Sikapin nating mailapit ang serbisyo ng gobyerno sa mamamayan

ni Bong Go @Bisyo Magserbisyo | April 13, 2024

Masayang-masaya ako dahil ngayong linggong ito ay nakapag-ikot tayo sa Luzon, Visayas at Mindanao para bisitahin ang mga Super Health Center sa iba’t ibang komunidad. 

Ang iba ay naitayo na at ang iba naman ay sisimulan na ang pagtatayo. Isa ito sa ating mga inisyatiba bilang chair ng Senate Committee on Health, kasama ang mga kapwa ko mambabatas, lokal na mga pamahalaan, at Department of Health upang mapalakas pa ang ating healthcare system, at bahagi ng ating obligasyon na maihatid ang serbisyo medikal ng gobyerno sa mga tao kahit sa pinakamalayong lugar sa ating bansa.

Isinulong natin at ipinaglaban ang pagpopondo sa mga Super Health Center dahil alam ko kung gaano kailangan ng ating mga kababayan lalo na ang nasa malalayong lugar na mapalapit sa kanila ang serbisyong medikal ng gobyerno, kaya naman tayo na ang gumawa ng paraan upang hindi na kayo lumayo pa para magpatingin at magpagamot.

Simula nang pumutok ang pandemya, nagulantang talaga ang ating healthcare system. Hindi tayo naging handa at nahirapan tayo. Kaya naman itong mga Super Health Centers ay isang paraan para mapagaan natin ang trabaho ng ating mga ospital at mapunan ang mga pangangailangang pangkalusugan sa mga komunidad.

Sa ating pagbisita sa Bataan noong April 10, nag-inspeksyon tayo sa itinayong Super Health Center sa Hermosa, personal na sinaksihan ang turnover ceremony ng isa pa sa Samal, at dumalo sa groundbreaking ceremony ng isa ring itatayo naman sa Limay. Bukod dito, nag-inspeksyon din tayo sa itinayong Super Health Center sa Pototan, Iloilo noong April 11, at sinaksihan ang groundbreaking ng itatayo naman sa Tagoloan, Misamis Oriental noong April 12.

Samantala, marami pa rin sa ating mga kababayan ang apektado ang kabuhayan ng iba’t ibang krisis at hindi pa tuluyang nakababangon mula sa pandemya kaya kasabay ng ating mga gawain sa labas ng Senado kapag bumibisita tayo sa iba’t ibang bahagi ng ating bansa ay personal din tayong naghahatid ng tulong sa kanila sa abot ng ating makakaya at kapasidad.

Habang nasa Bataan noong April 10 ay sinaksihan natin ang ribbon cutting ceremony ng bagong tayong public market sa Samal, gayundin ang groundbreaking ng itatayong sports complex sa lugar na ating sinusuportahan. Pinangunahan natin ang pamamahagi ng tulong sa 500 nawalan ng hanapbuhay sa Samal, 500 din sa Hermosa, at 500 pa sa Limay. Ang mga benepisyaryo ay nabigyan naman ng pansamantalang trabaho ng DOLE. Nagpapasalamat din ako sa mga bayan ng Samal at Hermosa sa pagdedeklara sa akin bilang adopted son. Naideklara rin akong adopted son ng Limay noong nakaraang taon.

Suportado natin ang malawak na sektor pangkalusugan kaya dumalo tayo sa ginanap na Philippine Pharmacists Association Inc. (PPHA) Annual National Convention Opening Ceremonies sa Iloilo Convention Center, Iloilo City noong April 11. Pinasalamatan natin ang mga pharmacist sa kanilang pagkakaloob sa mga Pilipino ng kanilang expertise, at sa pagpapalakas sa kakayahan ng mga Filipino pharmacists.

Nakibahagi rin tayo sa ginanap na Philippine Councilors League (PCL) Visayas Island Congress sa Iloilo City. Mensahe natin sa mga konsehal, unahin laging pagserbisyuhan ang mga mahihirap nating kababayan lalo na ang mga hopeless, helpless at walang malalapitan maliban sa pamahalaan. Hindi naman natin kinaligtaang magbigay ng tulong sa 500 residente ng Pototan, Iloilo na nawalan ng hanapbuhay, na nabigyan din ng DOLE ng pansamantalang trabaho; habang 70 naman na biktima ng Bagyong Egay ang nabigyan natin ng tulong pampaayos ng bahay katuwang ang NHA.

