9,296 bagong kaso ng COVID-19

ni Lolet Abania | March 30, 2021

Umabot na sa kabuuang 741,181 ang kaso ng COVID-19 sa bansa matapos na makapagtala ngayong Martes ang Department of Health (DOH) ng 9,296 bagong kaso ng na-infect ng virus.

Ito na ang ikalimang sunod na araw na nakapagtala ng mahigit sa 9,000 bagong kaso ng coronavirus.

Ayon sa DOH, pumalo naman ang bilang ng active cases sa bansa ng 124,680, pinakamataas na nai-record ngayong taon.

Sa nasabing bilang, 96% dito ay nakararanas ng mild symptoms, 2.3% ay asymptomatic habang 0.7% ay severe at 0.6% ay nasa critical condition.

Pumalo naman ang kabuuang bilang ng mga nakarekober sa 603,310 matapos na 103 ang bagong gumaling mula sa virus.

Mayroon namang 5 bagong nasawi kaya umakyat na sa 13,191 ang kabuuang bilang ng mga namatay dahil sa COVID-19.