Serbisyo at tulong, hindi dapat maantala, magmalasakit sa may sakit!

ni Bong Go @Bisyo Magserbisyo | Nov. 27, 2024

Naniniwala ang inyong Senator Kuya Bong Go na dahil maraming Piilipino ang patuloy na nangangailangan ng tulong, walang pinipiling oras at araw dapat ang serbisyo natin. At dahil wala ring pinipiling panahon ang pagkakasakit, dapat ay laging nakahanda ang serbisyo at tulong medikal para sa ating mga kababayan.

Ito ang lagi nating isinasaisip sa ating patuloy na pagsusulong sa mga programa para mapalakas ang ating healthcare system at mailapit ang medical services lalo na sa mahihirap.

Kaya naman sa ginanap na public hearing ng ating Senate Committee on Health noong November 25, inihayag natin ang pagtutol sa taun-taong “cut-off” ng Department of Social Welfare and Development (DSWD) sa paglalabas nito ng medical assistance sa pamamagitan ng guarantee letters dahil patapos na raw ang taon.

Paliwanag ng DSWD, tulad ng ibang sangay ng gobyerno ay bahagi ito ng accounting ng ahensya sa pagtatapos ng taon — magsasara ng libro — sa madaling salita. Pero ang tanong natin sa DSWD, paano naman ang mga magkakasakit? Ang sakit ay walang “deadline”. Wala ring extension ang buhay ng isang taong may sakit kung wala siyang matatakbuhan lalo pa ngayong paparating na ang Kapaskuhan.

Naniniwala ako na may paraan at sistema na puwedeng gawin ang gobyerno para matiyak na walang patid ang tulong sa mga nangangailangan. Isa sa mga iminungkahi nating solusyon ay ang paglalaan ng pondo para sa huling buwan o huling quarter ng taon. Ang mahalaga ay mahanapan ito agad ng solusyon alang-alang sa mga mahihirap, helpless, hopeless at walang ibang matatakbuhan maliban sa pamahalaan.

Tandaan natin na ang maayos na kalusugan ang pinakamagandang regalo natin sa ating sarili at pamilya!

Samantala, muli tayong nanawagan sa PhilHealth na tuparin ang mga pangako nito kabilang na ang malawakang information drive. Mahalagang malaman ng bawat Pilipino na miyembro na ng PhilHealth na maaari nilang mapakinabangan ang mga benepisyo alinsunod sa Universal Health Care Law.

Napakaraming pangako ng PhilHealth na pagpapaganda sa mga benepisyo. Nakuha natin ang mga commitment na ito dahil sa walang humpay na pangungulit at pagdiin natin tuwing may pagdinig ang ating komite. Umaasa kayo na ang kanilang mga pangako ay hindi mapapako at matutupad din alang-alang sa mga kababayan nating may sakit.

Babantayan natin ang pangakong pagtataas ng case rates; dagdag na benefit packages, lalo na sa 10 pinakamapanganib na sakit; pagkakaloob ng libreng gamot at assistive devices, gaya ng salamin sa mata at wheelchairs; pagsasama sa dental, visual, emergency at preventive care; at pag-a-update ng kanilang mga polisiya para matugunan ang pangangailangan ng mga Pilipino.

At dahil hindi tayo humihinto sa pagseserbisyo, dumalo tayo noong November 23 sa National Master Plumbers Association of the Philippines, Inc. (NAMPAP, INC.) National Convention sa Davao City. Sinaksihan din natin ang Precious International School of Davao (PISD) Installation of Officers Ceremony.

Kasama si Mayor Catalina Cabrera, sinaksihan ng aking opisina noong November 25 ang groundbreaking ng Super Health Center sa Sasmuan, Pampanga.

Kahapon, November 26, dumalo tayo sa National Movement of Young Legislators (NMYL) 4th Quarter National Council Assembly na ginanap sa Pasay City sa imbitasyon ni NMYL President, Councilor Marlon Alejandrino.

Sinaksihan ng aking opisina ang sportsfest sa Kalinga State University na nasuportahan sa ating kapasidad bilang chairperson ng Senate on Sports kasama ang Philippine Sports Commission, gayundin ang turnover ceremony ng Super Health Center sa Cateel, Davao Oriental.

