Tamang nutrisyon para sa mabuting kalusugan ng mga Pinoy

ni Bong Go @Bisyo Magserbisyo | October 28, 2023

Lagi kong sinasabi at ipinapaalala bilang tayo ang chair ng Senate Committee on Health na napakahalagang aspeto ng tamang nutrisyon para mapanatili ang pangkalahatang kalusugan ng isang tao.

Importante ito lalo na sa mga pasyente para mas mabilis silang gumaling sa kanilang mga karamdaman, at maging sa mga nagtatrabaho sa medical community na siyang nag-aalaga sa mga pasyente. Dapat nating tiyakin na ang ating mga pasyente sa mga ospital, maging ang ating healthcare workers at frontliners ay may access sa masusustansyang pagkain lalo na sa panahon ngayon na mahirap ang buhay.

Ang importante sa akin ay may laman ang tiyan ng ating mga kababayan. Unahin natin ang kapakanan ng mga mahihirap. Sikapin natin na walang magutom sa kanila.

Bilang ehemplo, sinikap nating maghatid ng libreng pagkain para sa mga pasyente, hospital workers, at frontliners sa mga pampublikong ospital na may Malasakit Centers para palaganapin ang kahalagahan ng tamang nutrisyon sa bawat Pilipino. Hindi lang ito basta pagtulong lang sa kanila, kundi isa ring simbolo ng pangangalaga at pagsuporta sa kanilang mga sakripisyo at kabayanihan.

Nais ko ring bigyang-diin ang kahalagahan ng wastong nutrisyon sa ating mga kababayan, kaya sa paglilibot ng aking opisina sa mga komunidad, palagi naming sinisikap na magbigay ng kaunting pagkain upang hindi sila magutom. Sa pagkain tayo kumukuha ng lakas at proteksyon laban sa iba’t ibang sakit kaya dapat lang na ang bawat Pilipino ay may access sa sapat at masustansyang pagkain. Naniniwala tayo na ang malusog na katawan ay isa sa mga pundasyon ng pag-unlad ng bawat pamilyang Pilipino.

Sa ating isinasagawang feeding activities sa iba’t ibang Malasakit Centers sa buong bansa, nakapaghatid tayo ng pagkain tulad ng lugaw sa mga pampublikong ospital sa Metro Manila, at maging sa mga ospital sa Pampanga, Bulacan, Batangas, Cavite, Laguna at Rizal. Nakabenepisyo na rin dito ang mga pasyente, hospital workers at frontliners sa mga ospital sa Cebu, Aklan at Antique sa Visayas. Sa Mindanao, nakapagdaos din tayo ng feeding initiative sa mga ospital sa Misamis Oriental, Lanao del Sur, Lanao del Norte, Bukidnon, Davao del Norte, Davao del Sur, Davao de Oro, Cotabato City, Surigao del Sur, Agusan del Norte, Sultan Kudarat at marami pang iba.

Sa totoo lang, nababahala tayo sa pagtaas ng kaso ng malnutrisyon sa ating bansa na nakakaapekto na sa milyun-milyong batang Pilipino, na nagpapabagal sa kanilang paglaki at pagkatuto. Kailangang masolusyunan agad ito sa pamamagitan ng sama-samang pag-aksyon ng mga nasa gobyerno.

Kung matatatandaan, noong panahon ni dating Pangulong Rodrigo Duterte ay ipinatupad ang Philippine Plan of Action for Nutrition 2017-2022 para matugunan ang malnutrisyon sa buong bansa. Isa sa mga naging istratehiya ng naturang plano ay ang magpokus sa unang 1,000 days ng sanggol para matiyak na magkakaroon siya ng pinakamaayos na pag-unlad sa pisikal at mental na aspeto. Maipagmamalaki natin

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Suporta at pagkilala sa ating para-athletes

ni Bong Go @Bisyo Magserbisyo | October 25, 2023

Pagkatapos mag-uwi ng mga medalya at karangalan ng ating mga pambansang atleta na sumabak sa Asian Games kamakailan, kasalukuyan namang ginaganap ngayon sa Hangzhou, China ang 4th Asian Para Games.

Ang naturang sports competition ay nagsimula noong October 22 at matatapos sa October 28.

Bilang Chair ng Senate Committee on Sports, ineengganyo ko ang lahat ng ating mga kababayan na ipagbunyi ang bawat laban ng ating para-athletes.