Tuluy-tuloy rin tayo sa pagmo-monitor ng Malasakit Centers program para matulungan ang ating mga kababayan sa kanilang hospital bills. Masaya kong ibinabalita na kahapon, April 12, sinaksihan natin ang paglulunsad ng ika-162 Malasakit Center na nasa First Misamis Oriental General Hospital sa Medina, Misamis Oriental.

Pinangunahan din natin ang pagkakaloob ng tulong sa 500 residente ng Medina na nawalan ng hanapbuhay. Nabigyan ang mga ito ng pansamantalang trabaho ng DOLE. Dumiretso tayo sa Villanueva at sinaksihan naman ang inagurasyon ng Northeastern Misamis General Hospital sa Villanueva, Misamis Oriental na ating sinuportahan na maipagawa sa paanyaya ni Cong. Bambi Emano. Matapos ito, namahagi tayo ng tulong sa 455 residente ng Villanueva na nawalan din ng hanapbuhay. Nabigyan din ang mga ito ng pansamantalang trabaho ng DOLE.

Sa abot ng ating makakaya at kapasidad, wala ring tigil ang ating pagtulong sa mga kababayan nating nagiging biktima ng mga sakuna at kalamidad. Namahagi ng tulong ang aking Malasakit Team sa mga naging biktima ng magkakahiwalay na insidente ng sunog kabilang ang 109 sa Talomo District, Davao City; anim sa Calamba City, Laguna; at 26 sa Tacloban City, Leyte.

Natulungan din ang mga naging biktima ng nakaraang mga bagyo at mga insidente ng sunog gaya ng 154 sa Zamboanga City; 56 sa Buenavista, Jordan, Nueva Valencia at San Lorenzo, mga bayan sa Guimaras; at anim sa Miagao, Iloilo. Nakatanggap din ang mga ito ng tulong mula sa NHA.

Naayudahan naman natin ang 76 na nawalan ng hanapbuhay sa Brgy. Tambo, Parañaque City katuwang si Brgy. Chairman Jenn Quizon; at 500 displaced workers mula sa Iloilo City katuwang si Mayor Jerry Treñas, kung saan nakabenepisyo rin sila sa programa mula sa DOLE.

Nakapag-abot din tayo ng tulong sa 180 mahihirap na residente ng Cateel, Davao Oriental, katuwang sina Mayor Emilio Nunez, Councilor Cynthia Steinl at Councilor Michael Rosalia; at sa 1,067 benepisyaryo sa Laur, Nueva Ecija, kasama si Congressman GP Padiernos. Nakatanggap din ang mga ito ng tulong sa national government.

Bilang inyong Mr. Malasakit, patuloy akong magseserbisyo sa abot ng aking makakaya dahil bisyo ko ang magserbisyo sa inyo. Naniniwala rin ako na ang serbisyo sa tao, serbisyo ‘yan sa Diyos. Magtulungan tayo upang mailapit ang serbisyo publiko sa mga kababayan nating higit na nangangailangan sa ating pagsisikap na walang maiwan sa pag-unlad ng ating bansa.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Maraming salamat sa inyong patuloy na tiwala at suporta

ni Bong Go @Bisyo Magserbisyo | April 10, 2024

Lubos akong nagpapasalamat sa bawat Pilipinong patuloy na nagtitiwala sa akin bilang inyong Senator Kuya Bong Go. 

Ang inyong suporta ang siyang nagbibigay ng lakas at inspirasyon sa akin upang magpatuloy sa paglilingkod sa inyong lahat at sa ating bansa sa abot ng aking makakaya. Mula noon hanggang ngayon, hindi ko sasayangin ang pagkakataon na ito na makapagserbisyo sa inyo at maipaglaban ang kapakanan ng bawat Pilipino. 

Bilang isang simpleng probinsyanong binigyan ng Panginoon at ng mga mamamayang Pilipino ng mandatong maglingkod na senador simula noong taong 2019, hindi ako tumigil sa aking mga gawain na makatulong sa kapwa, lalo na para sa mga mahihirap at pinakanangangailangan.

