Ipadama ang tunay na serbisyong may malasakit sa mga Pilipino

ni Bong Go @Bisyo Magserbisyo | Oct. 16, 2024

Mula nang pumasok sa serbisyo-publiko ang inyong Senator Kuya Bong Go, may isang panuntunan ako na nagsisilbing gabay sa lahat ng mga desisyon ko sa buhay — palaging unahin ang kapakanan ng kapwa Pilipino. Payo ito sa akin ni dating Pangulong Rodrigo Duterte, na kapag inuna mo ang interes ng bayan at ng ating mga kababayan lalo na ng mga mahihirap, hinding-hindi tayo magkakamali sa paninilbihan sa mga Pilipino.

Sa ginanap na deliberasyon noong October 14 para sa panukalang budget ng Department of Social Welfare and Development, nanawagan tayo sa mga pinuno ng departamento na siguruhing ang pondo na pantulong sa mga mahihirap, nangangailangan, at nahaharap sa krisis ay agarang makarating sa kanila.

Uulitin ko, pera iyan ng taumbayan na dapat ibigay sa mga Pilipino sa oras ng kanilang pangangailangan. Kaya nga nandiyan ang mga programa tulad ng Assistance to Individuals in Crisis Situation o AICS. Ibig sabihin, para sa mga naghihirap ito. Hindi naman pipila ‘yan ng napakahaba, hindi magpapainit at magpapaulan ‘yan kung hindi naman nila kailangan ‘yung tulong.

Humingi tayo ng paliwanag sa DSWD kung bakit may mga ayudang inaabot ng isang taon bago ma-validate ang listahan ng mga benepisyaryo habang sa ibang lugar naman ay agad-agad at malaking halaga ang ipinamamahagi gayung wala namang kalamidad doon. Nilinaw rin natin ang nangyari sa mga lugar tulad ng Zamboanga City kung saan ang mga opisyal at benepisyaryo mismo ay nagmakaawa pa para lang i-release ang tulong na dapat nilang makuha.

Dahil dito, iminungkahi natin sa komite na huwag munang aprubahan ang panukalang budget ng DSWD hangga’t hindi nila magagarantiyahan ang patas at makataong sistema ng pamimigay ng ayuda.

Huwag dapat pagsamantalahan ang kahinaan ng mga Pilipinong may pinagdaraanang krisis. Naghihirap na nga, pahirapan pa ang pagkuha ng ayuda. Huwag na dapat pahirapan ang mahihirap, ibigay agad ang ayuda nang walang pili, walang delay, at walang halong pulitika!

Kaya rin walang tigil ang ating pagseserbisyong may tapang at malasakit. Sa ating munting paraan bilang inyong Mr. Malasakit na ang tanging bisyo ay magserbisyo, sinisikap nating ilapit ang serbisyo ng gobyerno sa mga nangangailangan nito.

Bumisita tayo sa Davao Oriental noong October 12 at nakipagpulong sa mga lider ng San Isidro. Sinaksihan natin ang turnover ng mga ambulansya para sa Banaybanay at Governor Generoso na ating isinulong. Namahagi rin tayo ng tulong para sa 1,000 residenteng kapos ang kinikita katuwang si Mayor Angel Go.

Patuloy din ang ating pakikipagkapit-bisig sa mga lider ng iba’t ibang komunidad kaya dumalo tayo kahapon, October 15, bilang guest speaker sa ginanap na Gender and Development Seminar ng mga barangay official ng San Carlos City, Pangasinan sa imbitasyon ni Mayor Ayoy Resuello, na ginanap sa Quezon City. Matapos ito ay dumiretso tayo sa Tagaytay City para dumalo sa ginanap na PCL Northern Samar Seminar sa paanyaya ni PCL Provincial President BM Gina Silvano.

Ang aking Malasakit Team naman ay patuloy ang pag-iikot sa iba’t ibang komunidad para maghatid ng tulong. Sinaksihan namin ang inagurasyon ng itinayong Super Health Center sa Tagudin, Ilocos Sur, upang ilapit ang pangunahing serbisyong medikal sa komunidad.

