Healthcare system, palakasin pa para mas maging handa laban sa sakit

ni Bong Go @Bisyo Magserbisyo | April 3, 2024

Muli na namang umuusbong ang iba’t ibang nakahahawang sakit. Kamakailan lang ay naobserbahan natin ang pagtaas ng bilang ng mga kaso ng pertussis at tigdas. 

Bagama’t wala namang surge sa mga hospital admissions sa buong bansa, nakita natin na dumarami ang bilang ng mga kaso kaya may ilang local government units na nagdeklara ng pertussis outbreak.

Dahil dito, bilang tayo ang Chair ng Senate Committee on Health, patuloy nating isusulong sa Senado ang mga panukalang batas na magpapalakas sa ating healthcare system. Isinumite natin ang Senate Bill No. 195 na naglalayon na magtatag ng Center for Disease Control and Prevention, at ang SBN 196 para naman likhain ang Virology Science and Technology Institute. Pareho itong nakadisenyo para mas mapalakas pa ang ating public healthcare sector dahil dapat na matuto na tayo sa mga pagsubok na inihatid sa atin ng COVID-19. Dapat nating tiyakin na hindi na uli tayo mabubulaga, hindi handa, kulang sa kagamitan at mga tauhan sa paglaban sa mga sakit na magiging banta sa kalusugan nating mga Pilipino sa hinaharap.

Bilang mga experts sa infectious diseases, ang CDC ang mangunguna sa pagsugpo sa lahat ng banta sa kalusugan ng ating mga mamamayan. Ngayon na ang tamang panahon na magkaroon tayo ng sariling CDC kung maisabatas ito.

Ang virology institute naman, kung maisabatas, ay maaaring magbigay sa atin ng kakayahan na mag-produce ng ating sariling bakuna. One-step ahead dapat tayo para hindi na tayo mabigla kung may darating na mga future public health emergencies. Sa dalawang taon na pakikipaglaban natin sa COVID-19 pandemic, nalaman natin na ang isa sa pinakamalaking kahinaan ng ating healthcare system ay ang kawalan natin ng kakayahan na makagawa ng sarili nating bakuna laban sa iba’t ibang sakit.

Tulad ng ating mga natutunan sa pandemya, mahalaga ang pagkakaroon ng sapat na kaalaman, pag-iingat, at pagtutulungan ng bawat isa. Dapat tayong magpatuloy sa pagbabakuna at pagsunod sa mga rekomendasyon ng mga eksperto sa kalusugan.

Sa ginawang pagdinig naman kahapon, April 2, ng Senate Committee on Health na ating pinamumunuan ay inalam natin ang mga prayoridad ng pamahalaan pagdating sa kalusugan ng mga Pilipino tulad ng estado ng ating mga health facilities kasama ang pagpapatayo at pagsasaayos ng mga pampublikong ospital; paglulunsad ng mga Super Health Centers upang ilapit ang pangunahing serbisyong medikal sa mga komunidad; ang implementasyon ng Malasakit Centers Act upang matulungan ang mga mahihirap na pasyente; at ang paghahanda laban sa mga kasalukuyang sakit na nagiging banta sa ating kalusugan.Ayaw nating pasa nang pasa lang tayo ng mga local bills, lalo na ‘yung pagpapatayo ng mga bagong ospital at iba pang health facilities, kung hindi naman maa-assure tayo ng taga-Executive Department na mabibigyan ng sapat na pondo ang mga ito. Ayaw natin ng mga white elephants.

Gaya ng madalas kong sabihin, ang pagpapalakas sa ating healthcare system ay isang investment para sa hinaharap. Ipinakiusap ko rin na gamitin ang pera ng gobyerno sa mga mahihirap, at dapat ang mga mahihirap na kababayan natin ang makikinabang sa mga pampublikong ospital na ito. Unahin natin ang mga mahihirap, mga helpless at hopeless nating kababayan.

Binanggit ko rin ang pagsusulong ng kapakanan ng mga healthcare workers kasama na riyan ang pagbibigay ng long overdue na Health Emergency Allowance sa kanila. Hindi katanggap-tanggap na hanggang ngayon ay marami pa ring mga healthcare workers ang hindi nakakatanggap ng kanilang health emergency allowance. Services rendered na iyan. Maliit na halaga iyan kumpara sa serbisyo at sakripisyo ng ating mga frontliners. 

