Drug trafficker, huli sa drug-bust

News @Balitang Probinsiya | July 12, 2024

Camarines Norte — Isang drug trafficker ang naaresto sa drug-bust operation ng mga otoridad kamakalawa sa Brgy. Del Rosario, Mercedes sa lalawigang ito.

Ang suspek ay kinilala ng pulisya sa alyas na “Mike”, nasa hustong gulang at residente ng nabanggit na bayan.

Ayon sa ulat, naaresto ang suspek nang pagbentahan nito ng shabu ang mga operatibang nagpanggap na buyer. 

Napag-alaman na nakakumpiska ang mga otoridad ng mahigit 150 gramo ng hinihinalang shabu at markadong pera sa pag-iingat ng suspek.

Nakapiit na ang suspek na nahaharap sa kasong paglabag sa Comprehensive Dangerous Drugs Act of 2002.

---

EX-MARINE SOLDIER, TIKLO SA BOGA

BACOLOD CITY -- Isang ex-marine soldier ang inaresto ng pulisya nang makumpiskahan ng isang baril kamakalawa sa Sitio Villa Servando, Brgy. Singcang-Airport sa lungsod na ito.

Hindi na muna pinangalanan ang suspek habang iniimbestigahan ito ng mga otoridad.

Ayon sa ulat, isang residente sa nasabing barangay ang nakaalitan ng suspek at habang nagtatalo ay ipinakita ng ex-marine soldier ang nakasukbit niyang baril.

Dahil dito, nagtungo sa himpilan ng pulisya ang residente at inireklamo ang suspek kaya inaresto ang ex-marine soldier na nakumpiskahan ng walang lisensyang baril na kalibre .45 pistola at mga bala. 

Hindi na nanlaban ang suspek nang dakpin siya ng mga otoridad at sa ngayon ay nahaharap sa kasong illegal possession of firearms and ammunitions.

---

MANGINGISDA, TEPOK SA KIDLAT

ANTIQUE -- Isang mangingisda ang namatay nang tamaan ng kidlat kamakalawa sa karagatang sakop ng Brgy. Batbatan, Culasi sa lalawigang ito.

Ang biktima ay kinilalang si Giovanni Nacasabug, nasa hustong gulang, residente ng Brgy. Lamputong sa nabanggit na bayan.

Ayon sa ulat, nangingisda sa dagat si Nacasabug nang biglang bumuhos ang ulan at kasunod ang pagkidlat na tumama sa biktima.  

Dahil sa lakas ng boltahe ng kidlat na tumama kay Nacasabug ay agad itong nasawi.

Sa pagsusuri ng mga otoridad ay nabatid na nagkaroon ng 3rd degree burns sa katawan ang biktima na siya nitong ikinamatay.

---

EMPLEYADA, PATAY SA KURYENTE

KALINGA -- Isang empleyada ang namatay nang makuryente kamakalawa sa Brgy. Camalog, Pinukpok sa lalawigang ito.

Ang biktima ay kinilala ng pulisya na si Gina Asbok, 50, kawani ng Department of Environment and Natural Resources (DENR) at nakatira sa Bulanao, Tabuk City sa naturang lalawigan.

Ayon sa ulat, habang pinamamahalaan ni Asbok ang paggawa ng mga kapwa niya kawani ng DENR sa boom barrier ay napahawak ang biktima sa live wire.

Nabatid na sa lakas ng boltahe ng kuryente ay nagtamo ang biktima ng 3rd degree burns sa buong katawan.

Dinala ng kanyang mga kasamahan sa trabaho ang biktima sa ospital, pero idineklara itong dead-on-arrival sa pagamutan.

Magsasaka natagpuang patay sa bukid

News @Balitang Probinsiya | July 11, 2024

Quezon — Isang 59-anyos na magsasaka ang natagpuang patay sa bukid sa Brgy. Casasahan Ibaba, Gumaca sa lalawigang ito.

Sa kahilingan ng pamilya ng biktima ay hindi na isinapubliko ng mga otoridad ang pangalan ng magsasaka.

Napag-alaman na isang kamag-anak ang nakatagpo sa bangkay ng biktima na nakadapa sa naturang bukid at ini-report sa pulisya.

Z

Sa pagsisiyasat ng pulisya, napag-alamang may 3rd degree burns sa katawan ang biktima na posible umanong tinamaan ito ng kidlat.

---

DRUG PUSHER TIMBOG SA BUY-BUST

ISABELA -- ISANG drug pusher ang dinakip ng mga otoridad sa buy-bust operation kamakalawa sa Brgy. Minante 1, Cauayan City sa lalawigang ito.

Itinago muna ng pulisya ang suspek sa alyas na Pito, nasa hustong gulang, habang iniimbestigahan pa.

Ayon sa ulat, naaresto ang suspek nang pagbentahan nito ng shabu ang mga operatiba na nagpanggap na buyer.

Nabatid na nakakumpiska ang mga otoridad ng isang sachet ng shabu at markadong pera sa pag-iingat ng suspek.

Nakapiit na ang suspek na nahaharap sa kasong paglabag sa Comprehensive Dangerous Drug Act of 2002.

