Inihahanda na ng gobyerno na gawing "mega-quarantine facility" ang Philippine Arena sa Bocaue, Bulacan para sa mga pasyente ng COVID-19.
Sa Laging Handa Press Briefing, pinasalamatan ni Bases Conversion and Development Authority (BCDA) President and CEO Vince Dizon ang Iglesia Ni Cristo (INC) sa pag-alok na magsilbing quarantine center ang tinaguriang world’s largest indoor arena sa probinsiya ng Bulacan at mga kalapit na lugar.
"Nagpapasalamat tayo sa INC, sa Kapatiran, dahil pumayag na po sila. In-offer po nilang gamitin ang Philippine Arena para mag-serve sa Bulacan at Region 3,” ani Dizon.
Bukod dito, mayroong 12 pasilidad sa Metro Manila na gagamitin bilang temporary isolation sites para sa pasyente ng COVID-19.
Kabilang dito ang Philippine International Convention Center (PICC) Forum Halls, World Trade Center, Rizal Memorial Coliseum, FTI facility sa Taguig City, Quezon Institute, PhilSports Arena sa
Pasig, Filinvest Tent sa Alabang, Duty-Free Philippines sa Parañaque, Amoranto Sports Complex sa Quezon City, Quezon Memorial Circle at ang Veterans Memorial Medical Center.