang buhay sa bawat mamamayang Pilipino.

Bilang chair ng Senate Committee on Sports, patuloy akong nagsusulong ng mga sports-related programs, projects, at initiatives sa bansa para masuportahan ang estratehiyang ito. Isa na rito ang National Academy of Sports na ating iniakda at naging co-sponsor sa Senado at naisabatas sa ilalim ng administrasyong Duterte. Ito ay itinayo sa New Clark City, Capas, Tarlac at nagbibigay ng specialized secondary education program na nakatuon sa sports para sa ating mga aspiring athletes. Wala po silang masasakripisyo dito. Makakapag-aral sila habang nagti-training.

At alinsunod sa ating adbokasiya, nakasama ko nitong September 17, ang ilang kabataang lumalahok sa Philippine ROTC Games matapos akong imbitahan bilang guest speaker sa opening ceremony ng Luzon Qualifying Leg sa Cavite State University, Indang Campus sa Indang, Cavite. Kasama si Senator Francis Tolentino, Philippine Sports Commission Chair Richard Bachmann, Commission on Higher Education Chair Prospero de Vera III, at iba pang opisyal, hinikayat namin ang mga kabataan na ipamalas ang kanilang pagmamahal sa bayan sa pamamagitan ng ROTC, makilahok sa sports, at lumayo sa bisyo tulad ng droga.

Noong Setyembre 18, dumalo naman tayo sa send-off ceremony sa Philippine International Convention Center sa Pasay City para sa ating mga atletang lalahok sa 19th Asian Games at 4th Asian Para-Games sa Hangzhou City, China. Sa aking mensahe, inihayag ko ang aking patuloy na suporta sa mga atleta sa kanilang darating na mga kompetisyon. Naniniwala ako na ang tagumpay nila ay tagumpay din ng bawat Pilipino kaya nararapat lamang natin silang suportahan.

Samantala, habang nagsusulong tayo ng mga inisyatiba kontra ilegal na droga, patuloy din ako at ang aking opisina sa pakikisalamuha sa ating mga kababayan at namamahagi ng tulong sa mga pinakanangangailangan nito.

Noong September 16, dumalo tayo sa groundbreaking ng Super Health Center sa Manolo Fortich, Bukidnon. Bumisita rin tayo sa bayan ng Damulog, kung saan nagkaroon tayo ng inspeksyon ng mga proyektong sinusuportahan ko doon, tulad ng isang trading center, road concreting project, evacuation center, solar street lights, at isang multipurpose building.

Dinaluhan din natin ang ika-25 anibersaryo ng Philippine National Police Public Safety Basic Recruit Course (PSBRC) Class 1998-Alpha sa Acacia Hotel sa Davao City.

Nagbigay rin ng tulong ang aking opisina sa 65 biktima ng sunog sa Bacolod City, Negros Occidental; at 98 sa Cebu City. Nagbigay din tayo ng tulong sa 75 TESDA graduates sa Victorias City, Negros Occidental.

Ang laban natin kontra sa ilegal na droga ay hindi lamang tungkol sa pagtulong natin sa mga nawawala sa tamang landas, kundi sa pagbuo ng isang lipunan na mas ligtas, mas maayos, at makatarungan para sa lahat.

Sa laban na ito, walang iwanan. Sa laban na ito, walang susuko. Sa laban na ito, tanging ang pagkakaisa, pagmamalasakit, at pagtutulungan ang magdadala sa atin sa tagumpay tungo sa mas magandang kinabukasan para sa ating mga anak.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.