Paghahatid ng serbisyong pangkalusugan sa mga kababayan, tuluy-tuloy!

ni Bong Go @Bisyo Magserbisyo | Dec. 18, 2024

Kahit malapit na ang Pasko at karamihan sa atin ay abalang-abala na sa pagsalubong sa espesyal na okasyong ito, tuluy-tuloy ang inyong Senator Kuya Bong Go sa paghahatid ng serbisyo lalo na sa mga nangangailangan. 

Sinimulan natin ang linggong ito sa pagbisita sa ating mga kababayan sa Batangas noong Lunes para personal na saksihan ang inagurasyon ng Super Health Center sa San Jose. Matapos ang inagurasyon, namahagi tayo ng tulong para sa 420 na mga barangay health workers, municipal health staff, senior citizens, grupo ng mga kababaihan at mga empleyado ng lokal na pamahalaan. Pinasalamatan natin ang mga lokal na opisyal na naroroon kabilang sina Mayor Valentino Patron, Vice Mayor Renji Arcilla, at mga konsehal.

Kahapon, dumalo rin tayo sa inagurasyon ng isa pang Super Health Center na itinayo naman sa Lumban, Laguna kasama si Mayor Ding Valeda, Vice Mayor Belen Raga at iba pang opisyal. Nagbigay din tayo ng suporta sa 139 health workers at 135 displaced workers doon. Bilang adopted son ng CALABARZON, patuloy ang aking pagsisikap na makatulong sa inyo. 

Ang pagpapatayo ng mga Super Health Center sa buong bansa, lalo na sa malalayong komunidad, ay sinusuportahan natin bilang chairperson ng Senate Committee on Health upang mapalakas ang ating healthcare system at mailapit sa mga kababayan ang pangunahing serbisyong pangkalusugan. 

Sa kasalukuyan ay mahigit 700 Super Health Centers ang napaglaanan na ng pondo para maipatayo sa ating pakikipagtulungan bilang vice chairperson ng Senate Finance Committee kasama ang DOH, mga kapwa mambabatas at mga lokal na pamahalaan. 

Naniniwala ako na health is wealth, at ang kalusugan ay katumbas ng buhay ng bawat Pilipino. Kaya sa pamamagitan ng mga ganitong inisyatiba ay mas matutugunan ang pangangailangang pangkalusugan sa mga komunidad lalo na pagdating sa early disease detection, primary care at konsultasyon, na kailangan para maagapan ang paglala ng sakit. 

Sa kakaikot ko sa buong Pilipinas, naobserbahan ko na maraming bayan ay walang maayos na health facilities. May mga buntis na nanganganak sa tricycle o jeepney at may emergency cases na inaabutan na sa bahay o sa daan ng kamatayan dahil napakalayo ng ospital. Ngayon, inilapit natin ang serbisyong medikal sa ating mga kababayan sa pamamagitan ng mga inisyatibang ganito.

Bukod sa Super Health Center ay naririyan din ang Malasakit Centers na ating sinimulan noong 2018 at na-institutionalize noong 2019 sa pamamagitan ng Republic Act No. 11463, o ang Malasakit Centers Act na tayo ang principal sponsor at author. 

Dito ay makakakuha ang mga benepisyaryo ng tulong pampagamot mula sa Department of Social Welfare and Development, Department of Health, PhilHealth, at Philippine Charity Sweepstakes Office. Isa itong paraan para siguraduhing walang Pilipinong mapapabayaan pagdating sa kalusugan. Batay sa datos ng DOH, may 166 Malasakit Centers na sa buong bansa at mahigit 15 milyong kababayan na natin ang natutulungan ng programang ito. 

Sama-sama nating ilapit ang serbisyo sa tao. Kaya noong December 16 ay muli nating binigyan ng tulong ang 452 residente ng Tondo, Manila, na naging biktima ng sunog. Nakatanggap din sila ng emergency housing assistance mula sa NHA na ating isinulong para may pambili sila ng materyales sa pagpapatayong muli ng kanilang tahanan. 