Ipinadala ko ang aking Malasakit Team para maghatid ng tulong sa iba’t ibang komunidad, tulad ng 700 naging biktima ng pagbaha sa Dipolog City, Zamboanga del Norte katuwang si Mayor Darel Uy.

Nakatanggap din ng tulong ang 977 mahirap na residente sa Mauban, Quezon katuwang si Mayor Ninong Pastrana; 1,013 sa Sarangani, Davao Occidental kaagapay si Mayor Adelan de Arce; 500 sa Kapalong, Davao del Norte kasama natin si Mayor Tess Timbol; at 1,000 sa Passi City, Iloilo katuwang si Mayor Stephen Palmares.

Sa Masbate City, nakatanggap ng tulong ang 650 mahihirap katuwang si BM Alan Cos; at 996 sa Dimasalang kaagapay si Mayor Mac Du Naga. Sa Bulakan, Bulacan, nasuportahan natin ang 263 indibidwal kasama si VM Aika Sanchez, Coun. Benjo Cruz, Coun. Marbin Garcia at SK Fed Miguel Leonardo. Nabigyan din ng tulong ang 250 kapos ang kita sa Naujan, Oriental Mindoro katuwang si BM RJ Recto.

Sinuportahan natin ang mga nawalan ng hanapbuhay na sa ating pakikipagkapit-bisig sa DOLE ay nabigyan din ng pansamantalang trabaho bukod sa ating naitulong — kabilang ang 585 sa Cateel, Davao Oriental katuwang si Mayor Emilou Nuñez; at 138 sa Lala, Lanao del Norte kaagapay si VG Allan Lim.

Binalikan natin at muling tinulungan ang anim na residenteng nawalan ng tahanan sa Sto. Niño, Surallah, at Koronadal City sa South Cotabato na nakatanggap din ng emergency housing assistance mula sa NHA na ating isinulong para may pambili sila ng materyales sa pagpapaayos ng kanilang nasirang bahay.

Nagbigay din tayo ng suporta sa 325 TESDA scholars sa Danao City, Cebu.

Sa mga kapwa ko lingkod-bayan, tandaan nating minsan lang tayong dadaan sa mundong ito. Kung anong tulong ang puwede nating ibigay sa ating kapwa, gawin na natin ngayon dahil hindi na tayo babalik sa panahong ito. Magtulungan tayo at magmalasakit sa kapwa upang mas maging maayos at mabilis ang serbisyo sa mga nangangailangan.

Patuloy akong magtatrabaho para sa bawat Pilipino at tutulong sa abot ng aking makakaya. Bisyo ko ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Ilapit ang serbisyong medikal sa mga Pilipino

ni Bong Go @Bisyo Magserbisyo | Nov. 23, 2024

Isa sa pinakainiiwasan nating lahat ang magkasakit. Mula nang lumaganap ang pandemya, marami ang natuto na gawing prayoridad ang kanilang kalusugan dahil sa realisasyong katumbas nito ay buhay. Napakahirap magkasakit lalo na kung mahirap at walang mapagkukunan ng pampagamot.

Sa panahon naman ng mga sakuna at kalamidad, tumataas ang insidente ng pagkakasakit lalo na sa mga lugar na binabaha. Naririyan ang panganib na hatid ng dengue, leptospirosis at iba pa. Kaya naman prayoridad ko bilang chairperson ng Senate Committee on Health na mapangalagaan ang kalusugan ng mga Pilipino sa pamamagitan ng mas malakas na healthcare system at serbisyong medikal na malapit sa bawat Pilipino.

Masaya kong ibinabahagi sa inyo na may apat na bagong batas na nalikha para mapaganda ang healthcare facilities at serbisyong medikal sa ilang lalawigan sa buong bansa. Tayo ang principal sponsor ng mga bagong batas na ito kabilang ang Republic Act No. 12068, na nag-upgrade sa Bataan General Hospital and Medical Center sa Balanga City, Bataan para maging multi-specialty hospital. Tinaasan ang bed capacity nito na mula 500 ay naging 1,000.

Sa pamamagitan naman ng RA 12069 ay nai-convert ang Dr. Catalino Gallego Nava Provincial Hospital sa Jordan, Guimaras para maging Level II hospital. Binago ang pangalan nito at tatawaging Dr. Catalino Gallego Nava Medical Center.

Naitatag sa ilalim ng RA 12070 ang isang ospital sa Negros Occidental, ang Victorias City General Hospital.

