Libreng annual check-ups at dialysis, oks!

ni Bong Go - @Bisyo Magserbisyo | July 20, 2022

Bilang Chair ng Senate Committee on Health, ang mga prayoridad na panukalang batas na ating inihain sa 19th Congress ay naglalayong tiyakin na ang ating mga kababayan ay may mas maayos at mabilis na access sa health care at iba pang serbisyo, lalung-lalo na ang pinakamahihirap na walang malalapitan kundi ang pamahalaan.

Kabilang sa mga panukalang ito ang libreng annual medical check-ups at libreng dialysis para sa lahat ng Pilipino sa pamamagitan ng PhilHealth, paglikha ng Emergency Medical Services Systems, pag-amyenda sa Insurance Code upang mas lalong matutukan ang mga Health Maintenance Organizations, Barangay Health Workers Compensation and Incentives Bill, Advanced Nursing Education Bill, pagtatayo ng Center for Disease Control and Prevention, at ng Virology Science and Technology Institute of the Philippines at marami pang iba.

Mahalaga ang patuloy na pagpapalakas sa healthcare system dahil palagi tayong may kinahaharap na isyung pangkalusugan. Bukod sa COVID-19, naririyan ang problema natin sa dengue, na batay sa ulat ng DOH ay may mahigit ng 60,000 kaso na naitala mula Enero 1 hanggang Hunyo 25. At dahil tag-ulan, marami pang sakit na mauuso. Kaya pakiusap, palagi tayong mag-iingat.

Bukod sa pagpapalakas ng serbisyong pangkalusugan, kaakibat din ng adbokasiyang ito ang pagsiguradong malusog at malakas ang ating mga kababayan para maiwasan ang sakit. Sabi nga, ‘prevention is better than cure’. At isa sa mga paraan upang maging matiwasay ang kalagayan ng tao ay ang ehersisyo at sports na ating gustong i-promote sa mga komunidad.

Bilang Chair of the Senate Committee on Sports, isinusulong natin ang pagpapalaganap ng grassroots sports programs upang maengganyo ang mga Pilipino na makilahok sa ganitong aktibidad para mapalakas ang katawan at mailayo rin sa mga bisyo, lalo na ang kabataan natin.

Sa ating paghahatid ng tulong sa mga komunidad ay palagi nating binibigyang-diin sa kabataang benepisaryo ang importansya ng sports. Namamahagi tayo ng mga bola para may libangan sila, para na rin mahasa ang kanilang talento at mapangalagaan ang kalusugan sa kanilang komunidad. Naniniwala tayo na ang pagpapalaganap ng sports ang isa sa mabisang paraan para makaiwas sila sa ilegal na droga, iba pang bisyo at paggawa ng krimen.

Samantala, binabati rin natin ang Philippine Women’s National Football Team—ang Filipinas team—na lumikha ng kasaysayan bilang kampeon ng 2022 ASEAN Football Federation Women’s Championship. Muli nilang pinatunayan ang angking galing ng mga atletang Pilipino. Nagpapasalamat tayo sa kanilang pag-uwi ng karangalan sa ating bansa. Umaasa tayong ang kanilang tagumpay ay magbibigay ng inspirasyon sa lahat ng Pilipino para patuloy tayong maging matatag, nagkakaisa at nagbabayanihan sa harap ng anumang krisis.

Dahil sa magandang ipinakita ng ating mga atleta sa international competitions, patuloy nating isusulong ang mga programa at panukalang batas para sa long-term at grassroots sports development sa ating bansa.

Sa katunayan, isinumite natin ang panukalang Philippine National Games bilang pangunahing pambansang kompetisyon na gaganapin kada dalawang taon. Kumpara sa Palarong Pambansa, mas malawak ang sakop ng PNG para mahanap ang mga kinakailangan nating sports talents, kabilang ang mga hindi nag-aaral, para mapabilang sa national pool na sasanayin para sa international sports competitions.

Noong 2020 ay inakda natin at naisabatas ang Republic Act No. 11470 na lumikha sa National Academy of Sports (NAS) na itinayo sa New Clark City, Capas, Tarlac. Isang dream come true ito dahil pangarap nating magkaroon ng paaralan na magbibigay ng pagkakataon sa kabataang may talento sa sports na mag-training at malinang ang kanilang kakayahan habang binibigyan sila ng dekalidad na edukasyon.

