Utas ang 54-anyos na lalaki matapos barilin ng pulis Quezon City na kanyang nakaalitan sa gitna ng selebrasyon ng binyagan, kamakalawa ng gabi sa Tondo, Manila.
Dead-on-arrival sa Ospital ng Tondo si Elmer Badua, sanhi ng tama ng bala sa dibdib.
Pinaghahanap na ang suspek na si Police Staff Sergeant Manuel Lopez Asuncion, 34, nakatalaga sa Police Station 1 ng Quezon City Police District.
Sa imbestigasyon ni P/Corporal Allan Lingcong, alas-7:30 kamakalawa ng gabi nang mangyari ang krimen sa harapan ng bahay ng suspek kung saan idinaraos ang inuman kaugnay sa naganap na pagbibinyag sa anak nito.
Sa gitna ng kasiyahan, biglang nagkainitan ang biktima at suspek na nauwi sa bugbugan hanggang sa bumunot ng baril ang suspek at ipinutok sa biktima.