Gilas vs. NZ sa FIBA q'fiers, Sotto at Malonzo out

ni Anthony E. Servinio @Sports | February 26, 2026

Photo: Inaasahang solido ang laro nina Kevin Quiambao, Justin Brownlee, Carl Tamayo at Justine Baltazar laban sa matatangkad na Tall Blacks.

Haharap ng higanteng hamon ang Gilas Pilipinas sa pagbisita ng Aotearoa New Zealand ngayong Huwebes sa pagpapatuloy ng FIBA World Cup Qatar 2027 Asian Qualifiers sa MOA Arena. Nais ng mga Pinoy na manatiling perpekto matapos walisin ang dalawang laro kontra Guam.

Dinurog ng Gilas ang Guam, 87-46, noong Nobyembre 28 sa Calvo Fieldhouse. Umulit ang mga Pinoy, 95-71 noong Disyembre 1 sa Blue Eagle Gym ng Ateneo de Manila.

Halos kumpleto ang Gilas at nakasalalay kay June Mar Fajardo, Quentin Millora-Brown, Carl Tamayo, AJ Edu at Justin Brownlee na tapatan ang mga matatangkad ng Tall Blacks. Babalik din sina Scottie Thompson, Dwight Ramos, CJay Perez, RJ Abarrientos, Kevin Quiambao at Chris Newsome.

Kasama sa mga kandidato sina Calvin Oftana, Justine Baltazar, Juan Gomez de Liano at Troy Rosario. Ihahayag pa ni Coach Cone ang huling 12.

Hindi makakalaro ngayon dahil sa iba't ibang dahilan sina Kai Sotto at Jamie Malonzo. Nag-retiro din sa Gilas si Japeth Aguilar matapos ang pangalawang laban sa Guam.

Tinalo ng Australia ang Tall Blacks ng dalawang beses upang maging 2-0 din sa taas ng Grupo A kasama ang Gilas. Nanalo ang Boomers sa harap ng mga kababayan sa Hobart, 84-79 at lumakbay patungong Wellington para sa manaig muli, 79-77.

Kung buo ang Gilas, nagpatupad ng ilang pagbabago ang Tall Blacks at tanging sina Taylor Britt, Sam Mennenga, Taine Murray, Carlin Davison at Yanni Wetzell ang magbabalik sa koponan. 

Ang idinagdag ay sina Jordan Ngatai, Tohi Smith-Milner, Max Darling, Keanu Rasmussen, Tyrell Harrison, Alex McNaught at Reuben Te Rangi. Nakatakdang dumating ang Boomers para sa susunod na laro ng Pilipinas sa Marso 1 sa MOA pa rin. Bago noon ay haharapin ng China ang Chinese-Taipei matapos iutos ng FIBA na ilipat ang laro sa Pilipinas.

Green bumida sa Suns, 40 na panalo ng Spurs

ni Anthony E. Servinio @Sports | February 23, 2026

Photo: Phoenix Suns

Ipinanalo ni kabayan Jalen Green ang Phoenix Suns laban sa bisitang Orlando Magic sa dobleng overtime, 113-110 sa NBA kahapon sa Mortgage Matchup Center. Umabot na sa ika-40 panalo ang San Antonio Spurs kontra Sacramento Kings, 139-122.

Tumanggap si Green ng pasa at tumira ng 3-points sabay ng huling busina. Hindi siya makapaniwala dahil ayon sa kanya, ito ang unang pagkakataon na nagawa niya ang nagpapanalong tira.

Nagtapos ang produkto ng taunang NBTC na may 16 puntos, 7 rebound at 5 assist. Nanguna si reserba Grayson Allen na may 27 at Collin Gillespie na may 19.

Walong sunod na ang panalo ng Spurs at sila na ang pangatlong koponan at pangalawa sa Western Conference na may 40 tagumpay. Halimaw pa rin si Victor Wembanyama sa kanyang 28 at 15 rebound habang tig-18 sina De'Aaron Fox, Stephon Castle at reserba Keldon Johnson.

Tumibay muli ang kapit ng Detroit Pistons sa taas ng Eastern Conference matapos manaig sa Chicago Bulls, 126-110. Double-double sina Jalen Duren na 26 at 13 rebound at Cade Cunningham na 18 at 13 assist.

Kinailangan ang mga free throw nina OG Anunoby at Landry Shamet sa huling mga segundo para mapreserba ang 108-106 panalo ng New York Knicks sa Houston Rockets. Nagtala ng 25 si Karl-Anthony Towns at sumuporta sina Jalen Brunson at Anunoby na parehong may 20.

Sa ibang mga laro, wagi ang Miami Heat sa Memphis Grizzlies, 136-120. Dinaig ng New Orleans Pelicans ang Philadelphia 76ers, 126-111.

Lillard at Johnson champs sa All Star 3-points at slam dunk

ni Anthony E. Servinio @Sports | February 16, 2026

Photo: Damian Lillard at Keshad Johnson - Portland Trail Blazers - Miami Heat

Isama na si Damian Lillard ng Portland Trail Blazers sa hanay ng mga may tatlong kampeonato sa 3-Point Contest sa 2026 NBA All-Star Weekend Los Angeles kahapon sa Intuit Dome.  Ito na rin ang unang tapak niya sa korte ngayong taon matapos mapilay sa 2025 Playoffs.

Sa finals, unang tumira si rookie Kon Knueppel ng Charlotte Hornets at nagtala ng 17 pero hinigitan ito ng 29 ni Lillard. May pagkakataon ang huling kalahok at 2018 kampeon Devin Booker at nagbanta sa 27 subalit biglang minintis ang huling tatlong bola.

Sinundan ni Lillard ang  mga kampeonato noong 2023 at 2024. Ang iba pang naka-tatlo ay sina Larry Bird (1986-88) at Craig Hodges (1990-92).

Numero uno sa elimination si Booker na may 30 at parehong 27 sina Lillard at Knueppel. Ang iba pang kalahok ay sina Donovan Mitchell (24), Norman Powell (23), Jamal Murray (18), Tyrese Maxey (17) at Bobby Portis (15).

Kampeon sa Slam Dunk si Keshad Johnson ng Miami Heat. Masasabing inabot sa kanya ang titulo ni Carter Bryant ng San Antonio Spurs na lamang sa mga hurado subalit nagmintis ang kanyang komplikadong huling dunk sa halip ng mas simpleng tira.

Nanaig ang Team Knicks nina Jalen Brunson, Karl-Anthony Towns at alamat Allan Houston sa Shooting Stars laban sa Team Cameron na sina Knueppel, Jalen Johnson at Corey Magette, 47-38.  Sa elimination, numero uno ang Knicks 31 kasunod ang Cameron na 24 at hindi nakausad na parehong may 18 ang Team All-Star nina Chet Holmgren, Scottie Barnes at Richard Hamilton at Team Harper ni Ron Harper Sr. at kanyang mga anak Dylan at Ron Jr. na ang nanay Maria ay tubong Bataan.

Makikita ngayong Lunes kung mahuhuli ang panlasa ng mga tagahanga sa bagong USA vs. World sa All-Star Game. Magbabakbakan ang Team USA Stars, Team USA Stripes at Team World sa bagong patakaran na puntiryang ibalik ang sigla sa taunang laro.