Nakiusap tayo muli sa DOH at sa Department of Budget ang Management na aksyunan na agad ito dahil napakatagal nang hinihintay ‘yan! Kung may pondo naman, sana ay unahin natin ang mga bayani noong panahon ng pandemya. Hindi na nila kailangan magmakaawa pa para makuha ang dapat na sa kanila. Pera naman ‘yan ng taumbayan, hindi naman natin pera ‘yan!

Hindi ako ‘yung tipo ng pulitiko na nangangako at hindi niyo ako maririnig na mangangako. Ngunit, gagawin ko lang ang aking trabaho at magseserbisyo ako sa inyong lahat sa abot ng aking makakaya. Saang sulok man ng bansa ay napuntahan ko na, mula Batanes hanggang Jolo, hanggang Tawi-Tawi, mula sa Palawan sa kanlurang bahagi ng bansa hanggang Samar sa Silangan, para maghatid ng maayos na serbisyo. Ito ay dahil hindi ko matiis na paupo-upo lang sa aking opisina habang maraming mga kababayan natin ang naghihirap. Makatulong man lang.

Bukod sa trabaho sa loob ng Senado, walang tigil din ang ating paghahatid ng tulong sa mga kababayan nating nahaharap sa iba’t ibang krisis.

Kahapon, April 2, ay ipinadala ko ang aking Malasakit Team sa Rizal, Piat at Enrile, mga bayan sa Cagayan upang maghatid ng tulong sa 350 maliliit na negosyante na ang kabuhayan ay naapektuhan ng mga kalamidad kasama sina Rizal Mayor Joel Ruma, Enrile Mayor Miguel Decena, Jr., at Piat Mayor Leonel Guzman. Nakatanggap ang mga ito ng tulong pangkabuhayan mula sa national government.

Nagpakain naman ang aking opisina para sa mga kamag-anak ng mga pasyenteng nakapila sa Malasakit Center sa Casimiro A. Ynares Sr. Memorial Hospital sa Rodriguez, Rizal at sa Amang Rodriguez Memorial Medical Center sa Marikina City.

Patuloy nating ilapit ang serbisyo medikal mula sa gobyerno sa mga taong nangangailangan nito lalo na sa mga mahihirap at walang ibang malalapitan. Pera naman ng taumbayan ‘yan, ibalik dapat sa kanila sa pamamagitan ng maayos na serbisyong pangkalusugan.

Bilang Mr. Malasakit, nagpapaalala naman ako sa lahat na ingatan ang kalusugan lalo ngayong napakainit ng panahon at maraming mga sakit na kumakalat. Mag-ingat tayo para sa ating sarili, sa ating kalusugan at maging ng ating komunidad. Tandaan natin na ang kalusugan ay katumbas ng buhay ng bawat Pilipino. Sa abot ng aking makakaya ay magseserbisyo ako sa aking kapwa Pilipino dahil bisyo ko na ang magserbisyo at naniniwala ako na ang serbisyo sa tao ay serbisyo sa Diyos!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Isapuso ang pagmamalasakit sa kapwa ngayong Semana Santa

ni Bong Go @Bisyo Magserbisyo | Marso 27, 2024

Ngayong Semana Santa, alalahanin natin ang sakripisyo ng ating Diyos sa pamamagitan ng kanyang anak na si Hesu-Kristo na inialay ang kanyang buhay para sa sangkatauhan.

Maging oportunidad sana ito na magdasal, bigyan ng oras ang pamilya, at higit sa lahat ay pahalagahan ang buhay na ibinigay sa atin ng Panginoon. 

Nakakalungkot na sa panahon ding ito ay nababalitaang tumataas ang bilang ng kaso ng pertussis o ang tinatawag na whooping cough. Bilang pagmamalasakit sa kapwa, nananawagan tayo sa lahat na maging maingat. Umapela rin tayo sa pamahalaan na maglatag ng mga interventions, at sa kooperasyon ng mga komunidad ay mabawasan ang paglaganap ng naturang sakit at maiwasan na may masawi sa ating mga kababayan. 

Kaya naman, bilang tayo ang chair ng Senate Committee on Health, umaapela tayo sa ating mga kababayan na boluntaryong magsuot ng mask lalo na kung nasa pampublikong lugar. Tulad ng lagi kong payo, kung hindi naman sagabal sa inyo, ugaliing magsuot na ng mask sa mga matataong lugar upang proteksyunan ang sarili at ang ating pamilya.

Kahit mababa na ang kaso ng COVID-19, nandidiyan pa rin ang banta ng mga sakit na maaaring makahawa lalo na sa mga matatanda at bata. Hindi natin alam kung anong sakit ang maaari nating maiuwi sa bahay. Mabuti nang mag-ingat. Nagawa nating magsuot ng mask nang higit dalawang taon noong pandemya. Konting tiis lang ito upang makasalba ng buhay ng ating kapwa, kung hindi man buhay natin mismo.

