Inoobliga ng Pamahalaang Lungsod ng Pasay ang 201 kapitan ng barangay na maglagay ng 24/7 COVID-19 hotlines sa kanilang lugar.
Layunin nito na mapadali ang komunikasyon sa mga residente na may concern habang sila ay naka-quarantine.
Ayon kay Pasay City Mayor Emi Calixto-Rubiano, sa pamamagitan ng barangay hotline system ay mababawasan ang paglabas-labas ng mga residente sa kanilang bahay para maiwasan na mahawa o magkaroon ng virus.
Kabilang sa iniiwasan ay ang pagkukumpulan sa barangay hall para magtanong ng schedule ng delivery ng food packs, pagpapalista ng beneficiaries at ang pagtatanong ng schedule ng disinfection sa kanilang lugar.
Pagdidiin ng alkalde, kahit tig-iisang barangay COVID hotline ay makatutulong na para maiwasan ang paglabas ng mga constituents sa lungsod.