Mga batang may cancer, palakasin at bigyang pag-asa

ni Bong Go @Bisyo Magserbisyo | June 16, 2024

Isa sa mga paborito kong aral na natutunan kay dating Pangulong Rodrigo Duterte ay ang pagpapakumbaba at pagseserbisyo sa ating mga kababayan. Parati kong sinasabi -- lalo na sa mga kabataan -- unahin lagi ang interes at kapakanan ng mga kababayang nangangailangan at hinding-hindi sila magkakamali sa pipiliing landas.

Sa loob ng 24 taon ng pagtatrabaho ko noon kasama si Tatay Digong, ni minsan ay hindi siya nag-celebrate ng kanyang birthday. Kaya tulad ng kaarawan ko nitong Biyernes, mas ninais kong patuloy na tumulong sa kapwa at magpasalamat sa Diyos sa dagdag na pagkakataon na makapagserbisyo sa inyo.

Ilang araw bago ko ipagdiwang ang aking kaarawan ay bumisita ako sa Philippine Children’s Medical Center sa Quezon City. Pagpapatuloy ito ng sinimulan namin ni Tatay Digong sa Davao City dahil malapit sa puso naming dalawa ang mga bata lalo na ang mga kaawa-awang may sakit na cancer.

Noong June 12, Araw ng Kalayaan, kinumusta natin ang Malasakit Center sa PCMC, isa sa 165 na Malasakit Centers sa buong bansa. Masaya kong ibabalita na puwedeng nang magpunta roon ang mga kababayan nating nangangailangan ng medical assistance.

Lalo pa tayong nasiyahan nang muli nating makasama ang mga batang pasyente sa isang munting salo-salo kasama ang pamunuan ng PCMC. Naantig ang damdamin ng lahat ng naroon sa mensahe ng mga batang tulad nina Sherwin Arocha, 10-anyos, na may Langerhans-cell histiocytosis; Don Raizen Parafina, 15, na nakikipaglaban sa aplastic anemia; si Vinz Matthew Fugaban, 10, na isang leukemia survivor; at si Markhen Nidal Gabuyan, 11, na lumaban sa acute lymphoblastic leukemia.

Naroon din siyempre ang aking best friend na si John Paul Cuilao. June 14, 2018 nang kami ay magkakilala sa PCMC dahil nag-donate tayo ng napanalunan ng ating basketball team noon. Four years old pa lang si John Paul noon at may leukemia, pero ngayon ay nasa mas mabuting kalagayan na. Nakabalik na rin siya sa pag-aaral at siya ang class president.

Sabi ni John Paul, hindi siya makapaniwala na nagkatotoo ang pangako natin na makapanood siya ng PBA games. Nagpasalamat din siya sa pagkakalipat sa ospital kung saan mas napadali ang paggagamot sa kanya. Patuloy tayong sumusuporta sa “Touch of Love” group, isang non-profit organization na itinatag noong 2018, bilang adbokasiya ni John Paul para palakasin ang loob at bigyan ng pag-asa ang iba pang bata na nakikipaglaban sa cancer.

Nagpasalamat tayo sa pamunuan ng PCMC sa walang humpay nilang pag-aalaga sa mga bata para masigurong humaba pa ang kanilang mga buhay. Ang birthday wish ko, sana ay maging cancer-free na rin ang lahat ng kababayan natin lalo na ang mga bata na patuloy na nakikipaglaban sa sakit.

Sa kabuuan, 81 na mga batang pasyenteng may cancer at iba pang sakit ang kasama natin sa araw na iyon. Nagkaloob tayo ng kaunting tulong at regalo tulad ng gift packs at loot bags habang ang mga parents at ilang staff ng ospital ay nabigyan naman ng gift boxes at mga bola ng basketball at volleyball.

Bilang Vice Chair ng Senate Finance Committee, kasama ang ating mga kapwa mambabatas na sina Senator Sonny Angara at Senator Pia Cayetano, naisulong nating magkaroon ng pondo para makabili ang PCMC ng bagong MRI at CT scan equipment at maitayo ang Pediatric Brain and Spine Center.

