Tagumpay ng ating mga atleta, tagumpay ng bawat Pilipino!

ni Bong Go @Bisyo Magserbisyo | October 07, 2023

Bilang isang Pilipino, masasabi ko na talagang maipagmamalaki ang ating mga atleta na kalahok sa ginaganap na 19th Asian Games sa Hangzhou City, China, na sinimulan noong September 23 at magtatapos bukas, October 8.

Sa simula ng nakaraang linggo ay personal tayong bumiyahe sa China para ipakita ang ating suporta sa mga Pilipinong manlalaro. Masarap talaga ang pakiramdam bilang isang Pilipino na masilayan ang pagwawagi ng ating mga atleta.

Masayang-masaya tayo sa historic performance ng Gilas Pilipinas kahapon sa finals game upang masungkit ang gintong medalya sa basketball na huli nating napanalunan noong 1962 Asian Games pa. Ito rin ang pang-apat na gintong medalya natin sa kasalukuyang Asian Games na ito.

Pinupuri rin natin si Annie Ramirez na nakasungkit kahapon ng pangatlong ginto ng Pilipinas matapos maging kampeon sa jiu-jitsu (women’s 57kg) at si jiu-jitsu fighter Margarita “Meggie” Ochoa na nakuha ang ikalawang ginto para sa ating bansa noong October 5 sa women’s -48 kg division.

Punung-puno rin tayo ng papuri sa ating pole vaulter na si Ernest John Obiena na unang nakasungkit ng gintong medalya para sa Pilipinas. Saludo tayo sa iba pa nating atleta na nakakuha ng silver at bronze medals.

Bilang chair ng Senate Committee on Sports, taus-puso tayong nagpapasalamat sa lahat ng ating mga manlalaro, coaches, national sports associations at mga staff, gayundin sa Philippine Olympic Committee, Philippine Sports Commission at iba pang ahensya na nagtrabaho para suportahan ang ating delegasyon.

Ipinagmamalaki natin ang ating mga manlalaro na ibinibigay ang lahat para itaas ang bandila ng Pilipinas sa ginaganap na kompetisyon. Manalo man o matalo, ang importante ay magkaisa tayo at ipamalas ang puso ng Pilipino na lumalaban hanggang dulo.

Tayo naman po, bilang vice chairperson ng Senate Committee on Finance, ay laging todo-suporta para madagdagan ang pondo sa ating sports programs. Sa katunayan, ang pondong ilalaan sana ngayong taon para sa PSC ay nasa P200 million lang. Ipinaglaban natin ito na maitaas pa at isinulong natin ang karagdagang P1 bilyon, at atin namang naisakatuparan. Dahil dito, nakapagbigay tayo ng dagdag na suporta para sa mga atletang lumahok sa mga international competitions kabilang ang 2023 Southeast Asian Games sa Cambodia at ang kasalukuyang Asian Games sa China.

Tinututukan din natin ang grassroots sports development upang mahubog ang mga kabataan nasaan man sila sa bansa na nagnanais na sumabak sa mga pambansa at pandaigdigang palaro.

Tayo rin ang may-akda at co-sponsor sa Senado ng Republic Act 11470, na nagtatag ng National Academy of Sports sa New Clark City, Tarlac. Ang NAS ay nagbibigay ng dekalidad na edukasyon at sports training sa mga batang may potensyal na maging world-class athletes.

Isinumite rin natin ang SBN 423, o ang Philippine National Games (PNG) bill, na naglalayon na mapalakas ang isang national platform para sa mga atleta lalo na sa mga kabataan mula sa mga probinsya upang maipakita ang kanilang husay. Kung maisabatas ito, mas maraming talento ang mabibigyan ng pagkakataon na makilala at mapabilang sa ating national team.

Suportado rin natin ang pagdaraos ng sports clinics, community leagues, pagpapatayo ng sports facilities at pagkakaloob ng sports equipment sa mga kanayunan.

Naniniwala ako na ang sports ay isa ring mabisang paraan para mailayo ang mga kabataan sa masasamang bisyo at kriminalidad. Palagi ko ngang binabanggit, get into sports and stay away from drugs, and, of course, to stay healthy and fit.