Gayundin, isinulong natin ang dagdag-pondo para sa preparasyon at training ng mga atletang lumahok sa Tokyo Olympics at sa SEA Games sa Hanoi, Vietnam. Kaya’t mabuting balita na nadagdagan ang natanggap na insentibo ng mga nakapag-uwi ng medalya bukod pa sa pabuyang dapat nilang matanggap, ayon sa batas.

Hindi bumibitaw ang inyong Kuya Bong Go sa pangakong magbigay ng mas komportableng buhay sa bawat Pilipino at walang maiiwan sa ating muling pagbangon.

Makikipagtulungan tayo sa Executive branch upang maipagpatuloy ang magagandang nasimulan ng dating administrasyon at kaisa rin tayo ng administrasyon ni Pangulong Ferdinand “Bongbong” Marcos, Jr. sa layunin nitong mapababa ang antas ng kahirapan, magkaroon ng sapat na supply ng pagkain, mas maparami pa ang itatayong imprastraktura at iba pang proyekto at programa tungo sa mas matatag na Pilipinas.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Maagap na pagtugon na magpapalakas ng serbisyong pangkalusugan

ni Bong Go - @Bisyo Magserbisyo | July 15, 2022

Ngayong mas maraming industriya na ang nagbubukas, muling bumabangon ang ating ekonomiya at pinagpaplanuhan na rin ang pagpapatupad ng face-to-face classes sa mga paaralan, bilang Chair ng Senate Committee on Health ay umaapela ang inyong lingkod sa lahat na makiisa sa gobyerno para masigurong tuluyang malampasan na ang pandemya.

Sa hanay ng pamahalaan, sikapin nating mas palakasin ang isinasagawang vaccination campaign para mas maraming kababayan nating kuwalipikado ang mabakunahan. Maayos ang ating naging paghahanda sa vaccine rollout noong nakaraang taon at mayroon tayong sapat na supply ng bakuna, pero kailangan nating maiparating ito sa lahat ng komunidad upang maproteksyunan sila at masigurong walang maiiwan sa ating muling pagbangon.

Nirerespeto natin ang karapatan ng bawat Pilipino na magdesisyon kung gusto nilang magpabakuna o hindi. Sa kadahilanang ito, mainam na bigyan sila ng tamang impormasyon para maintindihan ang importansya ng bakuna at ang magagawa nito sa kanilang kaligtasan, maging ng kanilang pamilya at komunidad—lalo na ngayon na ipinakikita ng siyensya na bukod sa primary shots ay kailangan din ng booster shots para sa tuluy-tuloy na proteksyon laban sa COVID-19.

Bukod sa sapat na supply, “awareness and access” sa mga bakunang ito ang kailangan upang hindi masayang ang ating mga pinaghirapan. Kung puwede ay dalhin natin ang tamang impormasyon at mismong bakuna sa mga kabahayan, lalo na sa mga liblib na lugar.

Mula Hulyo 4 hanggang Hulyo 10 ay nakapagtala tayo ng kabuuang 10,271 bagong kaso, na mas mataas ng 39% kaysa sinundang linggo. Ngunit hindi dapat tayo mag-panic. Ang kailangan natin ay todong pag-iingat at kooperasyon ng lahat sa harap ng inaasahang pagsulpot pa ng mga bagong variants. Huwag muna tayong magkumpiyansa dahil delikado pa rin ang panahon habang nand'yan pa ang COVID-19.

Tandaan natin at ipaintindi sa komunidad na ang pakikipagbayanihan at pagbigay-importansya sa bakuna ang tanging solusyon ngayon para labanan ang pandemya at tuluyang makabalik tayo sa normal na pamumuhay.

Sa bahagi natin bilang kinatawan sa Senado, isinumite natin na para sa 19th Congress ang mga prayoridad na panukalang batas para palakasin pa lalo ang serbisyong pangkalusugan na dapat matanggap ng bawat Pilipino.

