Kapakanan at kalusugan ng bawat Pilipino, hindi dapat paghintayin

ni Bong Go @Bisyo Magserbisyo | August 24, 2024

Kamakailan ay nalaman natin sa pagdinig sa Senado na ating pinamunuan bilang chairperson ng Senate Health Committee na may sobra-sobrang pondo ang PhilHealth na nagkakahalaga ng humigit-kumulang 500 bilyong piso na natutulog lang kaya ngayon ay ililipat na ang parte nito na P89.9B sa National Treasury.

Hindi katanggap-tanggap para sa akin na may mga naghihingalong pasyente na humihingi ng tulong sa gobyerno para may ipampagamot samantalang may pondo riyan na pangkalusugan naman na nakatiwangwang lang, planong gamitin sa ibang mga programa, at hindi mapapakinabangan ng mga mahihirap na may sakit. 

Sana naman ay magising na ang pamunuan ng PhilHealth. Hindi naman sila bangko na dapat mag-ipon lang ng pondo. Gamitin sana nila ito para mas maproteksyunan ang kalusugan at buhay ng bawat Pilipino ayon sa kanilang mandato, at alinsunod din sa Universal Health Care Law. 

Tinututulan ko rin ang “Single Period of Confinement Policy” ng PhilHealth kung saan isang beses lang covered ng PhilHealth ang parehong medical condition sa loob ng tatlong buwan. Halimbawa, nag-bleeding ang isang buntis dahil sa maselang kondisyon. Kapag dinugo siya ulit sa loob ng susunod na 90 araw ay labas na sa PhilHealth coverage ang bayarin ng pasyente. Hindi katanggap-tanggap ito lalo na’t may pondo naman pala na puwedeng itulong sa nangangailangan! 

Mismong ang pamunuan ng PhilHealth ay aminadong “flawed” o palyado ang polisiyang ito kaya’t nangako sila na pag-aaralang rebisahin ang naturang regulasyon. Tututukan natin ito hanggang tuparin ng PhilHealth ang kanilang pangako, katulad na lamang ng naunang pangako na irerekomenda sa Pangulo na bawasan ang premium contribution ng mga miyembro. 

Ang kapakanan at kalusugan ng bawat Pilipino ay hindi dapat pinaghihintay. Uulitin ko, ang pondo ng PhilHealth ay dapat na gamitin sa health. Imbes na pinapatulog ng PhilHealth ang pondong pangkalusugan na mula naman sa taumbayan at para sa kanila, dapat ay gamitin ito para palawakin pa ang benepisyo o packages mula PhilHealth, itaas pa ang case rates na sasakop sa pangangailangan ng mga pasyente, at maibaba ang premium contributions ng mga Pilipinong nag-aambag buwan-buwan para may pondo ang PhilHealth. 

Nitong nakaraang linggo rin ay sinuportahan natin ang panukalang SBN 2620 bilang co-author at co-sponsor na nais amyendahan ang UHC Law. Kapag naisabatas, kasama na rito ang pagbaba ng premium contributions sa PhilHealth.

Sa pagdinig pa rin ay ipinunto natin sa Department of Health na hindi dapat maantala ang mga proyektong nasa ilalim ng Health Facilities Enhancement Program. Napakaimportante ng mga pasilidad pangkalusugan lalo na sa kanayunan. 

Sa kabila nito, pinasalamatan pa rin natin ang DOH dahil sa matagumpay na implementasyon ng Super Health Centers. Isa rito ang Super Health Center sa Tingloy, Batangas na isang isla na ating nabisita noon. Ang mga kababayan nating Batangueño doon, hindi na kailangang bumiyahe ng bangka para magpa-check-up. Masasabi nating isa itong modelo kung ano ang naisasakatuparan kung magtutulungan tayo at uunahin natin ang kapakanan ng mga kababayan natin. 