---

EMPLEYADO, NIRATRAT NG RIDING-IN-TANDEM

NEGROS OCCIDENTAL -- ISANG empleyado ang namatay nang pagbabarilin ng riding-in-tandem kamakalawa sa Brgy. Mambaroto, Sipalay City sa lalawigang ito.

Ang biktimang nagtamo ng mga tama ng bala sa katawan ay nakilalang si Andre Pajarillo, nasa hustong gulang, empleyado ng Department of Agrarian Reform (DAR) at residente sa nasabing barangay.

Ayon sa ulat, habang lulan si Pajarillo ng kanyang motorsiklo sa nasabing lugar ay biglang sumulpot ang mga suspek na nakasakay din sa isang motor at agad pinagbabaril ang biktima.

Matapos tiyaking patay na ang biktima saka tumakas ang mga salarin.

Nagpalabas na ng manhunt operation ang pulisya para madakip ang mga suspek.

---

SK CHAIRMAN NANUNTOK NG PULIS, ARESTADO

AKLAN--ISANG Sangguniang Kabataan (SK) chairman na nanuntok ng isang pulis ang inaresto kamakalawa sa Brgy. Torralba, Banga sa lalawigang ito.

Hindi na pinangalanan ng pulisya ang suspek na SK chairman na residente sa nabanggit na barangay.

Ayon sa ulat, dinakip ng mga otoridad ang SK chairman sa bisa ng warrant of arrest na inisyu ng korte sa kasong direct assault dahil sa panununtok nito sa isang pulis na rumesponde sa away ng mga kabataan sa nasabing barangay.

Hindi naman nanlaban ang SK chairman nang dakpin siya,

Nakapiit na ang suspek sa himpilan ng pulisya.

Mangingisda nalunod sa ilog

News @Balitang Probinsiya | July 10, 2024

Pangasinan — Isang mangingisda ang natagpuang patay kamakalawa na nakalutang sa ilog na sakop ng Brgy. Guelew, San Carlos City sa lalawigang ito.

Sa kahilingan ng pamilya ng biktima ay hindi na isinapubliko ng mga otoridad ang pangalan ng lolong namatay sa lunod. 

Nabatid na ilang residente ang nag-report sa pulisya tungkol sa natagpuan nilang bangkay na nakalutang sa ilog.

Huli umanong nakitang buhay ang biktima na sakay ng bangka para mangisda sa ilog. 

Sa imbestigasyon ng mga otoridad ay napag-alamang tumaob ang sinasakyang bangka ng biktima kaya ito nalunod sa ilog.

---

RIDER NA PULIS, PATAY SA SEMPLANG

NEGROS OCCIDENTAL -- Isang rider na pulis ang namatay nang sumemplang ang kinalululanan nitong motorsiklo kamakalawa sa Brgy. Bato, Hinigaran sa lalawigang ito.

Ang biktima ay nakilalang si P/Sgt. Steven Donasco, nakatalaga sa Hinigaran Police Station sa nasabing lalawigan.

Ayon sa ulat, habang minamaneho ni Donasco ang kanyang motorsiklo ay nawalan ito ng kontrol kaya bigla itong sumemplang.

Napag-alaman na nagtamo ang biktima ng malaking pinsala sa ulo nang mabagok ito sa sementadong kalsada.

Agad dinala ng mga residente ang biktima sa ospital, pero idineklara itong dead-on-arrival. 

---

BIGTIME TULAK, HULI SA DRUG-BUST

CAMARINES SUR -- Isang bigtime drug pusher ang naaresto sa drug-bust operation ng mga otoridad kamakalawa sa Brgy. San Esteban, Nabua sa lalawigang ito.

Ang suspek ay kinilala ng pulisya na si Allan Prades, nasa hustong gulang at residente ng nabanggit na barangay. 

Ayon sa ulat, nadakip ang suspek nang pagbentahan nito ng shabu ang mga operatibang nagpanggap na buyer ng illegal drugs. 

Napag-alaman na nakakumpiska ang mga otoridad ng mahigit 350 gramo ng hinihinalang shabu at markadong pera sa pag-iingat ng suspek.

Nahaharap ang suspek sa kasong paglabag sa Comprehensive Dangerous Drugs Act of 2002.

---

2 KELOT, DEDBOL SA SUV

SOUTHERN LEYTE -- Dalawang lalaki ang namatay nang mabangga ng isang SUV kamakalawa sa national highway ng bayan ng Libagon sa lalawigang ito.

Hindi na muna pinangalanan ang dalawang biktima at ang driver ng SUV habang nagsasagawa ng imbestigasyon ang mga otoridad.

Ayon sa ulat, nasa gilid ng kalsada ang dalawang biktima at ginagawa ang gamit nilang nasirang motorsiklo nang nabangga sila ng SUV.

Sa imbestigasyon ay inamin ng SUV driver na nawalan siya ng kontrol sa pagmamaneho kaya nabangga niya ang dalawang biktima.

Nakapiit na ang SUV driver na nahaharap sa kasong reckless imprudence resulting to double homicide and damage to property.