Edukasyon, kaagapay sa mabilis na pagbabago ng mundo

ni Bong Go @Bisyo Magserbisyo | February 7, 2024

Naniniwala ako na ang edukasyon ay isa sa mga susi para sa magandang bukas. Sa panahon ngayon, napakaimportante na patuloy tayong matuto para makaagapay sa mabilis na mga pagbabago sa mundo at hamon na ating hinaharap. 

Ang mga estudyante ay may mahalagang papel sa paghubog sa kinabukasan ng ating bayan. Lagi kong ipinapayo sa kanila na gamitin nila ang mga natutunan upang magdala ng positibong pagbabago, hindi lamang sa kanilang sarili, kundi pati na rin sa buhay ng iba. Gaya ng sinabi ng aking idolong si Dr. Jose Rizal, nasa kabataan ang pag-asa ng bayan.

Noong February 5, naging panauhing pandangal tayo sa Scholars’ Recognition Day sa University of Perpetual Help System DALTA sa Calamba City, Laguna. Sa aking inisyatiba, nabigyan ng scholarship ang 118 estudyante mula sa Tulong Dunong Program ng Commission on Higher Education. 

Pinuri natin ang mga scholar sa kanilang dedikasyon at pagpupursige. Hindi lamang ito bunga ng kanilang sariling pagsusumikap, kundi pati na rin ng kanilang mga pamilya, guro at komunidad na patuloy na sumusuporta sa kanilang paglalakbay. Huwag din nilang kalimutang pasalamatan ang mga magulang na halos nagpapakamatay magtrabaho mapaaral lang sila. 

Bilang senador at isang magulang din, lagi akong nakahanda na magbigay ng suporta sa mga kabataan sa abot ng aking makakaya lalo na pagdating sa kanilang pag-aaral.

Tandaan natin na sa bawat iskolar na makakapagtapos, isang buong pamilya ang nabibigyan natin ng pag-asang makaahon sa kahirapan. 

Noong panahon ni dating Pangulong Rodrigo Duterte, naisabatas ang RA 10931 o ang Universal Access to Quality Tertiary Education Act. Napakalaking tulong nito na magkaroon ng libreng tuition sa local universities and colleges at sa mga state-run technical vocational institution. Pero hindi rito nagtatapos ang ating nagkakaisang layunin na mapaunlad ang bawat Pilipino sa pamamagitan ng edukasyon. Naging co-sponsor at co-author din ako nitong 19th Congress ng Senate Bill No. 1360 para mapalawak ang sakop ng Tertiary Education Subsidy sa pamamagitan ng pag-amyenda sa RA 10931.

Naging co-author at co-sponsor tayo ng Senate Bill 1359, o ang No Permit, No Exam Prohibition Act. Layunin nito na ihinto ang polisiya ng ilang educational institutions na nagbabawal sa mga estudyante na makakuha ng exams kung hindi pa nakabayad ng matrikula at iba pang school fees dahil sa kanilang kahirapan. Kung maisabatas, mabibigyan sila ng palugit upang makaraos sa paraang hindi naman malulugi ang mga eskuwelahan.

Co-author at co-sponsor din tayo ng Senate Bill No. 1864 o ang Student Loan Payment Moratorium During Disasters and Emergencies Act, na pumasa sa ikatlo at pinal na pagbasa sa Senado. Layunin nito na magkaloob ng tulong sa mga estudyanteng may pagkakautang sa school at hindi agad makabayad sanhi ng hindi inaasahang kalamidad o sakuna, kung naisabatas. 

Co-author din tayo ng RA 11510 na nagsabatas sa Alternative Learning System (ALS) para mapagkalooban ng edukasyon ang “underserved and disadvantaged students” kabilang ang indigenous students, at maging ang may physical and learning disabilities.

Tayo rin ang co-sponsor at isa sa author ng batas na nagbuo ng National Academy of Sports. Sa NAS, puwede nang mag-aral ang estudyanteng atleta at mag-training nang walang masasakripisyo dahil sabay na niya itong magagawa sa loob ng eskuwelahan na nasa New Clark City sa Capas, Tarlac. At bilang chair ng Committees on Health, and on Sports, isa sa ating layunin ang ilayo ang mga kabataan sa ilegal na droga. Get into sports, stay away from drugs and to keep us healthy and fit. Kapag tayo ay fit and healthy, hahaba ang ating buhay. 