Mahirap sugpuin ang cancer, pero ito ang isang laban na kaya nating magwagi. Lagi nating ipinaglalaban ang karagdagang pondo para sa Cancer Assistance Fund ng DOH — na naging higit doble ngayong taon sa tulong na rin ng aking mga kapwa mambabatas. Ang karagdagang pondo ay ginagamit sa gastos para sa pagpapagamot ng mga mahihirap na cancer patients, kabilang ang kanilang diagnostics at laboratory tests.

Bumisita naman tayo sa mga kapwa Davaoeños noong June 13 at personal na pinangunahan ang pamamahagi ng tulong sa 23 kooperatiba sa Davao Region sa ilalim ng Malasakit sa Kooperatiba program ng Cooperative Development Authority na isa sa ating mga inisyatiba para mapalakas ang mga kooperatiba sa buong bansa.

Sinaksihan din natin ang groundbreaking ng itatayong Multipurpose Building Crisis Intervention Center sa Balay Dangupan sa Davao City. Isinulong natin na mapondohan ang naturang proyekto. Kinumusta natin at naghatid ng tulong sa 55 senior citizens na nasa pangangalaga ng Co Su Gian Home for the Aged sa lungsod. Nagbigay tayo ng gift packs sa ilang staff doon.

Naghatid naman ng tulong ang aking Malasakit Team sa mga kababayang nahaharap sa iba’t ibang krisis kasama na ang mga biktima ng sunog tulad ng 137 sa Bacoor City, Cavite; 155 sa Cagayan de Oro City; 25 sa Lucena City, Quezon; at 323 sa Parañaque City. Nagsimula na rin ang ating pamamahagi ng tulong sa mga kababayang nabiktima ng pagputok ng Bulkang Kanlaon mula sa mga bayan ng Pontevedra, La Castellana, Moises Padilla, at Bago City, at La Carlota City, sa lalawigan ng Negros Occidental.

Napagkalooban din ng tulong ang mga mahihirap na residente kabilang ang 1,500 sa Hinatuan, Surigao del Sur katuwang sina Gov. Ayec Pimentel at Senator Joel Villanueva; 201 sa Don Salvador Benedicto, Negros Occidental kasama si Mayor Mac dela Cruz; at 200 sa Sto. Domingo, Ilocos Sur kaagapay sina Annea de Leon at San Pablo Brgy. Captain Lalaine Seson.

Hindi natin kinaligtaan ang mga nawalan ng hanapbuhay at natulungan ang 73 sa Parañaque City katuwang si SK Chairman Julia Labarda; 98 sa Urdaneta, Pangasinan kasama si Brgy. Captain Danny Ildefonso; 156 sa Tandag, Surigao del Sur kaagapay si Mayor Roxanne Pimentel; 156 sa Claver, Surigao del Norte sa tulong ni Vice Governor Eddie Gokiangkee; at 6,741 sa iba’t ibang lugar sa Zamboanga del Sur sa pakikiisa ni Congresswoman Divine Yu.

Nagbigay rin tayo ng karagdagang tulong sa CHED scholars kabilang ang 300 sa Pagadian City, Zamboanga del Sur; at 45 TESDA trainees sa San Agustin, Surigao del Sur katuwang si Vice Gov. Manuel Alameda.

Minsan lang tayong dadaan sa mundong ito. Kung anong kabutihan o tulong na puwede nating gawin sa kapwa tao, gawin na natin ngayon. Ang kalusugan ay katumbas ng buhay ng bawat Pilipino, at bilang inyong Chair ng Senate Committee on Health, gagawin ko ang aking tungkulin sa abot ng aking makakaya na mailapit ang serbisyong medikal sa mga Pilipino. Patuloy akong magseserbisyo sa inyo dahil bisyo ko ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Paggunita at patuloy na laban para sa kalayaan

ni Bong Go @Bisyo Magserbisyo | June 12, 2024

Sa pagdiriwang natin sa araw na ito ng ika-126 anibersaryo ng pagkadeklara ng kalayaan ng Pilipinas, napakahalagang maintindihan ng bawat Pilipino ang tunay na diwa ng Araw ng Kalayaan.

Muli nating ginugunita ang dakilang sakripisyo at pag-aalay ng buhay ng ating mga ninuno para sa kalayaan at magandang kinabukasan ng sambayanan. Ito ay sumasalamin din sa ating pagkakaisa saan man tayo naroroon.

