Diamond, babala ng gulo

ni Estrellia de Luna - @Panaginip gabay ng buhay | January 16, 2022

Analisahin natin ang panaginip na ipinadala ni Loida ng Zambales.

Dear Maestra,

Matagal ko nang gustong magpaanalisa sa inyo ng mga panaginip ko, kaya lang, masyado akong naging busy noong mga nakaraang araw. Buti na lang, medyo gumaan-gaan na ang trabaho ko ngayon.

Madalas akong managinip ng diamond. Napanaginipan ko last Sunday na may natagpuan akong mga batong hiyas na parang diamond sa likod-bahay namin na katabi ng puno ng mangga. Kagabi naman, napanaginipan ko na binigyan ako ng diamond ring ng dyowa ko.

Ano kaya ang ibig ipahiwatig ng panaginip ko?

Naghihintay,

Loida

Sa iyo, Loida,

Hindi maganda ang ipinahihiwatig ng panaginip mo na may natagpuan kang diamond sa likod-bahay n’yo dahil ito ay nagbababala na may paparating na gulo sa buhay mo kaya dapat kang mag-ingat.

Tungkol naman sa dyowa mo na ang sabi mo ay binigyan ka ng diamond ring, ito ay nangangahulugan na may taong nag-iisip ng hindi maganda laban sa iyo, pero hindi siya magtatagumpay dahil kahit ano’ng gawin niya, suswertehin ka sa dyowa mo. Gayundin, may paparating na mga suwerte at pagpapala sa buhay mo.

Matapat na sumasaiyo,

Maestra Estrellia De Luna