Kaligtasan at kapakanan ng mga Pinoy, iprayoridad natin

ni Bong Go @Bisyo Magserbisyo | October 18, 2023

Sa ating patuloy na adhikain na mapangalagaan at maproteksyunan ang ating mga kababayan tulad ng mga overseas Filipino workers, noong nakaraang linggo ay nagkaroon tayo ng pagkakataon na bisitahin at alamin ang kalagayan ng mga Pilipino sa Hong Kong.

Bilang Vice Chair ng Senate Committee on Migrant Workers, naimbitahan tayo noong October 15 sa ginanap na Indigenous Peoples Festival sa Chater Road bilang bahagi ng pagdiriwang ng Indigenous Peoples Month. Nakatutuwa na kahit nasa ibang bansa ay naipapakita ang ating kultura at mga tradisyon.

Para sa akin, ang lahat ng OFWs ay maituturing na mga makabagong bayani. Nabanggit ko sa kanila na nalulungkot ako kapag may naaapi na Pilipino. Ipinaalam ko sa kanila na sa aking kapasidad bilang inyong senador, na lagi kong hinihikayat ang gobyerno na tulungan ang mga OFWs — nasaang panig man ng mundo — kung may pangangailangan sila, at dapat laging bukas ang ating tanggapan para sa kanilang lahat.

Ito ay bilang pagkilala rin sa kanilang sakripisyo para mapaganda ang buhay ng kanilang pamilya at makatulong sa pag-unlad ng Pilipinas.

Sa Hong Kong ay nagkaroon tayo ng pagkakataon na makausap ang iba’t ibang grupo mula sa Filipino community roon at nakinig sa kanilang mga karaingan. Sa parte ko bilang senador at lingkod bayan, ipinarating ko naman sa kanila ang mga kaganapan sa ating bansa. Ipinaalam ko rin sa kanila ang ating mga prayoridad bilang mambabatas kung saan kabilang sila sa ating laging ipinaglalaban sa Senado.

Isa tayo sa may-akda at co-sponsor ng naging Republic Act No. 11641 na lumikha sa Department of Migrant Workers. Isa ito sa ating mga pangarap na natupad para matulungan ang ating mga OFWs.

Sa pagkakalikha sa DMW, nagkaroon ng departamento ang ating pamahalaan na nakatutok kapag may problema ang mga migrant workers at ang kanilang mga kapamilya, at hindi na sila dapat pinagpapasa-pasahan pa ng iba’t ibang ahensya.

Bilang Chair ng Senate Committee on Health, isinumite natin ang Senate Bill No. 229, na kung maisabatas, ay ma-institutionalize ang OFW Hospital and Diagnostic Center sa San Fernando City, Pampanga. Titiyakin nito ang serbisyong pangkalusugan para sa OFWs at kanilang pamilya sa pamamagitan ng pagpapalakas sa nabanggit na ospital. Maglalaan ng sapat na pondo para sa operasyon nito, mga kinakailangang tauhan at mga kagamitan. Mayroon na ring Malasakit Center sa ospital na ito para matulungan ang ating mga kababayan sa bayaring pampagamot.

Isinumite rin natin ang SBN 2414, o ang “OFW Ward Act.” Kapag pumasa at naging ganap na batas, ang bawat ospital na nasa ilalim ng pangangasiwa ng Department of Health sa buong bansa ay magkakaroon ng dedicated ward para sa pagpapaospital ng OFWs at ng kanilang pamilya.

Masaya ko ring ibinabalita na kamakailan lang ay inaprubahan na sa Senado sa huli at ikatlong pagbasa ang panukalang batas para ma-institutionalize ang Magna Carta of Filipino Seafarers.

Isa tayo sa may-akda at co-sponsor ng panukala. Ang unanimous na pagpasa nito sa Senado para sa akin ay isang tagumpay ng ating mga marino. Isang ehemplo rin ito ng ating pagkilala sa kabayanihan at pangangalaga sa kapakanan ng ating mga manlalayag.

Mahal na mahal ko ang ating mga OFWs. Hindi tayo titigil sa pagsusulong ng mga programa na makakatulong sa ating modern-day heroes. Sabi ko nga sa kanila, mahirap mapalayo sa pamilya, ngunit naroon sila sa ibang bansa para magtrabaho at may maisuporta sa kanilang mga pamilya.

Sila at ang kanilang nagiging sakripisyo ay dapat lang na bigyan ng sapat na importansya.