Pero sa araw-araw nating pamumuhay sa modernong panahon, nariyan pa rin ang mga hamon para maipaglaban ang ating kalayaan at isapuso ang ating pagmamahal sa bansa at sa bawat Pilipino. Malaking pagsubok pa rin ang kahirapan, kakulangan sa trabaho, kakapusan sa kita, hindi pagkakapantay-pantay, karapatan sa malayang pagpapahayag at iba pa. Bilang isang lahi, kinakaharap din natin ngayon ang banta ng panghihimasok sa ating mga teritoryo at saklaw na karagatan.

Dahil sa mga hamong ito, dapat nating alalahanin na ang pagkakamit ng kalayaan ay nangangailangan ng paggunita sa nakaraan at patuloy na pakikipaglaban, pagkakaisa, at pagbabayanihan. Tulad ng mga bayani natin noon, sana ay patuloy nating isadiwa ang ating pagmamahal sa bayan, pagseserbisyo, at pagmamalasakit sa kapwa Pilipino sa araw-araw nating mga gawain.

Bilang chairman ng Senate Committee on Health, nais kong magbigay ng natatanging pagkilala sa lahat ng mga frontliner na nag-alay ng kanilang buhay noong panahon ng pandemya. Hanggang ngayon, nakikipaglaban pa rin sila para sa kaligtasan ng bawat Pilipino.

Nagbibigay-pugay rin ako sa ating OFWs na tinitiis na mapalayo sa kanilang mga mahal sa buhay kapalit ng magandang kinabukasan. Sumasaludo rin ako sa ating mga sundalo, pulisya at iba pang uniformed personnel na patuloy na iniaalay ang buhay para sa katatagan at kaligtasan ng bansa.

Higit sa lahat, bigyan din natin ng halaga ang sakripisyo ng bawat Pilipino na araw-araw ay patuloy na nagsisikap para sa kanilang pamilya. Kayo ang inspirasyon ko bilang Mr. Malasakit Senator Kuya Bong Go para ilapit pang lalo ang serbisyo at malasakit ng gobyerno sa ating mga kababayan lalo na ang mga pinakanangangailangan. Kaya nitong nakaraang mga araw, walang tigil ang ating pagseserbisyo sa abot ng ating makakaya.

Bilang chairman ng Senate Committee on Sports, kasama si Quezon City Councilor Mikey Belmonte ay nilahukan natin ang Mikey Belmonte Cup 2024 na ginanap sa Brgy. Payatas, Quezon City noong June 9. Naging daan tayo upang mapondohan ang naturang palaro kasama ang Philippine Sports Commission upang mai-promote ang grassroots sports development sa komunidad. Lagi kong ipinapayo sa mga kabataan: ‘get into sports, stay away from drugs, and to keep them healthy and fit.’

Binisita naman natin ang ating mga kababayan sa Pasig City noong June 10 at personal na pinangunahan ang pamamahagi ng dagdag na tulong sa 1,000 residenteng nawalan ng hanapbuhay. Nakatuwang natin dito sina Vice Mayor Dodot Jaworski at mga konsehal na sina Bel Asilo, Kiko Rustia, Eric Gonzales at Volta Delos Santos. Ang mga kuwalipikadong benepisyaryo ay mabibigyan din ng pansamantalang trabaho.

Naging guest of honor and speaker din tayo sa 51st Commencement Exercises ng Philippine Christian University-Dasmariñas Cavite branch. Idinaos ang seremonya para sa 849 graduates sa Philippine International Convention Center sa Pasay City. Dito natin inengganyo ang mga kabataan na pahalagahan ang sakripisyo ng kanilang mga magulang at guro, huwag matakot mangarap at paghirapang marating ang kanilang mga inaasam sa buhay, at higit sa lahat, gamitin ang bawat oportunidad upang makatulong sa kapwa, makapagserbisyo sa bayan, at magmalasakit sa isa’t isa. Go lang nang go tungo sa mas magandang kinabukasan dahil kayong mga kabataan ang pag-asa ng bayan!

Dinalaw naman natin kahapon, June 11, ang ating mga kababayan sa Cavite at binisita ang itinayong Super Health Center sa Imus City. Matapos ito ay pinangunahan natin ang pamamahagi ng tulong sa 2,000 benepisyaryo na binubuo ng mga barangay health workers, barangay nutrition scholars, at mga mahihirap doon. Bukod sa naipagkaloob ng aking opisina, nakatanggap din ang mga benepisyaryo ng tulong pinansyal mula sa programang ating isinulong kasama si Mayor AA Advincula. Nag-inspeksyon din tayo sa ginawang bypass road doon na ating isinulong na mapondohan noon.

