Mga programa ng gobyerno, tiyaking nararamdaman ng mga Pinoy

ni Bong Go @Bisyo Magserbisyo | November 8, 2023

Noong November 4 ay tinanggap na ng Senado ang House Bill No. 8980, o ang General Appropriations Bill for 2024 mula sa House of Representatives.

Ngayong linggo ay sisimulan nang talakayin sa plenaryo ang 2024 national budget na nagkakahalaga ng halos anim na trilyong piso. Sa halagang ito, mainam na suriin saan planong gamitin ang pondo upang masigurong magkakaroon ng benepisyo ang taumbayan at walang masasayang ni piso sa paggamit nito.

Sa parte ko, lalo na bilang Chair ng Senate committees on Health at on Sports at Vice Chair ng Senate Committee on Finance, suportado natin ang panukalang budget para sa susunod na taon.

Dapat ay gawing prayoridad ang mga programang makatutulong sa mga mahihirap, hopeless, helpless at walang malalapitan maliban sa pamahalaan, at ang mga inisyatiba para mas mapaganda pa ang paghahatid ng serbisyong pangkalusugan at sports sa buong bansa lalo na sa malalayong lugar.

Gusto kong bigyang-diin na ang prayoridad ko ay ang mga programang makatutulong sa mga mahihirap at tiyakin na walang Pilipino na magugutom. Magtutulungan kami ng mga kapwa ko mambabatas na ilapit ang serbisyo medikal at ang iba pang serbisyo ng gobyerno sa ating mga kababayan. Huwag na nating hintayin na sila pa ang lalapit sa atin para magmakaawang humingi ng tulong. Sino ba naman ang magtutulungan kundi tayo na kapwa natin Pilipino? Ang mga walang-wala na umaasa sa gobyerno ang dapat nating unahin na maramdaman ang mga programa na ating inilaan para sa kanila.

Pagdating sa kalusugan, isusulong ko kung ano ang makakabuti sa ating healthcare system gaya ng pagtiyak na ang ating healthcare workers ay nakatatanggap ng sapat na suporta mula sa gobyerno. Itong ating healthcare workers ay walang tigil sa pagtupad sa kanilang tungkulin lalo pa noong pandemya kaya labis ang ating pasasalamat sa kanilang sakripisyo. Kailangan nating mag-invest sa ating healthcare workforce, mapabuti ang ating mga pasilidad, at dagdagan ang accessibility ng ating mga kababayan sa mga essential medicines at primary care upang hindi na lumubha ang kanilang mga karamdaman.

Dapat ding mapalakas ang implementasyon ng Universal Health Care Act (UHC) na nagkakaloob ng abot-kaya at de-kalidad na serbisyong pangkalusugan. Tiwala ako na mas magagampanan ng ating healthcare workers ang kanilang trabaho kung maayos na naipatutupad ang mga batas pangkalusugan. Kaya mahalaga na tiyakin na ang mga layunin ng UHC ay naisasakatuparan.

Isa rin sa ating mahalagang inisyatiba ang Senate Bill No. (SBN) 427, o ang Barangay Health Workers Compensation Bill. Kung maisabatas, layunin nito na magkaloob ng tamang kumpensasyon at mga benepisyo sa BHWs lalo pa at may mahalagang papel silang ginagampanan sa paghahatid ng primary healthcare services sa kanilang komunidad.

Isinumite rin natin sa Senado ang SBN 191, o ang Advanced Nursing Education bill, na naglalayon na mas mapalawak pa ang kaalaman at kakayahan ng ating nursing professionals kung maisabatas.

Sa pamamagitan ng pag-i-invest sa advanced nursing education, makatitiyak tayo sa mas mataas na pamantayan sa pangangalaga at kahandaan sakaling may sumulpot na panibagong krisis pangkalusugan.