Kahapon, December 17, personal din nating sinaksihan ang groundbreaking ng itatayong new Lumban Municipal Hall sa Laguna na napondohan sa ating inisyatiba kasama si Mayor Rolando Ubatay. Nagpapasalamat din tayo sa lokal na pamahalaan ng Lumban sa pagdedeklara sa atin bilang adopted son ng bayan. 

Namahagi rin ng tulong ang aking opisina sa 545 mahihirap na residente ng Virac at San Andres, Catanduanes, na sa ating inisyatiba ay nakatanggap din ng tulong pinansyal mula sa lokal na pamahalaan, katuwang si Mayor Leo Mendoza at Mayor Samuel Laynes.

Nagkaloob naman ang aking Malasakit Team ng dagdag na suporta sa 424 estudyante ng University of Batangas; at 211 scholars sa Cebu. Nakapamahagi rin tayo ng tulong para sa ilang mga solo parents at transport workers sa Muntinlupa City. 

Samantala, nasa Tanjay City, Negros Oriental rin ang aking team at dumalo sa kanilang Bodbod Festival sa paanyaya ni Mayor Jose Orlino. Suportado natin ang pagpapanatili at pagpapayabong ng kulturang Pilipino. 

Sinaksihan din ng aking opisina kasama si Mayor Mar Mission ang inagurasyon ng itinayong multipurpose building sa San Remigio, Antique na ating sinuportahang mapondohan. 

Ngayong panahon ng Kapaskuhan, ipakita natin ang tunay na kahuluhan ng okasyong ito sa pamamagitan ng pagmamalasakit, pagtulong at pagserbisyo sa kapwa sa abot ng ating makakaya. Bilang inyong Mr. Malasakit, patuloy akong magseserbisyo sa inyo anuman ang panahon at nasaan man kayo sa Pilipinas dahil bisyo ko ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pondo ng Health, dapat gamitin para sa health!

ni Bong Go @Bisyo Magserbisyo | Dec. 14, 2024

Niratipikahan na ng Senado noong December 11 ang Bicameral Committee Report kung saan nakasaad na zero budget, o hindi maglalaan ang gobyerno ng pondo para sa Philippine Health Insurance Corporation (PhilHealth) sa susunod na taon. Mariin natin itong tinutulan at patuloy nating ihahayag ang hinaing ng taumbayan laban dito.

Bagama’t nadiskubre natin na may mahigit P500 bilyong reserve fund ang PhilHealth matapos ang sunud-sunod na Senate Health Committee hearings na ating pinangunahan, hindi ako sumasang-ayon na tuluyan na nating hindi bigyan ng subsidiya ang PhilHealth. Anti-poor ito at hindi katanggap-tanggap!

Napakahalaga na matiyak ng gobyerno ang suporta nito sa PhilHealth para mas mapalawak pa ang mga benepisyo nito lalo na sa mga mahihirap na pasyente. Pero paano ito maisasagawa ng ahensya kung ni piso ay walang ibibigay na subsidiya ang gobyerno para rito?

Ipinaglalaban natin ang tamang paggamit ng pondo ng PhilHealth, pero dapat ding suportahan natin ang hangaring ito sa pamamagitan ng pagsigurong mapupunta sa health ang pondo na para naman talaga sa health — na naaayon sa batas! Hindi ito dapat mapunta sa ibang paggagamitan. Ang tanong kasi ng taumbayan: Kung hindi popondohan ang PhilHealth, saan inilagay ang budget na unang inilaan para rito?

Tandaan natin na alinsunod sa Universal Health Care Law, dapat ay ibaba natin nang husto ang bayaring pangmedikal ng bawat Pilipino sa mga susunod na taon. Malayung-malayo pa tayo sa hangaring ito, at baka lalo pa tayong aatras dahil sa zero budget ng PhilHealth.

