Dear Doc. Shane,
Dalawang araw nang nagtatae ang 3-anyos kong anak. Hindi ko pa siya napapa-check-up kaya nag-aalala ako na baka ma-dehydrate siya dahil medyo matubig ang kanyang dumi. Ano ba ang dapat kong gawin? - Inday
Sagot
Ang tiyan ng mga bata ay maselan kaya mabilis silang madale ng mga bakterya, virus o mga organismo na nagdudulot ng pagtatae. Ang diarrhea o pagtatae ay normal na bahagi ng paglaki subalit, kailangang alisto ang mga magulang sapagkat may ilang uri ng pagtatae na delikado at kinakailangang maipatingin agad sa doktor o ospital.
Ang mga sumusunod ay mga nakaaalarmang palatandaan ng pagtatae na kailangang ipatingin sa doktor:
Lagpas na ng tatlong araw at hindi pa nawawala
May kasamang dugo ang pagtatae
May kasama na itong pagsusuka
Tila wala itong ganang kumain
Maputla at nanghihina
May mataas na lagnat o lagnat na higit sa isang araw
Hindi nito kaya o wala itong ganang uminom ng tubig
May iba pang kakaibang sintomas
Kung pagtatae lamang ang nararanasan at hindi naman matamlay ang bata, ang pinakamahalagang dapat gawin ay painumin siya ng maraming tubig at iba pang likido upang hindi siya mawalan ng tubig sa katawan o ma-dehydrate. Makatutulong ang pag-inom ng ‘oral rehydration salts’. Ang prinsipyo rito ay kung anumang nawalang tubig sa katawan ay dapat mapalitan ng katumbas na tubig. Ang mineral at zinc ay nakatutulong din, puwedeng painumin ang bata ng multivitamin syrup na may zinc.
Maging maselan sa pagpunas ng puwit ng bata na nagtatae sapagkat puwede itong masugatan kung patuloy ang pagtatae.