Kung sakaling maihain ang panukalang Salary Standardization Law 6 (SSL 6) at masigurong may sapat na pondo para rito ay susuportahan ko ito para mas maitaas ang suweldo ng mga manggagawa sa gobyerno kabilang ang mga medical professionals na nagtatrabaho sa public sector. Isa po tayo sa may-akda at co-sponsor ng naunang Salary Standardization Law 5 (SSL 5).

Kaisa ako ng gobyerno sa paghahangad na mapagkalooban ng panibagong dagdag na sahod ang mga nasa public sector kabilang ang ating healthcare workers.

Titiyakin din natin ang patuloy na operasyon ng Malasakit Center sa mga kuwalipikadong ospital ng pamahalaan sa buong bansa. Isa ito sa ating itinaguyod noon para mapabilis ang pagkakaloob ng medical assistance sa mga pasyente dahil nasa iisang bubong na ang mga ahensya ng pamahalaan na kanilang lalapitan at hindi na sila magpapalipat-lipat pa. Batas na ito sa pamamagitan ng Republic Act No. 11463, na tayo ang principal author at sponsor. Sa kasalukuyan ay mayroon ng 159 Malasakit Centers, at batay sa datos ng DOH ay nakapaghatid na ng tulong sa mahigit pitong milyon na pasyenteng benepisyaryo.

Tuluy-tuloy rin ang ating pagsulong sa pagpapatayo ng mga Super Health Center, na isa rin sa ating mga inisyatiba, para maihatid ang pangunahing serbisyong medikal sa mga liblib na lugar.

Kabilang sa mga serbisyong hatid nito ang database management, out-patient, birthing, isolation, diagnostic (laboratory: X-Ray, ultrasound), pharmacy, at ambulatory surgical unit. Nagkakaloob din ito ng eye, ear, nose, and throat (EENT) service; oncology centers; physical therapy and rehabilitation center; at telemedicine kung saan puwedeng magpakonsulta ang pasyente sa pamamagitan ng pagtawag sa telepono. Sa pangunguna ng DOH at sa tulong ng mga kapwa ko mambabatas, napondohan ang pagpapatayo ng 307 SHCs noong 2022, at 322 ngayong 2023. Sana ay madagdagan pa ito.

Samantala, patuloy rin tayo sa ating mga gawain bilang lingkod bayan. Kahapon, November 7, ay dumalo tayo sa 36th Founding Anniversary ng Department of Health-Metro Manila Center for Health Development (DOH-MMCHD) sa Century Park Hotel Manila para magbigay ng keynote speech bilang pagsuporta sa mga programang pangkalusugan at sa ating health workers.

Nagkaloob naman ng tulong ang aking tanggapan para sa 87 mahihirap na residente ng Brgy. Baliwasan, Zamboanga City, at sa 63 naging biktima ng insidente ng sunog sa Brgy. Ilaya, Las Piñas.

Naalalayan din natin ang 36 na maliliit na negosyante ng Puerto Princesa City, Palawan.

Nagbigay tayo ng dagdag na suporta sa kanila bukod sa livelihood kits mula Department of Trade and Industry sa programa nilang ating isinulong noon.

Nagbigay rin tayo ng dagdag na tulong sa 153 na manggagawa sa San Juan City katuwang ang tanggapan ni Congresswoman Belle Zamora, bukod sa pansamantalang trabaho na ibinigay ng Department of Labor and Employment.

Sa lahat ng ating pagsisikap na makapaghatid ng serbisyo ay malinaw ang ating adhikain — ibalik sa mga tao ang pera ng gobyerno at wala dapat pinipiling tulungan lalo na pagdating sa mga pinakanangangailangan. Tiyakin natin na walang magugutom na Pilipino, at siguraduhin na nararamdaman ng ating mga kababayan ang mga programa ng pamahalaan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Mga mahihirap na Pinoy, protektahan laban sa pandaigdigang krisis

ni Bong Go @Bisyo Magserbisyo | November 4, 2023

Kailangang mapangalagaan ang kapakanan ng mga ordinaryong Pilipino nasaan man sila sa mundo.