Bilang inyong Mr. Malasakit na ang tanging bisyo ay magserbisyo, patuloy ang ating paghahatid ng tulong at paglalapit ng mga serbisyo ng gobyerno sa mga nangangailangan nito. 

Dumalo tayo sa ginanap na League of Municipalities of the Philippines - Luzon Island Cluster Conference bilang isa sa Guest Speakers sa paanyaya ni LMP National President Mayor JB Bernos noong August 21. Nakiisa rin tayo sa ginanap na Higalaay Festival Pyro Musical Fireworks sa Cagayan de Oro City sa araw na iyon. 

Personal naman nating pinangunahan ang pagkakaloob ng tulong pinansyal sa 22 cooperatives sa Northern Mindanao Region noong August 22 sa Cagayan de Oro City katuwang ang Cooperative Development Authority sa ilalim ng kanilang programang Malasakit sa Kooperatiba na ating isinulong. Sinuportahan din natin ang 1,000 mahihirap na residente sa lungsod katuwang si Mayor Klarex Uy. 

Kahapon, August 23, ay sinaksihan natin ang groundbreaking ng itatayong footbridge sa National Highway ng Polomolok, South Cotabato na napondohan sa ating kapasidad bilang vice chairperson ng Finance Committee. Personal din nating pinangunahan ang pamamahagi ng tulong sa 1,000 mahihirap na residente ng Polomolok — na sa ating inisyatiba ay may natanggap ding tulong pinansyal mula sa gobyerno sa pakikipag-ugnayan natin kay Mayor Bernie Palencia. Sinuportahan natin ang 1,000 residenteng nawalan ng hanapbuhay na napagkalooban din ng pansamantalang trabaho. 

Nagkaloob tayo ng suporta sa 23 cooperatives sa Region 12 na nabigyan din ng tulong pinansyal mula sa Malasakit sa Kooperatiba na programa ng CDA na ating isinulong. Nakipag-ugnayan tayo sa araw na iyon sa OFW Global Movement for Empowerment (OFW GME), na ginanap naman sa Gen. Santos City. 

Samantala, sinimulan na ang pagtatayo ng Super Health Center sa Cuartero, Capiz na binisita ng aking Malasakit Team sa araw ding iyon. Tuluy-tuloy naman kami sa pag-agapay sa mga biktima ng sunog gaya ng walo sa Paranaque City; at 12 sa Malabon City. 

Namahagi rin tayo ng tulong sa 2,000 mahihirap na residente ng Digos City katuwang si Mayor Josef Cagas; at 2,500 sa General Santos City katuwang si Mayor Lorelie Pacquiao. Sa ating inisyatiba, nakatanggap din ang mga ito ng tulong pinansyal mula sa lokal na pamahalaan. 

Nag-abot din tayo ng tulong sa mga nawalan ng hanapbuhay bukod sa pansamantalang trabaho na naibigay ng gobyerno na ating isinulong para sa kanila. Kasama rito ang 53 sa Cuyapo, Nueva Ecija katuwang si VM Cinderella Ramos; 110 sa Lebak, Sultan Kudarat kaagapay si Mayor Frederick Celestial; 257 sa Kapangan, Benguet kasama si Mayor Manny Fermin; 69 sa Quezon City kaalalay si Coun. Candy Medina; 35 sa La Carlota City, Negros Occidental katuwang si VG Jeffrey Ferrer. Sa Ilocos Sur ay natulungan din ang 38 sa Santiago, katuwang si Coun. Bobby Gutierrez, at 98 sa Suyo kaagapay naman si Mayor Mario Subagan. Sa Pangasinan ay naalalayan din ang 39 sa Burgos kasama si BM Apple Bacay, at 108 pa sa Binmaley kasama sina Councilor Urbano Delos Angeles III at Councilor Amelito Sison. 

Sinaksihan din ng aking Malasakit Team ang groundbreaking ng Super Health Center sa Anda, Pangasinan. 

