Bawat kontrata sa gobyerno, ‘tubong lugaw’, mga kontraktor tiba-tiba

ni Ka Ambo @Bistado | Jan. 22, 2025

Nagpapalitan pa rin ng patutsadahan ang Malacañang at kampo ni VP Sara.

Pero, tila hindi na kailangan pang kumilos ang kampo ni Inday bagkus ay panoorin na lamang ang diskarte ng mga ayudante ni PBBM.

----$$$--

KAPAG hindi naging maingat ang Malacañang, ang mismong negatibong diskarte sa kanilang paligid ang wawasak sa kanila.

Nakatuon ang tsismis ngayon sa kaliwa’t kanang maniobra ng mga kontraktor.

----$$$--

Bagaman hindi naman bago na maghanap ng padrino ang mga kontraktor, pero dapat ay maingat nila itong ginagawa.

Alam naman ng lahat, ang bawat kontrata sa gobyerno ay “tubong lugaw” — nagkakamal ng salapi ang mga gumagalaw sa “likod ng kontrata”.

----$$$--

MARAMI nang naaresto dahil sa pagpapanggap na konektado sa First Family, ang problema, ayaw magsitigil.

Pinakasikat ngayon ang tinataguriang “riding-in-tandem”.

Magkapakner sa diskarte. He-he-he!

-----$$$--

TEKA, pinagpipiyestahan ngayon ng mga “marites” ang pagkakasibak kay Ako Bicol Partylist Rep. Zaldy Co.

Iba’t iba ang espekulasyon at tsismis sa dahilan ng kanyang “pagbagsak”.

---$$$--

HINDI kaya nakaamoy ang Malacañang, dili kaya’y nabiktima ito ng mga “marites”?

Sa bagay, ‘pag mayroong “usok” ay may “sunog”. Ha-ha-ha! 

----$$$--

MAY bulungan na pumapalag at nagrereklamo ang ilang kontraktor sa Bicol.

At nakarating umano ang “sumbong” sa big boss.

Tsk, tsk, tsk.

---$$$--

HINDI naman kasi nakaya ng mga kontraktor ang kapritso.

Siyempre, nasukol sila sa pader.

----$$$--

ISINISISI kay “Mr. L” at “Miss S” ang hinaing ng mga kontraktor dahil sa “kasintaas” ng langit ang kapritso.

Malulugi na ang mga kontraktor.

----$$$--

MAY nagsasabi na ngayong 2025 ay “na-zero” na sa project listing ang “riding-in-tandem”.

Maaaring naamoy na ang diskarte.

----$$$--

PERO, binago na nila ang estratehiya ngayon, nanghaharbat na lang sila ng “proyekto” nang may “proyekto” sa DPWH Mindanao.

Dumidiretso na sila sa mga local official, siyempre, astig sila ‘pag bumoka.

 ----$$$--

SA totoo lang, marami ang naaawa kay SAP Anton, kasi’y wala naman talaga siyang kinalaman sa “tsismis” pero ayaw tumigil ng mga “marites”.

Huh, sana ay “maapula” agad ang apoy sakali mang magliyab.

----$$$--

ANG problema ay nabibilad ang mga ayudante ni PBBM.

Nababahala tayo, dahil baka hindi sinasadya maging ang opisina ng SAP ay ma-QuadComm

Ngek!!!

----$$$--

WALA sanang maisagawang “lifestyle check”.

Masasayang kasi ang mga pinaghirapan ng Malacañang sa nagdaang tatlong taon.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Israel at Hamas, nagkasundo na, taliwas naman kina PBBM at VP Sara

ni Ka Ambo @Bistado | Jan. 17, 2025

Nagkasundo na ang Israel at Hamas.

Natigil na ang madugong digmaan.

-----$$$--

Taliwas sa Israel at Hamas, hindi pa nagkakasundo sina PBBM at VP Sara.

Wala sanang civil war na maganap.

----$$$--

INARESTO ang dating pangulo ng South Korea na nagtangkang ideklara ang Martial Law.

Hindi rin sana ito masaksihan sa Pilipinas.