Binalikan natin at muling sinuportahan ang mga nawalan ng tirahan sanhi ng iba’t ibang kalamidad sa Agusan del Norte kabilang ang 13 sa Buenavista, 13 sa Bunawan, at 31 sa Prosperidad. Tumulong tayo sa pagbangon ng dalawang pamilya sa Cagwait, Surigao del Sur at pito sa Socorro, Surigao del Norte. Nabigyan din sila ng ayuda mula sa NHA na ating isinulong para may pambili ng materyales tulad ng pako at yero na pampaayos ng kanilang tahanan.

Tuluy-tuloy din ang ating pagtulong sa mga nawalan ng hanapbuhay na sa ating pakikipagtulungan sa DOLE ay nabigyan din ng pansamantalang trabaho. Kabilang sa kanila ang 98 sa Currimao, Ilocos Norte kaagapay si Mayor Edward Quilala. Sa Sultan Kudarat, naging benepisyaryo ang 110 sa President Quirino katuwang si Mayor Maria Sandigan, at 110 din sa Esperanza kaagapay naman si Mayor Charles Ploteña.

Nahatidan din ng tulong ang 740 mahihirap sa San Vicente, Camarines Norte katuwang si Mayor Jhoana Ong, at 100 sa Padada, Davao del Sur kaagapay si Brgy. Kap. Stephanie Lanticse.

Naalalayan ang mga maliliit na negosyante sa Davao de Oro gaya ng 70 sa New Bataan, at 50 sa Nabunturan. Bukod sa ating tulong ay nakabenepisyo rin sila sa programang pangkabuhayan na ating isinulong kasama ang DTI.

Sinuportahan ko naman ang pagdaraos ng sports festival sa Bongabong, Oriental Mindoro kasama si BM Lito Camo at pati na rin sa Northwestern Mindanao State College sa Tangub City, Misamis Occidental kamakailan. Gayundin, ang Fatima Basketball League Finals sa Davao City. Bahagi ito ng ating inisyatiba bilang chairperson ng Senate Committee on Sports, at Committee on Youth na engganyuhin ang kabataan to get into sports, stay away from drugs to keep us healthy and fit!

Sa rami ng pagsubok na ating hinaharap, palagi nating isaisip at isapuso ang tunay na diwa ng pagmamalasakit at pagseserbisyo sa kapwa. Unahin natin ang kapakanan at interes ng mga mahihirap at pinakanangangailangan, at tandaan natin na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Mga opisyal, tuparin ang mga pangako para sa kalusugan ng bawat Pilipino

ni Bong Go @Bisyo Magserbisyo | Oct. 12, 2024

Bilang mga lingkod-bayan, may pananagutan tayo sa taumbayan. Ang bawat aksyon at kawalan ng aksyon natin ay sumasalamin sa ating mandato na magserbisyo sa kapwa.

Ang bawat opisyal ay dapat na may isang salita dahil tiwala ng taumbayan sa gobyerno ang nakasalalay rito. Kaya naman sa nakaraang public hearing para sa panukalang budget ng Department of Health, mariin ang paalala natin sa DOH at mga attached agencies nito, gaya ng PhilHealth, na ang hinihingi ng taumbayan ay isang salita at palabra de honor. 

Iba’t ibang commitments ang inilatag ng PhilHealth kasunod ng paulit-ulit na panawagan ng inyong Senator Kuya Bong Go na mas pagandahin nito ang serbisyo at mga benepisyo. Trabaho natin na bantayan at hindi tigilan ang PhilHealth hanggang matupad ang mga pangakong nito. 

Para patunayan ang kanilang sinseridad at bago aprubahan ang budget sa kalusugan, humihingi tayo ng signed commitment letter mula sa PhilHealth na tutuparin nila ang lahat ng kanilang mga ibinahaging pangako sa mga nakaraang pagdinig ng Senate Committee on Health na tayo ang chairman. 