Pakiusap ko naman sa ating gobyerno, mahalaga na paigtingin natin ang ating drive sa pagbabakuna, lalo na sa pagtugon sa pertussis. Kasama ito sa ating mandatory vaccination program, at kailangan nating siguruhin na ang bawat isa, lalo na ang mga bata, ay protektado laban sa sakit na ito. 

Samantala, tuloy pa rin tayo sa ating paghahatid ng serbisyo sa ating mga kababayan sa abot ng aking makakaya. Bisyo ko na ang magserbisyo at naniniwala ako na ang serbisyo sa tao ay serbisyo sa Diyos. 

Habang papalapit ang Semana Santa, nasa Negros Occidental tayo noong March 23 at pinangunahan ang pamamahagi ng aking tulong sa 500 na nawalan ng hanapbuhay sa bayan ng Ilog. Nakatanggap din ang mga ito ng tulong pangkabuhayan sa pamamagitan ng pansamantalang trabaho mula sa Department of Labor and Employment. Nakiisa tayo sa ginanap na Kisi-Kisi Festival kung saan pinangunahan natin ang pagsisimula ng Talaba Festival sa paanyaya ni Congresswoman Mercedes “Cheding” Alvarez, Mayor Mayor John Paul Alvarez at mga lokal na opisyal. 

Nag-inspeksyon din tayo sa itinatayong Super Health Center sa Himamaylan City na malapit nang matapos upang ilapit ang pangunahing serbisyong pangkalusugan sa mga komunidad. Binisita natin ang itinayong Himamaylan Bridge na napondohan sa ating kapasidad bilang Vice Chair ng Senate Committee on Finance. Personal nating pinangunahan ang pamamahagi ng aking tulong sa 500 nawalan ng hanapbuhay sa Himamaylan City, na nakatanggap din ng pansamantalang trabaho mula sa DOLE kaakibat si Mayor Raymond Tongson. 

Bumisita naman tayo sa Bacolod City kasama si Mayor Albee Benitez noong March 24 at personal na pinangunahan ang pagkakaloob ng tulong sa 500 na nawalan ng hanapbuhay. May hiwalay ding tulong mula sa DOLE sa pamamagitan ng pansamantalang trabaho para sa kanila. Nagbigay naman ako ng dagdag na tulong sa 45 na biktima ng sunog bukod sa ibinigay na ayuda ng NHA mula sa programang isinulong natin noon para may pambili sila ng pako, yero, semento at iba pang materyales sa pagtatayong muli ng kanilang nasirang tahanan. Nag-inspeksyon din tayo sa itinatayong Super Health Center sa lungsod na ating isinulong kasama ang DOH at mga kapwa mambabatas. 

Dumiretso tayo sa Victorias City at nag-inspeksyon sa itinatayong Super Health Center kasama si Mayor Javi Benitez, Councilor Derek Palanca at iba pang lokal na opisyal. Personal nating pinangunahan ang pamamahagi ng tulong sa 500 nawalan ng hanapbuhay na binigyan din ng pansamantalang trabaho ng DOLE. Dagdag dito, tinulungan natin ang 18 na biktima ng insidente ng sunog doon. 

Pagkatapos nito ay nakilahok tayo sa PBA All-Star Weekend Festivities sa Bacolod City rin. Bilang Chair ng Senate Sports Committee, suportado ko ang mga inisyatiba upang ilapit ang sports sa mga komunidad dahil malaking bahagi ito ng paghubog sa ating mga kabataan. Get into sports, stay away from illegal drugs to keep healthy and fit! 

Sa nakaraang mga araw, bumisita rin ang aking Malasakit Team sa iba’t ibang parte ng ating bansa para matulungan ang mga kababayan nating nahaharap sa iba’t ibang krisis. Naayudahan natin ang mga naging biktima ng sunog kabilang ang walong pamilya sa Brgy. Cawag at isa pa sa Brgy. Del Monte, mga lugar sa Island Garden City of Samal; at 16 sa Brgy. Ibaba, Malabon City.

Natulungan din ang 139 nawalan ng hanapbuhay sa Sta. Fe, Nueva Vizcaya katuwang si Congresswoman Luisa “Banti” Cuaresma. Sa ating pamamagitan, nagbigay rin ng pansamantalang trabaho ang DOLE sa mga kuwalipikadong benepisyaryo roon. 

