Metro Manila Mayors, ‘nganga’ sa pagbabahay-bahay ng mga kubrador para magpataya?!

ni Pablo Hernandez III - @Prangkahan | January 18, 2022

ANO ANG DAHILAN AT ‘NGANGA’ LANG ANG METRO MANILA MAYORS SA PAGBABAHAY-BAHAY NG MGA KUBRADOR PARA MAGPATAYA NG STL-CON JUETENG?–Pinakamaraming kubrador ng STL-con jueteng na nagbabahay-bahay ay sa mga lugar nina Mayor Isko Moreno, Taguig City Lino Cayetano, Muntinlupa City Mayor Jaime Fresnedi, Parañaque City Mayor Edwin Olivares, Las Piñas City Imelda Aguilar, Makati City Mayor Abby Binay, Pasay City Mayor Emmy Calixto-Rubiano, Pateros Mayor Ike Ponce, Caloocan City Mayor Oscar “Oca” Malapitan at Navotas City Mayor Toby Tiangco.

Ang nakapagtataka, sa dami ng tinatamaan ng virus ngayon, “nganga” lang ang mga alkaldeng ito sa mga kubrador ng STL-con jueteng na nagbabahay-bahay para magpataya ng sugal sa kanilang mga nasasakupan, mga buwisit!

◘◘◘

BUKOD SA STL-CON JUETENG, DAMING KUBRADOR DIN NG BOOKIES NINA “BOY ABANG”, “LORNA” AT “LANDO SIMBULAN” SA LUGAR NI PRESIDENTIAL CANDIDATE YORME ISKO–Bukod sa mga kubrador ng STL-con jueteng, sangkaterba rin ang mga kubrador ng bookies nina “Boy Abang”, “Lorna” at “Lando Simbulan” sa Maynila.

Sa dami ng mga kubrador ng mga pasugalan sa Maynila na nagbabahay-bahay para magpataya ng STL-con jueteng at bookies, hindi na dapat pang i-memorize kung bakit maraming tinatamaan ng virus sa lugar ni presidential candidate, Yorme Isko, boom!