Kabilang sa mga repormang ito ang pagtataas sa case rates o halagang sasagutin ng PhilHealth; dagdagan pa ang mga sakit na puwedeng i-cover; ibaba ang contribution o kaltas sa sahod ng mga regular member; palawakin ang benefit packages katulad ng para sa dental, visual at mental health; magbigay ng mga assistive devices, tulad ng wheelchairs at salamin, ayon sa rekomendasyon ng mga doktor; magpamahagi ng libreng gamot; at rebisahin ang mga outdated na polisiya tulad ng 24-hour confinement rule kung saan kailangan pang ma-confine sa ospital ang maysakit para lang ma-cover ng PhilHealth, at ang hindi pagsama sa emergency care sa mga benepisyong covered ng PhilHealth. 

Bagama’t nasimulan na ang reporma sa pamamagitan ng pagtanggal sa hindi makataong single period of confinement policy kung saan maaari lang i-cover ng PhilHealth ang sakit isang beses sa loob ng 90 araw, simula pa lamang ito sa mga ipinaglalaban nating reporma upang maproteksyunan ang buhay at kalusugan ng bawat Pilipino. 

Sa parte ng DOH, hinihingi naman natin sa kanila na ipakita ang kanilang dedikasyon at sinseridad na titiyakin nila na ang tulong pampagamot ay magiging accessible sa sinuman ayon sa Universal Health Care Law at Malasakit Centers Program Law na ating isinulong bilang principal sponsor at author ng naturang batas. Importanteng masiguro ang uninterrupted at unhampered operations ng Malasakit Centers dahil ito ang nilalapitan ng mga mamamayan upang makahingi ng tulong pampagamot mula sa gobyerno. 

Sa datos ng DOH ay umaabot na sa mahigit 15 milyong Pilipino ang natulungan ng Malasakit Centers. Batas na ito at malaki ang pakinabang lalo na ng mahihirap na pasyente. Huwag nating ipagkait sa mga Pilipino ang serbisyo at malasakit na ang pondo ay galing din naman sa kaban ng bayan o sarili nilang bulsa.

Paalala ko sa mga kapwa ko public servants, hindi pribilehiyo kundi karapatan ng taumbayan na sila ay mapagserbisyuhan. Ilapit natin ang serbisyo sa tao at huwag pahirapan ang mga naghihirap na.

Samantala, naging panauhing tagapagsalita tayo noong October 9 sa ginanap na 3rd National Convention ng Philippine Alliance of Retired Educators na idinaos sa Pasay City. Nagbigay tayo ng suporta sa mga dumalo at pinahalagahan ang papel ng mga guro sa paghubog ng mga kabataan na itinuturing na pag-asa at future leaders ng bayan. 

Binisita rin natin ang mga kababayan natin sa Bulacan at personal na namahagi ng tulong para sa 1,500 mahihirap sa Hagonoy. Katuwang si Mayor Baby Manlapaz, isinulong natin na mabigyan ang mga benepisyaryo ng tulong pinansyal ng lokal na pamahalaan. 

Nasa Tarlac City naman ang aking Malasakit Team kahapon, October 11, at nag-inspeksyon sa itinayong Super Health Center sa lugar. Nakapagpaabot din tayo ng tulong katuwang si Mayor Cristy Angeles para sa 2,000 mahihirap na residente, na napagkalooban din ng tulong pinansyal ng lokal na pamahalaan. Ginanap ang pamamahagi ng tulong sa Gymnatorium na ating sinuportahang maipatayo. 

Sinaksihan din ng aking opisina ang groundbreaking ng itatayong Super Health Center sa Buenavista, Quezon noong araw na iyon. 

Nagtungo naman ang ating Malasakit Team sa iba’t ibang komunidad para maghatid ng tulong sa ating mga kababayan. Tinulungan natin ang 34 biktima ng sunog sa Brgy. Lapasan, Cagayan de Oro City at ang 42 na binaha at biktima ng landslide sa Jose Abad Santos, Davao Occidental. 

Binalikan natin at muling binigyan ng tulong ang mga nawalan ng tirahan sa Lanao del Sur kabilang ang 308 sa bayan ng Picong at 197 sa Malabang. Nakatanggap din sila ng tulong pinansyal mula sa NHA na ating isinulong para may pambili sila ng materyales tulad ng mga pako at yero na pampaayos ng tahanan. 