Samantala, tuluy-tuloy tayo sa ating adhikain upang mailapit ang serbisyo ng gobyerno sa iba’t ibang sektor, lalo na ‘yung mga nahaharap sa iba’t ibang krisis.

Naging guest speaker tayo kahapon, October 6, sa ginanap na 33rd Commencement Exercises ng Polytechnic University of the Philippines-Maragondon Campus sa Cavite kung saan pinahalagahan natin ang edukasyon bilang tanging puhunan para sa mas magandang kinabukasan. Nagbigay tayo ng inspirasyon at nagkaloob ng munting regalo para sa graduates, pati na rin sa 7th commencement exercises ng PUP-Alfonso Campus sa Cavite sa hapon nang araw na iyon.

Dumalo rin tayo sa Barangay Health Workers Summit sa Cebu City bilang guest of honor and speaker. Kasama ang BHW Partylist at lokal na pamahalaan, namahagi tayo ng grocery packs sa mga BHWs doon. Namahagi rin tayo ng dagdag na suporta bukod sa emergency housing assistance mula sa NHA na ating isinulong para may maibili ng housing materials gaya ng pako, yero at iba pa ang 2,253 benepisyaryong nasunugan noon sa Cebu City. Binigyan din natin sila ng grocery packs, masks, vitamins, bola o shirt at nagpa-raffle ng mga bisikleta, sapatos at cellphone.

Sinaksihan din natin ang ribbon cutting ceremony at pagbubukas ng bagong pasilidad ng Lapu-Lapu City Hospital na bahagi ng bagong phase na ating sinuportahan na mapondohan. Dumalo rin tayo sa ginanap na National Teacher’s Day celebration ng Lapu-Lapu City kasama si Mayor Ahong Chan kung saan pinahalagahan natin ang papel ng mga guro sa paghubog sa ating mga kabataan. Namahagi rin tayo ng grocery packs at face masks sa mga guro at nagpa-raffle ng bisikleta, sapatos at cellphone.

Nasa Antipolo City, Rizal naman tayo noong October 5 at naging guest speaker sa ginanap na World Teachers’ Day celebration, sa paanyaya ni Mayor Jun Ynares. Namahagi ako ng tulong para sa 620 mahihirap na residente at ilang biktima ng sunog sa Antipolo City, kasama ang ilang local officials tulad nina Governor Nina Ynares, Board Member Randy Puno, Vice Mayor Josefina Gatlabayan, Councilor Susan Say at mga barangay officials.

Matapos ito ay nag-inspeksyon tayo sa itinatayong Super Health Center doon. Bilang adopted son ng CALABARZON region, pinasalamatan natin ang ating mga kapwa mambabatas na nagsulong din ng mga Super Health Center sa Rizal gaya nina Cong. Robbie Puno, Cong. Romeo Acop, Cong. Jack Duavit, Cong. Fidel Nograles, Cong. Dino Tanjuatco at Cong. Jojo Garcia.

Samantala, sinilip din natin ang Antipolo City Hall of Justice na ating sinuportahan na mapondohan noon.

Tumulong naman ang aking opisina sa iba’t ibang komunidad tulad ng dalawang residenteng nasunugan sa Bagumbayan, Sultan Kudarat. Naayudahan din ang 377 mahihirap na residente ng Talavera, Nueva Ecija katuwang ang tanggapan ni Congressman Jose Padiernos, gayundin ang 225 na displaced workers sa Catanduanes.

Bilang inyong lingkod, walang tigil ang aking suporta sa ating mga atleta, pagmamalasakit sa ating mga kababayang aking nirerepresenta, at pagtulong sa abot ng aking makakaya sa mga Pilipinong nangangailangan. Ipagpatuloy natin ang ganitong pagkakaisa, hindi lamang sa aspeto ng sports kundi maging sa lahat ng bagay na makatutulong sa pag-unlad ng ating bayan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Mabuting kalusugan, katumbas ng mas maayos na buhay

ni Bong Go @Bisyo Magserbisyo | October 04, 2023

Laging nangunguna sa ating prayoridad bilang chair ng Senate Committee on Health ang pangangalaga sa kalusugan ng bawat Pilipino. Hindi tayo tumitigil sa ating layunin na mailapit ang abot-kayang serbisyo medikal sa ating mga kababayan nasaan man sila sa ating bansa, lalo na sa mga mahihirap, hopeless, helpless at walang ibang malalapitan maliban sa gobyerno.

