Suportahan at bigyan ng pagkilala ang mga nakatatanda

ni Bong Go @Bisyo Magserbisyo | February 28, 2024

Tayong mga Pilipino ay family-oriented. Inaalagaan natin ang ating mga senior citizen. Kaya naman masaya kong ibinabalita na ganap nang batas ang Republic Act 11982, o ang Amendments to the Centenarians Act of 2016, na isa tayo sa co-author at co-sponsor habang principal sponsor naman si Sen. Imee Marcos. Nagpapasalamat tayo kay Pangulong Ferdinand Marcos, Jr. na nilagdaan ito noong February 26, 2024.

Sa pamamagitan ng bagong batas na ito, ang ating mga nakatatanda na sasapit sa edad na 80 ay makatatanggap ng cash gift na P10,000 kada limang taon. Tatanggap naman sila ng P100,000 pagsapit nila sa ika-100 taon.

Nasa kultura na nating mga Pilipino na alagaan ang ating mga nakakatanda. Dapat natin silang suportahan at bigyan ng pagkilala. Habang kaya pang pakinabangan at ma-enjoy ng senior citizen ang cash gift, ibigay na natin sa kanila hanggang malalakas pa sila. Maganda rin na may inaasahan ang ating mga senior citizen pagtuntong nila ng 80, 85, 90, 95 at 100 years old. Anuman ang halaga, maaari itong magsilbing inspirasyon sa kanila para mas maging positibo ang kanilang pananaw at mag-improve ang kanilang kalusugan.

Ang batas na ito ay patunay ng aming malasakit at pagpapahalaga sa ating mga senior citizen na nag-ambag sa pag-unlad ng ating bansa. Hindi natin sila pababayaan, lalo na ang mga mahihirap at pinakanangangailangan.

Nilagdaan na rin ni Pangulong Marcos ang Republic Act No. 11981, o Tatak Pinoy Act. Isa rin tayo sa co-author ng batas na ito habang principal sponsor naman si Senator Sonny Angara. Sa pamamagitan ng RA 11981, mapapalakas natin ang partnership sa pagitan ng pamahalaan at ng pribadong sektor para mapalaganap ang mga produkto at serbisyong Pilipino sa pamamagitan ng pagkakaloob sa mga lokal na industriya ng teknikal at pinansyal na tulong para makapaglabas tayo ng mga high-quality products and services na kaya nating ipantapat at ibida sa buong mundo.

Sa kabila ng mga naisasakatuparan natin sa ating mga gawain sa Senado para makapaghatid ng serbisyo sa iba’t ibang sektor ng ating lipunan, patuloy rin tayo sa personal na paghahatid ng tulong sa ating mga kababayan sa abot ng ating makakaya at kapasidad.

Noong February 25 ay nakisalamuha tayo sa mga dating miyembro ng Sangguniang Kabataan ng Laguna kasama ang mga lokal na opisyal ng lalawigan sa pangunguna nina Governor Ramil Hernandez at Vice Governor Karen Agapay. Matapos ito ay personal nating binisita at inalam ang kalagayan ng 66 residente sa Cebu City na nagmula pa sa iba’t ibang barangay na naging biktima ng magkakahiwalay na insidente ng sunog. Pinangunahan din natin ang pagbibigay sa kanila ng tulong.

Nagbalik tayo sa Laguna noong February 26 bilang guest speaker sa ika-100 anibersaryo ng Laguna Medical Center na nasa bayan ng Sta. Cruz. Namahagi rin tayo ng lugaw sa mga health workers at pasyenteng nasa Malasakit Center ng LMC.

Kahapon, February 27, binisita natin ang 289 residente na naging biktima ng sunog mula sa iba’t ibang barangay sa Maynila, at personal nating pinangunahan ang pagkakaloob sa kanila ng tulong. Nakatanggap din ang mga ito ng tulong mula sa National Housing Authority sa ilalim ng programang isinulong natin noon para may pambili ng pako, yero, semento at iba pang materyales ang mga benepisyaryo sa pagkukumpuni ng kanilang mga nasirang tahanan.

Matapos ito, sunod naman nating binigyan ng tulong ang 190 na nasunugan din sa Brgy. 52 Zone 4 District 1, sa Maynila pa rin katuwang si Barangay Chairman Fernand Aguilera.

Naayudahan naman ng aking Malasakit Team ang 76 na residente ng Maasim, Sarangani na ang kabuhayan ay naapektuhan ng bagyong Paeng. Nabigyan din ng tulong ang 91 residente ng Addition Hills, Mandaluyong City na naging biktima ng insidente ng sunog.