Naayudahan din ang mga mahihirap nating kababayan gaya ng 740 sa San Vicente, Camarines Norte katuwang si Mayor Jhoana Ong; at 750 sa iba’t ibang bayan sa Southern Leyte kaagapay sina Gov. Damian Mercado at BM Ina Marie Loy.

Patuloy ang ating suporta sa mga nawalan ng hanapbuhay, na sa ating pakikipagkapit-bisig sa DOLE ay nabigyan din ng pansamantalang trabaho. Naging benepisyaryo ang 469 sa Villanueva, Misamis Oriental katuwang sina Mayor Jennie Uy-Mendes at VM Jeric Emano; 130 sa Solano, Nueva Vizcaya kaagapay si VG Eufemia Dacayo; 77 sa Lingig, Surigao del Sur kasama si Mayor Elmer Evangelio; 145 sa Mabini, Davao de Oro katuwang si VG Tyron Uy; at 42 sa Ormoc City, Leyte kaagapay si Mayor Lucy Torres Gomez.

Natulungan din natin ang mga mahihirap na manggagawa sa Guimaras kabilang ang 36 sa Nueva Valencia katuwang si Kap. Veronica Ortiz; 90 sa Jordan kaagapay si Kap. Marcelo Malones Jr.; 36 sa San Lorenzo kasama si Kap. Evelina Salcedo; at 36 pa sa Buenavista. Sa Iloilo, natulungan din ang 30 sa Tigbauan at 30 sa Tubungan katuwang si VG Tingting Garin.

Tulong pangkabuhayan naman ang ating isinulong bukod sa suporta mula sa aking tanggapan na ating ipinamahagi para sa mga maliliit na negosyante sa Davao de Oro kabilang ang 50 sa Mawab, 70 sa Maco, 50 sa Montevista at 80 sa Compostela katuwang din ang kanilang mga LGU. 

Nagkaloob din ang aking tanggapan ng karagdagang tulong para sa 333 estudyante sa General Trias City, Cavite katuwang si BM Morit Sison. Sinuportahan naman natin ang 79 scholars mula sa iba’t ibang unibersidad sa Pangasinan.

Ilapit natin ang serbisyo sa mga taong nangangailangan. Patuloy akong magseserbisyo sa mga kapwa Pilipino sa abot ng aking makakaya. Bisyo ko ang magserbisyo, at naniniwala akong ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Suportahan ang mga atleta at hikayatin ang kabataan na sumabak sa sports

ni Bong Go @Bisyo Magserbisyo | Oct. 9, 2024

Napatunayan natin sa 2024 Paris Olympics na kaya nating ibalik ang pagiging sports powerhouse ng Pilipinas sa Asya. Ang paghakot ng ating mga atleta ng medalya sa Olympics ay patunay rin na kapag buo at sanib-puwersa ang suporta ng gobyerno at ng private sector, malayo ang mararating ng ating mga manlalaro.

Kaya naman sa ginanap na pagdinig sa Senado na ating pinamunuan para sa panukalang 2025 budget ng Philippine Sports Commission at ng Games and Amusements Board, muli nating isinulong na madagdagan ang pondo ng pambansang sports sector. 

Taun-taon na lamang, mas maliit pa sa isang porsyento ng National Expenditure Program o proposed budget ang inilalaan sa sektor ng palakasan. Bilang chairperson ng Senate Sports Committee at vice chair ng Senate Finance Committee na nag-i-sponsor ng taunang budget ng PSC at GAB, palagi nating ipinaglalaban na taasan ito. 

Sa ating mga magigiting na pambato ng bansa sa larangan ng sports, umasa kayo na sa abot ng aking makakaya ay ipaglalaban ng inyong Senator Kuya Bong Go ang sapat na suportang nararapat para sa inyo.

Naniniwala ako na ang suporta sa ating mga atleta ay magsusulong din ng interes ng mga kabataan natin para maghangad ng malusog at magandang pangangatawan. Bilang chairperson din ng Senate Committee on Youth, sports ang ginagamit nating sandata para ilayo ang ating mga kabataan sa ilegal na droga. Lagi ko ngang sinasabi, “Get into sports, stay away from illegal drugs to keep us healthy and fit!” 