Patuloy tayo sa ating layunin na mas mapalakas pa ang ating healthcare system sa paniniwalang ang proteksyon sa kalusugan ay magdudulot ng mas maayos na buhay para sa bawat Pilipino.

Kaya sa ginanap na pagdinig noong September 28, bilang vice chair ng Senate Committee on Finance, nanawagan tayo upang madagdagan ang panukalang budget ng Department of Health sa 2024 para matiyak ang maayos na pagpapatupad ng ilan sa ating mga inisyatibo tulad ng bagong batas na Republic Act No. 11959, o ang Regional Specialty Centers Act, gayundin ang pagpapatayo ng mas marami pang Super Health Centers sa komunidad, at ang patuloy na operasyon ng Malasakit Centers sa buong bansa.

Napakahalaga ng Regional Specialty Centers Act, na tayo ang naging principal sponsor sa Senado at isa sa mga may-akda. Masaya ako na priority din ito ng kasalukuyang administrasyon, at nakakuha naman ng 24-0 na boto sa Senado. Sinuportahan ito ng lahat ng kapwa ko senador dahil naipaliwanag nating mabuti na makatutulong talaga ito sa mga kababayan nating mahihirap lalo na sa probinsya. Naging ganap na batas ito matapos lagdaan ni Pangulong Ferdinand Marcos, Jr. noong August 24.

Karamihan sa mga specialty centers, gaya ng Philippine Heart Center, National Kidney and Transplant Institute, Lung Center of the Philippines at Philippine Children’s Medical Center, ay nasa Metro Manila. Layunin ng bagong batas na makapagtatag ng specialty centers sa mga regional hospitals ng DOH. Hindi na mahihirapan ang mga pasyente sa pagbiyahe at sa dagdag na gastos tulad ng pamasahe at matutuluyan kung ilalapit na sa kanila ang mga specialty centers na ito na ang kalidad ng serbisyo, kakayahan ng mga personnel at equipment ay katulad din ng mga nasa Metro Manila.

Pero para maisakatuparan ito, kailangan ang sapat na pondo lalo na sa 2024 para matiyak ang maayos na inisyal na implementasyon ng naturang batas, gayundin sa mga susunod pang taon.

Bukod dito, sa ginanap na budget hearing ay binigyang-diin din natin na mahalaga na may sapat na pondo para sa mga pasyenteng may sakit na cancer, tuberculosis, at maging ang mga dumaranas ng mental health disorder.

Tinukoy natin na ang Cancer Assistance Fund (CAF) ngayong 2023 ay nasa P500 milyon na naipagkaloob sa pamamagitan ng sama-samang pagsisikap ng mga mambabatas noong isang taon.

Ngayon naman ay ipinanukala natin na doblehin ito at gawing P1 bilyon para sa 2024.

Gayunpaman, nagpahayag tayo ng pangamba na hindi masyadong nagagamit ang naturang pondo. Kaya apela ko sa DOH, pakisilip ito. Sa rami ng cancer patients na nangangailangan ng tulong, hindi katanggap-tanggap na hindi magastos ang pondo sa pagtulong sa kanila. Talagang napipilayan ang pamilya tuwing may nagkakakanser sa kanila dahil halos hindi na nakakapagtrabaho, at naka-focus na sa pagpapagamot.

Malaking tulong naman ang expanded hemodialysis package ng PhilHealth para sa mga may chronic kidney disease (CKD) stage 5. Mula sa 90 sessions ay ginawa na itong 156 sessions kada taon. Alinsunod ito sa standard dialysis requirement ng isang pasyente na mayroon siya dapat na tatlong sessions kada linggo. Para ma-avail ang package, ang pasyente ay dapat na inirekomenda ng isang licensed doctor para sumailalim sa hemodialysis. Dapat ding nakatala siya sa database ng PhilHealth.

Isa pa rin sa hindi dapat balewalain ay ang mental health ng ating mga kababayan.

Noong panahon ng pandemya ay marami ang nakaranas ng depression at apektado ang mental health. May panawagan ang PhilHealth na dagdagan pa ang kanilang pondo para sa mental health services, at suportado natin ito.