Gaya rin ng iba nating atleta, suportado natin ang ating mga para-athletes, at sa katunayan ay nai-file natin sa Senado ang Senate Bill No. 2116, na hangaring mag-aamyenda sa Republic Act No. 10699, o ang National Athletes and Coaches Benefits and Incentives Act.

Kung pumasa at maging batas, ang SBN 2116 na ating inakda ay maghahatid ng mga dagdag-suporta at insentibo sa ating mga para-athletes. Layunin nito na madagdagan ang matatanggap mula sa gobyerno ng ating mga para-athlete medalists sa mga qualified international competitions bilang pagkilala sa dangal at karangalan na dinala nila sa bansa.

Pinaghirapan at pinagpawisan nila ang mga medalyang ‘yan. Hindi nila ginusto na ang iba sa kanila ay may kapansanan kaya hindi sila dapat maliitin dahil sa kabila nito, hindi naging hadlang ito na maipakita ang kanilang kagalingan sa larong pinagtagumpayan nila sa international stage. Sa halip, bigyan natin sila ng karampatang suporta at insentibo bilang pagkilala sa kanilang husay, katatagan at sakripisyo sa harap ng pagsubok na kanilang hinarap para itaas ang bandera ng ating bansa.

Bukod sa dagdag na insentibo para sa ating para-athletes, layunin din ng ating panukala na mabigyan sila ng pantay na oportunidad at pagkilala na ibinibigay sa bawat atletang Pilipino.

Walang dapat maiiwan sa ating mga atleta para mas mapalaganap natin ang inclusivity and diversity sa ating sports program. Ito ang pinakapuso ng ating isinumiteng panukala.

Lagi rin nating ipinaglalaban ang ating sports programs na nasa ilalim ng Philippine Sports Commission. Sa ginanap na budget deliberation noong isang taon, ang panukalang budget para sa PSC nitong 2023 ay nasa humigit-kumulang P200 milyon lang. Bilang inyong Vice Chair ng Senate Committee on Finance, isinulong natin na madagdagan ng P1 billion ang pondo ng PSC kaya nadagdagan ang suporta para sa ating mga atletang lumahok sa international competitions, pati na rin sa ating mga grassroots sports development programs. Kasama sa ating naipaglaban na pondo ang 30 million pesos para sa preparation, training and participation sa 2023 ASEAN Para Games.

Bukod dito, natupad na ang pangarap natin na maitatag ang National Academy of Sports, na nasa New Clark City sa Tarlac matapos lagdaan ni dating Pangulong Rodrigo Duterte ang RA 11470 noong June 2020, na tayo ang may akda at isa sa co-sponsor.

Ngayon ay puwede nang mag-training sa NAS ang ating mga kabataang may talento sa sports nang hindi nasasakripisyo ang kanilang pag-aaral dahil kasabay na pinagkakalooban sila ng dekalidad na edukasyon.

Isinumite rin natin ang SBN 423, o ang panukalang PNG Act, na kung makapasa at maging ganap na batas ay naglalayon para sa institutionalization ng Philippine National Games bilang oportunidad upang maipakita ng mga kabataang atleta ang kanilang husay at makatuklas tayo mula sa kanila ng mga magiging bahagi ng ating national pool para sa future competitions.

Isa rin sa layunin natin sa grassroots program ay para maengganyo ang ating mga kabataan to get into sports, and stay away from drugs, at mapanatili ang ating maayos na kalusugan. Bilang chairman ng Senate Committee on Health, nais kong bigyang diin na konektado ang sports at health dahil kapag fit ka, healthy ka. Pangalagaan natin ang kalusugan ng bawat isa. Ang katumbas ng maayos na kalusugan ay maginhawang buhay para sa bawat Pilipino.

Tuluy-tuloy naman ang ating mga gawain bilang lingkod bayan, tulad ng paghahatid ng serbisyo sa ating mga kababayang nahaharap sa iba’t ibang krisis.

Nasa Davao del Norte tayo kahapon, October 24, para tingnan ang naipatayong multi-purpose building o ang “Bahay ni Maria”, at para na rin sa blessing at turnover ng itinayong multi-purpose building na gagamitin bilang Emergency Operations Center at Municipal Disaster Risk Reduction and Management Operation Center sa bayan ng Kapalong. Ang proyektong ito ay ating isinulong na mapondohan noon.

