Sa termino ni Trump, masasakop ang mundo ng AI syndrome

ni Ka Ambo @Bistado | Nov. 9, 2024

Panalo na si US President-elect Donald Trump.

Malinaw ang mga ulat, natalo rin ang “fake news” mula sa US media.

-----$$$----

TUMPAK ang paniniwala ng kolum na ito na ang mga lumalabas na ulat sa mainstream media ng US ay mga palsipikadong balita.

Pinalilitaw nila na natatalo at deadlock ang dalawang magkatunggali sa presidential race.

Nang lumabas ang totoong resulta, landslide si Trump!

----$$$--

KUNG sinusundan ninyo ang kolum na ito, binanggit natin na ang “indicators” ng matatalong kandidato — ay ang “mismong away o sigalot” sa loob ng kampo.

Malinaw na maaga pa lamang ay sinisisi na agad ng mga maka-Harris si US President Joe Biden na kanilang kagrupo.

Malinaw na nararamdaman na nila ang “stress at pressure” ng pagkatalo.

-----$$$--

NAG-SECOND win si Trump at nagbanderang kapos si Harris.

Kung idinaan sa primary si Harris at maagang umatras si Biden — tiyak na iba ang resulta.

----$$$--

ISA pa, paano tatalunin ng apelyidong “Harris” ang apelyidong “Trump” sa US politics?

Icon na ang “Trump” at walang patol pa ang “Harris”.

-----$$$--

GANYAN din sa Pilipinas, paano tatalunin ng apelyidong “Robredo” ang apelyidong “Marcos”?

Mahalaga ang konotasyon ng bawat pangalan lalo pa’t mahalaga ang papel ng media at komunikasyon.

----$$$--

ANG tanong: May epekto ba sa Pilipinas ang Trump presidency? Ang sagot: Hindi malaki ang epekto, bagkus ay UBOD NANG LAKI.

-----$$$--

MAINIT ang Marcos-Duterte feud sa ngayon.

Alam nating BFF ni Digong si Trump, sa tingin ba natin — ay walang epekto? Magsalita kayo!

----$$$--

LUMALALA ang expose sa mga pagdinig sa Kongreso.

Pero, sa gitna nito, biglang mauupo si Trump.

Kwidaw!

----$$$--

HINDI lang ang Pilipinas ang apektado sa resulta ng US election, bagkus maging ang China, Russia, Iran, North Korea, Japan, Ukraine, buong Europe at buong Africa.

Ang pagbabalik ni Trump ay maihahalintulad sa kinatatakutang “The Big One”.

Mayayanig ang lahat.

-----$$$--

MAAARING maging negatibo o positibo ang resulta ng Trump presidency.

Dahil sa kanyang edad at sa serye ng bigong asasinasyon, posibleng hindi siya makatapos ng termino.

Nakakayanig at nakakahilakbot din ‘yan, ‘di ba?

-----$$$--

POSIBLE rin dito na magmitsa ang Ikatlong Digmaang Pandaigdig o mabingit sa panganib ng nuclear war ang buong daigdig.

Gayunman, ang Trump presidency ay buwelo rin sa dekada 2030s kung saan ibayong pag-unlad ng teknolohiya ang mararanasan.

-----$$$--

SA panahon ng termino ni Trump, masasakop ang buong daigdig — indibidwal, pamilya, gobyerno at negosyo ng artificial intelligence syndrome.

Marami ang hindi makakasabay, pero ang mga kabataang bihasa sa gadgets at apps, tulad ng mga Pinoy ang kokontrol sa daigdig kasabay ng Trump presidency.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

‘Pinas, dapat pumostura ng pagiging neutral

ni Ka Ambo @Bistado | Nov. 7, 2024

BRICS versus G7.

Pilipinas, naiipit na naman.

-----$$$--

IPINAKIKITA ng India at Indonesia ang pagiging neutral sa away ng US at China.

Iyan ang disposisyon at kumbiksiyon.

May existing template naman!

-----$$$--

HINDI kasi puwede na magpadikta sa US.

Lalong hindi puwedeng magpa-unggoy sa China.

-----$$$--

SA aktuwal, ang Konstitusyon ng Pilipinas ay nag-aatas ng pagiging neutral ng bansa.

Kailangan pumostura ang ‘Pinas tulad sa India at Indonesia.

-----$$$--

SA totoo lang, nagtagumpay si ex-PRRD na makalas ang kadena na isinakal ng US sa ‘Pinas.

Ang problema, nabigo siya na ipakita na “hindi siya nakahapay” sa Tsekwa.

-----$$$--

ISANG karismatikong lider lamang ang maaaring makagawa ng diskarte ng India at Indonesia.