Samantala, matapos nating magkaloob ng tulong sa mga scholar ay nag-inspeksyon tayo sa Calamba City Super Health Center na layuning ilapit ang primary healthcare sa komunidad na ating prayoridad bilang chair ng Senate Health Committee. Namahagi tayo ng tulong sa mga barangay health worker at mga residente sa lugar.

Noong February 3, naging panauhing pandangal tayo sa ginanap na 1st Warden’s Rapid Chess Tournament sa Abreeza Mall sa Davao City. 

Kahapon, February 6, dinaluhan natin ang Access to Medicines (AtM) Summit 2.0 sa Maynila. Inilahad ko ang aking layunin na ilapit ang serbisyo medikal sa mga mahihirap at patuloy ang ating pagsisikap para mabigyan ng sapat at abot-kayang medisina ang mga nangangailangan. 

Sinaksihan ng ating tanggapan ang paglulunsad ng Cancer Warrior PH Campaign sa National Kidney and Transplant Institute sa Quezon City. Inihayag ko na patuloy tayo sa pagpapalawak ng mga programa para sa cancer patients. Isa na rito ang pagsusulong ng sapat na pondo para sa Cancer Assistance Fund at ang pagtataguyod ng specialty centers sa bawat rehiyon sa pamamagitan ng Regional Specialty Centers Act na ating pangunahing inisponsor at isa sa may akda sa Senado na ganap na batas na ngayon.

Naghatid ng tulong ang aking Malasakit Team sa mga kababayang nahaharap sa iba’t ibang krisis. Agad nating tinulungan ang mga biktima ng sunog, kabilang ang 15 residente ng Lupon, Davao Oriental; at tatlo pa sa Purok 63, Talomo Proper, Davao City. 

Tinulungan din natin ang 50 mahihirap na miyembro ng iba’t ibang sector, na nabigyan ng tulong pangkabuhayan ng gobyerno sa General Santos City kasama si Vice Mayor Rosalita Nuñez. Natulungan din ang 450 manggagawa sa Zamboanga City na nawalan ng hanapbuhay at napagkalooban ng DOLE ng pansamantalang trabaho. Naalalayan din ang ilang mahihirap na residente ng Quezon City katuwang si Councilor Mikey Belmonte. 

Muli, sama-sama nating tulungan at magmalasakit tayo sa mga kapwa Pilipino.

Pahalagahan at proteksyunan natin ang kinabukasan ng ating mga anak. Bigyan natin sila ng pag-asa gamit ang edukasyon. Isa lang ang maipapayo ko at natutunan ko ito kay ex-P-Duterte: Mahalin natin ang ating kapwa Pilipino, unahin natin ang kapakanan nila at hinding-hindi tayo magkakamali.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pagseserbisyo sa mamamayan unahin kaysa pamumulitika

ni Bong Go @Bisyo Magserbisyo | February 4, 2024

Kailangang magkaisa ang buong puwersa ng gobyerno at gawing prayoridad ang kapakanan ng mahihirap na Pilipino upang patuloy na makabangon ang ating ekonomiya. 

Lumabas sa mga ulat kamakailan na ang ating gross domestic product o GDP noong 2023 ay 5.6 porsyento lamang — mas mababa ito kumpara sa target ng gobyerno na 6-7 porsyento. Kaya patuloy ang Senado sa pagtalakay ng mga panukalang batas na makatutulong sa pagpapaunlad ng ekonomiya para maiangat natin ang kabuhayan ng ating mga kababayan.

Nagiging hadlang sa mithiing ito ang mga isyu na sumisira sa ating pagkakaisa tulad ng diumano ay panunuhol o panlilinlang ng iilan upang isulong ang People’s Initiative na marahil ay hindi repleksyon ng tunay na boses ng ordinaryong Pilipino. Para sa‘kin, dapat panagutin ang mga mapapatunayang nagsamantala sa kahirapan ng mga kababayan para sa kanilang pansariling interes upang matuldukan ang isyu at makapokus na ang lahat sa ating trabaho na iangat ang antas ng kabuhayan ng bawat Pilipino. 