Matapos ito ay dumiretso tayo sa Babak, Island Garden City of Samal at dumalo sa ginanap na Provincial Health Information Management Orientation for Barangay Health Workers. Personal din nating pinangunahan ang pamamahagi ng tulong sa 200 BHWs. Nauna nang nakatanggap ang 250 pang BHWs noong October 23 ng kaparehas na tulong mula sa aking tanggapan.

Naghatid naman ang aking opisina ng tulong sa mga naging biktima ng insidente ng sunog at naalalayan ang anim na apektadong residente mula sa Bgy. Lagubang at Bgy. Limuhay sa bayan ng Senator Ninoy Aquino sa Sultan Kudarat.

Namahagi rin tayo ng tulong sa mga miyembro ng iba’t ibang sektor katulad ng 253 displaced workers sa Koronadal City katuwang ang tanggapan ni Cong. Peter Miguel; at 268 sa Talitay, Maguindanao del Norte, na katuwang si Mayor Sidik Amiril. Ang mga benepisyaryo ay kuwalipikado rin na makatanggap ng pansamantalang trabaho mula sa DOLE.

Natulungan din natin ang mga maliliit na negosyante gaya ng 48 benepisyaryo sa Vigan; at 20 sa Caoayan, Ilocos Sur; at ang 43 sa Bgy. 22-C at Bgy. 21-C sa Davao City na nabiktima ng sunog noon, bukod sa livelihood kits na ipinamahagi ng DTI mula sa programang ating isinulong noon.

Nagpadala rin tayo ng 25 food packs sa mga lumahok sa ginanap na Pastoral Appreciation Week sa Baguio City, katuwang si Councilor Vladimir Cayabas.

Kilalanin natin ang katatagan ng mga Pilipino sa harap ng anumang pagsubok tulad ng ating mga world-class para-athletes. Suportahan natin sila sa kanilang bawat laban at bigyang importansya ang kanilang husay at sakripisyo para sa bayan. Ang karangalang kanilang maiuuwi ay karangalan din na maipagmamalaki ng bawat Pilipino.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Unahin ang kapakanan ng mga mahihirap at pinakanangangailangan

ni Bong Go @Bisyo Magserbisyo | October 21, 2023

Habang unti-unting bumabangon ang ating bansa mula sa hagupit ng pandemya na ilang taon din nating pinagsikapang labanan bilang nagkakaisang mga Pilipino, marami pa rin tayong kinakaharap na mga bagong hamon na dulot ng mga pandaigdigang kaganapan.

Mataas pa rin ang presyo ng bilihin. Marami sa ating mga kababayan ang pinagkakasya ang kanilang maliit na kinikita para lang makakain ng tatlong beses sa isang araw ang kanilang pamilya, bukod pa ang para sa kanilang pangunahing pangangailangan, at mga bayarin gaya ng kuryente at tubig. Kaya naman umaapela tayo sa Department of Trade and Industry na tutukan ang presyo ng mga pangunahing bilihin at gawan agad ng aksyon upang hindi na mas bumigat pa ang pasanin ng ordinaryong Pilipino.

Importante sa akin na walang magugutom na Pilipino. Ayaw natin na maapektuhan ang kalusugan ng ating mga mamamayan, na kinakailangang magtipid sa kanilang pagkain.

Mahalaga ang tamang nutrisyon lalo na sa mga kabataan, kaya bilang Chair ng Senate Committee on Health, umapela rin tayo sa Department of Health na tutukan ang kalusugan ng bawat Pilipino.

Umapela rin tayo sa Department of Social Welfare and Development na ipagpatuloy ang pagkakaloob ng ayuda lalo na sa mga mahihirap, mga hopeless, helpless at walang malalapitan maliban sa pamahalaan sa mabilis at nararapat na paraan. Gamitin dapat ang pondo ng bayan ng wasto, para mapakinabangan ng taumbayan.

Bilang mambabatas at pangunahing may akda at sponsor ng Malasakit Centers Act, tinututukan rin natin ang patuloy na operasyon ng mga Malasakit Center sa buong bansa na napakaraming natutulungang mahihirap na pasyente. Bukod pa rito ang pagsulong ng pagpapatayo ng mga Super Health Centers sa tulong ng DOH, lokal na pamahalaan at mga kapwa mambabatas para mailapit sa tao ang serbisyo medikal ng gobyerno tulad ng primary care, consultations at early disease detection.

