Kapag walang disposisyon ang lider ng bayan, malaking problema

ni Ka Ambo @Bistado | Mar. 24, 2025

Dahil magkakaiba ang kaalaman, talino, karanasan at moralidad ng indibidwal — magkakaiba ang kanilang magiging ‘desisyon’ hinggil sa iisang sitwasyon.

Pero, ano naman ang disposisyon?

Ang disposisyon — ay ang tapang at pagkukusa mong manindigan at magdesisyon — batay sa pinaniniwalaan mong “tama o mali” — na hango sa iyong kumbiksyon.

----$$$---

Ang malaking problema ay kapag walang disposisyon ang isang tao — lalo na kapag lider ka ng bayan.

Ang katrayanggulo ng disposisyon at kumbiksyon ay ang desisyon!

Iyan ang dapat maunawaan ng marami, lalo na si Senador Imee.

EH, MEY SOLUSYON!

----$$$---

Ayaw na sana nating sumawsaw sa maiinit na isyu pero napakarami ang nangungulit kung ano ang maayos na opinyon.

Kung aktuwal na naghiwalay, eh, kumbaga sa labada, dapat kung decolor, dapat ay isama sa decolor, kapag puti, isama sa puti.

----$$$---

HINDI lang si Sen. Imee Marcos ang naiipit sa nag-uumpugang bato, bagkus ay napakarami.

Sa aktuwal, marami ang nakatameme lang pero aktuwal silang apektado.

-----$$$--

ANO ang dapat gawin — kapag parehong malapit sa iyo ang nagtutunggali?

Bibihira ang nakakaunawa pero sisikapin nating ipaliwanag ang isang diskarte.

Ito ay may kaugnayan sa “disposisyon” at “kumbiksyon”.

----$$$--

HINIRAM natin ang ispeling sa Ingles ng “conviction” at “disposition”.

Magkaiba ang kahulugan -- kung gagamitin ang depinisyon sa English meaning at depinisyon kung gagamitin naman ang “lantay na Tagalog”.

Ibig sabihin, kapag nag-CHATGPT -- English man o Tagalog, ang ibibigay na kahulugan ay “teknikal” na kahulugan batay sa datos na nakapasok sa mga computer.

----$$$--

PERO ang kataga kapag ginagamit nang aktuwal ay may likas na itong kahulugan — batay sa aktuwal na aplikasyon, sosyal at kultura o nakamihasnan.

Ang conviction — ay may konotasyon ng pagiging “guilty” — batay sa English meaning, pero sa Tagalog, ang kumbiksyon — kapag ginagamit sa iskema, estilo o sistema sa pagdedesisyon — ay iba na ang kahulugan.

Ibig sabihin, magdesisyon ka batay sa “pinaniniwalaan mong tama — batay sa iyong kaalaman, talino, karanasan o moralidad”.

 -----$$$--

MALINAW kung ganu’n — kailangang magdesisyon ang isang tao — batay sa kanyang kumbiksyon — mali o tama man ito sa “paningin o paniniwala ng iba”.

Iyan ang disposisyon!

Political will — ang tawag diyan kapag ang desisyon ay may kaugnayan sa sosyal o panlipunan — para sa ikabubuti ng nakararami kahit kontra ang mayorya o ang popular na opinyon o  sentimyento.

-----$$$--

HINDI puwede ang neutral, hindi puwede ang plastic, hindi puwede ang balatkayo, hindi puwede ang boladas.

Dapat ay magdesisyon ka — anuman ang kauuwian nito — negatibo man o positibo sa personal mong buhay.

-----$$$--

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Slogan ni Trump na may ‘Great Again’, orihinal ni Apo Macoy noong 1965

ni Ka Ambo @Bistado | Jan. 25, 2025

‘Make America Great Again’.

Ayon sa artificial intelligence chat, ito ay isang political slogan ni US President Donald Trump.

Pero, ito ay mayroon ding bahid ng ideolohiya.

------$$$---

Ang paggamit ng “great again” bilang political slogan ay nauna nang ginamit ni dating Pangulong Ferdinand Edralin Marcos.

Orihinal si Apo Macoy sa kanyang kampanya noong 1965: “This Nation Can Be Great Again”.

---$$$---

MALINAW ang ideolohiya ni Trump at matandang Marcos.

Imbes na isang siglo na magagamit ng US ang mga military base sa teritoryo ng Pilipinas, pinaikli niya ito at sinagkaan sa loob lang ng 25 taon. 

----$$$--

TULAD ni Trump na prayoridad ang interes at soberanya ng Pilipinas, iyan mismo ang prayoridad ng matandang Marcos kung saan, idineklara at pinanindigang neutral o “non-aligned nation” ng Pilipinas, tulad sa itinatadhana ng Konstitusyon.

----$$$--

KASAMA si ex-FL Meldy, tinanggap nang maayos ng mga dakilang lider ang kanilang pagdalaw.