Uulitin ko, mga mahihirap na pasyente ang kawawa rito. Malaking tulong sa indigent patients kung mapapaganda ang benepisyo ng PhilHealth para mabawasan ang kanilang gastos o out-of-pocket expenses. Imbes na ibayad sa ospital, puwede na nila itong ipambili ng gamot, pagkain, at iba pa nilang pangangailangan.

Gayunpaman, bilang vice chair ng Senate Finance Committee at Chairperson ng iba’t ibang komite sa kalusugan, sa kabataan, at sa sports, suportado ko ang ibang mga probisyon sa panukalang budget na naglalayong paigtingin ang mga programa para sa mahihirap at pinakanangangailangan.

Basta para sa interes ng ating mga kababayan, susuporta ako. Pero kapag may nakikita akong mali, magsasalita ako bilang inyong Mr. Malasakit na walang ibang bisyo kundi magserbisyo!

Bilang chair ng Senate Committee on Sports, at on Youth, sinaksihan natin ang ginanap na CHED All-Star Basketball Friendship Game Opening Ceremony sa Quezon City sa paanyaya ni CHED Chair Popoy de Vera. Muling binigyan natin ng tulong ang 228 residente ng Taguig City na naging biktima ng sakuna. Nakatanggap din sila ng emergency housing allowance mula sa NHA na ating isinulong para may pambili ang mga benepisyaryo ng materyales na pagpapaayos ng kanilang nasirang tirahan. Dumalo rin tayo sa Oriental Mindoro Mayors Christmas Party sa paanyaya ni Governor Bonz Dolor, na ginanap sa Maynila. Dumaan din tayo at bumati ng maligayang Pasko sa LMP National Officers na nagtipun-tipon sa parehong lugar.

Nag-abot din tayo ng tulong para sa 1,500 mahihirap na residente ng Labangan, Zamboanga del Sur katuwang si Mayor Eddie Relacion. Sa ating inisyatiba, nabigyan din ang mga benepisyaryo ng tulong pinansyal ng lokal na pamahalaan. Nagpaabot din tayo ng mensahe sa ginanap na Philippine Councilors League Negros Occidental Year End Assembly na ginanap sa Bacolod City.  

Kahapon, pumunta ako sa Pangasinan, kung saan ako ay isang adopted son, at namigay ng regalo para sa 1,500 day-care students at kanilang guardians sa Calasiao kasama sina Vice Gov. Mark Lambino, Mayor Kevin Macanlalay, Vice Mayor Nestor Gabrillo, at BM Shiela Baniqued. Pagkatapos ay personal nating pinangunahan ang pagbibigay ng tulong sa 1,000 mahihirap katuwang si Governor Ramon Guico, na sa ating pamamagitan ay napagkalooban din ng lokal na pamahalaan ng tulong pinansyal. Nakiisa rin tayo sa ginanap na Barangay Captains Day sa Lingayen na dinaluhan ng 1,500 katao.

Sinaksihan naman ng aking opisina ang inagurasyon ng Super Health Center sa Bansud, Oriental Mindoro kasama si Mayor Ronaldo Morada.

Pinagkalooban tayo ng parangal bilang “Outstanding Servant Awardee” ng Golden Globe Annual Awards for Business Excellence (GGAABE) and Filipino Achievers na ginanap sa Maynila. With or without award, patuloy akong magseserbisyo.

Nagpaabot din ang aking opisina ng tulong para sa 1,000 estudyante ng Candaba, Pampanga, katuwang si Mayor Rene Maglanque.

Sa pamamagitan ng aking Malasakit Team, nagbigay tayo ng dagdag na tulong sa mga naging biktima ng kalamidad gaya ng 34 sa Maco, Davao de Oro; 269 sa Las Piñas City; 50 sa Pateros; 36 sa Makati City; at 67 sa Bacoor City, Cavite. Nakatanggap din sila ng emergency housing allowance mula sa NHA na ating isinulong.