Habang nagpapatuloy naman ang giyera sa pagitan ng Russia at Ukraine, pati na rin ang gulo sa pagitan ng Israel at Hamas, kailangan nating maghanda sa epekto nito sa ating ekonomiya. Higit pa rito ay ang kaligtasan ng Filipinos abroad na apektado ng kaguluhan doon. Napakasakit para sa atin na mabalitaan na ilan na sa ating mga kababayan ang namatay dahil sa kaguluhan.

Habang nakikiramay tayo sa kanilang mga naulilang pamilya, dapat sikapin din ng gobyerno na iligtas ang iba pang Pilipinong humihingi ng saklolo.

Kaya sa simula pa lang ay umapela na tayo sa DMW, DFA, at sa POEA na bilisan ang pagkilos dahil importante ang oras sa mga panahong ito at tiyakin na matutukoy lahat ang ating mga kapwa Pilipino na apektado. Ipanalangin natin ang kanilang kaligtasan at bigyan ng sapat na tulong para maidala sila sa ligtas na lugar.

Sa kabila ng mga hamon na hinaharap ng bansa, sana ay magkaisa tayo at sama-samang tulungan ang gobyerno upang maisakatuparan ang ating iisang hangarin na mabigyan ng mas matatag, maginhawa at ligtas na bansa ang bawat Pilipino na ating pinaglilingkuran.

Ang mga isyu sa loob at labas ng bansa ay labis na nakakaapekto sa mga dalahin ng mga karaniwang Pilipino. Kaya sikapin nating maging bahagi ng solusyon at mag-focus sa mga tungkuling nasa ating mga kamay bilang mga lingkod bayan. Sa ating parte, tuluy-tuloy ang ating pagseserbisyo sa mga kababayan nating nahaharap sa iba’t ibang krisis.

Masaya kong ibinabalita na ngayong linggo ay nagkaroon na ng groundbreaking ang itatayong Super Health Centers sa Cabadbaran City, Agusan del Norte; Brgy. Labangon sa Cebu City; Pitogo, Zamboanga del Sur; gayundin ang itatayo naman sa Tigbauan, Iloilo na sinaksihan ng ating tanggapan.

Nagbigay tayo ng tulong sa 1,000 mahihirap na residente ng Llanera, Nueva Ecija katuwang ang tanggapan ni Cong. GP Padiernos; 500 miyembro ng iba’t ibang sektor sa Barangay Mintal, Davao City; at 333 sa Pulupandan, Negros Occidental katuwang ang grupong Malasakit at Bayanihan.

Nakapamahagi rin tayo ng dagdag na tulong sa 93 displaced workers sa Lumban, Laguna; 210 sa Pilar, Bohol; at 1,104 pa mula sa iba’t ibang bayan ng Bohol. Ang mga benepisyaryo ay binigyan rin ng pansamantalang trabaho ng DOLE.

Mayroon ding 43 residente ng Davao City at siyam sa La Paz, Agusan del Sur na naging biktima ng sunog noon, pati 32 biktima ng pagbaha sa Kalamansig, Sultan Kudarat, na ating binigyan ng hiwalay na tulong bukod sa natanggap nilang livelihood kits sa pamamagitan ng programa ng DTI na ating patuloy na sinusuportahan ang implementasyon.

Sinuportahan rin nating makabangon ang 283 kababayang nabiktima ng sunog noon sa Cagayan de Oro City na binigyan natin ng hiwalay na tulong bukod pa sa natanggap na housing assistance mula sa programa ng NHA na ating isinulong noon para may pambili ng mga materyales tulad ng pako, yero at iba pa sa pagsasaayos ng kanilang bahay ang mga naging biktima ng sakuna.

Agarang tulong naman ang naibigay sa ating mga kababayang nabiktima ng sunog tulad ng 50 pamilya sa Baseco, Manila City. Nagkaloob din tayo ng dagdag tulong sa 200 scholars sa kanilang ginanap na TESDA Orientation sa Daet, Camarines Norte.

Gaya po ng madalas kong sabihin, ang pagiging lingkod bayan ay isang oportunidad na ibinigay sa atin ng taumbayan para ipaglaban at pagserbisyuhan sila. Ibalik natin ang tiwala at suporta na ibinigay sa atin sa pamamagitan ng pagtulong sa mga nangangailangan nating mga kababayan. Unahin natin ang kanilang kapakanan at ipamalas natin ang ating sinseridad sa pagseserbisyo at pagmamalasakit sa kanilang mga pinagdadaanan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.