Masaya ko ring ibinabalita na sa nakaraang mga araw ay sinaksihan ng aking tanggapan ang turnover ceremony ng itinayong Super Health Center sa Sta. Josefa, Agusan del Sur; gayundin ang inagurasyon ng Super Health Center sa San Jose, Tarlac na ating isinulong upang ilapit ang pangunahing serbisyo medikal sa mga komunidad.

Hindi rin tumitigil ang aking Malasakit Team sa paghahatid ng tulong sa mga komunidad tulad ng para sa 1,000 mahihirap sa Echague, Isabela katuwang si Mayor Kiko Dy; at 726 sa Dapa, Surigao del Norte kaagapay si Mayor Abeth Matugas. Ang mga benepisyaryo ay nakatanggap din ng tulong pinansyal mula sa gobyerno.  

Naalalayan din natin ang 31 mahihirap na residente ng Tabaco City, Albay katuwang si Mayor Krisel Lagman-Luistro kung saan ang mga benepisyaryo ay nabigyan din ng tulong pangkabuhayan ng pamahalaan.

Naabutan din ng tulong ang 106 nawalan ng hanapbuhay sa Calapan City, Oriental Mindoro kaagapay si Mayor Malou Morillo. Kuwalipikado rin sila sa programang pansamantalang trabaho mula sa DOLE.

Naniniwala ako na ang pagmamalasakit sa kapwa ay munting paraan para panatilihing buhay ang diwa ng kalayaan at pagmamahal sa ating bansa. Patuloy akong magseserbisyo sa bawat Pilipino dahil bisyo ko ang magserbisyo, at naniniwala ako na ang serbisyo sa tao ay serbisyo sa Diyos.

Nawa’y isapuso natin ang tunay na diwa ng ating kalayaan ngayong araw at ipagpatuloy natin ang ating pagmamahal at pagmamalasakit sa ating kapwa Pilipino. Unahin natin ang interes ng bayan dahil maaari nating maialay ito sa mga susunod pang henerasyon.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Serbisyo at malasakit na walang hinihintay na kapalit

ni Bong Go @Bisyo Magserbisyo | June 8, 2024

Sa tuwing nakakatanggap ng pasasalamat ang inyong Senator Kuya Bong Go dahil sa mga tulong na hatid natin at sa patuloy na paglalapit natin ng serbisyo sa mga nangangailangan, paulit-ulit kong sagot na hindi ako dapat pasalamatan. Karangalan at trabaho ko ang makapagserbisyo sa aking mga kababayan.

Sapat na ang makita nating nakangiti ang mga Pilipinong naghihirap dahil sa tulong na ating naipadadala sa kanila nang walang kapalit. Gusto lang natin na makaambag sa munting paraan sa pagpapabuti ng buhay ng mga nangangailangan.

At hindi lang mga indibidwal ang naghahanap ng ayuda mula sa pamahalaan kundi pati mga grupo gaya ng mga kooperatiba. Noon ngang June 6 sa Legazpi City, Albay, naghatid tayo ng tulong sa 23 kooperatiba mula sa Bicol region. Bukod pa rito ang benepisyo mula sa “Malasakit sa Kooperatiba” program ng Cooperative Development Authority o CDA na ating isinulong na mapondohan bilang vice chair ng Senate Finance Committee.

Malaking tulong ang isang kooperatiba sa mga miyembro nito, sa mga komunidad, at sa ating ekonomiya kaya isinusulong natin ang kapakanan ng mga ito. Co-author at co-sponsor tayo ng Republic Act No. 11502, o ang National Cooperative Month Act, na nagtakda sa buwan ng Oktubre bawat taon bilang National Cooperative Month. Bukod dito, co-author at co-sponsor din tayo ng RA 11535, na nagtatakda para magtalaga ng Cooperatives Development Officer sa mga munisipyo, lungsod at lalawigan.

Sa Albay pa rin, naghatid tayo ng tulong sa 2,000 kuwalipikadong mahihirap na miyembro ng TODA sa Legazpi City at Daraga. Ito ay tulong pinansyal na hatid natin kaagapay ang lokal na pamahalaan sa pangunguna nina Governor Grex Lagman.