Nagkaloob din tayo ng dagdag na suporta para sa 347 scholars sa Dapitan City. Naalalayan natin ang 88 nawalan ng hanapbuhay sa San Jose, Tarlac katuwang si Mayor Romeo Capitulo, na sa ating pakikipagkapit-bisig sa DOLE ay nabigyan din ng pansamantalang trabaho.  

Sa aking pagtupad sa tungkuling ipinagkatiwala at iniatang ninyo sa akin, ang laging layunin ko ay makapagtrabaho at makapagserbisyo sa inyo, lalo na sa mga mahihirap at higit na nangangailangan, sa abot ng aking makakaya.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pangalagaan at pahalagahan ang mental health ng ating kabataan!

ni Bong Go @Bisyo Magserbisyo | Dec. 11, 2024

Isa sa mga prayoridad natin ay ang mga kabataan, lalo na pagdating sa kanilang mental health. Dahil na rin sa epekto ng COVID-19 pandemic, mas naging talamak ang usapin ng mental health kaya’t tinitingnan na natin ito ngayon sa mas malawak na perspektiba.

Nakakalungkot na sa panahon ng krisis, maraming kabataan ang naapektuhan ang mental health. Noong 2021 sa kasagsagan ng pandemya, batay sa datos ay mahigit 400 Filipino learners ang kinitil ang sariling buhay, habang higit isang libo ang nagtangkang mag-suicide. Mahigit 22 porsyento ng ating mga kababayan ang napaulat na humingi ng professional help sa mga mental health professionals.

Bilang chairperson ng Senate Committees on Health at on Youth na nagsusulong ng mga repormang pangkalusugan sa ating bansa lalo na para sa kabataan na pag-asa ng ating bayan, masaya kong ibinabalita na isa nang batas ang Republic Act No. 12080, o ang Basic Education Mental Health and Well-Being Promotion Act noong December 9. Co-author at co-sponsor tayo ng bagong batas na ito na naglalayong matugunan ang nakababahalang mental health issue sa mga kabataang estudyanteng Pilipino. 

Sa ilalim ng RA 12080, hindi lang magtatayo ng care centers para sa mental health services sa lahat ng pampublikong paaralan, kukuha rin ng professionals na may sapat na kakayahan para sa serbisyong ito. Isa itong mahalagang hakbang para maitaas ang antas ng kamalayan sa isyu ng mental health. Ang mga guro at guidance counselors ang kaagapay natin sa pagbibigay ng suporta sa mga estudyante sa harap ng kanilang mga pagsubok na pinagdaraanan. Ang mental health issues ay hindi kahinaan kundi bahagi ng ating kalusugan na dapat nating tutukan at solusyunan.

Dahil buhay at kinabukasan ang nakataya, kailangang gawing mas accessible at abot-kaya ang serbisyong pangkalusugan ng isip para sa lahat ng mag-aaral. Hindi nila dapat maramdaman na mag-isa lang sila sa kanilang mga laban.

Dagdag dito, hindi natin dapat kalimutan ang mga mag-aaral sa state colleges and universities lalo na sa panahon ngayon kung saan ramdam pa rin natin ang epekto ng pandemya, mga isyu ng ekonomiya, at hirap na dulot ng mga sakuna. Isinusulong din natin ang Senate Bill No. 2598, o ang panukalang State Universities and Colleges (SUCs) Mental Health Services Act bilang isa sa mga may akda at co-sponsor nito. Kapag maisabatas, layunin nitong magpatayo ng Mental Health Offices sa bawat SUC campus para sa komprehensibong suporta at intervention sa mga estudyante, pati na sa faculty at staff.

Kailangan ding matiyak ang maayos na implementasyon ng RA 11036, o ang Philippine Mental Health Act, na naisabatas noong panahon ni dating Pangulong Rodrigo Duterte. Sa ilalim nito, ginagarantiyahan na ang bawat Pilipino ay may karapatang magkaroon ng access sa mental health care. Layunin din nito na maisama ang mental health programs sa ipinatutupad na programang pangkalusugan sa mga barangay at komunidad. 

