80th b-day ni ex-P-Duterte, buong mundo nagse-celebrate!

ni Ka Ambo @Bistado | Mar. 28, 2025

80th birthday ngayon ni Digong.

Extreme celebration si Tatay.

----$$$--

WALA sa hinagap ni Digong at ng kanyang pamilya na sa The Netherlands siya mag-ootsenta-anyos. 

At huwag ka, ipagdiriwang ang kanyang birthday sa malalawak na parke sa Pilipinas — at buong mundo — nang sabay-sabay.

Higit sa pangarap niya ang natupad.

-----$$$--

NAALALA natin ang isang dating presidential candidate na naging mayor pa at kongresista ay namatay nang mahulog habang nagkukumpuni ng bubong.

Ganyan din ang naging kamatayan ng isang lider ng militanteng grupo, nahulog mula sa bubong na kanyang inaatipan.

-----$$$--

ANG dalawang lider-mamamayan na ito ay nabingit ang buhay sa panganib ng serbisyo-publiko, at ang militanteng lider kung sakaling namatay sa gitna ng kilos-protesta o napatay ng pulis o military — ay tiyak na magiging martir.

Pero, nakakahinayang ang kanilang “pagkamatay” — sa isang walang kuwentang aktibidad o sitwasyon.

----$$$--

NAPAKASUWERTE ni Digong kapag binawian siya ng buhay sa loob ng karsel o kahit sa pag-uwi niya ay binawian siya ng buhay sa gitna ng kaliwa’t kanang demonstrasyon.

Mas makulay at makabuluhan ang kamatayan habang may ipinakikipaglabang adhikain kaysa sa tahimik na nagbabakasyon sa Davao at namatay sanhi ng ordinaryong sakit gaya ng diarrhea o dengue o trangkaso o pagkabangga ng motorsiklo.

-----$$$--

ANG kuwentong “Pagong at Matsing” ni Dr. Jose Rizal ay puwedeng magamit dito dahil dinampot si Digong upang ihagis ng karagatan kung saan lihim niyang nais malublob — ang isyu ng giyera kontra droga.

Tama, ang ilang komento na nagsasabi na “hindi dapat bawian ng buhay si Digong ngayon habang nasa loob ng karsel”.

----$$$--

Mas mainam umano ay magtagal pa si Digong sa karsel at magdusa.

Pero, ang pagong ay lihim na nagsasaya habang lumalangoy sa ilog matapos ihagis ng matsing.

-----$$$---

SA totoo lang, hindi si Digong ang tunay na isyu sa sitwasyon, bagkus ay ang posibilidad na maupo sa Malacañang ang kanyang anak na si Vice President Sara Duterte.

Sa 1.3 milyong Pinoy, sa ngayon — tanging si VP Sara — ang may pinakamalapit na tsansa na maging pangulo sapagkat siya ay No. 2 leader ng bansa — wala nang iba pa.

-----$$$---

SA ayaw at sa gusto natin, ang sitwasyon ni VP Sara ay kainggit-inggit dahil oras-oras ay siya ang pinag-uusapan.

Wala nang ganitong klase ng personalidad sa pulitika sa bansa ang may ganyang biyaya ng publisidad.

----$$$---

HARINAWA ay maging mapayapa ang ating bansa sa gitna ng maselang sitwasyong ito.

Hindi sinasadya ay napag-uusapan ang soberanya.

Kapag soberanya, kakambal niyan ang seguridad ng bansa.

----$$$--

AMINADO ang lahat na hindi inilalantad sa publiko ang ilang detalye kaugnay sa pag-aresto kay Digong.

Hindi na tayo dapat pang magtanong.

Mag-abang na lang tayo ng opisyal na pahayag ng Malacañang.

Minsan may nagsabi, mas mainam na manahimik kaysa sumawsaw sa masasalimuot na diskusyon.

‘Yan lang muna tayo, tipi-tipi-tipitin!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Sa pagguho ng tulay sa Isabela, kontraktor, padrino at korupsiyon, ‘magkakapatid’

ni Ka Ambo @Bistado | Mar. 26, 2025

Natabunan na ang isyu hinggil sa pagguho ng tulay sa Cabagan, Isabela.

Nagtuturuan ang mga kumag.

Kumbaga sa postings sa social media, ang keywords dito ay kontraktor, subasta, padrino at korupsiyon.

----$$$--

KAPAG may imprastruktura, hindi kailangan ng debate — idinidikit ‘yan sa korupsiyon.

Kakambal ‘yan ng kasaysayan ng Republika ng Pilipinas.

‘Pag may gumuho, dambuhalang kurakot!

----$$$--

MAY nagma-marites ngayon na isang mambabatas, ang pinalagan na mismo ng mga taga-DPWH.

Isang kontraktor kasi ito na naging partylist.

Kitam, napasok pa niya ang modernong “modus”.

-----$$$---

WALA siyang sariling distrito, pero siya na mismo ang nagma-marites upang mai-black propaganda ang mga lehitimong kontraktor.

Siyempre, ito ay para masulot niya — maliit man o malaking “ticket projects”.

Tsk, tsk, tsk.

