Flores at Diaz overall champ, pangarap ang National Team

ni Anthony E. Servinio @Sports | Feb. 4, 2025

Photo: Ang mga nag-overall champion sa tatlong karera ng 711 simultaneous run ng Muntinlupa, Davao at Cebu na sina Eduard Flores, Edsel Mural, Maricar Camacho sa 42km, Richard Salano at Arlan Arbois ng 32km, 2nd place si Nhea Ann Barcena at Macrose Dichoso sa 32km, kasama sina Ricky Organisa at Dickyias Mendioro sa 21km na ginawaran ng cash prize ang mga kampeon ng P25thou ni Jose C. Ang, 711 Head Gen Merchandise Division. (A. Servinio)

Patuloy ang pag-usbong ng baguhang si Eduard Flores at idagdag na ang Run 7-Eleven 2025 sa kanyang mga karangalan.

Naitala ng tubong General Santos ang pinakamabilis na oras sa Marathon na sabay-sabay ginanap sa mga lungsod ng Muntinlupa, Cebu at Davao simula Sabado ng gabi hanggang madaling araw ng Linggo.

Umoras si Flores ng 2:32:07 upang mabuo ang apat na ikot at 42.195 kilometro sa loob ng Filinvest-Alabang sa Muntinlupa.

Pumangalawa si Edsel Moral (2:34:01) habang pangatlo ang kampeon ng Cebu City na si Jerald Zabala (1:34:44). “Pangarap ko talaga maging bahagi ng pambansang koponan,” wika ni Flores na dating manlalaro ng UP-Diliman sa UAAP Athletics.

Makakatikim si Flores kung paano katawanin ang Pilipinas at ang mga nagwagi ay ipapadala sa isang pandaigdigang karera ngayong taon.

Sa panig ng kababaihan, pinakamabilis si April Rose Diaz na kampeon ng Davao at ang oras niyang 3:17:45.

Ito ay 31 segundo lang ang agwat sa kampeon sa Muntinlupa Maricar Camacho na 3:18:16 habang pangatlo si Rosalyn Tadlas ng Davao (3:18:34). Naging malupit ang palitan ng hakbang at sa huli ay nanaig si Richard Salano (1:47:37) kay Arlan Arbois (1:50:40) sa 32-kilometro sa Muntinlupa.

Pangatlo ang kampeon ng Cebu Jason Padayao (1:52:27) sa rutang nagsimula at nagtapos sa Citi de Mare at tampok ang tulay ng Cebu-Cordova Link Expressway.

Sa Cebu rin tumakbo ang pangkalahatang nagwagi sa kababaihan na si Cherry Andrin (2:21:08).

Sinundan siya ng mga sumalang sa Muntinlupa Nhea Ann Barcena (2:23:23) at Macrose Dichoso (2:24:59).

Reyna ng Half-Marathon o 21.1 kilometro ang pambansang atleta Christine Hallasgo na tinapos ang karera sa SM Davao sa 1:24:23 at malayo sa mga kapwa-kampeon Artjoy Torregosa ng Cebu (1:29:47) at Joida Gagnao ng Muntinlupa (1:31:26). Ang mga wagi sa kalalakihan ay sina Ricky Organisa (1:09:25) at Dickyias Mendioro (1:10:24) ng Muntinlupa at John Mark Dizon (1:12:00) ng Cebu. (A. Servinio)

Doncic at Davis nagpalitan ng team, Jazz may trade din

ni Anthony E. Servinio @Sports | Feb. 3, 2025

Photo: Luka Doncic at Anthony Davis - IG

Niyanig ang buong NBA ng higanteng palitan ng mga superstar kahapon at maglalaro na si Luka Doncic sa Los Angeles Lakers habang Dallas Mavericks na si Anthony Davis.  Kasama sa komplikadong transaksyon ang Utah Jazz na tiyak magbabago ng takbo ng karera sa Western Conference.