Ito ang ating naging panawagan sa gobyerno sa harap ng patuloy na pagtaas ng tensyon sa pagitan ng Israel-Hamas, at ang posibleng epekto nito sa pandaigdigang presyo ng mga produktong petrolyo at iba pang mga bilihin.

Bukod sa kaligtasan ng mga kababayan natin doon, importante ring maproteksyunan ang kapakanan ng mga ordinaryong Pilipino laban sa epekto ng mga pandaigdigang krisis. Hindi tayo dapat na nakaantabay lang sa kung ano ang mangyayari dahil apektado ang buhay at ekonomiya natin sa mga nangyayari sa iba’t ibang sulok ng mundo.

Ang World Bank mismo ang nagpaalala na ang nagpapatuloy na gulo sa pagitan ng Israel at Hamas ay maaaring magresulta sa sobrang pagtaas ng presyo ng mahahalagang produkto gaya ng langis at pagkain. Bukod dito, hindi pa rin natatapos ang giyera sa pagitan ng Russia at Ukraine. Ang mga pandaigdigang krisis na ito ay may epekto sa kabuhayan ng bawat Pilipino.

Sa mga panahong ito na marami tayong kinakaharap na economic uncertainties, kabilang na ang inflation, kailangan nating kumilos agad sa pamamagitan ng mabilis na paglalatag ng mga hakbang para mapagaan ang dalahin ng ating mga mamamayan.

Kaya binigyang-diin natin na dapat tutukan ng pamahalaan ang pagtaas ng presyo ng mga bilihin sa ating mga pamilihan at magpatupad ng mga kinakailangang programa para maproteksyunan ang mga mahihirap nating kababayan na higit na nangangailangan.

Kaya ang pakiusap ko sa mga ahensya ng ating pamahalaan, unahin natin ang kapakanan ng mga mahihirap dahil ang bawat minuto at bawat piso ay napakahalaga para sa kanila. Bilang mga lingkod-bayan, wala dapat pinipiling tulungan ang ating gobyerno. Basta gamitin nang maayos at tama ang pondo ng bayan para maiahon ang mga mahihirap, hopeless, helpless at walang malalapitan maliban sa pamahalaan.

Umapela tayo sa Department of Social Welfare and Development, sa Department of Trade and Industry, at sa Department of Labor and Employment na palakasin ang kanilang pagsisikap na maayudahan ang mga Pilipino na hindi na mapagkasya ang kanilang kinikita para masuportahan ang kanilang mga pamilya.

Nagpaalala tayo sa DTI na dapat ay nasa unahan sila ng ating pagprotekta sa mga karaniwang mamimili. Kailangan ng agarang interventions para hindi malubhang tumaas ang presyo ng mga bilihin. I-monitor ang mga presyo ng mga produkto at serbisyo at maglatag ng mga hakbang para mapagaan ang epekto nito sa kabuhayan lalo na ng mga ordinaryong Pilipino.

Nagpayo rin tayo sa DSWD na ipagpatuloy at mas palawakin pa ang kanilang mga programa na tumutulong sa mga kuwalipikadong mahihirap na pamilya at biktima ng iba’t ibang krisis na makaraos ang mga ito sa pamamagitan ng agarang tulong pinansyal. Sabi ko nga sa DSWD, nand’yan naman ang pondo at mga programa na aprubado ng Kongreso kaya dapat ay gamitin agad para mapakinabangan nang walang pili ng mga higit na nangangailangan.

Nagpaalala rin tayo sa DOLE na patuloy na alalayan ang mga kababayan nating displaced workers para mabigyan sila ng pansamantalang trabaho.

Maging ang Department of Agriculture ay ating pinakiusapan na magpatupad ng mga hakbang na makatutulong sa ating mga magsasaka na malampasan ang mga krisis na kanilang kinakaharap at higit silang maging produktibo at mapataas ang ani mula sa kanilang mga pananim. Ang sektor ng agrikultura ang isa sa mga pinakaapektado ng inflation. Kung mag-i-invest ang gobyerno sa ating mga magsasaka, makatutulong iyon para makamit natin sa hinaharap ang seguridad sa pagkain dahil importante na may laman ang tiyan ng bawat Pilipino.