Nananawagan ako sa ating mga kapwa mambabatas at mga trabahante sa gobyerno — let’s focus on the work at hand. Walang mga panukalang batas na uusad ‘pag hindi nagkasundo ang dalawang kapulungan ng Kongreso. Unahin nating talakayin ang mga isyung pang-ekonomiya kaysa pulitika, unahin ang pagseserbisyo at pagtulong sa tao, at unahin ang kapakanan ng mga kababayan nating mahihirap.

Ang amin lang naman, nais naming proteksyunan ang Senado bilang institusyon na naglalayong magkaroon ng ‘checks and balances’ sa gobyerno lalo na sa lehislatibo. As nationally elected officials, kami ay naatasan ng taumbayan na maging representante ng buong sambayanan at ipaglaban ang mga adbokasiyang minimithi ng bawat Pilipinong bumoto sa amin. ‘Yan ay parte ng demokrasyang ating ipinaglaban at sinisikap na protektahan. 

Hindi dapat mawalan ng saysay ang Senado sa bicameral system na nilalaman ng ating Konstitusyon o mapalitan ang istruktura ng gobyerno na binuo upang maproteksyunan ang tunay na interes at boses ng Pilipino. 

Lunes hanggang Linggo, magtatrabaho ako mapa-Luzon, Visayas at Mindanao. Wala akong pinipiling araw o lugar, nagtatrabaho ako lalung-lalo na para sa kapakanan ng mga kababayan nating mahihirap, mga hopeless, helpless at walang malalapitan maliban sa pamahalaan. 

Marami sa mga inisyatibong ating ipinaglaban noon ay naisabatas na dahil sa pagtutulungan ng kapwa ko mambabatas sa parehong kapulungan. Nariyan ang National Academy of Sports na ating iniakda. Itong mga regional specialty centers na prayoridad din ni Pangulong Ferdinand Marcos, Jr. ay naisabatas na at ako ang pangunahing nag-sponsor at isa sa may akda nito. Ang Malasakit Centers Act na aking pangunahing ini-sponsor at iniakda noon. Nabuo na rin ang Department of Migrant Workers na base sa batas na isa ako sa author at co-sponsor. Ilan lamang ito sa mga panukalang ating inihain na batas na upang makatulong sa mga kababayan. Kapag nagtatrabaho ang Senado at Kamara kaagapay ang Ehekutibo, ang makikinabang ay ang buong sambayanan. 

Kaya ako ay nananawagan na tuldukan na itong PI at iwasan ang away sa pulitika. Gawin natin ang sinumpaang magserbisyo sa kapwa Pilipino. Gaya ng aking nabanggit na buong linggo tayong nagtatrabaho at walang tigil ang paghahatid ng serbisyo sa mga nabisita at nakasalamuha natin. 

Noong February 1, nasa Quezon, Nueva Ecija tayo para sa kanilang Patimyas Ani Festival, isang makulay na pagkilala sa kabayanihan ng mga Novo Ecijanos.

Pinangunahan natin ang pamamahagi ng tulong sa 354 disadvantaged at displaced workers. Ang mga kuwalipikadong benepisyaryo ay nabigyan din ng DOLE ng pansamantalang trabaho.

Bilang chair ng Senate Committee on Health, tiningnan natin ang bagong tayo na dialysis center sa lugar na proyektong sinuportahan ni Cong. Mika Suansing. 

Sinaksihan din natin ang inagurasyon ng bagong tayong legislative building ng munisipalidad. Bilang vice chair ng Senate Committee on Finance, nakatulong tayo para mapondohan ang naturang proyekto.

Bumisita naman tayo sa Cuyapo at sumama sa pamamahagi ng tulong si Cong. GP Padiernos para sa 700 mahihirap na residente sa lugar. 

Noong February 2 ay ang groundbreaking ceremony para sa Super Health Center sa Lemery, Iloilo. 

Naghatid din ng tulong ang aking Malasakit Team sa iba’t ibang komunidad na nahaharap sa mga krisis. Naayudahan natin ang 93 residente ng Brgy. Poblacion, Talisay City at 19 residente sa Brgy. Panacan, Davao City na biktima ng sunog.

Natulungan din natin ang 450 participants sa ginanap na Free Theoretical Driving Course TDC3 sa Guagua, Pampanga. Nagkaloob tayo ng suporta sa 75 TESDA graduates sa Argao, Cebu. 