Isang Level III general hospital naman sa Bay, Laguna na magiging Laguna Regional Hospital ang naitatag sa bisa ng RA 12071.

Inaasahan natin na sa pamamagitan ng mga bagong batas na ito ay mapupunan ang mga kakulangan sa ating healthcare services dahil mas dumami na ang hospital beds, mayroon nang specialized treatments, at nailapit na ang mga pasilidad sa mga kanayunan at maging sa mga lugar na malaki ang populasyon.  

Hindi dapat maging hadlang ang kahirapan para makakuha ng maayos na serbisyong pangkalusugan. Sa mga bagong batas na ito, titiyakin nating mas maraming Pilipino ang maaasahan ang tulong ng gobyerno sa oras ng kanilang pangangailangan. Layunin nating mas mapaabot ang serbisyong medikal sa bawat sulok ng bansa. Lagi ngang sinasabi ng inyong Senator Kuya Bong Go na huwag na nating pahirapan pa ang mga kapwa natin Pilipino na naghihirap na.

Sa kasalukuyan ay naging instrumento na tayo sa pagpasa ng 78 batas na ang layunin ay mapaayos pa ang mga ospital sa buong Pilipinas. Patuloy nating palalakasin ang ating healthcare system para walang Pilipinong maiiwan.

Kaugnay pa rin ng ating adhikain na mapangalagaan ang kalusugan ng ating mga kababayan, noong Huwebes, November 21 ay personal nating sinaksihan ang inagurasyon ng itinayong Super Health Center sa Malvar, Batangas kasama ang mga kapwa ko Batangueño at lingkod-bayan na sina Vice Governor Mark Leviste, Dennis Collantes na kumatawan kay Rep. Maitet Collantes, Mayor Tita Reyes, Vice Mayor Alberto Lat at mga konsehal. Pinangunahan din natin ang pagtu-turnover ng mga bagong ambulansya para sa mga bayan ng Malvar at para na rin sa bayan ng Sta. Teresita na ating isinulong. Matapos ito ay dumiretso tayo sa Batangas City at nagbigay ng tulong sa 2,500 barangay volunteers sa pakikipagtuwang kay Governor Dodo Mandanas.

Tuluy-tuloy din ang ating paglalapit ng serbisyo sa ating mga kababayan. Ipinaabot natin ang ating mensahe ng pakikiisa sa Philippine Councilors League Region 7 4th Quarter Regional Assembly and Seminar na ginanap sa Mandaue City, Cebu noong November 20.

Personal din nating pinangunahan noong November 21 ang pamamahagi ng tulong para sa 1,000 PWDs sa Parañaque City na kapos ang kita. Sa ating inisyatiba kasama sina Cong. Edwin Olivarez, Mayor Eric Olivarez, at Vice Mayor Joan Villafuerte ay nabigyan din sila ng financial support ng gobyerno.  

Nasa Davao City tayo kahapon, November 22, at dumalo sa ginanap na Philippine Institute of Certified Public Accountants (PICPA) 79th Annual Convention sa paanyaya ni Convention Chair Napoleon Rocero.  

Sinaksihan naman ng aking opisina ang groundbreaking ng itatayong Super Health Center sa Malitbog, Southern Leyte.

Nagtungo sa iba’t ibang komunidad ang aking Malasakit Team para maalalayan ang iba pa nating mga kababayang nangangailangan tulad ng mga biktima ng sunog kabilang ang 25 sa Surigao City; at 34 sa Banaybanay, Davao Oriental.

Natulungan din ang mahihirap na residente gaya ng 175 sa Calumpit, Bulacan katuwang si Coun. Maureen Torres; 1,000 sa Anilao, Iloilo kaagapay si Mayor Lee Ann Debuque, at 350 pa sa Banate, Iloilo kasama ang mga konsehal ng bayan.

Pinagaan natin ang pasanin ng mga nawalan ng hanapbuhay dahil nabigyan sila ng DOLE ng pansamantalang trabaho tulad ng 310 sa Kalawit, Zamboanga del Norte katuwang si Mayor Salvador Antojado, Jr.; 179 sa Datu Odin Sinsuat, Maguindanao del Norte kaagapay si Mayor Lester Sinsuat; at 582 sa Medina, Misamis Oriental katuwang si Vice Mayor Paolo Magallanes, mga konsehal, at mga barangay captain.