Hindi malilimutan ang pakikitungo sa mag-asawang Marcos nina Mao Tse Tung ng China; Moamar Kadhafy ng Libya at maging ng mga lider ng USSR at United States.

----$$$--

ISINULONG ng matandang Marcos ang 11 industrial projects upang gawing industriyalisado ang Pilipinas.

Kabilang sa proyekto ang Bataan Nuclear Power Plant na magpapababa sa singil sa elektrisidad at aakit sa mga foreign investor.

----$$$--

SA sobrang inggit at insecurity ng ilang bansa katuwang ang mga traydor na pulitiko, sosyalista at komunista at sa bandang huli — ang imperyalista — kinuyog nila ang liderato ng matandang Marcos.

Nang mawala sa Malacañang si Apo Macoy, idinikta at kinontrol na ng mga dayuhan ang takbo ng buhay ng Pinoy at gobyerno ng Pilipinas.

 ----$$$--

WALA tayong masasabi kung puwedeng ikumpara kay Trump si PBBM o maihalintulad man lamang siya sa kanyang ama.

Hindi kasi malinaw ang slogan na Bagong Pilipinas.

----$$$--

HINDI naman naidikit ng mga propagandista ang Bagong Pilipinas sa orihinal na slogan na “This Nation Can Be Great Again” na kinopya ni Trump.

Mahalagang sundan ni PBBM ang ideolohiya ng kanyang ama na katuwang na nililok ng mga bumubuo ng Presidential Center for Special Studies sa Malacañang Library.

----$$$--

HINDI dapat magpadikta ang Pilipinas sa malalaking bansa para lamang dumipensa kontra China.

Kailangan pa ring manatiling may dignidad at integridad ang Republika ng Pilipinas.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

US, babae at lalaki lang kikilalanin, eh ‘di wow!

ni Ka Ambo @Bistado | Jan. 24, 2025

Lumagda si US President Donald Trump ng kautusan na nagdedeklara na dalawang kasarian lamang ng tao ang kikilalanin ng gobyerno ng United States -- lalaki at babae lamang!

Iyan mismo ang kahulugan ng political will.

-----$$$--

KAHIT may malaking bulto ng populasyon na kontra sa ganitong prinsipyo, pinanindigan pa rin ni Trump kung alin ang tama batay sa kanyang paniniwala.

Iyan naman ang tinatawag na kumbiksiyon.

-----$$$--

ANG diskarteng ito ni Trump ang maghahatid sa kanyang kadakilaan at magmamarka sa kasaysayan.

Iyan din mismo ang tunay na dahilan kung bakit siya dalawang beses na ibinoto ng mga tao sa pinakamakapangyarihan bansa sa daigdig.

----$$$--

MALINAW na hindi tinatablan si Trump ng propaganda sa media at hindi siya natatakot sa panduduro o pananakot ng kanyang mga kalaban.

Bibihira lamang ang lider na may ganyang katangian.

----$$$--

HINDI nagmula sa hanay ng mga batikang pulitiko si Trump, bagkus ay hinugot siya ng kapalaran mula sa pribadong sektor.

Malinaw na tinalo ni Trump ang tradisyunal at sinaunang estilo ng pamumulitika.

----$$$--

SA Pilipinas, ‘yan din ang dapat maganap — at sa totoo lang, ang kasabikan ng mga tao na makahulagpos sa tradisyunal na pulitika ang nagtulak kung bakit nagwagi si Digong.

Si Digong at si Trump ay sinasabing halos magkamukha ng estilo.

-----$$$--

HALIMBAWA, sa siyudad ng Parañaque, nauumay na rin ang mga residente sa Distrito Dos sa apelyidong Tambunting.

Wala nang kinang at nais ng mga tao ang bagong mukha na magpapabago ng kanilang buhay.

-----$$$--

BAGAMAN maituturing na dark horse, naglakas loob ang partylist representative na si Brian Raymund Yamsuan na banggain ang pader.

May bahid na pulitika si Gus Tambunting pero si Yamsuan ay may sapat na karanasan bilang mga ayudante nina dating Senador Ed Angara, Rep. Tessie Aquino-Oreta at Ronnie Puno.

----$$$--

NAHASA si Yamsuan bilang dating assistant secretary sa DILG, media officers sa Malacañang at deputy secretary sa Kamara.

Inihahalintulad ang sitwasyon sa naturang distrito sa pagkakasilat ni Mayor Vico Sotto sa makapangyarihang Eusebio clan sa Pasig City.

----$$$--

SA totoo lang, noong 2022 eleksyon, muntik na ring masilat si Tambunting ng isang hindi gaanong kilalang kandidato.

Sa social media, ipinararamdam ng mga netizens ang pagkakaumay o tulad sa pagkain ay nagsasawa sila sa ‘paglamon’ ng karneng baboy.

-----$$$--

UMAASA ang mga mamamayan na masasabay sila sa nagbabagong henerasyon kung saan itinatakwil ang sinaunang pulitika.

Napakahalaga ng pagbabago, at iyan ang inaasam-asam ng mga mamamayan sa ngayon.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.