Noong September 11 ay pumasa na rin sa ikatlo at huling pagbasa ang Senate Bill No. 2200, o ang Basic Education Mental Health and Well-Being Promotion Act na isa tayo sa co-authors at co-sponsors. Kapag naging ganap na batas, layunin nito na magtayo ng Mental Health and Well-Being Center sa public and private K-12 schools. Suportado rin nito ang learning recovery plan ng Department of Education, at ang paglikha ng bago at permanenteng posisyon para sa Guidance Counselor at Guidance Associate sa mga paaralan. Isa itong mahalagang panukala dahil magsisilbi itong lifeline ng ating young learners sa kinakaharap natin na mental health issues na hindi dapat balewalain.

Samantala, tuluy-tuloy tayo sa iba pa nating gawain sa labas ng Senado at sa ating paghahatid ng tulong sa mga kababayan na nahaharap sa iba’t ibang krisis.

Bilang pakikiisa sa selebrasyon ng paggunita at pasasalamat sa ating mga Pilipinong guro, personal akong dumalo sa Konsyerto sa Palasyo na may temang "Para sa mahal nating mga Guro" na ginanap sa Malacañang Palace nitong October 1.

Ang pagtitipon ay handog ni Pangulong Marcos, Jr. para sa ating mga guro, kasama sina First Lady Liza Marcos, Vice President Sara Duterte, mga kapwa ko mambabatas, at ilan pang government officials.

Noong September 30 ay sumama naman tayo sa pamamahagi ng food packs sa 657 female detainees sa Camp Karingal, Quezon City kasama ang OFW Partylist.

Nagkaloob naman ng tulong para sa 127 residente ng Bgy. Arkong Bato, Valenzuela City na naging biktima ng sunog kamakailan. Sila ay benepisyaryo ng National Housing Authority sa pamamagitan ng programang nagbibigay ng pambili ng housing materials gaya ng pako at yero ang mga nasunugan na ating isinulong noon at patuloy na sinusuportahan.

Hindi ako pulitikong nangangako, pero gagawin ko sa abot ng aking makakaya at kapasidad ang patuloy na pagtulong, pagmamalasakit at pagseserbisyo sa inyong lahat, lalo na sa mga mahihirap nating kababayan, pagdating sa usaping pangkalusugan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pangangalaga sa karapatan at kapakanan ng mga marino

ni Bong Go @Bisyo Magserbisyo | September 30, 2023

Kabilang ang mga marinong Pilipino sa mga sektor na ating ipinaglalaban na maproteksyunan ang mga karapatan sa kanilang paghahanapbuhay.

Gaya ng iba nating mga overseas Filipino workers, malaking sakripisyo ang kanilang ginagawa para mabigyan lang ang kanilang pamilyang naiwan ng mas magandang kinabukasan.

Kaya naman masaya kong ibinabalita na noong September 27 ay nagkakaisang inaprubahan ng Senado sa ikatlo at huling pagbasa ang panukalang batas para sa Magna Carta of Filipino Seafarers. Isa tayo sa may-akda at co-sponsor nito, habang si Senator Raffy Tulfo naman ang principal sponsor ng naturang panukala.

Para sa akin, ang pag-aapruba ng Senado ay isang tagumpay para sa ating mga marino at patunay sa hangarin ng mga mambabatas na mapangalagaan ang ating mga manlalayag. Maituturing sila na backbone ng ating maritime industry, at panahon na para mas kilalanin ang kanilang kontribusyon sa ating bansa.

Kung maging ganap na batas ito, malaking bagay ang malinaw na patakaran at pamantayan para sa proteksyon lalo pa at delikado ang kanilang trabaho at laging may banta sa kanilang buhay at kalusugan.

Sa pamamagitan din ng panukalang ito, mas makatitiyak din tayo na angkop sa global maritime standards ang kakayahan at kuwalipikasyon ng ating mga marino, lalo na’t ang Pilipinas ay itinuturing na malaking parte ng maritime industry sa buong mundo.

