Arbilon, naka-bronze sa World Laser All Stars

ni VA - @Sports | September 13, 2020

Nagwagi ng bronze medal si Princess Honey Arbilon matapos igupo si Maryia Gnedtchik ng Belarus, 4-1,sa championship round ng Union Internationale de Pentathlon Moderne World Laser All Stars noong nakaraang Huwebes.

Natalo ang 18-anyos na tubong Ormoc City kay Darcy Dryden ng Great Britain, 2-4, sa semifinals ng under-22 online tournament kaya nakaduwelo nito si Gnedtchik.

Si Silvia Ventura ng Mexico na tumalo kay Gnedtchik sa semis ang nagwagi ng titulo matapos gapiin si Dryden, 4-2, sa race-to-four finale kung saan may limang target kada match.

“We’re slowly honing her to develop the way she makes quick and precise decisions,’’ani Philippine Modern Pentathlon Association president Richard Gomez.

Umusad si Arbilon sa medal rounds makaraang igupo si Nouran Beheiry ng Egypt sa quarterfinals ng world shoot fest kung saan nagtipon ang mga pinakamahuhusay na pentathletes mula sa 33 mga bansa mula sa limang kontinente.

Kabilang si Arbilon sa mga pentathletes na nasa pangangalaga ni Gomez sa Ormoc City.

Nagwagi ang koponan ng dalawang gold medals, isang silver at 2 bronzes noong nakaraang 2019 SEA Games.