Thunder tinusta ang Grizzlies, Jokic ng Nuggets nanambak

ni Anthony E. Servinio @Sports | December 24, 2025

Photo: Nikola Jokic / Denver Nuggets IG

Nagpamalas ng lalim ang World Champion Oklahoma City Thunder sa 119-103 panalo sa Memphis Grizzlies sa NBA kahapon sa Paycom Center. Tinambakan din ng Denver Nuggets ang Utah Jazz, 135-112, upang manatiling malapit sa OKC.

Tinamaan ng pilay o sakit ang maraming manlalaro sa parehong koponan subalit iba pa rin ang kalidad ni MVP Shai Gilgeous-Alexander at nagbagsak ng 31 puntos at 10 rebound habang 24 si Jalen Williams. Ito ang ika-100 sunod na laro ni SGA na may 20 o higit at umakyat ang Thunder sa 26-3.

Tatlong quarter lang kinailangan ang mga bituin at lamang ang Nuggets, 103-83, sa triple-double si Nikola Jokic na 14 at tig-13 rebound at assist. Nanguna sina Jamal Murray na may 27 at Peyton Watson na may 20 at lahat silang tatlo ay umupo na sa huling quarter tungo sa 21-7 at kapantay ang nagpapahingang San Antonio Spurs para pangalawa sa Western Conference.

Pinatibay ng numero uno ng Eastern Conference Detroit Pistons ang kanilang estado sa 110-102 tagumpay sa Portland Trail Blazers na kanilang ika-23 sa 29 laro. Wagi ang Golden State Warriors sa Orlando Magic, 120-97, sa likod ng 26 ni Stephen Curry.

Binura ng Boston Celtics ang 43-61 butas upang manaig sa Indiana Pacers, 103-95. Bumida sina Jaylen Brown na may 31 at Derrick White na may 19.

Patuloy ang pag-ahon ng New Orleans Pelicans mula sa pinakailalim ng West at limang sunod na ang kanilang nang talunin ang Dallas Mavericks, 119-113, sa likod ni Zion Williamson na nagtala ng 24 sa 25 minuto bilang reserba. Nasa ika-13 na ang Pelicans sa 8-22 habang 11-19 ang Mavs.

Kasaysayan ng 'Pinas sa Women's Football - GINTO!

ni Anthony E. Servinio @Sports | December 19, 2025

Photo: Si goalkeeper Olivia McDaniel ang nagsilbing bayani nang masalo nito ang bola ng Vietnam at mapunta sa Filipinas ang gintong medalya ng 2025 SEAG Thailand.  (pocpix) 

Lumikha ng bagong kasaysayan ang Philippine Women's Football Team at tawagin na silang mga kampeon ng 2025 SEA Games. Lumiwanag ang Miyerkules ng gabi nang talunin ng Filipinas ang defending champion Vietnam sa makapigil-hiningang penalty shootout, 6-5, sa Chonburi Stadium.

Walang goal sa takdang 90 at karagdagang 30 minuto kaya kinailangan ang shootout. Ipinasok ng unang limang napiling sina Jael-Marie Guy, Alexa Pino, kapitana Hali Long, Angie Beard at Ariana Markey ang kanilang mga bola subalit natumbasan ito ng mga sumipa sa Vietnam, ang kampeon sa huling apat na SEA Games.

Pumasok sa "sudden death" at bawal magkamali pero sumipa ng malakas si Jackie Sawicki at hindi na ito naabot. Pagkakataon na ni Tran Thi Thu pero nabasa ni Olivia McDaniel na papuntang kanan ang bola at nasalo niya ito na naging hudyat ng selebrasyon ng mga Pinay.

Tinanggap ng Filipinas ang mga ginto kay PFF General Secretary Angelico Mercader. Pagkatapos ng "Lupang Hinirang" ay ginawaran ng uniporme si Long na may numerong 100 dahil ang kampeonato ay ang kanyang ika-100 laro para sa pambansang koponan.

Sinamahan ni Malea Cesar ang kanyang nakakabatang kapatid Naomi Cesar na kinuha ang ginto sa Women's 800M ng Athletics noong isang araw. Magkahalong lungkot at saya ang hatid ni beteranang goalkeeper Inna Palacios sa paghayag ng kanyang pag-retiro.

Asahan ang mabigat na 2026 para sa Filipinas simula sa AFC Women's Asian Cup Australia sa Marso na qualifier para sa FIFA Women's World Cup Brazil 2027. Susunod ang Aichi Nagoya Asian Games sa Setyembre.

Samantala, bigong makauwi ng medalya sa Women's Futsal nang yumuko ang Filipina5 sa host at dating kampeon Thailand, 0-5, sa labanan para sa tanso kahapon sa Bangkokthonburi University. Ang Vietnam at Indonesia ang magtatapat para sa ginto.

3 medalya kinolekta ng SEA Games Marathon

ni Anthony E. Servinio @Sports | December 16, 2025

Photo: Silver medalist sina Artjoy Torregosa at Arlan Arbois sa 33rd SEAGames Thailand marathon. (fbpix)

Kumulekta ang Pilipinas ng tatlong medalya mula sa 2025 SEA Games Marathon Linggo ng gabi sa Happy & Healthy Bike Lane. Pilak sina Arlan Arbois Jr. at Artjoy Torregosa habang tanso si Richard Salano sa gitna ng dobleng ginto ng Indonesia.

Sa halip sa karaniwang umaga sa Pilipinas ay bago lumubog ang araw ginanap ang 42.195 kilometrong karera sa Bangkok. Kampeon si Robi Syianturi sa 2:27:33 at nanatili sa Indonesia ang ginto matapos ni Agus Prayogo noong 2023.

Naglabanan para sa pilak ang mga magkakampi at sa huli nanaig si Arbois sa 2:30:19. Sumunod si Salano sa 2:31:29. Bumida agad si Torregosa sa kanyang unang SEA Games. Subalit wagi muli si 2021 kampeon Odekta Elvina Naibaho sa 2:43:13 kumpara kay Torregosa na 2:48:00 at tanso Bui Thin Thu Ha ng Vietnam na 2:54:40.

Hindi nag-medalya ang pang-apat na atleta Christine Hallasgo. Ginto siya noong 2019, pilak noong 2021 at tanso noong 2023.

Dalawa pa lang ang Athletics ginto ng Pilipinas kay John Cabang sa 110M Hurdles at Hokett delos Santos sa Decathlon. Pilak si Yacine Guermali sa 5,000M at tanso sina Sonny Wagdos sa parehong 5,000M, Leonard Grospe (High Jump), William Morrison III (Shot Put), Zion Rose Nelson (200M), Jeralyn Rodriguez (400M), Susan Ramadan (1,500M), Joida Gagnao (5,000M), Bhianca Espenilla (Javelin) at ang kombinasyon nina Bernalyn Bejoy, Alhryan Labita, Alfred Talplacido at Angel Watson sa 4X400M Mixed Relay.