Hindi muna mararamdaman ang epekto ng lipatan at parehong nagpapagaling sina Luka Magic at AD. Huling naglaro si Doncic noong Pasko at napilay ang binti habang isang linggo mawawala si Davis matapos masaktan ang kalamnan sa sikmura.

Kahit naglaro lang sa 22 ng 49 laro ng Mavs, nagsumite pa rin si Doncic ng impresibong 28.1 puntos, 8.3 rebound at 7.8 assist. Double-double si Davis na 25.7 puntos at 11.9 rebound sa 42 laro.

Lumalabas na ipapadala ng Lakers si Davis at Max Christie sa Mavs para kay Doncic, Maxi Kleber at Markieff Morris. Lilipat sa Jazz mula Lakers si Jalen Hood-Schifino.

Bago inihayag ang palitan ay tinalo ng bisitang Lakers ang New York Knicks, 128-112.  Nagtala si LeBron James ng 33, 11 rebound at 12 assist at tanging siya at ang alamat na si Karl Malone ang mga may triple-double sa edad 40 pataas.

Uminit si Gilas Pilipinas Jordan Clarkson para sa 14 ng kanyang 16 sa huling quarter kasama ang apat na tres at wagi ang Jazz sa Orlando Magic, 113-99. Nagwakas rin ang walong sunod na talo ng Utah at umangat sa 11-36 subalit huli pa rin sa West.

Tunay na araw ng mga dehado at tinapos ng Washington Wizards ang 16 sunod na talo at wagi sa Minnesota Timberwolves, 105-103, at unang panalo mula Enero 1. Nanguna sa Wiz si Kyle Kuzma na may 31.

Numero uno pa rin sa West ang Oklahoma City Thunder na nanaig sa Sacramento Kings, 144-110. Gumawa ng 41 at 14 rebound si Aaron Wiggins. 

Hallasgo at Salano mga bibida sa Muntinlupa, Cebu, Davao Races

ni Anthony E. Servinio @Sports | Feb. 1, 2025

Photo: Salano at Hallasgo

Sabay-sabay mapupuno ang mga kalsada ng Muntinlupa, Cebu at Davao sa paglarga ng Run 7-Eleven 2025 ngayong Sabado at Linggo.

Ito na ang pagbabalik ng isa sa pinaka-inaabangang karera na tumatak na sa puso at isip ng mananakbong Filipino. Kabilang sa inaasahang libo-libong mga kalahok ay ilang mga kampeon at matunog na pangalan sa larangan ng takbuhan.

Pinangungunahan ito ng mga pambansang atleta Richard Salano na tatakbo sa Muntinlupa at Christine Hallasgo na lalahok sa Davao.

Inaabisuhan ang mga motorista na iwasan ang mga dadaanan ng karera na Filinvest-Alabang sa Muntinlupa, Citi de Mare sa Cebu at SM Davao Ecoland. Isasara ang mga kalsada sa Sabado bago umalis ang unang karera na Marathon o 42.195 kilometro sa 11:00 ng gabi.

Maliban sa Marathon ay may karera sa 32, 21, 10, lima at talong kilometro. Magkakaroon ng bagong kategorya na 711 metro para sa mga kabataan edad pito hanggang 11 taon.

Bibigyan din ng hiwalay na parangal ang mga Master Athlete o mga edad 60 pataas. Ito ay isa sa mga adbokasiya ng karera na kilalanin ang pagiging matibay ng mga ito sa paglipas ng panahon.

Mahalaga na mabatid na ang tatlong karera sa tatlong lungsod ay sabay-sabay aalis. Magkakaroon ng pangkalahatang kampeon ayon sa mga pinagsamang mga oras. Ang mga kampeon ay ipapadala para katawanin ang Pilipinas sa pandaigdigang takbuhan.

Sa mga nakaraang taon ay nagpadala ng mga atleta sa Vietnam at Thailand. Subalit sa huli ay ang karera ay selebrasyon ng pagtakbo. Aabangan ang pagbuhos ng mga regalo mula sa mga sponsor na naging tatak ng Run 7-Eleven sa nakaraang dekada.