Nakatanggap din ang mga ito ng tulong mula sa national government.

Ang respetong ibinibigay natin sa ating mga nakatatanda at ang patuloy na pagkakaloob sa kanila ng tulong at serbisyo ay bahagi ng ating pagkilala sa naiambag nila sa ating buhay at sa ating bansa. Kinikilala rin natin ang kakayahan ng ating mga nasa lokal na industriya para maitanghal ang mga gawang tatak Pilipino, hindi lang sa ating bansa kundi sa buong mundo, kaya mahalagang patuloy silang matulungan ng mga programa ng gobyerno.

Lubos din akong nagpapasalamat sa RP-Mission and Development Foundation Inc. sa pagkilala sa akin bilang isa sa mga Outstanding Public Servant Awardees ng 2023. Ito ay nagbibigay inspirasyon at lakas sa akin upang lalo pang pagbutihin ang aking serbisyo para sa kapakanan ng bawat Pilipino. With or without an award, patuloy akong magseserbisyo sa abot ng aking makakaya dahil bisyo ko na ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Edukasyon, pundasyon sa pagseserbisyo sa kapwa at sa bayan

ni Bong Go @Bisyo Magserbisyo | February 24, 2024

Kabilang sa ating adbokasiya ang edukasyon at paghubog sa ating mga kabataan. Para sa akin ay napakahalaga na palakasin natin ang ating sistema ng edukasyon dahil isa ito sa mga pundasyon sa pag-unlad ng ating bansa. 

Naging guest speaker tayo noong February 22 sa ginanap na 31st and 20th Founding Anniversary ng Urdaneta and Tayug Campuses Leaders’ Summit ng Panpacific University sa Urdaneta City, Pangasinan. Pinasalamatan natin ang unibersidad at ang mga bumubuo rito sa kanilang patuloy na paghahatid ng edukasyon at paghubog sa kamalayan ng mga kabataan. 

Ang mga kabataang Pilipino ang kinabukasan ng bayang ito. Balang araw, posibleng ang iba sa kanila ay maging senador o lider din ng ating bansa. Ibinahagi ko sa kanila na isa lang ang sikreto riyan. Pagdating ng panahon, mahalin nila ang kanilang kapwa Pilipino.

Mahalin nila ang ating bayan, unahin parati ang kapakanan ng mga mahihirap, at hinding-hindi sila magkakamali riyan. Iyan ang naging payo sa akin ni dating Pangulong Rodrigo Duterte na aking ibinabahagi rin sa susunod na henerasyon ng mga lingkod bayan.

Para kasi sa akin, ang tunay na serbisyo ay dapat na inuuna ang kapakanan ng kapwa tao bago ang sarili. Dapat din nating kilalanin ang ating mga sarili kung paano tayo magiging inspirasyon, magseserbisyo at magmamalasakit sa ating mga kababayan. 

Sa pamamagitan ng pagkakaloob ng mahusay na edukasyon sa ating mga kabataan, nabibigyan natin sila ng sapat na kakayahan at nahuhubog ang kanilang mabuting pag-uugali para makapag-ambag sa kanilang komunidad at sa ating bansa. Kaya naman patuloy kong itataguyod at susuportahan ang mga inisyatiba at panukala na layuning pagandahin ang ating education system. 

Pinayuhan ko rin ang mga estudyante na huwag kalimutan na pasalamatan ang kanilang mga magulang. Kaming mga magulang, wala kaming ibang ginagawa kundi magtrabaho para mapaaral ang aming mga anak. Bilang ganti, ang puwedeng gawin ngayon ng mga anak ay mag-aral nang mabuti para maging masaya ang kanilang mga magulang at makatulong sa pamilya. 

Matapos ang okasyon, pinangunahan natin ang groundbreaking ng itatayong Super Health Center sa Sison, Pangasinan kasama ang ilang opisyal ng lokal na pamahalaan sa pangunguna ni Mayor Danilo Uy. Bilang adopted son ng Pangasinan, patuloy akong tutulong na mailapit ang serbisyo ng gobyerno sa aking mga kapwa Pangasinense. 

Sinaksihan naman ng aking tanggapan ang groundbreaking ng itatayong Super Health Center kasama si Mayor Cecilia Jalosjos Carreon sa Piñan, Zamboanga del Norte noong araw na iyon. 