Mayroon tayong 16 na kababayan na nasira ang tahanan sa Lumban, Laguna na nakatanggap ng tulong mula sa ating opisina. Sa ating pamamagitan, nabigyan din sila ng ayuda mula sa NHA upang makabili ng materyales na pampaayos ng kanilang mga bahay. 

Sumama rin kami kina Gov. Delta Pineda at Vice Gov. Nanay Pineda upang magbigay ng dagdag na suporta sa 4,000 mahihirap na estudyante ng City of San Fernando, Pampanga bukod pa sa tulong mula sa DOLE at ng lokal na pamahalaan. Dagdag pa r’yan, 333 mahihirap na estudyante sa Naga City ang ating sinuportahan at nabigyan ng tulong katuwang naman si Cong. Gabriel Bordado. Sinamahan din namin ang grupong

Bumbera ng Cainta Outreach Group para maghatid ng tulong sa mga estudyante sa Tanay, Rizal. 

Nakilahok kami sa isang medical mission at Serbisyo Caravan sa Brgy. Sta. Cruz, Talikud Island, IGACOS kasama si Councilor Renz Lacorte at nagbigay ng hiwalay na tulong sa mga residente roon. 

Lagi nating tandaan na ang kalusugan ay katumbas ng buhay ng bawat Pilipino. Tulad ng ating mga natutunan noong panahon ng pandemya, mahalaga ang pagkakaroon ng sapat na kaalaman, pag-iingat, at pagtutulungan ng bawat isa. Habang tayo ay nagdarasal ngayong Semana Santa, palagi rin nating isapuso ang pagmamalasakit sa kapwa at isabuhay naman ang pakikipagbayanihan sa ating komunidad upang mapangalagaan ang buhay na ibinigay sa atin ng Panginoon.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Alalahanin ang sakripisyo ni Hesus ngayong Semana Santa

ni Bong Go @Bisyo Magserbisyo | Marso 23, 2024

Semana Santa na sa susunod na linggo. Ipinapayo ng inyong Senator Kuya Bong Go sa ating mga kababayan na magdasal tayo at magpasalamat sa ginawang pagsasakripisyo ng ating Poong Hesukristo sa atin. Anuman ang ating pananampalataya, magkaisa tayo sa pagmamalasakit at pagseserbisyo sa ating kapwa.

Gamitin din natin ang okasyong ito para makapagpahinga mula sa ating mga gawain at makapiling naman ang ating mga mahal sa buhay.  Sa mga uuwi sa probinsya lalo na ang mga probinsyanong katulad ko, mag-ingat tayo sa biyahe.

Ngayong Fire Prevention Month, tiyakin din ninyo na ligtas ang inyong mga tahanan at iwasan ang mga posibleng pagmulan ng insidente ng sunog. Huwag ding kalilimutan na pangalagaan ang ating kalusugan. Masarap magbakasyon kung kampante ang ating kalooban at wala tayong agam-agam sa ating mga ari-arian at kalusugan.

Samantala, sa ginanap na public hearing ng Senate Committee on Sports noong Miyerkules na ating pinamumunuan tungkol sa issue ng game fixing, hinikayat natin ang mga dumalo na makiisa para mapag-aralan ang mga panukala upang mas mapaayos at malagyan ng ngipin ang mga batas laban sa game fixing.

Mahalagang mapanatili ang integridad ng lahat ng sports. Nakakasira ito ng tiwala ng ating mga kababayan at nagiging bahid ito sa imahe ng ating mga atleta kung napapasukan ng game fixing. Biktima rito ang mga manonood, at mga atletang tapat sa laro, at maging ang imahe ng Philippine sports.

Pangalagaan natin ang integridad ng sports na nagbibigay-inspirasyon sa mga kabataan. Isa ito sa mga paraan para malabanan ang kriminalidad at ang ilegal na droga. Gaya ng madalas kong payo sa mga kabataaan, get into sports, stay away from drugs to keep us healthy and fit.

Bago ang session break sa Senado, nagpahayag din tayo ng suporta para maamyendahan ang Universal Healthcare Law, partikular ang pagbabayad ng PhilHealth premium. Bilang Chair ng Senate Committee on Health, para sa akin ay nararapat lamang na muling suriin ang itinakdang pagtaas sa kontribusyon sa PhilHealth.