Napakarami nating magagawa para matulungan ang mga kababayan kung magkakaisa. Unahin natin ang serbisyo at pagtulong sa kapwa sa abot ng ating makakaya, nang sa gayon ay walang Pilipinong maiiwan tungo sa minimithing mas ligtas at masaganang buhay para sa lahat.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Mahihirap, ‘wag pagsamantalahan kapalit ng pirma

ni Bong Go @Bisyo Magserbisyo | Enero 31, 2024

Ipagkakaisa ang ipinakita namin ng mga kapwa ko senador noong Lunes, January 29, sa pamamagitan ng pagsusuot ng puting damit at arm band na sumisimbulo sa Senado. 

Ito ay naghahayag ng aming pagkakabuklod-buklod laban sa kasalukuyang isinusulong na People’s Initiative upang maamyendahan ang 1987 Philippine Constitution, na ginagawa sa mapanlinlang na paraan. 

Para sa akin, kailangang protektahan ang ating Konstitusyon, ang Senado bilang isang institusyon, ang interes ng ating mga kababayan, ang demokrasya sa ating bansa, at ang tunay na boses ng mga ordinaryong Pilipino! 

Mahalaga ang checks and balances sa gobyerno upang maiwasan ang pang-aabuso sa kapangyarihan. Sinasabi ko ito hindi lang bilang isang senador, kundi bilang isang Pilipino na hindi papayag na gamitin ang ating mga kababayan para sa pansariling interes ng iilan lamang. 

Sa isang Senate hearing ng Committee on Electoral Reforms and People’s Participation na ginanap nitong Martes, marami ring testigong tumindig upang isiwalat ang panunuhol at panlilinlang na ginawa sa kanila kapalit ng pirma sa people’s initiative.

Kung totoo ito, klaro na hindi ito tunay na people’s initiative! 

Ang hindi rin katanggap-tanggap dito ay ginagamit pa raw ang mga programa ng gobyerno para tulungan ang mga mahihirap bilang kapalit para makakuha ng pirma sa pekeng people’s initiative na ito. Sa mga pasimuno nito, huwag ninyong

pagsamantalahan ang kahinaan ng mga Pilipino dahil sa kahirapan. Naghihirap na nga, pagsasamantalahan at gagamitin pa ang pirma nila sa pulitika! 

Tulad ng programa ng DSWD, kaya nga Assistance to Individuals in Crisis Situations ang tawag, in crisis ang mga taong dapat makatanggap nito. Huwag ninyong gamitin ang ayuda bilang kapalit sa kanilang pirma dahil dapat walang kapalit ang tulong ng gobyerno sa nangangailangang mga Pilipino. 

Ang nangyayari rito ay hindi people’s initiative kundi politicians’ initiative dahil mga pulitiko ang mistulang nakikinabang at hindi ang taumbayan. Kaya sa ating mga kababayan, kung kayo ay pumirma sa isang bagay na hindi lubos na ipinaintindi sa inyo ang kahulugan, o ‘di kaya ay na-realize ninyo na hindi kayo sang-ayon sa inyong nilagdaan, mayroon kayong karapatan na bawiin ito habang may panahon pa. 

Napakaraming isyung kinakaharap ng ating bansa at doon dapat ibuhos ng buong puwersa ng gobyerno ang panahon at resources para masolusyunan ang mga iyon, lalung-lalo na ang paghahatid ng serbisyo sa mga mahihirap nating kababayan, hopeless, helpless at walang malalapitan maliban sa pamahalaan. 

Bilang chair ng Senate Committee on Health, madalas nating payo at panawagan sa taumbayan na ingatan ang ating kalusugan dahil ang katumbas nito ay ang buhay ng bawat Pilipino. Kaya patuloy ang ating suporta sa Malasakit Center program, ang pagpapatayo ng Super Health Center sa iba’t ibang komunidad, at pagsusulong ng mga panukalang batas para mas mapangalagaan ang kalusugan ng ating mga kababayan, mapalakas ang ating healthcare system, maihatid ang de-kalidad na serbisyong medikal ng gobyerno, maprotektahan ang ating healthcare workers, at mapaunlad at mapalawak ang ating medical education system. 

