Korean Actress na si Oh In Hye, 36, pumanaw na

ni Thea Janica Teh | September 15, 2020

Pumanaw na ngayong Martes, Setyembre 15, ang Korean actress na si Oh In Hye, ayon sa Allkpop.

Sa inilabas na report ng Dispatch, isang K-pop culture website, sinabing nakitaan ito na makare-recover dahil bumalik ang paghinga at pulse rate ngunit hindi na ito nagising.

Naglabas na rin ang Soompi tungkol sa burol ng aktres sa Inha University Hospital.

Anila, “The late Oh In Hye’s funeral visitation has been arranged at our hospital.”

Sa imbestigasyon ng Incheon Yeonsu Police Station at Incheon Songdo Fire Station, naabutan ng mga ito ang 36-anyos na aktres bandang alas-5 ng umaga na inaatake sa puso sa bahay nito sa Songdo International Business District sa Incheon.

Ayon pa sa isang kaibigan ng aktres, tumawag na ito sa pulis dahil hindi umano sila sinasagot ni Oh In Hye.

Sa ngayon ay wala pang inilalabas na iba pang detalye ngunit, may mga lumalabas na espekulasyon na nag-suicide ang aktres.

Nakilala si Oh In Hye sa mga palabas tulad ng The Plan, Wish Taxi, No Breathing at marami pang iba.