Maraming miyembro nito ang walang kakayahang magbayad ng kanilang premium na itinakda sa UHC sa ngayon dahil marami ang bumabangon pa mula sa hirap na dulot ng pandemya tulad ng ating mga bagong bayani na OFWs. Para sa akin, dapat mabigyan ng gobyerno ang lahat ng konting palugit sa kanilang mga bayarin bilang pagmamalasakit sa kanilang pinagdaraanan sa paraang hindi naman maaapektuhan ang serbisyo na dapat nilang makuha sa PhilHealth pagdating sa kalusugan.

Tuluy-tuloy naman tayo sa ating mga gawain sa labas ng Senado para rumesponde sa ating mga kababayan lalo na ang mga mahihirap, hopeless, helpless at walang malalapitan maliban sa gobyerno.

Kaugnay ng pagdiriwang ng Women’s Month at bilang Chair ng Senate Committee on Sports, naging panauhing pandangal at tagapagsalita tayo sa ginanap na 1st Women in Sports Awards ng Philippine Sports Commission sa Rizal Memorial Sports Complex noong March 20. Binigyang-puri natin ang mga atletang Pilipina sa kanilang kontribusyon at paghahatid ng karangalan sa ating bansa sa larangan ng sports.

Nasa Bulacan naman tayo noong March 21 at pinangunahan ang pamamahagi ng tulong sa 1,250 na mga residente ng Pandi. Nakatanggap ang mga ito ng tulong mula sa lokal na pamahalaan sa pamamagitan ng ating suporta. May hiwalay ding 1,250 benepisyaryong mabibigyan ng parehong tulong sa mga susunod na araw. Sinaksihan natin ang inagurasyon ng itinayong Super Health Center sa lugar at namahagi naman ng tulong sa 100 na community leaders doon.

Nagpapasalamat ako kina Congressman Ambrosio Cruz Jr., Vice Governor Alex Castro, Mayor Enrique Roque, Vice Mayor Luisa Sebastian, Board Member Richard Roque, at iba pang opisyal sa kanilang mainit na pagtanggap.

Dumiretso rin tayo sa Muntinlupa City para personal na alamin ang kalagayan at maghatid ng tulong sa 995 residente na naging biktima ng magkakahiwalay na insidente ng sunog kamakailan.

Kahapon, March 22, personal nating sinaksihan ang groundbreaking ng itatayong Super Health Center sa Brgy. Pasig, Lambunao, Iloilo kasama si Mayor Reynor Gonzales.

Pinangunahan natin ang pagkakaloob ng tulong sa 500 residente roon. Namigay tayo ng grocery packs, pagkain, bitamina, masks, bola at iba lang suporta sa kanila.

Nakatanggap din sila ng pansamantalang trabaho mula sa DOLE.

Pagkatapos ay pumunta tayo sa Iloilo City para sa ginanap na Lady Local Legislators League of the Philippines National Summit sa paanyaya ni Vice Governor Christine Garin. Magkakaiba man ang aming posisyon, pareho ang aming hangarin na magserbisyo sa aming kapwa.

Sa parehong araw, pinuntahan ng aking tanggapan ang 84 na mga nasunugan sa Brgy. Airport upang mabigyan ng tulong. Nagbigay tayo ng dagdag na tulong sa 1,000 mahihirap na residente ng Iloilo City katuwang si Cong. Jam Baronda.

Nakarating naman ang aking Malasakit Team sa iba’t ibang parte ng ating bansa para matulungan ang mga kapwa natin Pilipino na nahaharap sa iba’t ibang krisis gaya ng mga naging biktima ng insidente ng sunog kabilang ang 61 sa Mandaluyong City; lima sa Tagum City, Davao del Norte; 45 sa Surigao City; 67 sa Bocaue, Bulacan; at 15 sa Brgy. Tugatog, Malabon City.

Nagbigay tayo ng tulong sa ilang dumalo sa ginanap na 69th Founding Anniversary ng Brgy. Linosutan, Kaputian District sa Island Garden City of Samal; at 1,500 na lumahok sa Women’s Month Celebration sa Lupon, Davao Oriental.

Sa ating paggunita sa Semana Santa, gawin nating inspirasyon ang okasyon para magkaroon tayo ng makahulugang buhay sa kabila ng mga pagsubok na ating pinagdaraanan. Bilang inyong Mr. Malasakit na ang tanging bisyo ay magserbisyo, lagi kong paalala sa lahat na unahin ang kapakanan ng ating kapwa at hinding-hindi tayo magkakamali. Patuloy akong tutulong at magseserbisyo sa inyo sa abot ng aking makakaya, dahil naniniwala ako na ang serbisyo sa kapwa ay serbisyo iyan sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.