Samantala, patuloy naman ang ating pagtulong sa ating mga kababayan na nahaharap sa iba’t ibang krisis. Inalalayan ng aking opisina ang limang pamilyang nasunugan sa Alabang, Muntinlupa City katuwang si Bgy. Captain Tintin Abas.

Namahagi rin tayo ng hiwalay na tulong sa 290 residente sa Zamboanga City na mga naging biktima rin ng sunog, bukod sa natanggap nila mula sa NHA sa pamamagitan ng programa na ating isinulong noon para may pambili ng mga materyales tulad ng pako, yero at iba pa sa pagsasaayos ng kanilang bahay ang mga naging biktima ng sakuna.

Mayroon ding 43 nasunugan noon sa Davao City ang ating natulungan bukod sa pagbibigay ng livelihood kits sa pamamagitan ng DTI.

Inayudahan din natin ang 1,900 mahihirap na residente ng Caloocan City katuwang ang tanggapan ni Congresswoman Mitch Cajayon-Uy; 450 market vendors sa Nagcarlan, Laguna katuwang si Mayor Elmor Vita at Konsehal Rey Comendador; at 1,000 mahihirap sa Cebu City katuwang si Cong. Edu Rama.

Nabigyan naman natin ng dagdag na suporta ang 548 indibidwal na nawalan ng trabaho sa Carmen at Batuan sa Bohol katuwang si Board Member Nathaniel Binlod. Ang mga kuwalipikadong benepisyaryo ay nabigyan din ng temporary employment ng DOLE.

Namahagi rin tayo ng tulong sa 1,000 miyembro ng United Senior Citizens Association of Quezon City katuwang sina Congresswoman Mila Magsaysay at Senador Robin Padilla.

Masaya ko namang ibinabalita na noong October 14 ay nagkaroon na ng groundbreaking ang itatayong Super Health Center sa Bgy. Maliksi II, Bacoor City.

Kung masaya man tayo na nakasalamuha ang ating mga kababayan sa Hong Kong, labis naman ang ating pagkabahala para sa kaligtasan at kapakanan ng ating OFWs na naiipit sa gulo sa Israel. Patuloy ang ating panawagan sa DMW, Department of Foreign Affairs, Philippine Overseas Employment Administration at iba pang ahensya na tulungan sila at siguraduhin ang kanilang kaligtasan.

Lagi nating sinasabi, mahalaga ang buhay ng bawat Pilipino, narito man sa ating bansa o nasa ibang bahagi ng mundo. Sama-sama nating ipagdasal ang kanilang kaligtasan, magmalasakit tayo sa kanilang pinagdadaanan, at palagi nating unahin ang kapakanan ng ating pinakanangangailangang mga kababayan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Mga Pinoy, protektahan at tulungan saan man sila sa mundo

ni Bong Go @Bisyo Magserbisyo | October 14, 2023

Isa sa mga sektor na prayoridad nating tulungan at alalayan ay ang ating mga overseas Filipino workers.

Napakalaki ng kanilang sakripisyo na napipilitang magtrabaho sa ibang bansa para lang maipagkaloob sa kanilang pamilya ang magandang buhay. Madalas din na nagiging biktima sila ng pagmamaltrato, o kaya ay naiipit sa mga kaguluhan gaya ng kasalukuyang nangyayari sa Israel kung saan marami rin tayong OFWs.

Kaya masakit para sa aking mabalitaan na tatlo na sa ating mga kababayan ang namatay dahil sa kaguluhan doon, kasama na ang isang nurse na kababayan nating nagpasyang hindi iiwan ang kanyang pasyente at tinupad ang kanyang tungkulin sa trabaho hanggang sa huling sandali bago siya pinatay. Para sa akin, isa siyang tunay at kahanga-hangang bayani. Nakikiramay ako sa kanilang mga pamilya.

Sa harap ng nagaganap na gulo sa pagitan ng Israel at ng Hamas sa Gaza Strip, umapela tayo sa iba’t ibang ahensya ng pamahalaan kabilang ang Department of Migrant Workers, Department of Foreign Affairs, at Philippine Overseas Employment Administration na patuloy na tulungan ang mga Pilipinong apektado ng kaguluhan.

Bukod sa pagtiyak sa kanilang kaligtasan, importante na malaman ng kanilang mga kamag-anak dito sa Pilipinas na ligtas sila sa kanilang kinaroroonan, at ginagawa ng pamahalaan ang lahat para masiguro ang kapakanan ng kanilang mga mahal sa buhay na nasa Israel o saan mang parte ng mundo.