Ang resulta ng mga pinakahuling surveys ng Pulse Asia, OCTA Research at Pahayag ng Publicus Asia nitong unang quarter ng taong 2024 ay nagbibigay sa akin ng dagdag na lakas at determinasyon upang ipagpatuloy ang aking serbisyo para sa taumbayan. Ako naman, may survey man o wala, o kahit ano pa ang maging resulta n’yan, gagawin ko ang aking makakaya upang patuloy kong magampanan ang aking mga tungkulin nang may katapatan, lalo na sa mga panahong ito na kailangan natin ng pagkakaisa at malasakit sa isa’t isa.

Walang pinipiling oras ang pagseserbisyo. At ang palagi kong payo sa mga kabataan na nais maglingkod sa bayan, lagi nating unahin ang interes ng ating mga kababayan at kung ano ang makakabuti sa lahat. Kapag inuna mo ang kapakanan ng inyong kapwa, hinding-hindi tayo magkakamali.  

Bilang inyong Mr. Malasakit, anumang pagsubok ang ating haharapin sa susunod na mga araw, patuloy akong magseserbisyo sa inyong lahat dahil bisyo ko na ang magserbisyo at naniniwala ako na ang serbisyo sa tao ay serbisyo sa Diyos.

Kaya naman kahit weekend at holiday ay tuluy-tuloy pa rin ang ating paghahatid ng serbisyo sa ating mga kababayan sa buong bansa. Masaya kong ibinabalita na noong April 7 ay sinaksihan ng aking tanggapan ang inagurasyon ng itinayong Super Health Center sa Umingan, Pangasinan. Binisita ko ito noong nakaraang taon para sa groundbreaking at ngayon ay tapos na ang pasilidad na maglalapit ng mga pangunahing serbisyong pangkalusugan sa ating mga kababayan sa lugar. Kasabay nito ang kanilang Karabasa Festival kung saan nakisaya ang aking tanggapan at nagbigay rin ng kaunting tulong sa mga kababayan ko roon bilang adopted son tayo ng Pangasinan.

Kahapon, April 9, ay nasa Romblon tayo at sinaksihan ang turnover ceremony ng itinayong Super Health Center sa bayan ng Magdiwang. Matapos ito ay nag-inspeksyon tayo sa isinasagawang paglalatag ng konkreto at rehabilitasyon ng Manuel L. Quezon Street sa Cajidiocan na isinulong nating mapondohan sa ating kapasidad bilang vice chair ng Senate Committee on Finance. Pinangunahan din natin ang pagkakaloob ng tulong para sa 500 residente sa lugar na nawalan ng hanapbuhay. Nabigyan din ang mga ito ng pansamantalang trabaho mula sa programa ng DOLE.

Bilang tayo ang chair ng Senate Committee on Sports, dumalo rin tayo sa ginaganap na Romblon Provincial Athletic Meet, sa paanyaya ni Gov. Otik Riano, Cajidiocan Mayor Marvin Ramos, at iba pang opisyal. Pinayuhan ko ang mga lumahok, ‘to get into sports, stay away from illegal drugs, and keep healthy and fit!’ dahil malaki ang papel ng sports sa nation-building at sa paghubog ng ating kabataan.

Naghatid din ang aking Malasakit Team ng tulong sa mga kababayan nating nahaharap sa iba’t ibang krisis tulad ng 107 pamilyang nasunugan sa mga barangay sa Zamboanga City.

Nabigyan natin ng tulong ang 16 residente ng General Santos City na naging biktima ng insidente ng sunog. Nakatanggap din ang mga ito ng emergency housing assistance mula sa programa ng NHA na isinulong natin noon at patuloy na sinusuportahan ngayon para may pambili ang mga benepisyaryo ng pako, yero, semento at iba pang materyales sa pagtatayong muli ng kanilang mga tahanan.

Nagbigay naman tayo ng ilang regalo para sa 58 newlywed couples sa isinagawang Kasalang Bayan sa Quezon City katuwang si Councilor Mikey Belmonte.

