Mga 'bata; sa Gilas Pilipinas umangat ang laro sa FIBA — Cone

ni Anthony E. Servinio @Sports | Nov. 26, 2024

Photo: Coach Tim Cone - FIBA Asia Cup

Matapos umani ng dalawang malaking tagumpay sa 2025 FIBA Asia Cup Qualifiers sa harap ng mga kababayan sa MOA Arena nitong nakaraang linggo, nakatingin si Gilas Pilipinas Coach Tim Cone sa mas malaking larawan.

Tinalo ng mga Pinoy ang Aotearoa New Zealand, 93-89, noong Huwebes at sinundan ng Hong Kong noong Linggo, 93-54. Sa gitna ng mga sigaw sa palaruan na ipasok ang paboritong si Dwight Ramos, hindi na nagsugal si Coach Cone at may pilay itong nakuha sa panalo sa Tall Blacks.

Binigyan rin ng mas maraming minuto ang mga kabataan na sina Kevin Quiambao at Mason Amos na hindi ipinasok laban noong huling laro. Isang dapat tutukan ang kanilang depensa laban sa three-points.

Nagpasok ng 18 ang New Zealand habang 10 ang Hong Kong. Malaki rin ang inaasahan kay Quiambao, Amos at Carl Tamayo na bumomba ng 16 laban sa Hong Kong matapos malimitahan sa dalawang puntos sa New Zealand.

Ang tatlo ang napipisil na kinabukasan ng pambansang koponan at malaking bentahe ang kakayahan nila maglaro ng halos lahat ng puwesto.

Mahalaga na masanay ang lahat sa sistema. Sa simula ng ensayo nila sa Inspire Sports Academy medyo kumapa ang lahat kahit ilang buwan ang nakalipas mula 2024 Olympic Qualifiers subalit nabalik din ang talas.

Sina Justin Brownlee pa rin ang nagdala ng koponan kahit hindi naglaro sa huling quarter kontra Hong Kong. Mataas din ang inangat ng laro ni Kai Sotto na naka-dalawang double-double.

Susuriin muli kung magdadagdag ng manlalaro sa listahan sa gitna ng mga pilay kay Ramos, Jamie Malonzo at Calvin Oftana. Mas pabor si Coach Cone sa kasalukuyang 15 dahil mas madali magturo sa gitna ng maikling panahon upang mag-ensayo.

Lalakbay ang Gilas para sa pangatlo at huling qualifier sa Pebrero para harapin ang New Zealand and Chinese-Taipei sa kanilang mga bansa. Ang FIBA Asia Cup ay tatakbo mula August 5 hanggang 17, 2025 sa Jeddah.

NU Lady Bulldogs 3 peat na sa Shakeys V-League Pre-season Cup

ni Anthony E. Servinio @Sports | Nov. 25, 2024

Photo: NU Lady Bulldogs - Shakey’s Super League

Walang nakapigil sa National University at kinolekta nila ang pangatlong sunod na Shakey’s Super League Collegiate Pre-season Champion kontra De La Salle University Linggo ng gabi sa Rizal Memorial Coliseum.

Kinuha ng Lady Bulldogs ang Game Two sa apat na set – 23-25, 25-18, 25-16 at 25-20 – at tapusin ng maaga ang seryeng best-of-three, 2-0. Idinampot ng NU ang sarili matapos madulas sa unang set at inilabas ang bangis.

Nagpalitan ng pagkakataon ang mga bumida noong Game One noong Biyernes na sina Bella Belen, Alyssa Solomon at Evangeline Alinsug para sa kanilang bagong talagang coach Sherwin Meneses patungo sa kanyang unang tropeo para sa paaralan. Bumanat ng 19 puntos si Solomon habang 15 ang ambag ni Belen at 10 galing kay Alinsug.

Walang naka-10 sa Lady Spikers at siyam lang ang nagawa ni Angel Canino na hindi napigil ang kanilang pangalawang sunod na pagkabigo matapos walisin ang walong laro ng elimination hanggang semifinals.

Samantala, napunta ang pangatlong puwesto Far Eastern University na kinailangan ang limang set para manaig sa University of Santo Tomas. Kinuha ng Lady Tamaraws ang huling dalawang set – 20-25, 25-19, 23-25, 25-19 at 15-12 – tampok ang 18 puntos ni Tin Ubaldo.

Pagkatapos ng mga mainitang laro ay pinarangalan si Belen bilang Most Valuable Player at Best Open Spiker. Dinomina ang seremonya ng mga kakamping sina Best Opposite Spiker Solomon, Best Setter Camilla Lamina at Best Libero Shaira Jardio.

Ang iba pang mga tumanggap ng parangal ay sina Best Middle Blocker Amie Provido ng DLSU, Second Best Middle Blocker Jazlyn Ellarina ng FEU at Second Best Open Spiker Angeline Poyos ng UST. Paghahandaan na ng 18 lumahok na koponan ang kanilang mga liga na UAAP at NCAA na nalalapit na ang pagbubukas.

Gilas darayo na sa KSA matapos talunin ang HK sa FIBA Asia Cup

ni Anthony E. Servinio @Sports | Nov. 25, 2024

Photo: Kai Sotto, Brownlee at Fajardo ng GIlas Pilipinas - FIBA Asia Cup

Pupunta na ng Saudi Arabia ang Gilas Pilipinas para sa 2025 FIBA Asia Cup matapos nilang iligpit ng bisitang Hong Kong, 93-54, sa pagtatapos ng pangalawang window ng qualifiers Linggo ng gabi sa MOA Arena. Tiyak na ang mga Pinoy na nag-iisa sa tuktok ng Grupo B na may malinis na kartadang 4-0.

Nakasabay ang wala pang panalong Hong Kong sa unang limang minuto at hinawakan ang 10-9 lamang hanggang ibinura ng Gilas ang agam-agam ng kanilang mga tagahanga.

Bumira ng 13 magkasunod na puntos sina Justin Brownlee, June Mar Fajardo, Kai Sotto, Chris Newsome at ang bagong-pasok Kevin Quiambao para maging 22-9. Saglit nabuhayan ang Hong Kong at ipinasok ang unang pitong puntos ng pangalawang quarter at magbanta, 25-27, subalit nakahinga ang Gilas sa 14 na walang sagot na puntos nina Carl Tamayo, CJ Perez, Fajardo at Newsome para sa mas komportableng 41-25 agwat. Inihatid nina Tamayo, Quiambao at Mason Amos ang mga puntos upang matamasa ang pinakamalaking lamang na siya rin ang huling talaan.

Kinuha ni Coach Tim Cone ang pagkakataon na bigyan ng mas maraming minuto ang mga hindi masyadong ginamit sa 93-89 panalo sa Aotearoa New Zealand noong Biyernes sa parehong palaruan.

Nanguna sa Gilas si Tamayo na may 16 puntos bilang reserba. Sumunod na may 14 si Fajardio at 13 si Brownlee kahit hindi na siya pinasok sa huling quarter.

Double-double sa pangalawang sunod na laro si Sotto na 12 at 15 rebound at humabol sa 10 si Perez. Kumuha ng opensa ang Hong Kong mula kay Leung Shiu Wah na may 11 at Oliver Xu na may 10.

Lalakbay ang Gilas para sa pangatlo at huling qualifier sa Pebrero para harapin ang New Zealand and Chinese-Taipei. Ang FIBA Asia Cup ay gaganapin mula August 5 hanggang 17, 2025 sa Jeddah.