9 sabungero, arestado sa tupada

@Balitang Probinsiya | January 20, 2021

PAMPANGA—Siyam na sabungero ang inaresto ng pulisya nang mahuli sa aktong nagtutupada kamakalawa sa Bgy. Dau, Mabalacat City.

Nakilala ang mga suspek na sina Randy Cunanan, Nesto Rodriguez, Fidel Nuqui, Ronel de Dios, Danilo Alfaro, Melhor Dulay, Arnes Abalos, Jorge Montilla, at Reynaldo Monticillo, pawang nakatira sa nabanggit na lungsod.

Ayon sa ulat, may nag-tip sa pulisya na may kalalakihan nagtutupada sa nasabing barangay kaya agad nagsagawa ng pagsalakay ang mga awtoridad at dinakip ang mga suspek.

Nakakumpiska ang mga awtoridad ng mga manok na panabong, cash at mga tari sa pag-iingat ng mga suspek.

Nakapiit na ang mga suspek na pawang nahaharap sa kasong paglabag sa RA 1602 o illegal gambling.