Pera ng bayan, gamitin sa serbisyong mabilis, naaabot at maaasahan

ni Bong Go @Bisyo Magserbisyo | January 6, 2024

Ang dalangin ko ngayong 2024 ay maging mas matatag pa ang diwa ng bayanihan sa ating mga Pilipino. 

Sana ay patuloy na mangibabaw ang pagmamalasakit sa isa’t isa lalo na para sa mga higit na nangangailangan, mga helpless at hopeless nating mga kababayan.

Noong December 20, 2023 ay nilagdaan na ni Pangulong Ferdinand Marcos Jr. ang P5.768 trillion national budget para sa taong 2024. Kaugnay nito, nanawagan tayo sa Department of Health na tiyakin ang tamang implementasyon at maingat na paggamit ng pondo para mapangalagaan ang kalusugan ng mga Pilipino, partikular ang nakalaan sa pagpapatayo ng Super Health Centers — na isa sa aking mga ipinaglaban at suportado ng aking mga kapwa mambabatas, DOH at mga lokal na pamahalaan. 

Ngayong taon ay 132 bagong Super Health Centers, ang napondohan bilang bahagi ng General Appropriations Act of 2024 na ating isinulong noon sa Senate budget deliberations bilang chair ng Senate Committee on Health at vice chair ng Senate Committee on Finance. Ang bilang na ito ay magiging karagdagan para sa 307 SHCs na napondohan noong 2022, at 322 naman nitong 2023.

Patuloy akong tutulong sa pagpaparami ng Super Health Centers sa bansa sa abot ng aking makakaya. Ang apela ko lang sa DOH, siguraduhin na magamit ang pondo nang tama at hindi masayang. Ipinaglaban natin na mapondohan ang pagpapatayo ng Super Health Centers sa iba’t ibang sulok ng bansa. Sana naman ay maimplementa ito nang maayos at sa lalong madaling panahon para mapakinabangan ng mga mahihirap dahil para sa kanila ito. 

Sa mga itinayo nang Super Health Centers, nakita namin kung gaano kalaki ang naitutulong nito sa komunidad lalo na sa rural areas. Iyan ang layunin ng mga Super Health Centers, ang ilapit sa mamamayan ang serbisyong medikal ng gobyerno.

Nakatutulong din ito para mabawasan ang bilang ng mga pasyente sa mga ospital dahil nagagawa na rito ang libreng konsultasyon sa tulong ng municipal health offices, local government units, at ng Philippine Health Insurance Corporation sa ilalim ng kanilang Konsulta program.

Kabilang sa mga serbisyong kayang ipagkaloob ng Super Health Centers ang database management, outpatient care, birthing facilities, isolation wards, diagnostics (tulad ng X-rays and ultrasounds), pharmacy, at maging ambulatory surgical units. Nagkakaloob din ito ng specialized services para sa EENT, oncology, physical therapy, rehabilitation, at telemedicine kung saan maaaring magpakonsulta ang pasyente sa pamamagitan ng pagtawag sa telepono.

Naisabatas na rin ang Republic Act 11959, o ang Regional Specialty Centers Act noong August 24, 2023. Tayo ang naging principal sponsor nito sa Senado, at isa sa mga may akda. Ipinag-aatas ng naturang batas ang pagpapatayo ng Regional Specialty Centers sa mga existing DOH regional hospitals. Ang mga specialty centers na ito ay nakapokus sa specialized treatments para sa mga karamdamang gaya ng sakit sa puso, bato, baga, utak, gulugod at lung, brain, spine, problema sa mga buto gayundin ang mental health, at iba pang espesyalisasyon. Hindi na kailangang lumuwas pa ng pasyente at magkaroon ng dagdag na gastos sa mga specialty hospitals na karamihan ay nasa Metro Manila.

Sabi ko nga, bakit pa natin pahihirapan ang mga Pilipino? Ang budget ng gobyerno ay pera ‘yan ng mga Pilipino na dapat ibalik sa kanila sa pamamagitan ng serbisyong mabilis, naaabot at maaasahan lalo na pagdating sa kanilang kalusugan. Tandaan natin na ang kalusugan ay katumbas ng buhay ng bawat Pilipino. Karapatan nila na makakuha ng nararapat na serbisyong medikal mula sa gobyerno upang mapangalagaan ang kanilang buhay. 