-----$$$--

NAGPAPALITAN ng malalakas na missile at drone ang Russia at Ukraine.

Totoo po, walang nananalo sa digmaan.

-----$$$--

HINDI pa naapula ang wild fire sa California.

Huwag sanang matulad ang Baguio City sa naturang trahedya.

-----$$$---

NAAKSAYA ang mga naimprentang balota dahil ipinabalik ng Korte Suprema ang mga pangalan ng kandidato na binasted ng Comelec.

Sino ang engot?

----$$$--

NANANATILING balwarte ni VP Sara ang Mindanao at Visayas.

Walang nabago, mas tumatag pa.

----$$$--

HINDI kailanman, puwedeng makopo ng taga-VisMin ang boto ng Luzon.

‘Yan ang makatotohanang pagtaya.

----$$$--

SAKALING kumandidato ni VP Sara bilang pangulo, kailangan lamang niya ay huwag “maiwanan o matambakan” ng kalaban sa Balance Luzon.

Ganu’n lang kasimple.

----$$$--

WALANG matibay na kalaban si VP Sara sa pagka-presidente na magmumula sa Luzon.

Isipin ninyong mabuti ‘yan.

----$$$--

ANG mga negatibong ulat laban sa pamilya Duterte ay hindi naman bago.

Anumang atake sa isang pulitiko — ay maituturing na black propaganda — may ebidensya man o wala.

----$$$--

ANG black propaganda ay mas nakakatulong sa inatake — dahil nananatiling “popular” o napag-uusapan ang kanyang pangalan.

Kumbaga sa showbiz, negative news ay nananatiling publisidad.

-----$$$--

BILYUNG-BILYONG piso ang katumbas ng “name recall media blitz” -- at ito ay inilibre ng mga kalaban ni VP Sara.

May negatibong epekto lamang ang black propaganda kapag hindi ito maayos na nasagot ng inaakusahan.

-----$$$--

ANG black propaganda kapag nasagot nang maayos at malinaw, ito ay naiko-convert tungo sa “good publicity”.

Kumbaga, kapag dispalinghado ang diskarte, nagbo-boomerang ang paninira sa isang kandidato.

-----$$$--

NAPAKALAYO pa ng 2028 — at kahit sa boxing, maaaring maka-recover ang boksingero kahit ma-knockout sa 2nd o third round.

Epektibo lang ang knockout punch kapag ito ay pinakawalan at tumama sa last round ng bakbakan.

-----$$$---

ANG pagkapanalo ni EX-PRRD noong 2026 — ay dahil na-knockout si ex-VP Binay sa mga huling round ng kampanya.

Pero, dahil masyadong mahina — ang manok ng Liberal Party, nakalusot ang isang dark horse.

----$$$--

SA aktuwal, nagtagumpay ang LP sa pagwasak kay Binay at naipanalo bilang bise presidente si ex-VP Leni.

Pero, dahil hindi pang-derby ang kaliskis ng tandang, nakatsamba ang taga-Mindanao.

-----$$$--

NGAYON, nagtataka tayo, bakit walang lumabas na resulta ng presidential survey.

Ang labanan ay nasa senatorial race, pero ang inuupakan agad ay ang pang-presidentiable.

Anubayannn?

-----$$$---

NAGLABAS na ng tubig ang umaapaw na Angat Dam.

Hindi ba puwedeng i-export ang tubig sa Angat paluwas ng California?

-----$$$--

DAPAT ay panahon na ng tag-init ngayon, pero nilinaw ng PAGASA na umiiral ang La Nina.

Nagkaletse-letse na ang klima.

-----$$$---

WALANG nakakapansin, may epidemya na ng pagkaadik sa online gaming.

Tahimik lang ang Malacañang.

 ----$$$--

NAUUBOS ang cash gift mula sa pamahalaan dahil sa talamak na online gambling na may bendisyon daw ng gobyerno.

Imoralidad ito na tila kinukunsinti ng pamahalaan.

-----$$$--

HINDI maawat ang pananakop ng artificial intelligence sa lahat ng sektor.