Kaugnay nito, matagumpay nating naisulong ang pagkakatatag ng National Academy of Sports na sa kasalukuyan ay may mga scholars na sa ating state-of-the-art facilities sa New Clark City, Capas, Tarlac. Bukod dito, umaasa tayong tuluyan nang maisasabatas ang Philippine National Games program na ating iniakda at pangunahing inisponsor. Magtulungan tayo na iangat ang antas ng ating sports programs maging sa grassroots-level kung saan maaaring madiskubre ang ating mga susunod na bagong bayani sa larangan ng palakasan. 

Sa simula ng linggong ito, personal kong dinaluhan ang Senate Flag Raising Ceremony kasama ang mga Senate officials at employees. Binati ko rin ang aking mga kasamahan sa Senate Sentinels basketball team na naging kampeon sa UNTV Executive Face Off 2024. 

Matapos ito ay naging guest of honor and speaker tayo sa ginanap na Newborn Screening (NBS) 22nd National Convention noong October 7 na idinaos sa Manila Hotel sa imbitasyon ni convention chair Dr. Ebner Maceda. Nagbigay tayo ng suporta at tokens sa mga opisyal, medical frontliners, midwives at iba pang nandoon. Bilang chairperson ng Senate Health Committee, isinulong din natin na palawakin ang coverage ng PhilHealth pagdating sa mga madidiskubreng sakit ng mga bagong

panganak. 

Pinangunahan din ng aking tanggapan ang pamamahagi ng tulong para sa 127 residente ng Santa Rosa, Laguna na nawalan ng tahanan bukod pa sa tulong pinansyal na kanilang natanggap mula sa NHA sa ilalim ng programang ating isinulong para may pambili sila ng materyales sa pagpapaayos ng kanilang tirahan. 

Masaya ko namang ibinabalita na kahapon, October 8, ay nagkaroon na ng ceremonial signing ang Self-Reliant Defense Posture Revitalization Act sa Malakanyang. Isa tayo sa co-author nito. 

Kahapon din ay dumalo tayo sa pagdinig ng Senado sa panukalang budget ng Department of Health at PhilHealth. Dito natin idiniin sa mga opisyal ang importansya ng isang salita kung saan ang mga ipinangako nila sa taumbayan na palawakin ang serbisyong medikal lalo na sa mga mahihirap ay dapat maisakatuparan. Magmalasakit dapat ang gobyerno sa maysakit at gamitin ang pondo nang tama para maproteksyunan ang kalusugan at buhay ng bawat Pilipino. 

Tuluy-tuloy din ang aking Malasakit Team sa paghahatid ng tulong sa mga kababayan nating nangangailangan. Natulungan natin ang 27 residente ng Calamba City, Laguna na nawalan ng tirahan, na nakatanggap din ng tulong pinansyal mula sa NHA. 

Nabigyan natin ng tulong, bukod sa pansamantalang trabaho na ating isinulong, ang mga nawalan ng hanapbuhay kabilang ang 111 sa Madrid, Surigao del Sur katuwang si Mayor Paolo Lopez; at 64 sa Calbayog City, Samar kaagapay si BM Ancecio Guades. 

Napagkalooban din ng tulong ang 43 maliliit na negosyante ng Maynila kasama si VM Yul Servo, na sa ating inisyatiba ay nabbigyan din ng tulong pangkabuhayan ng gobyerno. 

Sinuportahan natin ang pagdaraos ng sportsfest sa Sulu State College at maging sa Cavite State University. 

Nagbigay din tayo ng dagdag na tulong para sa 450 benepisyaryo sa isinagawang Cebu Doctors University Alumni Association Medical Health Mission sa Mandaue City, Cebu. 

Dinaluhan naman ng aking opisina ang inagurasyon ng Advanced Comprehensive Cancer Care Center sa East Avenue Medical Center sa Quezon City.

Minsan lang tayong dadaan sa mundong ito. Kaya anumang tulong ang puwede nating ibigay sa kapwa, o anumang karangalan ang maaari nating ialay sa bansa ay gawin na natin ngayon. Bilang inyong Senator Kuya Bong Go, patuloy akong magseserbisyo sa abot ng aking makakaya dahil bisyo ko ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.