Bukod naman sa kalusugan ng mga Pinoy, bilang chair ng Senate Committee on Sports, ipinaglaban din natin ang dagdag na pondo sa ating national budget para patuloy na masuportahan ang mga programang pampalakasan. 

Bilang chair ng dalawang komite sa Senado, gusto kong bigyang-diin na konektado ang health at sports. Isa sa paraan para labanan ang ilegal na droga ay sa pamamagitan ng sports. Ang sports ay hindi lamang isang larangan ng kumpetisyon o libangan. Malaki rin ang papel ng sports sa paghubog sa ating kabataan para sa nation-building. Gaya ng madalas kong sabihin, get into sports and stay away from drugs to keep us healthy and fit. ‘Pag tayo ay fit, healthy tayo. ‘Pag healthy tayo, hahaba ang ating buhay at magiging mas produktibo tayo. 

Ngayong 2024, patuloy lang tayo sa paghahatid ng tulong sa ating mga kababayang nahaharap sa iba’t ibang krisis. Naghatid ang aking Malasakit Team ng tulong sa mga naging biktima ng sunog kamakailan sa Davao City kabilang ang 15 residente ng Calinan, at 42 naman sa Matina. 

Masaya ko ring ibinabalita na noong January 4 ay isinagawa na ang groundbreaking ng Outpatient Department Building ng Dr. Jorge P. Royeca City Hospital sa General Santos City, na sinaksihan din ni Mayor Lorelie Pacquiao. Ang naturang proyekto ay sinuportahan at ipinaglaban nating maisulong. 

Kahapon, January 5, nagkaroon na rin ng groundbreaking para sa itatayong Super Health Center sa Brgy. Lun Padidu sa Malapatan, Sarangani Province, habang idinaos naman ang inagurasyon sa itinayong Super Health Center sa Brgy. Ampayon, Butuan City na akin ring nainspeksyon noong June 2023.

Sa mga nasabing events ay namahagi rin ang aking Malasakit Team ng food packs para sa ilang mga kababayan natin sa lugar na iyon.

Simulan natin ang Bagong Taon na bukas ang puso para sa mga kababayan nating pinakangangailangan. Sa abot ng aking makakaya ay patuloy akong magmamalasakit at magseserbisyo sa kapwa ko Pilipino. Tulad ng turo ni dating Pangulong Rodrigo Duterte sa akin, kapag inuna mo ang kapakanan at interes ng ating mga kababayan, hinding-hindi ka magkakamali. Naniniwala rin ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Malasakit at serbisyo para sa mas malusog at masayang Bagong Taon

ni Bong Go @Bisyo Magserbisyo | January 3, 2024

Kumusta po ang inyong selebrasyon ng pagsalubong sa 2024? 

Umaasa ako na naging masaya at makulay ang mga huling araw ng nakaraang taon para sa inyo kapiling ang inyong mga mahal sa buhay, lalo na ang mga umuwi pa ng probinsya. Nakapag-relax sana kayo, nakakuwentuhan ang mga kaibigan at iba pang kamag-anak, at napuntahan ang lugar na gusto ninyong bisitahin. 

Taglay sana ninyo ang panibagong lakas at enerhiya sa pagsisimula ng bagong taon para tuparin at makamit ang mga nai-set ninyong goals sa iba’t ibang aspeto ng inyong buhay, lalo na ang mga nasimulan na ninyo noong 2023.

Umaasa rin ako na sana ay maayos ang inyong kalusugan — pisikal at mental. Bilang chair ng Senate Committee on Health, ako naman, parati kong binabanggit na ang kalusugan ng bawat Pilipino ay napakaimportante sa akin.

Kaya ang wish ko, happy and healthy New Year sa ating lahat — dahil ang katumbas ng kalusugan ay buhay ng bawat Pilipino.Pangalagaan natin ang ating kalusugan.

Sana ay walang nasaktan sa atin sa nagdaang pagdiriwang at sinunod ninyo ang payo na huwag na magpaputok at maging maingat sa pagsalubong sa Bagong Taon para kumpleto pa rin ang ating mga daliri, walang napinsala sa katawan at walang dapat pagsisihan.