Bilang chair ng Senate Committee on Health, binibigyang-diin natin ang importansya ng tama at sapat na nutrisyon. Lahat tayo ay dapat na may tamang nutrisyon para makamit natin ang isang matatag na bansa na may malulusog na mamamayan. Kaya huwag nating hayaan na may magugutom sa ating mga kababayan. Tandaan natin na ang maayos na kalusugan ay katumbas ng maayos na buhay para sa bawat Pilipino.

Sa parte ko bilang inyong Senator Kuya Bong Go, sinuportahan natin ang mga panukalang budget at mga programa para sa 2024 ng DTI, DSWD, DA at Department of Health noong natalakay ito sa budget hearings sa Senado. Ang importante sa akin ay magamit ang pera ng bayan nang wasto at walang nasasayang para makabenepisyo ang taumbayan.

Patuloy rin tayo sa ating misyon na ilapit ang serbisyo at tulong mula sa gobyerno sa iba’t ibang sektor na nahaharap sa krisis at hirap. Kaakibat natin dito ang lokal na pamahalaan lalo na ang mga barangay dahil sila ang may alam sa tunay na sitwasyon sa ibaba.

Sa mga nanalo sa nakaraang barangay and SK elections, ang hamon ko sa inyo ay unahin palagi ang interes at kapakanan ng inyong mga nasasakupan nang may tunay na pagmamahal at malasakit sa kapwa. Always remember that public office is a public trust. Alagaan ninyo ang ibinigay na tiwala ng ating mga kababayan sa inyong lahat.

Ngayong tapos na ang eleksyon, magkaisa tayo para sa ikabubuti ng ating mga komunidad. Sa mga natapos na ang termino, sa mga magsisimula pa lang ang termino, at sa mga patuloy na magsisilbi sa kanilang mga komunidad, salamat po sa inyong dedikasyon sa paglilingkod sa ating bayan.

Bilang inyong senador, magkasama tayo sa iisang hangaring mapabuti ang kalagayan ng ating mga komunidad at maproteksyunan ang kapakanan ng ordinaryong Pilipino laban sa anumang hamon sa loob at labas ng bansa.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Sa mga bagong opisyal ng barangay, ang interes ng tao at bayan ang una!

ni Bong Go @Bisyo Magserbisyo | November 1, 2023

Isang pagkakataon para sa ating mga Pilipino, lalo na ang mga manggagawa sa iba’t ibang sektor, ang pagsapit ng panahon ng Undas para makapagpahinga.

Dahil isa ang All Saints’ Day sa ating mga official holiday kasunod ang All Souls’ Day, sama-sama nating gunitain ang tunay na layunin ng dalawang okasyon na ito — ang magdasal at makadalaw na rin sa himlayan ng ating mga pumanaw na mahal sa buhay — na isa sa mga tradisyon natin.

Isa rin ito sa maituturing na oportunidad para makapiling at makasama ang iba pa nating mahal sa buhay na nasa malalayong lugar. Karamihan sa atin ay nagsasakripisyong umuwi sa probinsiya para makasama ang mga kamag-anak. Sinasamantala na rin nila ang pagkakataon na mabisita ang mga kaibigan, at makapaglibot sa lugar na kanilang kinalakihan. Ang mga ganitong aktibidad ay maituturing na oportunidad upang makapagpahinga, maalagaan ang ating sarili, at mabigyan ng oras ang ating pamilya.

Gayunpaman, ang pinakaimportante sa okasyon ng All Saints’ Day ay ang pagdarasal at pagpuri sa mga santo at martir na nagsisilbing inspirasyon sa ating pananampalataya.