Bukod sa kanilang scholarship grant na ating isinulong, nagkaloob tayo ng dagdag na tulong para sa 37 scholars ng San Fernando City, La Union; 225 sa Pangasinan; at 387 Laoag City.

Natulungan natin ang 60 maliliit na negosyante sa Palanan, Isabela na nakatanggap pa ng tulong pangkabuhayan mula sa DTI.

Sa Tarlac City ay naalalayan natin ang 68 na naging biktima ng kalamidad, na sa ating inisyatiba ay nabigyan ng DHSUD ng tulong pampaayos ng kanilang bahay.

Naabutan din natin ng tulong ang 135 mahihirap sa Tuguegarao City katuwang si Mayor Maila Ting.

Ilapit natin ang serbisyo ng gobyerno, lalo na pagdating sa kalusugan, sa mga nangangailangan nito. Bilang inyong Mr. Malasakit, gagawin ko ang aking makakaya para makatulong dahil bisyo ko ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Kabataan, suportahan at ihanda sa magiging papel sa lipunan

ni Bong Go @Bisyo Magserbisyo | Nov. 20, 2024

Ang ating pambansang bayani at isa sa aking mga idolo na si Dr. Jose P. Rizal ang nagsabing “Ang kabataan ang pag-asa ng bayan.” 

Kaya bilang chairman ng Senate Committee on Youth, prayoridad ko ang edukasyon ng ating mga kabataan na pundasyon ng kanilang mga pangarap. Ito ang susi sa kanilang magandang kinabukasan.

Ito rin ang mensahe ko nang maghatid ako ng tulong sa mga scholars sa University of Perpetual Help System Dalta-Calamba noong November 15: “Mag-aral nang mabuti dahil kayo ang susunod na lider ng bansa.” Nanawagan din ako ng pagkakaisa at pakikipagtulungan upang maisulong ang mga inisyatiba para sa kabataan.

Para maipagpatuloy ng mga kabataan — lalo na ng mga mahihirap — ang kanilang pag-aaral, sinusuportahan natin ang scholarship programs ng gobyerno. Tumutugon ito sa misyon natin na mapagkalooban sila ng inclusive and quality education.

Sa ating adhikain na mas maraming kabataan at estudyante ang matulungan, tayo rin ang isa sa mga may-akda at co-sponsor ng Republic Act No. 11510, na nag-institutionalize sa Alternative Learning System (ALS) para mas mapaganda ang paghahatid ng basic education sa mga pinakamahihirap na estudyante at higit na nangangailangan. Nariyan din ang RA 11984, o ang “No Permit, No Exam Prohibition Act”, na nagbabawal sa mga educational institutions na tanggihan ang mga estudyanteng may pagkakautang na makakuha ng pagsusulit.

Isinulong din natin ang RA 12006, o ang “Free College Entrance Examinations Act”, kung saan hindi na kailangang singilin ng entrance exam fees ng mga pribadong kolehiyo at unibersidad ang mga kuwalipikadong estudyanteng nangunguna sa kanilang klase. Para naman sa mga guro sa pampublikong paaralan, nariyan ang RA 11997, o ang “Kabalikat sa Pagtuturo Act,” na nagtaas sa kanilang teaching supply allowances.

Isa rin ako sa co-author at co-sponsor ng Senate Bill No. 1360 na kung maisabatas ay naglalayon na mapalawak ang sakop ng subsidiya para sa tertiary education sa pamamagitan ng pag-amyenda sa RA 10931, o ang Universal Access to Quality Tertiary Education Act, na naisabatas noong panahon ni dating Pangulong Rodrigo Duterte.

Co-author at co-sponsor din tayo ng SBN 1864, o ang Student Loan Payment Moratorium During Disasters and Emergencies Act, para naman mabigyan ng palugit ang mga estudyanteng may pagkakautang pero hindi makabayad dahil tinamaan ng kalamidad at iba pang sakuna kung maisabatas.

Isinusulong din natin sa Senado ang pagpasa ng SBN 1786, na nag-aatas sa mga pampublikong Higher Education Institutions (HEIs) na magkaroon ng Mental Health Offices sa kanilang campus. Kaugnay ito ng ating adhikain bilang chairperson ng Senate Committee on Health na ang mental health ay dapat bigyan ng sapat na atensyon tulad ng inilalaan natin sa physical health.