Kabilang ang pagtatayo ng Virology Science and Technology Institute of the Philippines (VIP) para mapaigting ang ating kakayahan sa siyensya at magkaroon ng sapat na sariling gawang medisina at bakuna laban sa mga bagong lumalabas na sakit. Kailangang maging one-step ahead tayo sa mga darating pang public health emergencies kaya isinulong natin ang pagkakaroon ng Center for Disease Control and Prevention para mas maayos at mabilis nating matugunan ang anumang krisis pangkalusugan.

Sa nakaraang mga araw, tuluy-tuloy ang ating tanggapan sa pagtulong sa mga kababayan nating apektado ng pandemya at iba pang krisis. Agad nating tinulungan ang mga kababayan nating naging biktima ng magkakahiwalay na insidente ng sunog sa Davao City tulad ng 16 na pamilya mula sa Bgy. Talomo; 16 na residente ng Bgy. 31-D Boulevard; at limang pamilya mula sa Bgy. Sto. Niño.

Hinatidan din ng ayuda at pinagaan ang dalahin ng 101 pamilyang biktima ng sunog sa Bgy. Quiot, Cebu City; at 89 pamilya rin sa Caloocan City. Merong 16 pamilyang biktima naman ng tornado sa Digos City, Davao del Sur ang ating naayudahan. Bukod dito, mayroon din tayong 1,000 kababayan sa Dingalan, Aurora na nakatanggap ng tulong.

Kinumusta rin natin ang 67 na benepisaryo ng Balik Probinsya, Bagong Pag-asa Program sa Davao City at inalam kung maayos ang kanilang kalagayan. Sinigurado natin na maipagkakaloob ng mga ahensya ng pamahalaan at LGU ang kanilang mga pangangailangan upang makapagsimula muli sa probinsya nila.

Sinaksihan din ang groundbreaking ceremony ng dalawang Super Health Center na itatayo sa North Cotabato—isa sa Libungan, at ang isa pa ay sa Banisilan. Ang Super Health Center ay inisyatiba para magkaroon ang malalayong komunidad ng modernong pagamutan na may kapasidad na parang ospital para hindi na sila kailangang bumiyahe pa sa siyudad.

Sa tahimik, ngunit walang tigil na pagtatrabaho ay palaging kapakanan at kalusugan ng bawat Pilipino ang ating prayoridad. At tulad ng tiwala at suporta na ibinigay natin kay dating pangulong Rodrigo Duterte, umaasa tayo sa inyong pakikiisa para maging matagumpay din ang bagong administrasyon at malampasan natin ang anumang pagsubok na darating sa ating buhay bilang mas matatag na sambayanang Pilipino!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pagkakaisa tungo sa mas matatag at maunlad na kinabukasan

ni Bong Go - @Bisyo Magserbisyo | July 13, 2022

Ang Hulyo ay National Disaster Resilience Month (NDRM). Mas binibigyang-diin sa taunang pagpapatupad ng NDRM ang importansya ng pagkakaisa at bayanihan para matugunan ang mga hamon na hatid ng climate change at mga sakuna at iba pang pagsubok sa kaligtasan ng ating mga kababayan.

Ngayong 2022, ang tema ng NDRM ay "Sambayanang Pilipino, Nagkakaisa tungo sa Katatagan at Maunlad na Kinabukasan." Kabahagi nito ang pinagsama-samang pagsisikap ng lahat ng sektor at mga komunidad sa buong bansa para sa ating patuloy, ligtas at balanseng pag-unlad.

Sa parte natin bilang kinatawan sa Senado, isinumite natin para sa pagbubukas ng 19th Congress ang mga prayoridad na panukalang-batas na makatutulong sa ating pamahalaan at lalo’t higit sa mga Pilipino, para maging handa tayo sa anumang krisis, kalamidad o sakuna.

Una na ang Disaster Resilience Bill na naglalayong magtatag ng Department of Disaster Resilience na ahensya na siyang tututok kapag may mga sakuna at iba pang emergency. Kailangan talaga nating palakasin ang ating kahandaan, lalo na sa hanay ng gobyerno kung saan kritikal na mayroong klarong chain of command at streamlined process na saklaw mula disaster preparedness, response, mitigation, hanggang resilience at adaptability.

