Sa kauna-unahang pagkakataon matapos ang maraming dekada sa kasaysayan ng Wimbledon, mula sa panahon ng ikalawang digmaang pandaigdig, ikakansela nito ang mga laro dulot ng coronavirus disease (covid-19) pandemic.
Dahil sa patuloy na nararanasang lockdown sa pangkalahatan sa Britanya ay nagdesisyon na munang ipagpaliban ang pagsasagawa ng pinakamatandang Grand Slam event sa loob ng 75 taon.
“It has weighed heavily on our minds that the staging of The Championships has only been interrupted previously by World Wars,” wika ni All England club chairman Ian Hewitt. “[But], following thorough and extensive consideration of all scenarios, we believe that it is a measure of this global crisis that it is ultimately the right decision to cancel this year's Championships, and instead concentrate on how we can use the breadth of Wimbledon's resources to help those in our local communities and beyond.”
Nakatakda sanang ganapin ang mga laro sa grass-courts sa London simula Hunyo 29-Hulyo 12, pero masasaksihan ang mga aksyon sa Hunyo 28-Hulyo 11 sa susunod na taon.
Inanunsyo rin ng ATP at WTA na suspendido pansamantala ang mga laro sa men’s at women’s professional tours hanggang Hulyo 13, dahilan upang tumaas ang bilang ng mga piling tennis tournaments na apektado ng coronavirus disease simula pa noong Marso.
Unang ginanap ang mga laro ng Wimbledon noong 1877, at patuloy na ginaganap taon-taon, bukod lamang ng mga taon mula 1915-1918 dahil sa World War I at 1940-1945 dahil sa World War II. Ang Wimbledon ang unang Grand Slam tournament na napigilan dahil sa covid-19, samantalang ang French Open ay napagpaliban na rin simula huling linggo ng Mayo hanggang huling linggo ng Setyembre.