Binisita rin natin ang 61 residenteng nasunugan mula sa apat na barangay sa Las Piñas City at personal na pinangunahan ang pagkakaloob ng tulong sa mga ito. Nabalitaan ko rin na sa araw na iyon ay may panibagong mga bahay na natupok ng apoy, kaya personal kong pinuntahan ang pinangyarihan ng sunog at kinumusta ang mga apektadong pamilya.

Sunod ko namang binisita at tinulungan ang 86 na nasunugan mula sa Parañaque City.

Nagbigay rin ako ng dagdag na pagkain para sa mga biktima. Napamahaginan din ang ilang kuwalipikado sa kanila ng tulong mula NHA upang makabili ng mga materyales na pampaayos ng kanilang mga bahay. 

Samantala, nasa Marinduque naman tayo noong February 21 bilang guest speaker sa 104th Founding Anniversary ng lalawigan, sa imbitasyon ni Gov. Presby Velasco.

Sinaksihan naman ng aking tanggapan ang turn over ng  Super Health Center sa President Roxas, Cotabato, kasama si Mayor Jonathan Mahimpit, gayundin ang grand opening ng Dialymed Renal Care Center sa Caloocan City. 

Kahapon, February 23, panauhing pandangal tayo sa 1st Cityhood Anniversary ng Carmona City, Cavite sa imbitasyon ni Mayor Dr. Dahlia Loyola.

Nag-inspeksyon din tayo sa Super Heath Center sa lungsod. Matapos ito ay dinaluhan natin ang 41st Foundation Anniversary and Loyalty Awarding Ceremony ng National Kidney and Transplant Institute sa Quezon City. Nagbigay tayo ng suporta sa mga awardees bilang pasasalamat sa kanilang pagseserbisyo bilang mga frontliners at namahagi rin tayo ng lugaw sa mga pasyente at health workers doon. 

Tuluy-tuloy naman ang aking Malasakit Team sa pagtulong sa ating mga kababayang nahaharap sa iba’t ibang krisis. Inayudahan natin ang mga naging biktima ng sunog kabilang ang 38 sa Pasay City; apat sa Esperanza, Sultan Kudarat; dalawa sa Cotabato City; sampu sa Midsayap, Cotabato; sampu sa Butuan City, Agusan del Norte; apat sa Brgy. 76A, Bucana, Davao City; 30 sa General Santos City; tatlo sa Norala, South Cotabato; 64 sa Brgy. Puntod at 17 sa Brgy. Macabalan sa Cagayan de Oro City; at tatlo sa Iligan City. 

Nag-abot din tayo ng tulong sa mga nawalan ng hanapbuhay kabilang ang 63 residente mula sa Sampaloc, Manila; 60 sa Asuncion, Davao del Norte; 197 sa Koronadal City katuwang si Vice Gov. Arthur Pinggoy; at 157 sa Brgy. 600, Sta. Mesa, Manila. Ang mga benepisyaryo ay nabigyan din ng pansamantalang trabaho mula sa DOLE. 

Nakatanggap din ng tulong ang 350 mahihirap na residente ng Sibalom, Antique katuwang si Vice Governor Ed Denosta; 75 TESDA scholars ng University of San Jose Recoletos; at 75 pa sa Cebu City katuwang si Councilor Dondon Hontiveros.

Sa ating mga estudyante at mga kababayang Pilipino, bukas ang aking opisina para sa inyo. Bilang inyong Mr. Malasakit, patuloy akong magseserbisyo sa abot ng aking makakaya dahil ang tangi kong bisyo ay magserbisyo sa inyong lahat!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pagtulungan nating iangat ang kalagayan ng mga manggagawang Pilipino

ni Bong Go @Bisyo Magserbisyo | February 21, 2024

Masaya kong ibinabalita na nitong Lunes, February 19 ay pumasa na sa ikatlo at huling pagbasa ang Senate Bill No. 2534, o ang P100 Daily Minimum Wage Increase Bill. 

Isa tayo sa may akda at isa rin sa nag-sponsor sa Senado ng naturang panukala. Si Senate President Migz Zubiri mismo ang principal author nito, at si Senator Jinggoy Estrada naman ang principal sponsor. 

Dapat talaga ay may maayos na pasahod sa mga ordinaryong manggagawang Pilipino na naaayon sa pangkasalukuyang sitwasyon ng ating ekonomiya. Napakahalaga ng layunin ng SBN 2534 -- ang magkaloob sa mga manggagawang Pilipino ng suweldo na kayang masuportahan ang para sa pangunahing pangangailangan ng kanilang pamilya at maprotektahan sila laban sa kahirapan. 