Ereng mga policy makers, nakatulala lang.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Kailangan ni PBBM, matapat at matalinong tagapayo, ‘di sipsip at hunyango

ni Ka Ambo @Bistado | Jan. 15, 2025

Umabot sa 2 milyon hanggang 8 milyong katao ang dumalo sa peace rally ng Iglesia Ni Cristo.

Isinagawa ito sa iba’t ibang panig ng bansa.

-----$$$--

Hindi mahalaga rito ang aktuwal na bilang, bagkus ay ang impact at impresyon ng pagdagsa ng tao.

Ikinukumpara ang bulto ng tao sa EDSA 1 at EDSA 2.

----$$$--

SINASABING “moral” at hindi “political” ang implikasyon ng peace rally.

Iyan ay nagmumula sa kampo ng anti-Duterte.

----$$$--

DAPAT nating matanggap ang katotohanan at huwag maging plastik.

Sinibak ni Strongman Russian President Vladimir Putin ang ilang heneral dahil sa pagsisipsip sa kanya at pagtatago ng katotohanan.

----$$$--

Iyan din ang dapat gawin ni PBBM, sibakin ang mga sipsip at nagsisinungaling o mga tagapayo na walang kakayahan “prangkahin” siya at ipaunawa sa kanya ang “mapait na katotohanan”.

Tanging ang “katotohanan ang magpapalaya sa iyo”.

Ibig sabihin, ang katotohanan lamang ang epektibong batayan ng epektibong desisyon.

-----$$$--

SA ayaw o sa gusto mo, ang peace rally ay pabor sa pamilya Duterte.

Aminin man o hindi ang peace rally ay political.

----$$$--

ANG impeachment proceedings ay “political” — hindi ito magpapatunay ng “guilty” ang inaakusahan.

Ang impeachment ay proseso upang mawala sa puwesto ang isang opisyal ng gobyerno —kahit hindi siya nahahatulang guilty ng alinmang hukuman.

----$$$--

ANG “People Power” sa EDSA 1 at EDSA 2 — ay kinilala ng Korte Suprema bilang isang lehitimong proseso sa pagpapalit ng liderato sa Malacañang.

Ang street protest kung ganu’n ay isa ring political.

---$$$--

DAPAT din nating maunawaan ang papel na ginampanan ng Armed Forces of the Philippines nang mawala sa Malacañang si dating Pangulong Marcos Sr. at ex-President Erap.

Solido ang suporta ng AFP sa street protest.

---$$$--

DAHIL solido o iisa lang ang desisyon ng buong AFP — hindi nagkaroon ng civil war na dati-rating pinangangambahan.

Dahil solido ang sibilyan at military — kinilala ng Korte Suprema ang people protest bilang lehitimong proseso — kahit “hindi nagdaan sa halalan”.

-----$$$--

ANG peace rally ay isang pagpapakita ng puwersa ng mga Duterte — ay puwedeng gamitin sa pagpapalit ng pamahalaan.

Pero, may kulang ang naturang proseso, iyan ay 50 percent lamang.

-----$$$--

SA ngayon, masasabi nating hawak ni PBBM ang AFP na siyang tinitiyak ng Malacañang.

Pero siyempre, iyan din ang pagtiyak ni Apo Makoy at Pareng Erap bago sila mapatalsik.

-----$$$--

Napakahalaga ng “katotohanan” gaano man ito kapait lalo pa’t nasa proseso ng serye ng mga desisyon.

Maunawaan sana ito ni PBBM: Kailangan niya ng matatapat at matatalinong tagapayo — hindi ang simpleng sipsip at hunyango lamang.

-----$$$--

MAHALAGANG matukoy ni PBBM kung paano nagsimula ang sigalot, at kung paano mareresolba ito.

Hindi na kakandidato pa sa 2028 si PBBM — pero ang maniobra sa loob ng kanyang kampo — ang susunog sa kanyang magagandang nagawa sa bansa.

---$$$---

SA totoo lang, hindi dapat ipagamit ni PBBM ang kanyang poder upang sirain ang sinumang aspirante sa 2028 election.

Dapat siyang maging patas o neutral — ‘yan ang legacy na dapat niyang ipamana sa mga kabataan.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.