Ang pinakamagandang paraan para magampanan natin ang ating tungkulin — sa pamilya, sa kapwa, sa lipunan at sa bansa — ay ang pananatili natin na malusog.

Manatili tayong disiplinado at sumunod sa health protocols dahil naririyan lagi ang banta ng COVID-19, flu, at iba pang respiratory illnesses. Patuloy akong nananawagan na voluntarily na magsuot pa rin tayo ng face mask hindi lang para sa ating pansariling kaligtasan kundi maging ng ating kapamilya at kapwa Pilipino. Kung nagawa natin ito sa loob ng mahigit dalawang taon, magagawa pa rin natin ito ngayon lalo na at malaki ang natutunan natin kung paano mag-iingat noong panahon ng pandemya.

Sa parte ko, lagi kong pangangalagaan ang kabutihan, karapatan at kapakanan ng bawat Pilipino, lalung-lalo na ang mga mahihirap, hopeless, helpless at walang malalapitan maliban sa pamahalaan sa abot ng aking makakaya at kapasidad.Noong December 31 ay personal na binisita natin ang mga patient watchers ng Balay Pahulayan Temporary Shelter at ilang mga kababayan na nasa labas ng emergency room para mamahagi ng pang-Media Noche habang sila ay nasa Southern Philippines Medical Center sa Davao City.

Noon pa man ay nakasanayan ko nang bisitahin sila tuwing sasapit ang Kapaskuhan kasama ang mga kababayan nating nangangailangan. Namahagi tayo ng pagkain, food packs at iba pang tulong tulad ng pamasahe sa mga nagbabantay sa mga pasyente sa ospital. Maging ang security guards at vendors na ating nadaanan ay binigyan din natin ng tulong. Sa simpleng paraan ay napasaya natin at nadamayan sila sa panahon ng kanilang pangangailangan.

Sa kabila ng mga pagsubok na ating naranasan noong nakaraang taon, umaasa tayo na sa pagpasok ng 2024 ay magkakaroon tayo ng mas maraming pagkakataon na may magbukas ng bago at magandang kabanata sa ating buhay. Nawa’y magdala ng mas maraming kaligayahan at kasaganaan ang bagong taon para sa bawat isa sa atin.Nagpapasalamat ako sa inyong patuloy na suporta at pagtitiwala. Patuloy ang aking pagseserbisyo sa lahat ng Pilipino sa abot ng aking makakaya dahil naniniwala ako na ang serbisyo sa tao ay serbisyo sa Diyos.

Maligayang Bagong Taon sa ating lahat, at nawa'y maging mas malusog at mas masaya ang ating mga pamilya ngayong 2024!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Dr. Jose Rizal, inspirasyon sa pagseserbisyo sa kapwa Pinoy at pagmamahal sa bansa

ni Bong Go @Bisyo Magserbisyo | December 30, 2023

Nakikiisa tayo ngayong araw na ito sa paggunita sa ika-127 anibersaryo ng pagkamatay ng ating dakilang bayani na si Dr. Jose Rizal. 

Ang kanyang buhay at mga obra ay nagpaalab sa pagiging makabayan ng ating mga ninuno noong panahon ng himagsikan. Bukod sa pagiging manunulat at makata, isa rin siyang doktor, siyentipiko at bihasa sa iba’t ibang wika. 

Hindi lang sa ating bansa kilala ang bayaning si Rizal. Noong isang taon, naging kinatawan tayo ng Senado para sa paglulunsad ng ceremonial plaque bilang paggunita sa ika-75 anibersaryo ng pagkakatatag ng ugnayang pandiplomatiko ng Pilipinas at ng Espanya na ginanap sa Jose Rizal Monument, Avenida de las Islas Filipinas sa Madrid, Spain. Tinatayang mayroon siyang halos 30 markers sa buong mundo. Itinayo ang mga ito bilang pagkilala at pag-alala sa mga naging kontribusyon niya sa ating bansa, sa kulturang Pilipino, at maging sa buong mundo. 

Alalahanin at magbigay-pugay tayo sa ating bayaning si Dr. Jose Rizal na ang mga paniniwala at adbokasiya ay patuloy na nagbibigay inspirasyon sa ating mga kababayan mula noon hanggang ngayon. 