Kung tuluyang maging ganap na batas ang SBN 2534, tataas ang daily minimum wage ng isang manggagawa nang PhP100. Mahalagang magkaroon ng balanse sa pagitan ng interes ng mga may-ari ng kumpanya at ng mga manggagawa upang mas maraming magkaroon ng trabaho na may sapat na suweldo.  

Napakahalaga rin sa panahong ito na magpakita ng pagiging mapagbigay o bukas-palad ng lahat. Kaya sa mga mayayaman, kung ‘di naman kayo malulugi, ipamahagi naman ninyo ang kita ninyo sa mga mahihirap — sa mga isang kahig, isang tuka, na bawat piso ay napakahalaga para merong pambili ng pagkain, at may laman ang kanilang tiyan sa araw-araw.

Bukod dito, hindi tayo tumitigil sa paghahatid ng serbisyo at pagmamalasakit sa iba’t ibang sektor ng ating lipunan. 

Noong Lunes, sinuportahan din natin ang pagpasa sa ikatlo at huling pagbasa ng Senate Bill No. 2505 o ang Eddie Garcia bill, na isa rin tayo sa co-author. Kung maisabatas, layunin nito na proteksyunan at bigyan ng benepisyo ang mga manggagawa sa movie at television industry sa bansa. Isinusulong nito ang pagkakaroon ng patas na suweldo, dagdag na employment opportunities, at proteksyon laban sa pang-aabuso, mahabang oras ng pagtatrabaho, harassment, delikadong work environment at economic exploitation para sa mga artista at iba pang mga manggagawa sa pelikula at telebisyon. 

Dumalo rin tayo noong February 18 sa ginanap na Liga ng mga Barangay-Northern Samar Chapter gathering sa Pasay City sa paanyaya nina Board Member Arturo Dubongco at Councilor Bea Amande. Dito ay tinalakay ang mga hakbang upang maisulong ang disaster preparedness and resilience sa komunidad na isa sa aking mga pangunahing prayoridad. 

Naghatid naman ng tulong ang aking Malasakit Team sa 86 residente mula sa mga bayan ng Culasi, Hamtic, Barbaza at San Remigio sa Antique na bumabangon mula sa hagupit ng Bagyong Egay. Natulungan din ang anim na residente ng Libacao, Aklan. Nakatanggap din ang mga benepisyaryo ng tulong mula sa National Housing Authority sa ilalim ng programang aking isinulong noon para may pambili sila ng pako, yero at iba pang materyales sa pagkukumpuni ng kanilang nasirang tahanan. 

Nagpahatid din tayo ng dagdag na tulong sa 169 na indibidwal sa Lian, Batangas na nabigyan ng pansamantalang trabaho mula sa DOLE sa pamamagitan natin . Kasama naman ang tanggapan ni Senador Robin Padilla ay nagdala rin ang aking tanggapan ng dagdag-tulong sa 300 na mahihirap na residente ng Pasig City kasama si Konsehal Eric Gonzales.

Tinulungan din namin ang mga biktima ng sunog tulad ng 12 na residente ng Mati City; 30 sa Brgy. 30 at 115 naman sa Brgy. Nazareth, Cagayan de Oro City; at tatlong residente sa Binuangan, Misamis Oriental.

Sinuportahan at nagbigay rin tayo ng tulong sa mga kabataan na lumahok sa “Isang Isla, Isang Probinsya” One DavNor Samal Youth Project sa Island Garden City of Samal, kasama si Councilor Renz Allan Lacorte at ang Sibol Samal Youth. Lumahok tayo sa isang medical mission at nagbigay ng tulong sa 300 senior citizens sa Cavite City kasama ang ASIAN School of Advance Technology. 

Lubos ang ating pasasalamat sa mga kasamahan natin sa gobyerno na nagkakaisa ang layunin para matulungan ang ating mga manggagawang Pilipino. Ako ay patuloy na makikiisa at susuporta sa mga inisyatibong naglalayong pagtibayin ang kapakanan at karapatan ng ating mga kababayan lalo na ang mga mahihirap. Bilang inyong Mr. Malasakit, patuloy kong tutulong sa abot ng aking makakaya dahil bisyo ko ang magserbisyo sa inyong lahat, mga kapwa ko Pilipino!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.