Pagtugon sa malinis na hangin target ng TPSK Air Run 2026

ni Anthony Servinio @Sports | August 18, 2026

Photo: Ang masayang paglulunsad ng TPSK Air Run na magiging makulay ang event sa Setyembre 20, 2026 sa Quirino Grandstand kung saan opisyal na media partner ang BULGAR. (GFpix)

Aabangan ang pinakamakulay na fun run ng taon sa ika-apat na yugto seryeng Takbo Para Sa Kalikasan 2026 - Air Run - ngayong Setyembre 20 sa Quirino Grandstand.

Muling magtitipon ang komunidad ng mananakbo sa pagpapakita ng kanilang pagmamahal sa Inang Kalikasan lalo na ang laban para sa malinis na hangin. Tampok ngayon ang 21.1 kilometro o Half-Marathon. May mga karera pa rin sa 10 at limang kilometro.

Sa nais maghain ng panibagong hamon na maiba sa mga nakaraang taon, ang Air Run ay isa nang Color Run kung saan magsasaboy ng mga makulay na pulbos sa buong ruta.

Walang dapat isipin at ang mga pulbos ay ligtas at maaaring kainin. Bilang dagdag, maliban sa kinagawiang medalya na gawa sa kahoy at t-shirt ay tatanggap din ang lahat ng espesyal na medyas at sunglass.

Kasalukuyang ginaganap ang pagpapalista online at sa mga piling sangay ng Chris Sports. Sinasabayan ang salita ng kongkretong gawa ng tagapangasiwa ng patakbo na Green Media Events na sina Mr and Mrs. Jenny at Ernie Lumba.

Makikita ng mga tumakbo ang mga proyektong pinondohan ng kanilang pagsali. Matapos ang Air Run ay tutuldukan ang taon ng Earth Run sa Nobyembre 15 sa parehong lugar. Ang BULGAR ang opisyal na media partner ng TPSK 2026.

Strong Group binawian ang Chinese-Taipei sa Jones Cup

ni Anthony Servinio @Sports | August 17, 2026

Photo: Ang maaksiyong bakbakan ng SGA laban sa Taiwan. (SGApix)

Laro ngayong Martes - Xinzhuang 3:00 PM SGA vs. Japan

Umarangkada sa ikalawang sunod na panalo ang defending champion Strong Group Athletics laban sa host Chinese-Taipei Blue, 97-78, sa pagpapatuloy ng ika-45 William Jones Cup sa Xinzhuang Gym.

Subalit maituturing na bitin ang resulta. Nagtulungan sa pagbuhat ng koponan sina Isaiah Pineiro at Tajuan Agee na parehong may 19 puntos. Humugot din ng malaking tulong kay DJ Fenner na may 15 at gumana sa wakas ang laro nina Boban Marjanovic na may 14 at 10 rebound at Remy Martin na may 13.

Nanguna sa host si Kuo Chun-Yen na may 14. Nag-ambag sina Chou Kuei-Yu at Jonah Morrison ng tig-12. Umangat sa 2-1 ang Filipino club at bumaba sa 1-2 ang Taiwanese.

Ayon sa nakakagulat na patakaran ng torneo, kahit anong mangyari ay tutuloy ang Taiwan sa semifinals kaya alanganin ang SGA pangalawa sa lang sila sa walang-talo Wonju DB Promy ng Timog Korea (3-0) sa Grupo A.

Magpapahinga ang torneo sa Lunes at magbabalik para sa pangalawang yugto ng elimination sa Martes kung saan haharapin muli ng SGA ang kulelat Japan (0-3) na dinaig nila noong Sabado, 78-72. Sa Grupo B, malinis pa rin sa 3-0 ang University of California-Irvine.

Pangalawa ang Chinese-Taipei White (2-1) at sinusundan ng Malaysia (1-2) at Jordan (0-3).

Australia sinampolan agad ang Gilas sa FIBA U18 Asia Cup

ni Anthony Servinio @Sports | August 15, 2026

Photo: Gilas Boys (photo by: PilipinasSportsBar)

Laro sa Lunes - Savarkar Stadium 4 PM Pilipinas vs. Thailand

Masyadong malakas at matangkad ang defending champion Australia at giniba ang Gilas Pilipinas, 107-69, sa pagpapatuloy ng FIBA U18 Asia Cup India 2026 kahapon sa Veer Savarkar Indoor Stadium, Ahmedabad.

Pumantay ang mga Pinoy sa 1-1 sa Grupo A matapos ang 89-88 pagtakas sa Chinese-Taipei noong Huwebes. Bumira ng tres si JB Cagurungan at sinundan ng agaw at buslo ni Bruce Tubongbanua para sa 7-5 bentahe. Iyan na ang huling banat ng Gilas at mula sa 12-12 tabla ay humataw ang Emus para kunin ang unang quarter, 24-19.

Saglit nakalapit ang Pilipinas sa mga shoot nina Andrew Chio at Sizco Roquid sa simula ng pangalawa quarter, 23-26. Sinagot ito ng 13 walang-sagot na puntos ng Australia para tuluyang lumayo, 39-23. Nagtala ng George Green ng 12 at sinundan ni Luke Atacador na may 10.

Walang ibang Pinoy ang naka-10 at umabot ang agwat sa 107-65 pagsapit ng huling minuto bago ito binawasan nina Green at Atacador. Namuno sa balanseng atake ng Emus sina 7'0" Yahya Basara at 6'5" John Aryang na may 16.

Sumunod sina Antonio Browne at Jai Fa'ale na parehong 13 at tatlo pang kakampi na may 11 o higit. Susunod para sa Gilas ang Thailand sa Lunes, ang huling araw ng group stage.

Tinalo na nila ang mga Thai sa SEABA Qualifier noong Hunyo subalit may mga pagbabago sa listahan ang parehong bansa. Ang play-in ay nakatakda sa Agosto 20. Sunod-sunod ang quarterfinals, semifinals hanggang finals sa 23.