Anuman ang ating relihiyon o paniniwala, nawa’y maisapuso natin ang mga aral ng kabutihan at serbisyo sa kapwa na ipinamulat sa atin sa okasyon na ito na susundan naman ng ating pagdalaw sa himlayan ng ating mga mahal sa buhay at ang pag-aalay sa kanila ng panalangin para sa lalong ikatatahimik ng kanilang kaluluwa sa paggunita ng All Souls’ Day.

Sa okasyon na ito, bigyang-diin natin ang halaga ng mga aral na mapupulot natin mula sa mga kuwento tungkol sa buhay ng ating mga itinuturing na santo at martir na puwedeng maging gabay sa pagiging tamang ehemplo pagdating sa pagseserbisyo at pagmamalasakit sa kapwa.

Gawin din nating maayos at mapayapa ang araw na ito bilang respeto sa sagradong okasyon ng pagbibigay-puri sa pananampalataya ng bawat isa.

Bilang chair ng Senate Committee on Health, ipinaaalala ko na ingatan din ang ating kalusugan habang kapiling ang ating mga mahal sa buhay. Umaapela rin tayo sa ating mga law enforcers na tiyakin ang kaligtasan ng bawat Pilipino, lalo na sa mga simbahan, sementeryo, mga terminal at iba pang lugar na maraming tao. Dahil magkakasunod ang mga araw na walang pasok ang mga kabataan, siguraduhin nating protektado ang mga bata at ang kanilang buong pamilya.

Samantala, noong October 30 ay isinagawa ang Barangay at Sangguniang Kabataan Elections.

Isa tayo sa milyun-milyong Pilipino na pumila sa mga presinto para bumoto. Malaki ang papel ng mga barangay officials dahil sila ang unang nilalapitan ng mga residente kapag kailangan ng tulong. Sila rin ang unang tagapagpatupad ng mga programa ng pamahalaan lalo na sa paghahatid ng ayuda, pag-alalay sa iba’t ibang sektor, at pagsagip sa panahon ng kalamidad at sakuna. Malaki ang ating pasasalamat sa mga barangay officials dahil katuwang sila ng ating tanggapan tuwing mayroon tayong relief activities at iba pang programa.

Sa mga nagwagi, tuparin ninyo ang inyong tungkulin nang buong katapatan dahil public office ang inyong pinasukan. Public service, public office is a public trust po iyan. Huwag ninyong sayangin ang ibinigay na tiwala ng ating mga kababayan sa inyong lahat. Sa mga SK naman, kinabukasan kayo ng ating bayan at malayo ang inyong mararating basta unahin lang ninyo lagi ang pagmamahal at may malasakit na pagseserbisyo sa ating mga kababayan.

Iyan ang lagi nating tatandaan — interes ng tao, interes ng bayan. Lagi naman tayong handang sumuporta sa ating barangay at SK officials sa ating kapasidad bilang senador, at sa abot ng ating makakaya.

Mahalaga na nakapili tayo ng mga kandidatong tunay na nagmamahal at may malasakit sa kapwa Pilipino lalo na sa mga mahihirap. Ngayong tapos na ang eleksyon, magkaisa tayo para sa ikabubuti ng ating mga komunidad. Sa mga nahalal ng taumbayan, isapuso ninyo ang inyong gagampanang tungkulin at unahin ninyo ang kapakanan ng mga mahihirap at pinakanangangailangan.

Sa mga natapos na ang termino, sa mga magsisimula pa lang ang termino, at sa mga patuloy na magsisilbi sa kanilang mga komunidad, salamat sa inyong dedikasyon sa paglilingkod sa bayan.

Tulad ng ating pagbibigay-puri sa mga santo, martir at mga namayapa na ngayong panahon ng Undas, nawa’y maging inspirasyon tayong lahat kung ano ang tunay na pagmamalasakit at pagseserbisyo sa kapwa sa anumang kapasidad na ibinigay sa atin ng ating Diyos. Ito ay dahil ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.