Strong Group no. 1 na sa Dubai Int'l C'ships

ni Anthony E. Servinio @Sports | Feb. 1, 2025

Photo: Malaking bagay ang nagagawa ni Rhenz Abando para sa Strong Group-Philippines kung saan ang 6-foot-2 forward ay isa sa leading local scorers sa impresibong 9.0 points kada laro sa 34th Dubai International Championship sa Al Nasr Club kung saan pasok na sa semis ang SGA. (sgapix)

Winalis ng Strong Group Athletics ang Amman United ng Jordan, 84-75, para sa kanilang pang-apat na panalo at matanghal na numero uno sa huling araw ng group stage ng 34th Dubai International Championship sa Al Nasr Club.

Kabaligtaran para sa Zamboanga Valientes na uuwing kulelat at walang tagumpay matapos yumuko sa pambansang koponan ng Tunisia, 59-95.

Nagpaulan ng tres ang SGA sa umpisa upang lumayo agad, 16-4, hanggang itakda ang halftime sa 42-34 sa mainit na kamay nina Malachi Richardson at Chris McCullough.

Naka-shoot muli si McCullough at isinalpak ni Rhenz Abando ang dunk para sa pinakamalaking lamang sa simula ng huling quarter, 70-53.

Hindi sumuko ang Amman at lumapit, 69-75. May baon pang lakas si Richardson na ipinasok ang limang paniguradong puntos at humabol ng isa pang buslo si Jason Brickman, 82-73, at isang minuto ang nalalabi.

Nagtapos si Richardson na may 24 puntos buhat sa anim na 3-points habang may 19 si McCullough bilang reserba. Haharapin ng SGA (4-0) sa quarterfinals sa Biyernes ang Sharjah (1-3) na pang-apat sa Grupo B. Kung magwawagi ang SGA ay nag-aabang ang magwawagi sa pagitan ng Tunisia (3-1) at Amman (1-3) sa semifinals sa Sabado.

Ang iba pang quarterfinals ay Al Ahli Tripoli ng Libya (4-0) laban sa pambansang koponan ng United Arab Emirates (1-3).

Kumakapit sa maliit na pag-asang makasingit sa quarterfinals, kinuha ng Valientes ang 7-4 lamang pero iyan ng hudyat para magbuhos ng 13 puntos ang Tunisia, 17-7, at tuloy-tuloy ang tambakan. Ang Tunisia ay ika-36 sa FIBA Ranking kumpara sa Gilas Pilipinas na ika-34.

Nanguna sa Zamboanga si Sam Deguara na may 16 at sina Nic Cabanero na may 14 at Prince Caperal na may 13.

Towns, Lebron at Davis ganado sa pagpapasikat

ni Anthony E. Servinio @Sports | Jan. 23, 2025

Photo: Hindi maawat ang init ng mga kamay ni Anthony Davis ng Los Angeles Lakers nang tambakan ang kulelat na Washington Wizards sa NBA game kahapon. (docsports) 

Naitakas ng bisitang New York Knicks ang 99-95 panalo sa kapitbahay na Brooklyn Nets sa simula ng NBA Rivals Week kahapon sa Barclays Center. Magtatakda ang liga ng mga piling laro ngayong linggo na puno ng kasaysayan na aabangan ng mga tagahanga. 

Kumakapit ang Nets sa 90-89 lamang bago bumira ng dalawang magkasunod na buslo si Jalen Brunson para maagaw ang bentahe sa huling 2 minuto 93-90. Ipinasok ni Keon Johnson ang dalawang free throw pero nariyan muli sina Brunson at OG Anunoby para ihatid ang mga pandiin na puntos, 97-92 at isang minuto sa orasan. 

Nagtapos na may walo ng kanyang 17 puntos sa huling quarter si Brunson na tinuldukan ng dalawang paniguradong free throw na may 7 segundong nalalabi.  Nanguna sa Knicks si Karl-Anthony Towns na may 25 at 16 rebound at Anunoby na may 20. 

Ilan sa mga malaking salpukan ay ang pagkikita muli ng World Champion Boston Celtics at Los Angeles Lakers sa Biyernes. Matapos nito ay dadalaw ang Celtics sa tinalo para sa kampeonato Dallas Mavericks sa Linggo. 

Naghanda ang Lakers para sa Celtics sa 111-88 nang tambakan ang kulelat na Washington Wizards. Triple-double si LeBron James sa 21, 10 rebounds at 13 assists.  Nanguna si Anthony Davis na may 29 at 16 rebounds at umakyat ang Lakers sa 23-18 habang lagpak sa 6-36 ang Wizards. 

Tagumpay ang Portland Trail Blazers sa Miami Heat, 116-107. Bago ang laro, ginawaran ng USA Basketball ng singsing sina Bam Adebayo at kabayan Coach Erik Spoelstra para sa kanilang gold medal sa Paris 2024 Olympics. 

Samantala, maghaharap sa dalawang opisyal na laro ang Indiana Pacers at San Antonio Spurs sa Accor Arena kung saan ginanap ang Olympics sa Biyernes at Linggo. 

Magkaribal ang mga koponan buhat pa noong panahon nila sa American Basketball Association (ABA) na nagsara noong 1976.  

Harden ng L.A. Clippers bida, laro ng Lakers matamlay pa

ni Anthony E. Servinio @Sports | Jan. 15, 2025

Photo: James Harden - L.A. Clippers / FB

Gumanap ng malaking papel si Jalen Green sa 120-118 panalo ng Houston Rockets sa Memphis Grizzlies sa NBA kahapon sa Toyota Center. Ito ay sa gitna ng pagbabalik ng mga laro ng Los Angeles Lakers at tagumpay ng L.A. Clippers matapos ang malaking sunog sa lungsod sa nakalipas na mga araw na dahilan ng pagliban sa ilang laro. 

Tinumbasan ni Green ang kanyang personal na markang 42 puntos at ang huling buslo ang nagbalik ng lamang sa Rockets, 116-115, at 34 segundo sa orasan. Mula roon ay nagpasok ng tig-dalawang free throw sina Amen Thompson at Fred VanVleet upang makumpleto ang kanilang paghabol mula sa 87-100 maaga sa huling quarter. 

Nagtala ng tig-23 sina Victor Wembanyama, Devin Vassell at rookie Stephon Castle at binigo ng San Antonio Spurs ang Lakers, 126-102, sa Crypto.com Arena. Ang laro ay kasabay ng seremonya ng pagretiro ng Lakers ng numero 21 para kay alamat Michael Cooper na naglaro mula 1978 hanggang 1990 at naging bahagi ng limang kampeonato.

Sa Intuit Dome, humarurot sa pangalawang half ang Clippers upang tambakan ang Miami Heat, 109-98. Double-double sina James Harden na 26 at 11 assist at Ivica Zubac na 21 at 20 rebound habang may 29 puntos si Norman Powell. 

Impresibo si Cade Cunningham sa 36 puntos upang itulak ang bisitang Detroit Pistons sa malaking 124-119 panalo sa New York Knicks. Hindi pinapuntos ng Toronto Raptors ang Golden State Warriors sa huling dalawang minuto at bumuslo sina Chris Boucher at Ochai Agbaji upang maagaw ang 104-101 resulta. 

Lalong ibinaon ng Minnesota Timberwolves ang kulelat na Washington Wizards, 120-106, sa likod ng 41 ni Anthony Edwards. Kung maganda ang laro ni “Antman” ay patuloy naman ang hindi magandang asal kaya pinatawan siya muli ng multang $50,000 (P2.93-milyon) bunga ng  inasta sa mga reperi sa  laro kontra Memphis.