Muli, maraming salamat at ipagpapatuloy ko ang aking mga adbokasiya na makakabuti para sa bansa at sa lahat ng ating kababayang Pilipino. Magkaisa tayo para matugunan ang mga isyung kinakaharap ng ating bansa lalo na pagdating sa kalusugan at pangangailangan ng bawat Pilipino. Sikapin nating walang maiwan sa ating pagbangon at tulungan nating maiangat ang antas ng buhay ng mga hopeless, helpless at walang malalapitan maliban sa pamahalaan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Ibigay na ang nararapat sa mga healthcare worker

ni Bong Go @Bisyo Magserbisyo | April 6, 2024

Sa ginanap na public hearing sa Senado noong April 2 na isinagawa ng Senate Committee on Health na ating pinamumunuan, natalakay ang tungkol sa Health Emergency Allowance (HEA) na isinulong natin noon at naisabatas bilang pagtugon sa pangangailangan ng mga healthcare workers (HCWs) noong panahon ng pandemya dulot ng COVID-19.

Ayon sa Republic Act No. 11712 na isa ako sa nag-akda at co-sponsor, mabibigyan dapat ng dagdag na allowance ang mga kuwalipikadong HCWs noong state of public health emergency due to COVID-19. Sa kasamaang palad, halos isang taon nang na-lift ang state of public health emergency ngunit may ilan pang HCWs ang ‘di nakakatanggap nito.

Mula noon hanggang ngayon, hindi ako tumitigil sa pag-apela sa gobyerno na ibigay na ang pending na HEA sa mga kuwalipikadong HCWs. Sa katunayan, kahit noong panahon ni dating Pangulong Rodrigo Duterte, nag-privilege speech pa ako sa Senado upang kastiguhin ang mabagal na pagre-release ng dagdag na benepisyo sa HCWs tulad ng mga death benefit para sa mga nagbuwis ng buhay noon. Sila ang mga bayani sa panahon ng pandemya. Hindi natin mararating ito na nagbalik tayo sa normal kung hindi dahil sa kanilang sakripisyo.

Nagkaharap-harap ang Department of Health, Department of Budget and Management at maging ang mga kinatawan ng healthcare workers sa ating pagdinig. Binigyan natin ng pagkakataon ang mga HCWs na mapakinggan ang mga hinaing nila. Ako ‘yung taong aksyon agad kapag may problemang inilapit sa akin, kaya kaisa nila ako sa laban na ito.

Umapela tayong muli sa DOH at DBM na bilisan na ang pagre-release ng naturang HEA dahil services rendered na ito. Ibig sabihin, utang ito ng gobyerno sa mga HCWs.

Ipinaalala ko sa lahat na ang implementasyon ng budget ng gobyerno na ipinasa ng Lehislatibo at pinirmahan ng Pangulo ay tungkulin ng Ehekutibo. Ang initial na proposal ng budget bawat taon ay galing din sa Ehekutibo. Kung kaya’t patuloy ang ating apela sa Ehekutibo na gawing prayoridad ang pagbabayad ng HEA bilang pagsunod sa batas at pagkilala rin sa serbisyong ibinigay ng mga medical frontliners natin.

Isa sa mga hakbang na ating ipinayo sa DOH at DBM ay ang maayos na pag-reconcile ng kanilang records upang malaman kung ano na ba ang nabayaran, sino pa ang ‘di nakakatanggap ng HEA, ano ang rason ng pagkaantala ng release ng pondo, at magkano pa ba ang kailangan upang mapunan ang kulang para mapondohan ang balanse sa mga susunod na taon at maisara na ang obligasyon na ito. Kapwa nangako ang DOH at ang DBM na ire-reconcile ang kanilang mga records para mabayaran na ang mga HCWs.

Titiyakin naman natin na patuloy na susubaybay ang Senate Health Committee para tuluyang maipagkaloob ang pagkilala at kabayaran na nararapat para sa kanila. Napakaliit na halaga ito kumpara sa sakripisyo ng ating HCWs sa panahon ng pandemya. Ang importante rito, what is due sa kanila, dapat bayaran dahil pinagpawisan na nila iyan.

Gaano man tayo kaabala sa Senado, hindi natin kinakaligtaan ang paghahatid ng serbisyo sa iba’t ibang komunidad bilang inyong Mr. Malasakit.

