Paniwala ni Herbosa.. COVID-19 sa ‘Pinas, nakontrol na

ni Lolet Abania | November 24, 2021

Naniniwala ang isang opisyal ng National Task Force Against COVID-19 na maaari nang i-label ang bansa sa ngayon na nakokontrol na ang coronavirus.

Sa Laging Handa briefing ngayong Miyerkules, nasabi ito ni NTF medical adviser Dr. Ted Herbosa dahil ang Pilipinas ay nakapag-record na ng positivity rate ng tinatayang mas mababa sa 5% sa loob ng halos dalawang linggo.

“I think medyo magdadalawang linggo na ata tayong below 5%. So, I think we can be labeled as controlled kasi walang masyadong new cases ng COVID,” paliwanag ni Herbosa.

Nitong Martes, nakapagtala ang bansa ng positivity rate ng 2.3%, kung saan nakamit ang tinatawag na benchmark ng World Health Organization (WHO) na 5%, pati na rin ang Center for Disease Control and Prevention (CDCP) na 3%. Nai-report din na may 1,153 bagong impeksyon lamang, kaya umabot na sa kabuuang 2,827,820 ang COVID-19 cases.

Gayunman, giit ni Herbosa na hindi ibig sabihin nito na ang COVID-19 ay eliminated o nawala na sa bansa. “Puwede pa din siya mag-resurge dahil nandoon pa rin sa test positivity rate na above 0. Pag nag-zero ‘yan ‘yun ang eliminated,” sabi pa ni Herbosa.