Ilapit natin ang serbisyo ng gobyerno sa mga tao. Tandaan natin na ang kalusugan ay katumbas ng buhay ng bawat Pilipino. Kaya sa abot ng aking makakaya ay patuloy akong magseserbisyo sa inyong lahat dahil bisyo ko ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Suporta at malasakit sa mga atletang Pilipino!

ni Bong Go @Bisyo Magserbisyo | August 21, 2024

Binigyang parangal at kinilala natin ang naging tagumpay ng ating mga atletang Pilipino na lumahok sa 2024 Olympics at nag-uwi ng karangalan para sa ating bansa. 

Bilang chairperson ng Senate Committee on Sports, noong August 19, kasama ang aking mga kapwa senador, pinagkalooban ang ating Olympians ng parangal, at ang mga medalist ay nabigyan din ng cash incentives at ng prestihiyosong Senate Medal of Excellence.

Nangunguna sa mga pinarangalan si Golden Boy Carlos Yulo para sa kanyang makasaysayang double-gold medal win sa gymnastics. Binigyang pugay rin ng Senado ang Filipino boxers na sina Nesthy Petecio at Aira Villegas na parehong nakapag-uwi ng bronze medals. Binati at pinapurihan din natin ang buong delegasyon ng Pilipinas, ang Philippine Olympic Committee, at ang Philippine Sports Commission sa kanilang pakikiisa upang makapag-uwi ng karangalan sa bansa.

Sa araw na iyon, nag-sponsor din tayo ng Senate Bill No. 2789 na naglalayon na amyendahan ang Republic Act No. 10699 upang madagdagan ang incentives ng ating para-athletes. Ang ating para-athletes ay parehas na nag-aalay din ng pagod at hirap para mabigyan ng dangal at honor ang bansa. Suportahan natin sila lalo na ang mga sasabak sa Paris Paralympics sa susunod na linggo.

Dapat lang na taasan ang suporta at incentives para sa para-athletes. Bigyan natin sila ng tamang pagpapahalaga na nararapat sa kanilang mga sakripisyo at tagumpay.

Samantala, binisita ako sa aking opisina ng ating Filipina golfer at Olympian na si Dottie Ardina upang makipagtulungan kung paano mas maisasaayos ang preparasyon at suporta para sa mga atletang sumasabak sa international competitions.

Kung matatandaan, ang ating golfers, sa kasamaang palad ay naglaro sa Paris Olympics ng walang nararapat na uniporme. Malaking bagay ang uniporme kasi nandoon ang bandila ng Pilipinas. Ito ang sumisimbolo sa bansa at sumasalamin sa sambayanang kanilang nirerepresenta.

Sabi ko sa kanya, bukas ang Senate Committee on Sports na ating pinamumunuan para sa hinaing ng ating mga atleta. Kung gusto nating maging sports powerhouse muli sa Asya ang Pilipinas, sagarin na natin ang ating suporta, hindi lang sa usapin ng pondo kundi sa lahat ng klaseng suporta na puwede nating ibigay.

Magpapatawag din tayo ng post evaluation hearing para malaman kung ano pa ang makakatulong sa ating mga atleta sa kanilang preparasyon hanggang performance, at kung paano rin makakatulong ang ibang sektor ng lipunan. 

Hindi natin nais magsisihan. Ang gusto lang natin ay maibigay ang sapat na suporta sa ating mga magigiting na atleta na bitbit ang dangal ng ating bansa. Once in a lifetime lang ang mga oportunidad na ito na makasali sa Olympics at iba pang international competitions. Ibigay na natin ang buong suporta na nararapat! Go, go, go for gold!

Samantala, tuluy-tuloy pa rin tayo sa paghahatid ng serbisyo at malasakit sa ating mga kababayan. Dumalo tayo sa ginanap na Liga ng mga Barangay National Congress Cluster 2 noong August 17 na idinaos sa Pasay City. Nakiisa tayo sa 40th Anniversary ng El Shaddai at sa pagdiriwang ng ika-85 kaarawan ni Brother Mike Velarde sa Quirino Grandstand sa Manila.