Ang ating mga pangarap noon para sa mga marino at iba pang migranteng Pinoy ay nagkaroon na ng katuparan. Kung matatandaan ay naisakatuparan na natin ang pangarap na malikha ang Department of Migrant Workers matapos lagdaan ni dating Pangulong Rodrigo Duterte ang Republic Act No. 11641 noong December 2022. Tayo ay isa sa may-akda at co-sponsor nito sa Senado noon.

Mayroon na ring OFW Hospital sa Pampanga na itinatag noong nakaraang administrasyon. Bilang chair ng Senate Committee on Health, isinumite ko ang Senate Bill No. 2297, na naglalayong ma-institutionalize ang OFW Hospital at matiyak ang pangmatagalan nitong operasyon gaya ng pagkakaroon ng kinakailangang pondo, equipment at mga personnel. Mayroon na ring Malasakit Center sa OFW Hospital na iyon.

Ang mga ito ay hindi na lang panaginip kundi aktuwal na manipestasyon ng ating pagnanais na maipaglaban ang karapatan at kapakanan ng ating mga itinuturing na bagong bayani. Mahirap mawalay sa pamilya para lang mabigyan ng magandang kinabukasan ang kanilang mga anak. Kaya gawin natin ang lahat sa abot ng ating makakaya na suportahan sila bilang pagkilala sa kanilang kontribusyon, nasaan man sila sa mundo.

Samantala, tuluy-tuloy naman ang ating paghahatid ng serbisyo sa mga komunidad dito sa ating bansa para sa ating mga kababayang higit na nangangailangan.

Kahapon, September 29, ay sinaksihan natin ang Duterte Cup 2023 Awarding Ceremony at ang 54th Founding Anniversary ng Lex Talionis kasama si dating Pangulong Duterte sa Orchard Golf and Country Club, Dasmariñas City, Cavite. Masaya ko ring ibinabalita na isinagawa na ang groundbreaking ng itatayong Super Health Center sa Inopacan, Leyte sa araw ring iyon.

Noong September 28 ay dumalo naman tayo sa 50th Anniversary of Diplomatic Relations sa pagitan ng Hungary at ng Pilipinas sa Taguig City. Naimbitahan din tayo sa Pambansang Samahan ng Inhenyero Mekanikal Inc. (PSIM) 3rd National Convention na idinaos sa SMX Convention, Center Pasay bilang guest of honor and speaker. Sa araw ring iyon ay nagkaroon na ng groundbreaking ang itatayong Super Health Center sa Tanauan, Leyte.

Noong September 27 ay guest speaker naman tayo at nagbigay ng inspirasyon sa ginanap na 34th commencement exercises sa Tarlac State University sa Tarlac City. Matapos ito ay dumiretso tayo sa Talugtug, Nueva Ecija at personal na pinangunahan ang pamamahagi ng tulong sa 1,000 mahihirap na residente, katuwang ang tanggapan ni Cong. GP Padiernos at ng GP Partylist.

Nakarating naman ang aking opisina sa iba’t ibang bahagi ng bansa para alalayan ang ating mga kababayan na nangangailangan ng tulong. Naayudahan ang mga naging biktima ng sunog gaya ng 28 sa Tacloban City, Leyte; 13 sa General Santos City; at isa sa Palo, Leyte. Natulungan din ang 1,000 mahihirap na residente ng Lupao, Nueva Ecija.

Sa Caloocan City, 44 na benepisyaryo ng emergency housing assistance mula sa National Housing Authority ang ating binigyan ng dagdag na tulong. Ang programang ito ay isinulong natin noon at patuloy na sinusuportahan para may maibili ng housing materials gaya ng pako at yero ang mga nasunugan. Naalalayan din natin ang 233 mahihirap na residente ng Siniloan, Laguna, at 426 na displaced workers mula sa Cabanglasan, Bukidnon.

Hindi ako pulitikong nangangako. Gagawin ko lang ang lahat sa abot ng aking makakaya na ipagpatuloy ang ating mga pagsisikap na maipaglaban ang karapatan at kapakanan ng bawat sektor ng ating lipunan.

Sa loob at labas man ng Senado, kakampi ninyo ang inyong Senator Kuya Bong Go na ang bisyo ay magserbisyo sa bawat Pilipino lalo na ang mga mahihirap at pinakanangangailangan ng ating tulong at malasakit, nasaan man sila sa mundo.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.