----$$$--

EPEKTIBO ang kanyang diskarte, kasi may naine-namedrop siya kakambal ang kanyang padrino.

Presto, ayos na ang buto-buto.

He-he-he.

----$$$--

SIMPLE lang ang boladas: “Napag-usapan na namin iyan ni boss, sa akin ang project na ‘yan”.

Marami siyang padrino at maboladas.

Ere ang angas: Solidarity sa corruption.

Ha! Ha! Ha!

----$$$--

ISANG malaking problema ngayon ay ang mental health at marami ang umiiwas na pag-usapan ito.

Paano mareresolba kung walang kikilos?

-----$$$--

NATUTUWA tayo sa pagsuporta sa mga single parent at pamilya na may anak na may mental health conditions sa Pasig City.

Karaniwang idinadaing ay “ADHD” at “Autism”.

-----$$$--

SA totoo lang, isang civic leader na may apat na anak na dumaranas ng ganitong problema ay nagpapasimuno na tulungan ang mga batang may mental health conditions.

Nagkusang tumulong dahil nararamdaman kasi ni Sarah Discaya ng Pasig City kung paano at gaano ang hirap ng mga magulang na may mga anak na may Autism at ADHD.

----$$$--

“NAUUNAWAAN   ko ang hirap na nararanasan ng mga magulang ng mga batang may ADHD. Alam ko ang kanilang pangangailangan at kung gaano kamahal ang mga therapy at ibang medikal,” wika ni Discaya na kandidatong mayor sa Pasig.

Mahaba ang gamutan at halos habang buhay ang pag-aalaga sa mga batang may ganitong karamdaman kaya’t ito ang pinagtutuunan ni Discaya.

----$$$--

TINIYAK  niya sa mga Pasigueño na hindi rin siya titigil sa pagkakawanggawa at pagtulong sa mga magulang na kapos sa pantustos at panggastos upang maalalayan ang kanilang mga anak.

“Ang sipag, pananampalataya sa Diyos, at tiwala sa sarili  ang pundasyon nating lahat upang maibsan ang mabibigat na suliraning ito,” ani Discaya.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Gobyerno, kung inaasistehan mga obrero, pobreng magsasaka at mangingisda, saklolohan din

ni Ka Ambo @Bistado | Mar. 25, 2025

Walang duda, kailangan ang reporma sa PhilHealth.

Iyan din ang tipong lumabas sa oral argument mismo sa Korte Suprema.

-----$$$--

BATAY sa opinyon ni SC Associate Justice Antonio Kho, Jr dapat nang ireporma ang PhilHealth dahil sa hindi maayos na pamamahala.

Sinasabing mas malaki ang natanggap na pondo kaysa sa nagastos nito kaya’t ipinababalik sa National Treasury ang sobrang pondo.

----$$$--

BATAY kasi sa probisyon sa General Appropriations Act (GAA) of 2024, hindi lang ang PhilHealth ang inaatasang magsauli ng pondo, bagkus ay maging ang iba pang korporasyon na pag-aari ng gobyerno.

Ayon sa Department of Finance (DOF), umabot sa P89.9 bilyon ang hindi nagamit na subsidy ng PhilHealth mula 2021 hanggang 2023.

----$$$--

NAPAG-ALAMAN din na ang PhilHealth ay mayroong P700 billion reserve fund na naipon sa loob ng mga taon.

Pero noong Disyembre 19, 2024, P60 bilyon na ang na-remit pabalik sa National Treasury.

----$$$--

NAKATULONG ang oral argument sa Korte Suprema dahil nabisto ang kahinaan ng PhilHealth sa pangangasiwa.

Ngayon ay nagkukumahog ang PhilHealth sa pagpapaganda ng benepisyo kasama ang pag-alis sa 45-day benefit limit.

-----$$$--

PERO, bakit ngayon lang sila kumikilos upang mapagbuti ang benepisyo sa mga miyembro?

Malinaw na hindi dapat pagkatiwalaan ang mga opisyales nito ng malaking pondo.

Iyan mismo ang argumento kaya’t ipinababalik sa National Treasury ang “unused fund”.

-----$$$---

MAUGONG ang panawagan ng reporma sa loob ng naturang korporasyon ng gobyerno.

Dapat itong ipatupad sa lalong madaling panahon.

Entiendes?

----$$$---

SA gitna ng masalimuot na isyung political sa bansa, hindi dapat pabayaan ang serbisyo sa ordinaryong tao.

Imbes na magpropaganda at makisawsaw sa isyu, magpokus sana ang mga ehekutibo sa mabilis at episyenteng pagtulong sa ordinaryong mamamayan.

----$$$--

KUNG inaasistehan ang ordinaryong obrero, dapat ding saklolohan ng pamahalaan ang pobreng magsasaka at mangingisda.

Dahil sa nagkalat na imported agri-products, diretso sa pagkalugmok ang sektor na ito.

 ----$$$--

TANGING ang mga komprador, broker, importer, middlemen at mga ismagler ang ‘nagpapasasa’ sa pamahalaan.

Sabagay, iyan ay isang dambuhalang problema kahit sino pa ang maupo sa Malacañang.

He-he-he!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.