Nakiisa naman tayo noong August 18 sa mga kapwa natin Dabawenyo sa pagdiriwang ng 39th Kadayawan Festival sa Davao City kasama sina Mayor Sebastian “Baste” Duterte, Vice Mayor Jay Quitain at iba pang opisyal. Dinaluhan din natin ang 58th Founding Anniversary and 37th Biennial National Convention ng Gamma Phi Omicron Fraternity and Sorority sa Davao City.

Noong August 19, binisita natin ang mga kababayan sa Meycauayan City, Bulacan at personal na pinangunahan ang pamamahagi ng suporta para sa 1,936 residente na tinamaan ng Bagyong Carina katuwang si Mayor Henry Villarica. Sa ating inisyatiba ay nakatanggap din sila ng tulong pinansyal mula sa lokal na pamahalaan. May karagdagang 564 benepisyaryo rin ang natulungan sa sumunod na araw.

Sa araw ding iyon ay sinaksihan ng aking opisina ang groundbreaking ng Super Health Center sa Anda, Pangasinan.

Kahapon, pinangunahan natin ang pagdinig ng Senate Health Committee ukol sa estado ng serbisyong pangkalusugan sa ating bansa. Idiniin natin na ang pondo para sa kalusugan ay dapat gamitin para proteksyunan ang kalusugan at buhay ng bawat Pilipino, lalo na ang mga mahihirap.  

Hindi rin tumitigil ang aking Malasakit Team sa pag-alalay sa ating mga kababayang nangangailangan tulad ng 139 residente mula sa Cagayan de Oro City na naging biktima ng sunog na ating tinulungan.

Nagbigay tayo ng dagdag na suporta sa mga nawalan ng hanapbuhay bukod sa ating isinulong na pansamantalang trabaho mula gobyerno para sa 104 sa Marinduque katuwang si VG Lyn Angeles; 149 sa Borongan City, Eastern Samar kaagapay si VG Maricar Sison; 453 sa Talisay City, Negros Occidental kasama si Mayor Neil Lizares; 106 sa Dinalupihan, Bataan katuwang sina Councilor Gary David at ABC President Jose Salonga; 531 sa Cabanatuan City, Nueva Ecija katuwang si Mayor Myca Vergara; 134 sa Lumban, Laguna kaagapay sina Mayor Rolando Ubatay at VM Belen Raga; 107 sa Butuan City, Agusan del Norte kasama si Aries Myra; 1,000 sa General Santos City katuwang sina Mayor Lorelie Pacquiao; at 66 sa President Quirino, Sultan Kudarat kaagapay si VM Ian Aradanas.

Nag-abot din tayo ng tulong sa mga mahihirap na residente sa Samar, katuwang si Gov. Sharee Ann Tan tulad ng 517 sa Jiabong; 517 sa San Sebastian; 1,268 sa Villareal; at 1,089 sa Calbiga. Nabigyan din ang 500 na miyembro ng iba’t ibang sektor sa Catubig, Northern Samar katuwang si Cong. Harris Ongchuan; at 250 sa Valenzuela City kaagapay si Kagawad Michael Mayol.

Naalalayan din ang 260 kababaihan sa Banaybanay, Davao Oriental kaagapay si Cong. Nelson Dayanghirang, bukod pa ang tulong pangkabuhayan mula sa DTI na ating isinulong.

