DLSU balik sa UAAP Finals

ni Anthony E. Servinio @Sports | Dec. 1, 2024

Photo: La Salle Men's Team - UAAP Varsity Channel

Balik sa pamilyar na teritoryo ang defending champion De La Salle University sa 87th UAAP Men’s Basketball Finals.

Giniba ng Green Archers ang Adamson, 70-55, Sabado sa Araneta Coliseum upang itakda ang seryeng best-of-three kontra sa tinalo nila noong nakaraang taon University of the Philippines.

Galing sa 17-araw na pahinga, walang ipinagbago sa laro ng DLSU at linimatahan ang Soaring Falcons sa anim na puntos lang sa pangalawang quarter upang itayo ang 36-17 lamang pagsapit ng halftime.

Mula doon ay walang nakapigil sa Green Archers na lalong lumayo, 58-31, bago magsara ang pangatlong quarter.

Nagsabog ng 14 puntos na napipisil na MVP Kevin Quiambao at sinuportahan ni Joshua David na may 11. Kinuha ni Coach Topex Robinson na bigyan ng minuto ang mga reserba na nag-ambag ng 41 kumpara sa 27 ng Adamson.

Nanguna sa Adamson si reserba Royce Mantua na may 14 habang may 13 si Cedrick Manzano kahit napilitang umupo ng matagal bunga ng dalawang maagang foul.

Hindi rin nakalaro sina John Arthur Calisay at Anthony Fransman dahil sa trangkaso. Sinelyuhan ng UP ang tiket nila patungong Finals sa bisa ng 78-69 tagumpay sa University of Santo Tomas sa naunang laro.

Hahanapin nila ang ika-apat na titulo sa kasaysayan ng paaralan matapos ang 1939, 1986 at 2022. Nanguna sa UP sina Francis Lopez at Harold Alarcon na parehong may 16 puntos habang 13 si Reyland Torres.

Siyam na puntos lang si Quentin Millora-Brown pero humakot ng 19 rebound. Tig-12 sina Nic Cabanero, Kyle Paranada at Angelo Crisostomo para sa Tigers. Ito na rin ang huling laro sa UAAP ni Christian Manaytay na nag-ambag ng 10.

Soaring Falcons kinumpleto ang Final 4 sa UAAP playoffs

ni Anthony E. Servinio @Sports | Nov. 28, 2024

Photo: Adamson University Soaring Falcons - UAAP

Mga laro ngayong Sabado – Araneta

12:00 PM Adamson vs. Ateneo (W)

3:30 PM UP vs. UST (M)

6:30 PM DLSU vs. Adamson (M)

Tuloy ang ligaya para sa Adamson University at pasok na sila sa 87th UAAP Men’s Basketball Tournament Final Four. Giniba ng Soaring Falcons ang pangarap ng University of the East sa knockout playoff para sa ika-apat at huling upuan, 68-55, sa MOA Arena Miyerkules ng gabi.

Isang determinadong UE sa likod nina Jack Cruz-Dumont at John Michael Abate ang tumalon sa 10-2 lamang dala ang bigat ng limang sunod na talo.

Subalit sinagot ito ng 14 sunod ng Adamson para makuha ang unang quarter, 16-10, sa pag-ulan ng tres nina Matty Erolon, Anthony Fransman, Emmanuel Anabo at Matthew Montebon.

Hindi pa tapos ang Soaring Falcons at ginamit ni Cedrick Manzano ang kanyang lakas para sa unang limang puntos ng pangalawang quarter, 20-10.

Nagawang bumalik ng Warriors, 20-21, subalit nandiyan pa rin si Manzano para lumayo sa halftime, 39-30. Lalong lumalim ang problema ng UE at inilabas si Precious Momowei matapos ang masamang bagsak at lamang ang Falcons, 48-38, at 3:25 sa orasan.

Biglang nawalan ng hangin ang Warriors at kinuha ng Falcons ang pagkakataon para itakda ang laro sa Sabado kontra numero uno at defending champion De La Salle University sa Araneta Coliseum Nagtapos si Manzano na may 17 puntos na pinakamarami niya ngayong taon at 11 rebound.

Sumunod si Montebon na may 13 kasama ang tres na nagtakda ng huling talaan. Maghihintay pa ang Warriors kung kailan sila makakabalik sa Final Four na huli nilang natamasa noong 2009.

Nagtala ng 15 si Jack Cruz-Dumont at tig-10 sina Momowei, Abate at Rainier Maga subalit isang free throw lang ang na-ambag ng kanilang mga reserba kay Wello Lingolingo.

Maglalaro sa kabilang serye ang University of the Philippines at University of Santo Tomas. Magsisimula rin ang stepladder playoff ng Women’s sa pagitan ng Adamson at Ateneo de Manila University.

Kaya Iloilo positibo sa laban sa AFC League 2

ni Anthony E. Servinio @Sports | Nov. 28, 2024

Photo: KAYA Futbol Club - FB

Mga laro ngayong Huwebes

6 PM Jeonbuk vs. Cebu (Jeonju)

8 PM Kaya vs. Sanfreece (Rizal Memorial)

Galing sa inspiradong resulta sa nakaraang laro, bitbit ng Kaya FC Iloilo ng Philippines Football League ang positibong enerhiya sa pagsalubong sa bisitang Sanfreece Hiroshima ng Japan sa pagpapatuloy ng 2024-2025 AFC Champions League Two ngayong Huwebes sa Rizal Memorial Stadium.

Susubukan ng Kaya na sundan ang 2-1 tagumpay sa Eastern SC noong Nobyembre 7 ngunit magiging mas malaking hamon ang nangungunang koponang Hapon.

Bilang huling laro ng Kaya sa tahanan, maliban sa pagpapabuti ng pag-asa na makasingit sa playoffs ay gusto nilang makapagtala ng kahit isang magandang resulta sa harap ng mga kababayan.

Pantay sa tatlong puntos ang Kaya at Eastern at maaari pa nilang mahabol ang pumapangalawang Sydney FC ng Australia na may 6 na puntos habang ang Sanfreece ang nag-iisang kalahok na may perpekto 12 puntos sa apat na panalo.

Tinalo ng Sanfreece ang Kaya, 3-0, noong Setyembre 19 sa Hiroshima. Kasalukuyang pangalawa din sila sa J League na may 18 panalo, 11 tabla at pitong talo. Sasandal muli ang Kaya sa husay nina Daizo Horikoshi at beterano Robert Lopez Mendy na malaki ang papel sa panalo sa Eastern.

Mamimili si Coach Yu Hoshide kay Walid Birrou o Patrick Deyto para sa mahalagang posisyon ng goalkeeper. Samantala, lumakbay ang Dynamic Herb Cebu para harapin ng Jeonbuk Hyundai ng Timog Korea sa Jeonju.

Mabigat na paborito ang mga Koreano na ulitin ang 6-0 panalo sa Gentle Giants noong Setyembre 19 sa Rizal Memorial. Kasalukuyang numero uno ang Jeonbuk sa Grupo H na may siyam na puntos buhat sa tatlong panalo at isang talo.