Bilang tayo ang Vice Chair ng Senate Committee on Migrant Workers, binigyang-diin natin sa ating panawagan ang mabilis at komprehensibong imbentaryo ng lahat ng apektadong OFWs, lalung-lalo na ang mga posibleng naging biktima roon ng naganap na karahasan. At hangga’t maaari, kailangang planuhin agad ang mabilisang pagpapauwi sa kanila dahil hindi natin tiyak kung patuloy pang lalala ang sitwasyon doon.

Napakahalaga na ligtas ang ating mga kababayan nasaan man sila sa mundo. Kaya umaapela tayo sa DMW, DFA, at ang POEA na bilisan ang pagkilos dahil importante ang oras sa mga panahong ito at tiyakin na matutukoy lahat ang ating mga kapwa Pilipino na nasa Israel.

Umapela rin ako sa ating mga kababayan na nasa Israel na tiyakin din ang kanilang kaligtasan.

Makipag-ugnayan sila sa ating embahada. Sabi ko nga, nauunawaan ko na marami sa kanila ang may maayos at magandang buhay sa bansa na kanilang kinaroroonan, pero dapat pa ring maging prayoridad ang kanilang kaligtasan.

Sa ating mga kababayan sa Israel, kung may alam kayo na kababayan natin d’yan na nangangailangan ng tulong, gamitin natin ang mga nararapat na linya ng komunikasyon at ipaalam sa ating pamahalaan para maprotektahan ang ating kapwa Pinoy na nasa delikadong kalagayan.

Mahal natin ang ating mga OFWs na itinuturing nating mga bagong bayani. Sila ang ating inspirasyon kaya natupad natin ang isa sa ating mga pangarap, ang pagtatayo ng DMW, ang departamentong tututok sa kanila kapag mayroon silang problema sa pagtatrabaho sa ibang bansa. Nalikha ang DMW sa pamamagitan ng Republic Act No. 11641 na isa tayo sa may-akda at co-sponsor. Sa mga pagkakataong tulad ng kaguluhang nagaganap sa Israel, dito natin nakikita ang importansya ng nasabing ahensya na ating isinulong.

Samantala, tuluy-tuloy ang ating paghahatid ng serbisyo para sa ating mga kababayan na nahaharap sa iba’t ibang krisis, gayundin ang iba pa nating gawain sa loob at labas ng Senado.

Personal naman nating sinaksihan noong October 11 ang groundbreaking ng itatayong Super Health Center sa Plaridel, Bulacan. Pinangunahan din natin ang pamamahagi ng tulong para sa mahihirap na residente sa lugar kasama sina Vice Governor Alex Castro, Congresswoman Augustina “Tina” Pancho, Mayor Jocell Vistan, Vice Mayor Lorie Vinta, at iba pa nilang opisyal.

Kasabay nito ay isinagawa rin ang groundbreaking para sa itatayong Super Health Center sa Initao, Misamis Oriental at sa Rodriguez, Rizal. Noong October 12 naman ay nagkaroon din ng groundbreaking ang itatayong Super Health Center sa Isabela City, Basilan.

Nakarating naman ang aking tanggapan sa iba’t ibang komunidad para magkaloob ng tulong sa mahihirap na residente at apektadong sektor.

Kamakailan ay nagkaloob tayo ng tulong para sa 500 mahihirap na residente ng Calapan, Oriental Mindoro katuwang sina Mayor Marilou Morillo at Councilor Atty. Jelina Maree Magcusi. Natulungan din natin ang 655 mahihirap na residente ng Caloocan City katuwang ang tanggapan ni Congresswoman Mitch Cajayon. Namahagi rin ang ating tanggapan ng tulong para sa 700 mahihirap na residente ng South District ng Cebu City katuwang si Congressman Edu Rama.

Nagbigay rin tayo ng suporta sa mga TESDA graduates gaya ng 300 mula sa Ormoc City, Leyte; 400 mula sa Tacloban City, Leyte; 150 sa Mambusao at 100 sa Roxas City, Capiz; gayundin ang 25 benepisyaryo sa ginanap na TESDA Orientation sa San Fernando City, Pampanga.

Naalalayan natin ang ilang mga displaced workers tulad ng 350 sa Gapan, Nueva Ecija katuwang ang tanggapan ni Congressman GP Padiernos; 642 sa Medina, Misamis Oriental katuwang ang tanggapan ni Congressman Christian Unabia; 381 sa Dumarao, Capiz katuwang ang tanggapan ni Mayor Matt Hachuela; at 372 displaced workers ng Mataas na Kahoy, Batangas katuwang si Mayor Janet Ilagan. Ang mga benepisyaryong ito ay kwalipikado rin sa programa ng DOLE na nagbigay ng pansamantalang trabaho sa kanila.