Nais ko ring ibalita sa inyo na katuwang natin sa pagmamalasakit ang nag-iisang Superstar at National Artist for Film and Broadcast Arts and Philippine Cinema na si Nora Aunor. Nagpadala ng video message si Ate Guy para magpasalamat sa aniya’y milyun-milyong natulungan ng ating mga inisyatiba. Salamat, Ms. Nora, dahil inspirasyon kayo sa napakaraming mahihirap na Pilipino. Asahan ninyo na hindi ako titigil sa pagseserbisyo.

Habang nasa Bicol naman tayo noong June 6 ay dumalo rin tayo sa 2nd Bicol Social Media Summit 2024 na ginanap sa Casablanca Convention Center, Legazpi City. Naging guest speaker din tayo sa Southern Luzon Technological College Foundation Inc. 29th Commencement Exercises para sa mga nagtapos sa kolehiyo, at sa 8th Commencement and 7th Completion Exercise para sa high school sa paanyaya ni SLTCFI President and Legazpi City Water District Board Member Rosemarie Qunito-Rey. Sinaksihan natin ang inagurasyon ng New Legazpi Evacuation Center na nasa Barangay Banquerohan. Ang proyekto ay napondohan sa ating pamamagitan.

Panauhin din tayo sa gabing iyon pagbalik ng Maynila ng Philippine Councilors League (PCL)-Romblon Chapter General Assembly na ginanap sa Bayview Park Hotel Manila, sa paanyaya ni Secretary General Councilor Melwin Punzalan.  

Samantala, nasa Bohol tayo noong June 5 at nag-inspeksyon sa Super Health Center sa Panglao, gayundin sa Dauis. Pinangunahan din natin ang pagkakaloob ng tulong sa 522 residenteng nawalan ng hanapbuhay sa Panglao, at 522 din sa Dauis. Ang mga benepisyaryo ay nabigyan naman ng DOLE ng pansamantalang trabaho. Naging panauhin din tayo sa Liga ng mga Barangay - Bohol Chapter Provincial Congress na idinaos sa Bohol Tropics Resort sa Tagbilaran City, sa paanyaya ni Provincial Board Member Romulo Cepedoza.  

Kahapon, June 7, guest speaker naman tayo sa Saint Amatiel Education System Graduation Ceremony na ginanap sa PICC sa paanyaya ni President and CEO Pepito Trumata.  

Tuluy-tuloy din ang aking Malasakit Team sa pagtulong sa ating mga kababayan. Maagap tayong umalalay sa walong residenteng nasunugan sa Baguio City. Naayudahan natin ang 500 mahihirap na residente ng Dipolog City kabalikat si Mayor Darel Uy, at nakatanggap din ang mga ito ng karagdagang tulong mula sa national government.

Hindi natin kinaligtaan ang mga nawalan ng hanapbuhay at nabigyan ng tulong ang 73 sa Brgy. Pilar, Las Piñas City katuwang si Brgy. Capt Ronnie Fuentes; 84 sa Nasugbu, Batangas kaagapay si Provincial Board Member Armie Bausas; 111 sa Calintaan, Occidental Mindoro at nakasama natin si Mayor Dante Esteban; 687 sa Taguig City kasama sina Mayor Lani Cayetano at Congressman Ading Cruz; 147 sa Pateros kaalalay si Capt. Joven Gatpayat; 111 sa San Isidro kasama si Mayor Lamberto Domiños at 111 din sa Sta. Monica kasama si Mayor Arwela Dolar, mga lugar sa Siargao, Surigao del Norte; at 726 sa Makati City sa pakikipagtulungan ni Congressman Kid Peña. Nabigyan din sila ng pansamantalang trabaho ng Department of Labor and Employment.

Minsan lang tayong dadaan sa mundong ito. Kung anong kabutihan o tulong na puwede nating gawin sa ating kapwa ay gawin na natin ngayon dahil hindi na tayo babalik sa mundong ito.

Bilang inyong Mr. Malasakit, magtatrabaho ako para sa mga Pilipino at tutulong sa abot ng aking makakaya. Bibisitahin ko kayo saan mang sulok ng bansa basta kaya ng aking katawan at oras. Bisyo ko na ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.