Minsan lang tayong dadaan sa mundong ito. Kaya anumang tulong ang puwede nating ibigay sa kapwa, o anumang karangalan ang puwede nating ialay sa bansa ay gawin na natin ngayon. Bilang inyong senador, patuloy akong magseserbisyo sa abot ng aking makakaya dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pangalagaan natin ang buhay, kalusugan at kapakanan ng bawat Pilipino

ni Bong Go @Bisyo Magserbisyo | August 17, 2024

Bilang chairperson ng Senate Committee on Health, ang paalala ko sa ating mga kababayan, makinig tayo sa ating mga health worker at sumunod sa mga health protocols. Sa gitna ng ating pagharap sa mga kalamidad tulad ng bagyo, mahalaga na tayo ay maging maingat sa mga banta sa ating kalusugan. ‘Ika nga nila, health is wealth. Tandaan na ang kalusugan ay katumbas ng buhay ng bawat Pilipino!

Matapos ang pananalasa ng Bagyong Carina, nakababahala ang biglang pagdami ng kaso ng leptospirosis. Kaya suportado natin ang panukala ng Department of Health na ipagbawal ang paglalangoy sa baha na nagiging sanhi nito at ng iba pang sakit. Batay din sa datos ng DOH, mahigit 60 percent ng mga kaso ng mga pasyenteng tinamaan ng leptospirosis sa San Lazaro Hospital sa Maynila ay moderate to severe.

Sa mga tinamaan ng sakit — lalo na ang mga mahihirap, paalala lang na nandiyan ang ating isinulong na mga Malasakit Centers na handang tumulong sa inyong pagpapagamot. Nasa iisang kuwarto na sa loob ng mga piling pampublikong ospital ang mga ahensya na may medical assistance programs para hindi na kayo mahirapang humingi ng tulong sa gobyerno. Sa totoo lang, pera iyan ng taumbayan na ibinabalik lang sa inyo sa pamamagitan ng mabilis at maaasahang tulong pampagamot.

Tayo ang principal author at sponsor ng Republic Act No. 11463, o ang Malasakit Centers Act of 2019, na nag-institutionalize sa Malasakit Centers program. Mayroon nang 166 Malasakit Centers sa buong bansa at batay sa datos ng DOH ay nasa humigit-kumulang 10 milyong Pilipino na ang nagbenepisyo rito.

Patuloy rin nating isinusulong ang pagkakaroon ng Super Health Centers sa mga komunidad upang ilapit sa tao ang serbisyo medikal tulad ng primary care, pagkonsulta, at early disease detection. Katuwang natin sa inisyatibang ito ang mga kapwa natin mambabatas, ang DOH at mga lokal na pamahalaan para mapondohan ang pagpapatayo ng mahigit 700 Super Health Centers sa buong bansa.

Tayo rin ang naging principal sponsor at isa sa mga may-akda ng Republic Act No. 11959, o ang Regional Specialty Centers Act. Ito ay isang malaking tagumpay sa ating adhikain na maihatid ang serbisyong medikal sa ating mga kababayan sa bawat rehiyon na nangangailangan ng specialized care tulad ng mga may sakit sa puso, baga, kidney, at iba pa.

At para mas mapalakas pa ang ating healthcare system, isinusulong din natin ang Senate Bill No. 195, na naglalayong maitatag ang Center for Disease Control (CDC). Isinumite rin natin ang SBN 196, na magtatatag sa Virology Science and Technology Institute kapag naisabatas. Ang mga ito ay para mas mapag-aralan, ma-detect at matugunan ang panganib na hatid ng mga nauuso at paulit-ulit na sumusulpot na mga sakit.

Samantala, tuluy-tuloy ang ating pagseserbisyo sa ating mga kababayan upang magbigay ng tulong sa abot ng ating makakaya, masuportahan ang mga programa at proyekto na makakapagpaunlad ng kanilang lugar, at makapag-iwan ng ngiti sa oras ng kanilang pagdadalamhati.

Naging guest of honor tayo noong August 14 sa ginanap na Vice Mayors League of the Philippines (VMLP) Summit sa Iloilo City sa paanyaya ni Iloilo City Vice Mayor Jeffrey Ganzon; VMLP National President at San Mariano, Isabela Vice Mayor Dean Domalanta; National Chairman at Malabon City Vice Mayor Bernard dela Cruz; National Vice Chairperson for Visayas at Lambunao, Iloilo Vice Mayor Arvin Losaria; at iba pang vice mayors ng bansa. Nagpapasalamat tayo sa resolusyong kanilang inihain na nagpapakita ng kanilang suporta sa ating mga adhikain.

