Kahit iilang artista lamang ang dumating sa 37th Luna Awards ng Film Academy of the Philippines (FAP) na idinaos nitong Nobyembre 30, 2019, Sabado ng gabi sa Maybank Performing Arts Theater, BGC, Taguig City, masasabi na ring tagumpay ang awards night.
Karamihan sa mga nanalo ng trophy ay hindi nakarating sa venue para personal na tanggapin ang kanilang parangal.
Nasa Dubai ngayon ang Best Actor na si Daniel Padilla na nagwagi para sa pelikulang The Hows of Us ng Star Cinema. May prior commitment ang aktor sa Dubai, UAE kasama ang GF na si Kathryn Bernardo.
Hindi rin sumipot ang Best Actress winner na si Glaiza de Castro para sa pelikulang Liway. Nauna nang dumalo si Glaiza sa Nominees’ Night noong Nobyembre 20 sa Delgado 112 Restaurant sa Quezon City. Ang kanyang direktor na si Kip Oebanda ang tumanggap ng kanyang trophy.
“She was doing a teleserye that required her to do kickboxing on heels, and do stunts. And so, dumarating siya sa set namin, walang tulog,” kuwento ni Direk Kip.
“Blonde ang buhok niya, kukulayan namin nang isang oras. Pero despite that, naglakad siya sa putik, sa bundok.
“Dumating sa point, by the end of Liway na hindi na siya makapagbigay ng emosyon. Kasi, ubos na ubos na ubos siya sa role. At ginamit namin iyon sa cut. Ganu’n klaseng artista si Glaiza de Castro, and she deserves this,” dagdag pa ni Direk Kip tungkol sa kanyang bida sa movie.
Absent din ang Best Supporting Actor awardee na si Arjo Atayde (Buy Bust).
Si Daria Ramirez naman ng pelikulang Signal Rock ang ibinoto ng kanyang mga co-nominees para sa Best Supporting Actress award.
Kahit iika-ika ay dumating si Direk Chito Roño na nominadong Best Director para sa Signal Rock.
Second to the last ang announcement ng Best Director at hindi niya ‘yun nahintay. Nakaalis na si Direk Chito sa venue nang ihayag ang kanyang pagkapanalo.
Ang tumanggap ng kanyang tropeyo ay si Christian Bables, na gumanap bilang pangunahing karakter na si Intoy sa movie.
Ayon sa katotong Jun Lalin, inihatid kapagkuwan ni Christian kay Direk Chito ang tropeyo sa Manila Peninsula Hotel.
Kung Best Director sa Luna Awards si Chito Roño para sa Signal Rock, napanalunan naman ng pelikulang Goyo: Ang Batang Heneral ang Best Picture na idinirek ni Jerrold Tarog para sa TBA Studios.
Bukod sa Best Director award na napanalunan ng Signal Rock, nakuha rin nila ang Best Supporting Actress for Daria Ramirez.
Tatlo ang awards ng Goyo: Ang Batang Heneral — Best Picture, Best Musical Score (Jerrold Tarog), at Best Sound Design (Albert Michael Idioma at Alex Tomboc).
Tatlo rin ang awards ng Liway — Best Actress (Glaiza de Castro), Best Screenplay (Zig Dulay at Kip Oebanda), at Best Editing (Chuck Gutierrez).
Dalawa rin ang awards ng Gusto Kita with All My Hypothalamus — Best Production Design (Maolen Fadul) at Best Cinematography (Neil Daza).
Tig-isa ng award ang The Hows of Us (Best Actor, Daniel Padilla) at Buy Bust (Best Supporting Actor, Arjo Atayde).
Apat ang pinagkalooban ng special awards — Regal Matriarch Lily Monteverde (Fernando Poe, Jr. Lifetime Achievement Award), Nova Villa (Manuel de Leon Award for Exemplary Achievement), Soxie Topacio at Wenn Deramas (Lamberto Avellana Memorial Award).
Ang host ng programa ay si Jon Santos. Ang director ay si Ice Seguerra.
Magkatuwang sa 37th Luna Awards ang FAP at FDCP (Film Development Council of the Philippines).
Wala sa awards night si Leo Martinez, na director general ng FAP sa loob ng 16 taon. May shooting daw ito out of town at absent din si Vivian Velez, ang bagong Director General ng FAP.