Ang lantay na Ideolohiyang Pilipino ay dapat nakapundasyon sa Saligang Batas — at iyan ay ang pagpostura bilang “neutral na bansa”.

----$$$--

MAHIRAP mamangka sa dalawang ilog.

Pero, puwedeng maglangoy sa dalawang swimming pool.

----$$$--

KUNG susuriin natin, ang pagiging neutral ang nais ibunsod at isinusulong ni Sen. Imee, pero wala lang kakayahan ang kanyang mga ayudante na maipaliwanag ito sa ordinaryong tao.

Hindi kasi simple ang prinsipyo at paninindigang “non-aligned nation”.

----$$$--

MASELAN ang isyu sa ideolohiya lalo pa’t may kaugnayan sa pagkalag ng tali mula sa impluwensiya ng US.

Aakusahan kasi ang mga nagsusulong nito na “maka-komunista” kahit hindi naman isinusulong ang pagyakap sa China.

-----$$$--

INILILIHIS kasi ng ilang propagandista ang tunay na konteksto ng mga pahayag, impormasyon at mensahe.

Dapat ay magkakambal palagi na tinutukoy ang pag-iwas na magpadikta sa US at China kung saan dapat na idinurugtong agad — ang ibayong “pagmamalasakit at pagmamahal” sa Republika.

-----$$$--

SA dinami-dami ng kandidatong senador, may isa man lamang bang nagbubunsod na isulong ang ganap na ideolohiyang maka-Pilipino?Karaniwan sa kanila ay kontra korupsiyon, kuno.

Pero, kapag nanalo, lihim na magtatanong: May pork barrel ba tayo r’yan?

Ho! Ho! Ho!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

AI na ang pinag-uusapan sa mundo, ‘Pinas intel fund na rin

ni Ka Ambo @Bistado | Nov. 6, 2024

Artificial intelligence na ang pinag-uusapan sa buong daigdig ngayon.

Sa Pilipinas, intel fund pa rin.

------$$$--

KANYA-KANYANG press release ang mga kandidato.

‘Yan na mismo ang ‘fake news’.

Ha! Ha! Ha!

-----$$$--

WALANG nakakasabay sa modernisasyon at teknolohiya.

Nalipasan kasi ng panahon ang iskema ng edukasyon.

-----$$$--

HANGGANG ngayon sina Socrates at Plato pa rin ang modelo ng mga matatalino.

Huh, hindi sila matalino.

Hindi ba nagkaapo sina Socrates at Plato?

-----$$$---

BAGUHIN na dapat ang istruktura o iskema sa pagtuturo.

Nalipasan na ‘yan ng panahon.

Ibalik ang personal tutorial sa panahon ng mga kaharian.

----$$$--

Sa totoo lang, agrabyado ang mga anak ng mga nagdarahop sa mga anak ng mga mayayaman.

May tutor kada subjects ang anak ng mga “may salapi” samantalang nagtitinda pa rin ng bitso at puto si Butsoy imbes na magrebyu ng leksyon.

Sa honor roll, daig din sila sa sipsipan sa principal na laging may letseplan at patok ang tindahan sa online dahil suki ang mga taga-PTA.

-----$$$---

BIGYAN dapat ng mas malaking postura ang alternative learning system at home-study program.

Iyan ay dapat lagyan ng inobasyon — makakatipid ng klasrum, makakatipid ng gastusin ng mga estudyante.

-----$$$---

FIFTY percent dapat ng curriculum ay nakatuon sa international language learning, artificial intelligence, animation at coding.

Inaamag, panis at lipas sa panahon — ang kinopyang kurikulum mula sa ibang bansa.

Hindi na iyan ang uso sa susunod na 10 taon.

-----$$$--

MABILIS na nagbabago ang panahon tulad sa modelo ng kotse at cellphone.

Pero, ang curriculum, module at syllabus — ‘yun at ‘yun pa rin.

----$$$--

HANGGANG ngayon, lumang aklat pa rin ang ginagamit at dinidiktahan ng mga titser

ang estudyante.

Dapat nating maunawaan — ang kalayaan sa pagsasaliksik at praktikalidad — ang dapat pundasyon sa edukasyon.

Ganyan lang kasimple dapat.

------$$$--

ALISIN ang “honor roll” at ranking system.

‘Yan ang sumisira sa edukasyon!

----$$$--

ANG matatalino ay ginagawang iskolar gayung matalino na sila at may kakayahang tumindig sa sariling paa.

Ereng mga bobo o kapos sa karunungan dulot ng malnutrisyon at broken family — ay walang kumakalinga.

 ----$$$--

BAKIT walang scholarship para sa mga nahihirapang umunawa ng mga asignatura?

Bakit walang scholarship para sa laging “may back subject?

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.