Bago pa man dumating ang bagyo, pagbaha, lindol at pagputok ng bulkan, nakahanda na ang DDR at nakipag-ugnayan na sa local government units, naihanda na ang mga pangunahing pangangailangan ng mga ililikas at ililipat sila sa ligtas na lugar. Gayundin, kapag nakaalis na ang bagyo halimbawa, ang DDR din ang kikilos para maibalik sa normal ang nasalantang komunidad.

Inihain natin ang Mandatory Evacuation Centers Bill na naglalayong magtayo ng evacuation centers sa bawat munisipyo, lungsod at probinsya sa buong bansa. Bukod sa maayos na pasilidad, tulad ng tulugan at palikuran, ang mga itatayong evacuation center ay kumpleto rin sa pangunahing pangangailangan ng mga evacuees tulad ng maayos na pagkain, tubig na inumin at mga gamot.

Kabilang sa mga inihain natin ang Rental Housing Subsidy Bill na tutulong sa mga nawalan ng tirahan sanhi ng mga kalamidad at sakuna, maging ang mga informal settlers, na magkaroon ng access sa formal housing market sa pamamagitan ng pagkakaloob sa kanila ng pamahalaan ng subsidiya sa upa.

Sa ganito, may maayos silang pansamantalang matitirahan habang itinatayo ang kanilang magiging tahanan. Layunin natin na wala na dapat maging squatter sa sariling bayan.

Ang mga panukalang ito ay bilang suporta kay Pangulong Ferdinand "Bongbong" Marcos, Jr., na sa kanyang inaugural speech ay nagsabing gagawing isa sa mga prayoridad ng kanyang administrasyon ang isyu sa climate change tungo sa pagpapaigting ng resiliency and adaptability measures ng bansa.

Iisa kami ni Pangulong Marcos, Jr. ng layunin na ang kailangang maging aksyon sa oras ng kalamidad at sakuna ay “spare the victims and help them recover.” Palagi rin itong sinasabi ni dating pangulong Rodrigo Duterte na “dapat walang Pilipinong maiiwan sa ating muling pagbangon.”

Sa dami ng pinagdaanang pagsubok ng ating bansa, huwag nating hintayin na may panibago na namang trahedya na dumating sa ating buhay. Umaksyon na tayo, matuto na tayo at maging laging handa!

Samantala, bilang Chair ng Senate Committee on Health ay muli tayong nagpapaalala na patuloy na mag-ingat dahil naririyan ang banta ng COVID-19. Sa ngayon, batay sa ulat ng OCTA Research noong Hulyo 10, ang COVID-19 positivity rate sa ating bansa ay nasa 9.6 percent. Halos doble na ito sa positivity rate benchmark ng WHO na five percent.

Maging si DOH Undersecretary Maria Rosario Vergeire ay nagsabi na batay sa average new daily infections na 1,535 kaso, talagang tumataas pa rin ang bilang ng mga tinatamaan. Hindi aniya dapat mag-panic ang publiko, pero kailangan talagang mag-ingat tayong lahat. Dapat ding maintindihan ng publiko na hindi pa tapos ang laban kontra COVID-19 at asahan na natin ang pagsulpot ng bagong variants nito.

Ugaliin natin ang pagsunod sa health protocols. Magsuot ng face mask kapag nasa labas, palaging maghugas ng mga kamay at mag-obserba ng social distancing. Higit sa lahat, kung kuwalipikado na kayo sa bakuna at booster, magpabakuna na.

Kaya naging matagumpay ang ating pagkontina sa virus nitong nakaraang taon ay dahil sa bakuna. Huwag nating sayangin ang pagsisikap at sakripisyo. Ang pinakaimportante ay huwag bumagsak ang ating healthcare system, at mapanatili natin sa minimum ang mga malala at kritikal na kaso ng may sakit.

Patuloy tayong tutulong sa bagong administrasyon sa layunin nitong magkaroon ng mas ligtas at maasensong bansa na handa sa mga pagsubok ng kasalukuyang panahon at nagkakaisa tungo sa mas matatag at maunlad na kinabukasan para sa ating mga anak.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.