At bilang chairperson ng Senate Committee on Sports, payo ko sa mga kabataan ay: “Get into sports and stay away from illegal drugs to keep us healthy and fit!” Matagumpay nating naisulong ang National Academy of Sports sa New Clark City, Capas, Tarlac bilang isa sa mga may-akda at co-sponsor ng RA 11470. Sa NAS, mapagsasabay ng student-athlete ang pag-aaral at pag-eensayo ng walang masasakripisyo.

Principal sponsor at author naman tayo ng SBN 2514, o ang panukalang Philippine National Games (PNG) Act, na naglalayong ma-institutionalize ang isang national sports program para makatuklas ng mga kabataang atleta mula sa mga kanayunan kung maisabatas.

Bilang vice chair ng Senate Finance Committee, isinusulong ko rin ngayon ang dagdag na pondo para sa youth programs upang matulungan ang mga kabataan na magtagumpay sa larangang kanilang pinili at mabigyan ng oportunidad na makapagserbisyo rin sa kapwa.

Samantala, bumisita tayo sa Cagayan de Oro City at pinangunahan ang feeding initiative para sa mga pasyente at staff ng Northern Mindanao Medical Center noong November 16. Kasabay nito ang palugaw at pagbibigay ng tulong ng aking Malasakit Team sa mga pasyente sa JR Borja General Hospital.

Binalikan natin at binigyan ng tulong ang 116 residente na naapektuhan ng kalamidad sa Brgy. Puntod, Cagayan de Oro City noong November 16. Nakatanggap din sila ng emergency housing assistance mula sa NHA na ating isinulong para may pambili sila ng materyales na pampaayos ng kanilang tahanan. Sinaksihan din natin ang groundbreaking ng itatayong Super Health Center sa Brgy. Kauswagan sa CDO pa rin.  

Sa araw ding iyon, dumalo ang aking opisina sa ginaganap na sportsfest sa MSU sa General Santos City. Ang pagdaraos ng naturang palaro ay nasuportahan natin kasama ang Philippine Sports Commission.

Sinaksihan din ng aking opisina noong November 16 ang sportsfest sa Pamantasan ng Lungsod ng Muntinlupa na sinuportahan namin ng PSC. Dumalo rin tayo sa ginanap na SK Basketball and Volleyball League sa Basista, Pangasinan na proyekto ni SK Chair Irra Parazo.

Sa imbitasyon ni Mayor Bernie Palencia, sinaksihan ng aking opisina noong November 18 ang ginanap na South Cotabato Provincial Athletic Association Meet sa Polomolok, South Cotabato.

Kahapon, November 19, personal nating pinangunahan ang pagbibigay ng tulong sa 203 maliliit na negosyante sa Tondo, Maynila na sa ating inisyatiba ay nakatanggap din ng livelihood kits mula sa DTI. Pinangunahan din ng ating tanggapan ang pamamahagi ng tulong para sa 800 mahihirap sa Tanjay City, Negros Oriental na sa ating inisyatiba ay nabigyan ng tulong pinansyal katuwang si Mayor Jose Orlino.

Naging panauhin din tayo sa ginanap na Gawad Pilipino Lingkod Bayan Awards sa paanyaya ni President Dr. Danilo Mangahas. Nagpapasalamat tayo sa ipinagkaloob nila sa atin na parangal bilang isa sa mga Outstanding Senator. With or without award, patuloy lang akong magseserbisyo sa aking mga kapwa Pilipino.

Hindi rin tumitigil ang aking Malasakit Team sa pagbibigay tulong sa ating mga kababayan. Naalalayan natin ang 27 pamilyang nabiktima ng sunog sa Brgy. Tumaga, Zamboanga City.

Sa ating pakikipagkapit-bisig sa DOLE, nabigyan ng tulong at pansamantalang trabaho ang 110 displaced workers sa Isulan, Sultan Kudarat katuwang natin si Mayor Marites Pallasigue.

Nag-abot din tayo ng tulong sa ginanap na Patient Convention: Peace Tayo sa NKTI katuwang si Executive Director Dr. Rose Marie Liquette.

Bilang inyong Mr. Malasakit, patuloy akong magseserbisyo sa mga kapwa ko Pilipino sa abot ng aking makakaya dahil bisyo ko ang magserbisyo, at ako ay naniniwala na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.