Ang malinaw at payapang pag-iisip ay isang karapatan ayon mismo sa World Health Organization. Bilang inyong Senator Bong Go, patuloy kong isusulong ang mga programa para walang Pilipinong maiiwan at mapapabayaan. 

Samantala, nasa Davao De Oro tayo noong December 7 at nag-inspeksyon sa itinayong multi-purpose building at Super Health Center sa Maco. Personal din nating pinangunahan ang pamamahagi ng tulong sa 521 residenteng nabiktima ng landslide, na nakatanggap din ng emergency housing allowance mula sa NHA na ating isinulong para may pambili sila ng materyales na pampaayos ng kanilang nasirang tahanan. 

Sinaksihan natin sa pamamagitan ng video call at nagpaabot tayo ng mensahe noong December 8 sa ginanap na Panlalawigang Pederasyon ng mga Sangguniang Kabataan-Iloilo Province Year End Assessment Opening Ceremony sa Aklan sa paanyaya ni PPSK President BM Esara Javier; gayundin ang idinaos na Barangay Councilors League of the Philippines - Cebu City Christmas Party sa Cebu City sa imbitasyon ni BCLP Cebu President Dante Tabucal. 

Ginawaran naman tayo ng parangal bilang Premier Achiever Outstanding Public Servant sa 2nd Southeast Asian Premier Business and Achiever Award na idinaos sa Maynila. Nagpapasalamat tayo sa pagkilalang ito. With or without award, tuluy-tuloy lang ang pagseserbisyo ko sa mga Pilipino.  

Noong December 9 at kahapon, December 10, dumalo tayo sa ginanap na KABAKA 39th Anniversary sa Ninoy Aquino Stadium, sa paanyaya nina former representatives Crystal Bagatsing at Amado Bagatsing. Sumuporta rin tayo sa ginanap na Liga ng mga Barangay Bulacan Chapter Year End Assembly sa Malolos City, Bulacan sa imbitasyon ni LNB Chapter President Fortunato Angeles. 

Wala ring patid ang paghahatid ng tulong ng ating Malasakit Team. Naalalayan natin ang mga naging biktima ng magkakahiwalay na insidente ng sunog kabilang ang 20 sa Davao City; tatlo sa Iloilo City; at 62 sa Cagayan de Oro City.

Binalikan natin at muling binigyan ng tulong ang mga naging biktima ng kalamidad gaya ng 380 sa Cebu City, Talisay City at Minglanilla, Cebu; at 19 sa Cagayan de Oro City. Nakatanggap din sila ng emergency housing allowance mula sa NHA sa ilalim ng programang ating isinulong.  

Naabutan natin ng tulong ang 200 mahihirap na residente ng Sta. Teresita, Batangas, na sa ating pakikipagtuwang kay VM Marie Segunial ay nakatanggap din ng financial assistance mula sa gobyerno. 

Gayundin, ang 53 nawalan ng hanapbuhay sa Bustos, Bulacan kaagapay si VM Martin Angeles — na sa ating pakikipagkapit-bisig sa DOLE ay nabigyan ng pansamantalang trabaho. 

Nagbigay din tayo ng dagdag na tulong sa 2,000 TESDA graduates sa Ormoc City at Tacloban City katuwang ang Philippine Call Center Institute. 

Bilang inyong Mr. Malasakit, isa sa mga prayoridad natin ang ating mga kabataan dahil sila ang future leaders at pag-asa ng ating bayan. Pangalagaan natin ang mental health dahil ang kalusugan ay katumbas ng buhay ng bawat Pilipino. Patuloy akong magseserbisyo sa inyong lahat dahil bisyo ko na ang magserbisyo, at naniniwala akong ang serbisyo sa tao ay serbisyo rin sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.