Dear Doc. Shane,
Bago mag-lockdown ay nagkaroon ako ng problema sa mga mata. Ayon sa aking doktor, ito ay tinatawag na blepharitis. Binigyan niya ako ng eye drop pero lately ay parang muli itong bumabalik at natatakot akong bumisita sa ospital para magpagamot. May iba pa bang paraan kung pano ito magagamot? – Grace
Sagot
Ang blepharitis ay ang pamamaga ng mga talukap ng mata. Nagkakaroon ng pamamaga kapag ang mga oil gland ng talukap ay nairita o nabarahan ng dumi o anuman.
Mga sanhi:
Pagdami ng bakterya sa mga mata
Viral infection
Pamamahay ng parasitiko sa mga mata
Hormone imbalance
Alerhiya o allergy
Seborrheic dermatitis
Mga sintomas:
Pamamaga, pangangati at pamumula ng talukap ng mga mata
Mahapding pakiramdam sa mga mata
Pagtutubig o pagluluha ng mga mata
Pakiramdam na tila may nakabara sa ilalim ng mga talukap
Paglalangib ng mga pilikmata
Panunuyo ng mga mata
Madaling pagkasilaw
Panlalabo ng paningin
Upang maiwasan ang pagkakaroon ng blepharitis, iminumungkahing gawin ang mga sumusunod na pag-iingat:
Panatilihing malinis ang mukha. Upang matanggal ang anumang mikrobyo na kumapit sa mukha, hugasan ito lalo na bago matulog. Tanggalin at hugasan ng tubig at sabon ang anumang makeup sa mukha nang sa gayon ay hindi mairita ang mga mata.
Iwasang matuyo ang mga mata. Upang hindi manuyo ang mga ito, patakan ang mga mata ng mga eye drop.
Kumain ng mga pagkaing mayaman sa Omega-3. Ang mga pagkaing mayaman sa Omega-3 ay nakatutulong upang maiwasan ang anumang pamamaga ng katawan. Makukuha ang omega-3 sa pagkain ng mga isda tulad ng salmon, tuna, sardinas at iba pang pagkaing-dagat.