Ang ating layunin ay palawakin ang mga serbisyong medikal upang mas marami pang Pilipino ang makinabang. Tayo rin ang principal sponsor at isa sa may akda ng Republic Act No. 11959, o ang Regional Specialty Centers Act. Itinatakda nito ang pagtatayo ng Regional Specialty Centers sa mga existing DOH regional hospitals. Sa pamamagitan ng Regional Specialty Centers, makatitipid sa gastos ang pasyente dahil hindi na kailangang bumiyahe pa sa Metro Manila para sa specialized treatment at mailalapit natin ang serbisyo medikal na kailangan nila sa kanilang mga lugar. 

Nakalulungkot rin na marami sa ating mga kababayan ang nagugutom at tumaas ang bilang ng mga nakakaranas na walang makain ng kahit isang beses sa nakalipas na tatlong buwan base sa isang survey. Nakababahala ito dahil noon ko pa sinasabi na importante para sa akin na may laman ang tiyan ng bawat Pilipino para hindi makompromiso ang kanilang kalusugan, lalo na ang mga bata, matatanda, mga may karamdaman at mga mahihirap. 

Ang pagkakaroon ng sapat na pagkain at ang kalusugan ay magkaugnay na hamon na hindi natin maaaring pabayaan. Kaya tuluy-tuloy ang ating paghahatid ng serbisyo sa ating mga kababayan at iba’t ibang sektor. 

Naging panauhing tagapagsalita tayo at pinangunahan ang ginanap na induction ng mga bagong opisyal ng Structural Engineers Association of Davao noong January 27 sa Sotogrande Hotel sa Davao City. Pinahalagahan natin ang papel ng engineers sa nation-building. 

Nasa Iloilo naman tayo noong January 28 para sa pagdiriwang ng Dinagyang Festival.

Pinasalamatan natin sina Mayor Jerry Treñas, Vice Mayor Jeffrey Ganzon at ang buong pamahalaang lungsod ng Iloilo City dahil sa mapayapa at matagumpay na selebrasyon.

Nagpapasalamat rin tayo kina Congresswoman Jam Baronda, former Councilor Love Baronda, Leganes Mayor Junjun Jaen at iba pang opisyal sa kanilang mainit na pagtanggap. 

Hindi rin magiging kumpleto ang ating pagbisita kung hindi tayo nakapaghatid ng tulong sa ating mga kababayang Ilonggo. Namahagi tayo ng tulong para sa mga naapektuhan ng Bagyong Egay kabilang ang 53 residente mula Pavia, Zarraga at Iloilo City.

Nakatanggap din sila ng tulong mula sa National Housing Authority sa ilalim ng programang isinulong natin noon at patuloy na sinusuportahan para may pambili ng pako, yero, semento at iba pang materyales ang mga benepisyaryo sa pagtatayong muli ng kanilang bahay. 

Nag-inspeksyon din tayo kasama sina Cong. Michael Gorriceta, Mayor Laurence Gorriceta, Vice Mayor Edsel Gerochi at iba pang opisyal sa itinayong Super Health Center sa Pavia at namahagi ng tulong sa mga BHWs at ilang residente sa Brgy. Balaba. 

Nakarating naman ang aking Malasakit Team sa La Libertad, Negros Oriental para tulungan ang 99 residenteng nawalan ng hanapbuhay. Ang mga kuwalipikadong benepisyaryo ay nabigyan din ng Department of Labor and Employment ng pansamantalang trabaho. 

Natulungan din ang 48 residente ng San Joaquin at Tubungan, Iloilo na ang kabuhayan ay naapektuhan ng Bagyong Egay. Nakatanggap din ang mga ito ng hiwalay na tulong para pampaayos ng bahay mula sa NHA.

Sa gitna ng mga pagsubok na kinakaharap ng ating bansa ngayon, hindi puwedeng isantabi ang kalusugan ng mga Pilipino, at ang kanilang seguridad sa pagkain. Unahin natin ang pagseserbisyo at pagtulong sa abot ng ating makakaya sa mga nangangailangan bago ang pulitika at pansariling interes. Hinihikayat ko ang bawat sektor ng pamahalaan na magkaisa at magtulungan para sa kapakanan at kabutihan ng buong sambayanang Pilipino. 

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.