Bumisita naman tayo sa Negros Occidental noong August 15 at personal na pinangunahan ang pagkakaloob ng tulong sa 507 residente ng San Enrique na natulungan na rin natin nang manalasa ang Bagyong Egay. Bukod sa dagdag-suporta na ating naipagkaloob, nabigyan din sila ng NHA ng emergency housing assistance na ating isinulong para may pambili sila ng materyales tulad ng pako at yero sa pagpapaayos ng kanilang mga tahanan.

Nagbalik tayo noong araw na iyon sa Iloilo para mag-inspeksyon sa itinayong Super Health Center sa Estancia at nagbigay ng tulong tulad ng food packs sa Barangay Health Workers. Tayo rin ay namahagi ng tulong para sa 1,000 mahihirap na residente sa lugar. Dagdag dito, may 1,500 pa galing sa iba’t ibang sektor na nakatanggap din ng tulong mula sa atin bukod sa tulong pinansyal na ating isinulong kasama si Mayor Chic Mosqueda kaagapay ang iba pang lokal na opisyal tulad ni VM Mark Cordero at mga konsehal.

Sa ating pagbisita ay nakasama natin si Cong. Boboy Tupas na nakipagtulungan sa atin sa pagpapatayo ng bagong seafood market sa Estancia. Hinatiran din natin ng tulong ang 500 displaced market vendors doon bukod sa pansamantalang trabaho mula sa gobyerno.

Naging panauhing tagapagsalita naman tayo kahapon, August 16, sa 54th Annual Convention ng Philippine Association of Schools of Medical Technology and Public Health na ginanap sa Valenzuela City sa paanyaya ng kanilang presidente na si Dr. Jose Jurel Nuevo. Ibinahagi natin ang ating pag-file ng Senate Bill No. (SBN) 2503, o ang magiging “Philippine Medical Technology Act of 2023” kung maisabatas. Layunin nito na mas makasabay ang ating medical technologists sa global standards ng kanilang larangan, maisulong ang kanilang kapakanan, at ma-update ang mga kasalukuyang umiiral na batas na ilang dekada nang nandiyan na gumagabay sa sistema ng medical technology sa ating bansa.

Hindi naman tumitigil ang aking Malasakit Team sa pag-alalay sa mga kababayan nating nahaharap sa iba’t ibang krisis tulad ng walong naging biktima ng insidente ng sunog sa Rizal, Laguna kung saan nakatanggap din sila ng tulong mula sa Department of Human Settlements and Urban Development. Namahagi rin tayo ng food packs para sa 500 residente na apektado ng oil spill sa Limay, Bataan katuwang si VM Richie David. Naabutan din natin ng tulong ang tatlong pamilya na biktima ng sunog sa Cateel, Davao Oriental.

Tuluy-tuloy din tayo sa pagtulong sa mga nawalan ng hanapbuhay. Sa Romblon, naayudahan ang 51 sa San Agustin katuwang si VG Armando Gutierrez; 73 sa Ferrol kaagapay si Mayor Christian Gervacio; 44 sa Odiongan katuwang sina Board Member Venizar Maravilla at ABC President Milo Maulion. Sa Muntinlupa City ay 41 ang natulungan kaagapay si Christian Gravador; 33 sa Dasmariñas City, Cavite kasama si BM Nikol Austria; at 111 sa Bongabong, Oriental Mindoro katuwang si BM Lito Camo.

Pangalagaan natin ang buhay, kalusugan at kapakanan ng bawat Pilipino. Bilang inyong Mr. Malasakit, patuloy akong magseserbisyo sa abot ng aking makakaya dahil bisyo ko na ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.