Dumalo tayo sa ginanap na 25th Pandanan Festival at 170th Absolute Independence Day sa Luisiana, Laguna noong April 3 sa paanyaya ni Mayor Jomapher Alvarez kasama sina Vice Gov. Karen Agapay at iba pang lokal na opisyal. Bukod sa pagiging adopted son ng CALABARZON Region, pinapasalamatan ko rin ang mga kapatid kong taga-Luisiana sa pagdedeklara sa akin bilang adopted son ng kanilang bayan. Personal nating pinangunahan ang pamamahagi ng tulong para sa 500 residente sa lugar na nawalan ng hanapbuhay. Ang mga benepisyaryo ay nakatanggap din ng pansamantalang trabaho mula sa DOLE.

Binisita naman natin noong April 4 ang aking mga kapwa Batangueño at personal na sinaksihan ang groundbreaking ng itatayong dialysis center sa Mataas Na Kahoy. Ang naturang center ay natulungan nating mapondohan sa ating kapasidad bilang vice chair ng Senate Committee on Finance. Nag-inspeksyon din tayo sa itinayong Mataas Na Kahoy Center for Culture and Arts Auditorium na napondohan din sa ating pamamagitan. Personal din nating pinangunahan ang pagkakaloob ng tulong sa 500 residente sa lugar kasama sina Congresswoman Maitet Collantes, Mayor Janet Ilagan, Vice Mayor Jay Manalo Ilagan, Vice Mayor Ronin Leviste ng Lian, Vice Mayor Alvin Payo ng Balete at Vice Mayor Junjun Trinidad ng Tanauan. May tulong na pansamantalang trabaho rin na ipinagkaloob sa kanila.

Naging panauhin din tayo sa ginanap na launching ng programang Malasakit sa Kooperatiba ng Cooperative Development Authority (CDA) sa Quezon City kasama sina Mayor Joy Belmonte at CDA Chairperson Joy Encabo. Dito natin pinahalagahan ang papel ng kooperatiba sa mga komunidad. Sa pamamagitan ng programang ito na ating isinulong na mapondohan, mabibigyan ng dagdag na suporta ang mga kooperatiba na lumago at makatulong sa kanilang mga miyembro.

Sa mga nakaraang araw, natulungan din ng aking Malasakit Team ang mga naging biktima ng magkakahiwalay na insidente ng sunog kabilang ang 137 sa Talisay City, Cebu; 15 sa Pontevedera, Capiz; 32 sa Zamboanga City; isa sa M’lang, Cotabato; apat sa Buluan, Maguindanao del Sur; tatlo sa Cotabato City; at apat sa Parang, Maguindanao del Norte.

Natulungan din ang 850 maliliit na negosyante sa mga bayan ng Camalaniugan, Iguig, Amulung, Baggao at Alcala sa Cagayan katuwang sina Alcala Mayor Cristina Antonio, Amulung Mayor Elpidio Rendon, Baggao Mayor Leonardo Pattung, Camalaniugan Mayor Isidro Cabaddu at Iguig Mayor Ferdinand Trinidad. Nakatanggap sila ng tulong pangkabuhayan mula sa national government.

Dagdag pa riyan, natulungan natin ang 170 nawalan ng hanapbuhay sa Malolos City, Bulacan katuwang si Congressman Danny Domingo. Nakatanggap din ang mga ito ng tulong mula sa DOLE.

Naayudahan naman ang naging biktima ng iba’t ibang kalamidad gaya ng 10 benepisyaryo sa Makilala, Cotabato na naapektuhan ng Bagyong Paeng; at ang mga nakaranas ng malakas na pag-ulan kabilang ang 13 sa Pikit at apat sa Pigcawayan sa Cotabato; apat sa Koronadal City, walo sa Surallah at 11 sa Norala sa South Cotabato; 11 sa Bagumbayan, Sultan Kudarat. Nabigyan din ng sila ng tulong mula sa NHA sa ilalim ng programang isinulong natin noon para may pambili ang mga benepisyaryo ng pako, yero, semento at iba pang materyales sa pagtatayong muli ng kanilang nasirang tahanan.

Ngayong panahon ng tag-init, pangalagaan natin ang ating kalusugan at magmalasakit tayo sa bawat isa. Tandaan natin na ang kalusugan ay katumbas ng buhay ng bawat Pilipino. Bilang inyong representante sa Senado, patuloy akong magseserbisyo sa inyong lahat sa abot ng aking makakaya dahil bisyo ko na ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.