3 drug trafficker, nasakote

News @Balitang Probinsiya | July 9, 2024

Quezon — Tatlong drug trafficker ang nadakip sa drug-bust operation ng mga otoridad kamakalawa sa Brgy. Guis-Guis, Sariaya sa lalawigang ito.

Hindi na muna pinangalanan ang mga suspek na pawang nasa hustong gulang habang iniimbestigahan sila ng pulisya. 

Ayon sa ulat, may tinanggap na impormasyon ang mga otoridad na nagbebenta ng shabu ang mga suspek kaya agad nagsagawa ng drug-bust ang mga operatiba na naging dahilan upang madakip ang mga pusher.

Napag-alaman na nakakumpiska ang pulisya ng walong gramo ng hinihinalang shabu at markadong pera sa pag-iingat ng mga suspek.

Nakapiit na ang mga suspek na pawang nahaharap sa kasong paglabag sa Dangerous Drugs Act of 2002.

---

SUNDALO, PATAY SA BUS

NEGROS OCCIDENTAL -- Isang sundalo ang namatay nang mabangga ng isang pampasaherong bus ang kinalululanan nitong motorsiklo kamakalawa sa Brgy. Manalad, Ilog sa lalawigang ito.

Ang biktima ay kinilala ng pulisya na si Pfc. John Leo Saldua, 33, sundalo ng Philippine Army (PA) na nakatalaga sa nasabing lalawigan.

Ayon sa ulat, nawalan umano ng kontrol sa pagmamaneho ang bus drviver kaya nabangga nito ang motorsiklong kinalululanan ng biktima.

Nabatid na sa lakas ng impact ay nagtamo ng malaking pinsala sa ulo at katawan ang biktima na agad nitong ikinamatay.

Nangako naman ang bus driver na tutulong sa gastos at danyos sa pagkamatay ng biktima.

---

LABORER, BINOGA NG KATOMA

AKLAN -- Isang laborer ang sugatan nang tagain sa ulo ng kanyang kainuman kamakalawa sa Brgy. Arcanghel, Balete sa lalawigang ito.

Kinilala ng pulisya ang biktima na si Anthony But, samantalang ang suspek ay si Mars Cebuano, kapwa nasa hustong gulang at parehong nakatira sa nabanggit na barangay.

Ayon sa ulat, habang nag-iinuman ay nagkaroon ng pagtatalo ang dalawa hanggang kumuha ng itak ang suspek at tinaga sa ulo ang biktima.

Agad dinala ng mga saksi ang biktima sa ospital at kasalukuyang inoobserbahan.

Sumuko naman sa pulisya ang suspek na nahaharap sa kasong frustrated murder at illegal possession of deadly weapon.

---

MAGBIYENAN, TODAS SA PAMAMARIL

MAGUINDANAO DEL SUR -- Patay ang magbiyenan nang pagbabarilin ng mga armadong salarin kamakalawa sa Brgy. Poblacion, Ampatuan sa lalawigang ito.

Ang mga biktimang nagtamo ng mga tama ng bala sa katawan ay nakilalang sina Kalmo Butatek, 80, at Kael Nandang, 48, kapwa nakatira sa nabanggit na barangay.

Ayon sa ulat, habang nasa labas ng kanilang bahay ang magbiyenan ay biglang sumulpot ang mga hindi kilalang armadong lalaki at agad pinagbabaril ang mga biktima.

Matapos tiyaking patay na ang mga biktima ay mabilis na tumakas ang mga suspek,

Inaalam pa ng pulisya ang motibo ng mga suspek sa pamamaslang sa magbiyenan.

Bebot na rider, sugatan sa bus

News @Balitang Probinsiya | July 8, 2024

Aklan — Isang babaeng rider ang sugatan nang mabangga ng isang pampasaherong bus ang kinalululanan nitong motorsiklo kamakalawa sa Brgy. Poblacion, Banga sa lalawigang ito.

Hindi na muna pinangalanan ng mga otoridad ang biktimang 35-anyos habang hindi pa naipapabatid sa kanyang pamilyang ang kinasangkutan nitong aksidente. 

Ayon sa ulat, nawalan umano ng kontrol sa pagmamaneho ang hindi pinangalanang bus driver, nasa hustong gulang, kaya nabangga ang motorsiklong kinalululanan ng biktima.

Nabatid na sa lakas ng impact ay nagtamo ng malaking pinsala sa ulo at katawan ang biktima at sa ngayon ay ginagamot na siya sa ospital.

Napag-alaman na sinampahan na ng mga otoridad ng kasong reckless imprudence resulting to physical injury and damage to property ang bus driver.

---

OPISYAL NG NPA, SUMUKO

NEGROS OCCIDENTAL -- Isang opisyal ng komunistang New People’s Army (NPA) ang sumuko sa pamahalaan kamakalawa sa bayan ng Don Salvador Benedicto (DSB) sa lalawigang ito.

Para sa kanyang seguridad ay hindi na pinangalanan ng mga otoridad ang opisyal ng NPA.

Nabatid na isinurender din sa mga otoridad ng naturang official ang dala niyang armas at subersibong dokumento.

Ayon sa sumukong opisyal ng NPA, nais na niyang magbagong buhay kaya nagbalik-loob na siya sa gobyerno.

Patuloy pang isinasailalim sa taktikal na interogasyon ang nasabing rebelde upang matiyak na bukal sa kanyang kalooban ang pagsuko sa pamahalaan.