Samantala, umalalay rin tayo sa mga naging biktima ng sunog at naging benepisyaryo ang 31 residente ng Tagoloan, Misamis Oriental; at anim sa Remedios T. Romualdez, Agusan del Norte.

Namahagi rin tayo ng dagdag na tulong sa 13 nasunugan sa Iligan City at 18 binaha sa Maigo, Lanao del Norte bukod sa natanggap nila mula NHA sa pamamagitan ng programa na ating isinulong noon para may pambili ng mga materyales tulad ng pako, yero at iba pa sa pagsasaayos ng kanilang bahay ang mga naging biktima ng sakuna.

Tututukan natin ang nagaganap na kaguluhan sa Israel dahil kabilang ang buhay ng ating mga kababayan na naroroon ang nakataya rito. Sama-sama nating proteksyunan ang buhay ng bawat Pilipino nasaan man sila sa mundo.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Mga mahihirap, proteksyunan ang kabuhayan at kalusugan

ni Bong Go @Bisyo Magserbisyo | October 11, 2023

Madalas kong sabihin na napakaimportante sa akin na walang magugutom na Pilipino.

Kaya naman sa harap ng patuloy na pagtaas ng presyo at lumalaking gastusin ng ating mga kababayan, nanawagan tayo sa Department of Trade and Industry, Department of Social Welfare and Development at Department of Health na tutukan ang mga isyung ito na may malaking epekto sa kabuhayan at kalusugan ng ating mga kababayan.

Ang ating panawagan ay kasunod ng resulta ng lumabas na survey na nagpapakita kung gaano na nahihirapan ang mga pamilyang Pilipino sa kasalukuyan.

Batay sa isinagawang survey ng Pulse Asia mula September 10-14, 2023, ang 95% ng pamilyang Pilipino ay nadagdagan ang ginagastos para sa kanilang pagkain sa nakalipas na tatlong buwan.

Gayunpaman, kahit lumaki ang kanilang nagagastos, ang 53% ng mga pamilyang ito ay napilitan pang magtipid sa kanilang pagkain.

Kaya ang pakiusap ko sa mga ahensya ng ating pamahalaan, unahin natin ang kapakanan ng mga mahihirap. Huwag nating kaliligtaan ang ating mga minimum wage earners. Ang bawat piso ay napakahalaga para sa kanila.

Ang apela ko sa DTI na dapat ay nasa unahan sila ng ating pagprotekta sa ordinaryong consumers. Kailangan ng agarang interventions para hindi malubhang tumaas ang presyo ng mga bilihin. I-monitor ang mga presyo ng mga produkto at serbisyo at maglatag ng mga hakbang para mapagaan ang epekto nito sa buhay ng mga mahihirap nating kababayan.

Umapela rin tayo sa DSWD na ipagpatuloy at mas palawakin pa ang kanilang mga programa na tumutulong sa kuwalipikadong mahihirap na pamilya at biktima ng iba’t ibang krisis na makaraos ang mga ito sa pamamagitan ng agarang tulong pinansyal.

Sabi ko nga sa DSWD, nand’yan naman ang pera at mga programa na aprubado ng Kongreso kaya dapat ay gamitin para mapakinabangan ng higit na nangangailangan.

Wala dapat pinipiling tulungan. Basta gamitin nang maayos at tama ang pondo para sa mga mahihirap, hopeless, helpless at walang malalapitan maliban sa pamahalaan.

Bilang chair ng Senate Committee on Health, umapela rin tayo sa DOH na tutukan ang nutrisyon ng ating mga kababayan lalo ngayong nagtitipid ang maraming Pilipino sa pagkain. Ayokong nakokompromiso ang aspeto ng nutrisyon. Naniniwala ako na ang kalusugan ng bawat Pilipino ay mahalaga dahil katumbas nito ay isang malusog at masaganang buhay.

Sa parte ko, sinuportahan natin ang mga panukalang budget at programa para sa 2024 ng DTI, DSWD at DOH noong natalakay ito sa budget hearings sa Senado. Basta lang makabenepisyo sana ang mga ito sa mga pinakanangangailangan.

Patuloy rin tayo sa ating misyon na ilapit ang serbisyo at tulong mula sa gobyerno sa iba’t ibang sektor na nahaharap sa krisis at hirap.

Noong October 7 ay nasa Cebu City tayo para mamahagi ng pagkain sa mga pasyenteng pumipila sa Malasakit Center sa loob ng Cebu City Medical Center. Pinangunahan din natin ang pamamahagi ng tulong sa 72 pamilyang nasunugan sa Bgy. Tejero.

