Nagpositibo sa Coronavirus Disease 2019 ang dalawang benepisyaryo ng Balik Probinsiya program ng pamahalaan na nakabalik ng Leyte noong nakaaraang linggo.
Ayon kay Department of Health Region 8 (Eastern Visayas) Director Minerva Molon, isang 26-anyos na lalaki at 28-anyos na lalaki ang positibo sa virus at pawang asymptomatic o walang sintomas.
Noong gabi ng Mayo 21 nang makarating ng bayan ng Palo ang dalawang lalaki na kasama ng 112 beneficiaries ng Balik Probinsiya mula sa Metro Manila. Agad na kinunan ng swab samples ang mga "returnee".
Ang isa sa kanila ay umuwi ng bayan ng Tanauan habang ang isa ay sa Baybay City.
Dahil dito, irerekomenda ni Molon na marepaso ang protocols ng pagpapauwi sa mga probinsiya mula sa Metro Manila.
"We already sent reports on the lapses of the program. We also have to look into the readiness of the community to accept returning residents," ani Molon.
Sa Eastern Visayas region, inaasahan na aabot sa 4,000 residente ang uuwi mula sa National Capital Region sa mga susunod na linggo.
Sinabi rin ni Leyte provincial health officer Lesmes Lumen na ang ibang returnees ay nagpahayag sa interview nito na hindi sila nasuri sa COVID-19.
"The Balik Probinsiya program is good because we want people from Leyte to be back but the problem is the process of sending them back. We hope that all beneficiaries will follow the health protocols," ani Lumen.