---

SENGLOT, NALUNOD SA ILOG

DAVAO DEL SUR -- Isang lasing na lalaki ang namatay nang malunod kamakalawa sa ilog na sakop ng Brgy. Coronon, Sta. Cruz sa lalawigang ito.

Sa kahilingan ng kanyang pamilya ay hindi na pinangalanan ang biktimang residente ng naturang bayan.

Ayon sa ulat, habang naglalakad sa gilid ng Lagan River ay nawalan ng balanse ang biktima dulot ng kalasingan kaya nahulog ito sa nasabing ilog.

Tinangka ng mga residente na sumaklolo, pero lumubog sa malalim na bahagi ng ilog ang biktima.

Nabatid na makalipas ang ilang oras na paghahanap ay lumutang sa ilog ang bangkay nito.

---

2 NOTORYUS NA TULAK, TIMBOG

ILOILO -- Dalawang notoryus na drug pusher ang dinakip ng mga otoridad sa drug-bust operation ng mga operatiba kamakalawa sa Brgy. Aganan, Pavia sa lalawigang ito.

Nakilala ang mga suspek na sina Jonathan Ilisan at Gene Guillem, kapwa nasa hustong gulang at parehong residente sa nabanggit na lalawigan.

Ayon sa ulat, may tinanggap na impormasyon ang mga otoridad na nagbebenta ng shabu ang mga suspek kaya nagsagawa ng buy-bust operation ang mga operatiba na naging dahilan upang madakip ang dalawang pusher.

Napag-alaman na nakakumpiska ang pulisya ng 85 gramo ng hinihinalang shabu at markadong pera sa pag-iingat ng suspek.

Nakapiit na ang mga suspek na kapwa nahaharap sa kasong paglabag sa Comprehensive Dangerous Drugs Act of 2002.

Bebot na NPA, sumurender

News @Balitang Probinsiya | July 7, 2024

ILOCOS NORTE -- Isang babaeng miyembro ng komunistang New People’s Army (NPA) ang sumuko sa pamahalaan kamakalawa sa lungsod ng Batac sa lalawigang ito.

Para sa kanyang seguridad ay hindi na pinangalanan ng mga otoridad ang babaeng komunista.

Ayon sa ulat, isinuko rin sa mga otoridad ng naturang NPA ang dala niyang armas at subersibong dokumento.

Sinabi ng sumurender na rebelde na nais na niyang magbagong buhay kaya nagbalik-loob sa gobyerno.

Patuloy pang isinasailalim sa taktikal na interogasyon ang babaeng NPA upang matiyak na bukal sa kanyang kalooban ang pagsuko sa pamahalaan.

---

Small-time tulak, tiklo sa buy-bust

AKLAN -- Isang small-time drug pusher ang dinakip ng mga otoridad sa buy-bust operation kamakalawa sa Brgy. Camanci.

Nakilala ang suspek na si Ronnie Mendez, nasa hustong gulang at residente sa nabanggit na bayan. 

Ayon sa ulat, may tinanggap na impormasyon ang mga otoridad na nagbebenta ng shabu ang suspek kaya nagsagawa ng buy-bust operation ang mga operatiba na naging dahilan upang madakip ang pusher.

Nabatid na nakakumpiska ang pulisya ng isang sachet ng hinihinalang shabu at markadong pera sa pag-iingat ng suspek.

Nakapiit na ang suspek na nahaharap sa kasong paglabag sa Comprehensive Dangerous Drugs Act of 2002.

---

Most wanted criminal, arestado

ILOILO -- Isang most wanted criminal ang nadakip ng pulisya kamakalawa sa kanyang hideout sa Brgy. Pagdugue, Dumangas sa lalawigang ito.

Hindi muna pinangalanan ng pulisya ang suspek habang iniimbestigahan pa ito. 

Ayon sa ulat, dinakip ng mga otoridad ang suspek sa bisa ng warrant of arrest na inisyu ng korte kaugnay sa kinasasangkutan nitong 10-counts ng kasong rape sa lalawigan.

Napag-alaman na may nagbigay ng impormasyon sa pulisya sa pinagtataguan ng suspek kaya agad pinuntahan at inaresto ng mga operatiba ang rapist sa naturang lugar.

Hindi naman nanlaban ang suspek nang dakpin siya ng mga otoridad.

---

Notoryus na killer, dedo sa shootout

CAVITE -- Isang notoryus na killer ang napatay nang manlaban at makipagbarilan sa pulisya kamakalawa sa Brgy. Molino 6, Bacoor City sa lalawigang ito.

Ang suspek na nagtamo ng mga tama ng bala sa katawan ay kinilalang lang sa alyas na “Junel,” nasa hustong gulang at nakatira sa nabanggit na lungsod.

Napag-alaman na dadakpin sana ng mga otoridad ang suspek dahil sa panunutok nito ng baril sa isang hindi pinangalanang babae sa nasabing barangay, pero imbes na sumuko at pinagbabaril nito ang mga operatiba.

Dahil dito, gumanti ng putok ang mga otoridad na naging dahilan kaya napatay ang suspek, kung saan napag-alaman ng pulisya na may nakabinbin na 4-counts ng kasong murder.

Nakakumpiska ang mga otoridad ng isang baril at mga bala sa pinangyarihan ng insidente.