Matapos ito ay bumiyahe tayo sa Aklan at sinaksihan ang groundbreaking ng itatayong Balete Super Health Center. Binisita rin natin ang itinatayong evacuation center sa Bgy. Fulgencio na ating sinulong na mapondohan. Dumiretso tayo sa Makato at namahagi ng tulong sa 900 indigents at sa 600 na biktima ng bagyo. Sinaksihan din natin ang pagsisimula Sto. Niño Ati-Atihan Festival sa Kalibo. Nakasama natin sina Cong. Ted Haresco, Governor Joen Miraflores, Vice Governor Reynaldo Quimpo, Kalibo Mayor Juris Sucro, Balete Mayor Dexter Calizo, Ibajay Mayor Miguel Miraflores at iba pang mga lokal na opisyal.

Nagkaloob naman ang aking tanggapan ng tulong para sa 685 mahihirap na residente ng Cebu City; 563 na naging biktima ng sunog sa Zamboanga City; 37 sa Cagayan de Oro City; at sa 174 sa Caloocan City.

Nasa Sultan Kudarat naman tayo noong October 9 at sinaksihan ang groundbreaking ng itatayong Esperanza Super Health Center kasama si Mayor Charles Ploteña at iba pang local officials. Nag-inspekyon din tayo sa kinonkretong Junctional National Highway mula Barangay Saliao hanggang Purok Masagana na natulungang mapondohan sa ating pamamagitan.

Nagpapasalamat tayo sa pamahalaang panlalawigan ng Sultan Kudarat sa pamumuno ni Governor Datu Pax Ali Mangudadatu na sa bisa ng isang resolusyon ng Sangguniang Panlalawigan na kanilang ipinasa ay idineklara tayo bilang “adopted son” ng probinsya.

Isa itong malaking karangalan na nais kong masuklian sa pamamagitan ng aking pagseserbisyo.

Dumiretso naman tayo sa North Cotabato at sinaksihan ang ribbon cutting ceremony ng itinayong Makilala Public Market. Natulungang mapondohan din ito sa ating pamamagitan.

Sinaksihan din natin ang turnover ceremony ng kanilang New Municipal Hall — na ating sinulong na mapondohan noon. Personal din nating pinangunahan ang pamamahagi ng ayuda sa 481 mahihirap na residente sa lugar kasama sila Governor Lala Taliño-Mendoza, Mayor Armando Quibod at iba pang mga opisyal.

Binisita rin natin ang ating mga sundalong miyembro ng 39th Infantry Battalion 10ID sa Bgy. Poblacion at sinaksihan ang ceremonial turnover ng ipinagkaloob nating 485 pail of goodies at ilang mga bola. Dinaluhan din natin ang PNPA Sinaglaya Class 2002 Oath Taking na ginanap sa Orange Grove Hotel, Buhangin, Davao City noong gabing iyon.

Masaya ko ring ibinabalita na sa araw na iyon ay nagkaroon na ng groundbreaking para sa itatayong Super Health Centers sa Claveria, Misamis Oriental at Albuera, Leyte.

Kahapon, October 10, ay dumalo tayo sa ginanap na 5th National Convention of the Public Attorney’s Office Rank and File Employees, sa imbitasyon ni PAO Chief Atty. Persida Acosta.

Ito na ang ikalawang pagkilala sa akin ng PAO. Sabi ko nga, with or without award ay magseserbisyo ako sa aking mga kapwa Pilipino.

Samantala, kasabay ang pamamahagi ng ayuda pambili ng materyales sa bahay ng National Housing Authority ay namigay rin ng dagdag na tulong ang aking opisina sa pitong benepisyaryo sa Gingoog City, Misamis Oriental.

Nagkaloob din tayo ng dagdag na tulong sa 190 displaced workers sa Silay City, Negros Occidental, at sa 120 sa Lebak, Sultan Kudarat. Ang mga benepisyaryong ito ay natulungan rin ng Department of Labor and Employment upang mabigyan ng pansamantalang trabaho.

Gaano man kahirap ang sitwasyon, dapat gawing prayoridad nating mga nasa gobyerno ang kapakanan ng mga mahihirap nating kababayan. Bawat hakbang ay mahalaga mula sa pagbantay sa mga presyo ng bilihin, pagkakaloob ng sapat na tulong at pagtiyak na mayroon silang tamang nutrisyon. Huwag nating kalilimutan na ang katatagan ng isang bansa ay nakasalalay sa kalusugan ng mamamayan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.