Rider, tinodas ng riding-in-tandem

@Balitang Probinsiya | March 7, 2021

KIDAPAWAN CITY—Patay ang isang rider nang barilin ng riding-in-tandem kamakalawa sa national highway ng Bgy. Sudapin.

Ang biktimang nagtamo ng mga tama ng bala sa katawan ay kinilala ng pulisya na si Jamil Alinog, residente sa naturang barangay.

Ayon sa ulat, nakasakay sa kanyang motorsiklo si Alinog nang dinikitan ito ng dalawang hindi kilalang lalaki na nakasakay din sa motorsiklo at agad pinagbabaril ang biktima.

Mabilis na tumakas ang mga suspek matapos tiyaking patay na ang biktima.

Patuloy pa ang imbestigasyon ng pulisya para mabatid ang motibo ng mga suspek sa pamamaslang kay Alinog.