Malaki ang naging kontribusyon niya sa ating lipunan lalo na ang kanyang mga akda na ang mga kuwento ay nakasentro sa pagtatanggol sa karapatan at kalayaan ng bawat tao. Naging mitsa iyon upang mabuhay sa dibdib ng iba pa nating mga bayani ang pagnanais na maging isang malayang bansa ang Pilipinas noong panahon ng himagsikan. Pinatunayan niya na ang panunulat at salita ay kasing talim ng anumang sandata sa pakikipaglaban para sa karapatan ng bawat tao. 

Tulad ng nakararami nating kababayan, ang mapayapang pamamaraan ni Dr. Jose Rizal kung paano mapapangalagaan ang karapatan ng mga Pilipino ang naging inspirasyon ko sa patuloy na paghahatid ng serbisyo sa publiko sa abot ng aking makakaya at kapasidad, lalo na sa mga mahihirap, hopeless, helpless at walang malalapitan maliban sa pamahalaan.

Kaya naman kahit holiday season ay hindi tayo tumitigil sa pag-alalay sa ating mga kababayang nahaharap sa iba’t ibang krisis. Noong December 28 ay personal nating binisita at hinatiran ng tulong ang 361 residente ng Brgy. Leon Garcia, Agdao, Davao City na naging biktima ng sunog kamakailan. 

Nagpapasalamat naman tayo sa ipinagkaloob sa atin na Dangal ng Bayan Award mula sa Gawad Pilipino 2023: Duyan ka Ng Magiting. Para sa atin, may award man o wala ay patuloy tayo sa pagseserbisyo sa bawat Pilipino.

Nakarating din ang aking Malasakit Team sa iba’t ibang komunidad para maghatid ng tulong. Naayudahan natin ang 18 residente ng Brgy. Vicente Duterte, Agdao, Davao City na naging biktima ng sunog kamakailan. Nagbigay rin tayo ng dagdag na tulong sa 600 TESDA graduates sa Cabanatuan City, Nueva Ecija katuwang ang Philippine Academy of Technical Studies, Inc. 

Tinulungan din natin ang mga nawalan ng hanapbuhay. Sa Batangas City, at kabilang sa naayudahan ang 84 residente katuwang si former Brgy. Capt. Emma Tumambing, at 50 pa katuwang naman si Board Member Arthur Blanco; habang 169 naman sa Lemery at Tanauan City kasama si Board Member Alfredo Corona. Sa Zambales, naalalayan natin ang 177 sa Botolan kasama si Board Member Sam Ablola, at 177 din sa Iba, katuwang naman si Governor Hermogenes Ebdane, Jr. May 177 ding mula sa Sta. Cruz, Laguna ang nakatanggap ng tulong kasama si Congresswoman Jam Agarao. Sa Antique, naabutan din ng tulong ang 180 sa San Remigio kasama si Mayor Mar Mission, at 180 rin sa Sibalom katuwang si Vice Governor Ed Denosta. May 192 ring natulungan sa Talisay City, Cebu katuwang si Vice Mayor Choy Aznar. Ang mga kuwalipikadong benepisyaryo ay binigyan din ng Department of Labor and Employment ng pansamantalang trabaho.  

May 155 din tayong kababayan sa Sta. Cruz, Laguna na nakatanggap ng tulong mula sa atin dagdag pa sa livelihood kits mula sa Department of Trade and Industry.

Noong December 29, bumisita rin ang aking Malasakit Team sa Boston, Davao Oriental upang magsagawa ng inspection sa itinatayong Super Health Center. Matapos nito ay namahagi rin tayo ng tulong sa ilang mga kababayan nating naapektuhan ng Typhoon Kabayan. 

Sa darating na Bagong Taon, gawin nating tanglaw ang ating dakilang bayaning si Dr. Jose Rizal na sumisimbolo sa kabayanihan, pagmamalasakit, at pagmamahal sa bayan upang mabigyan ang ating mga kababayan ng panibagong pag-asa sa harap ng anumang pagsubok. 

Kilalanin din natin ang kabayanihan ng bawat isa na nagsasakripisyo para sa kanilang pamilya, nagseserbisyo sa kanilang kapwa tao, at patuloy na nagmamahal at nagmamalasakit sa ating bansa tungo sa mas ligtas at komportableng buhay para sa bawat Pilipino! 

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.